ಡೆಲ್ಲಿ ತಂಡದಲ್ಲಿ ಪೃಥ್ವಿ ಶಾಗೆ ಲಕ್ ಶುರುವಾಯ್ತಾ? ಕೆಕೆಆರ್ ವಿರುದ್ಧ ಎಂಟ್ರಿ ಕೊಡ್ತಾರಾ ಯಂಗ್ ಬ್ಯಾಟರ್?

ಒಂದು ಕಾಲದಲ್ಲಿ ಟೀಮ್ ಇಂಡಿಯಾದ ಭವಿಷ್ಯದ ತಾರೆ, ಡೆಲ್ಲಿ ತಂಡದ ಆಧಾರಸ್ತಂಭ ಎಂದೇ ಕರೆಸಿಕೊಳ್ಳುತ್ತಿದ್ದ ಪೃಥ್ವಿ ಶಾ, ಐಪಿಎಲ್ 2026ರಲ್ಲಿ ಅಕ್ಷರಶಃ ಮರೆಯಾಗಿ ಹೋಗಿದ್ದಾರೆ. ಟೂರ್ನಿ ಅರ್ಧ ಮುಗಿದರೂ ಪೃಥ್ವಿ ಇದುವರೆಗೂ ಒಂದೇ ಒಂದು ಪಂದ್ಯದಲ್ಲಿ ಪ್ಲೇಯಿಂಗ್-11ನಲ್ಲಿ ಕಾಣಿಸಿಕೊಂಡಿಲ್ಲ. ಆದರೆ ಇಂದು ಸಂಜೆ ಕೋಲ್ಕತ್ತಾ ನೈಟ್ ರೈಡರ್ಸ್ (KKR) ವಿರುದ್ಧ ನಡೆಯಲಿರುವ ಪಂದ್ಯದಲ್ಲಿ ಪೃಥ್ವಿ ಶಾ ಅವರಿಗೆ ಅವಕಾಶ ಸಿಗುವ ಸಾಧ್ಯತೆ ದಟ್ಟವಾಗಿದೆ ಎಂದು ವರದಿಯಾಗಿದೆ.

ಬ್ಯಾಟಿಂಗ್ ಬಲಕ್ಕಾಗಿ ಡೆಲ್ಲಿ ಕಸರತ್ತು

ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಸದ್ಯದ ಸ್ಥಿತಿ ನೋಡಿದರೆ ಸ್ವಲ್ಪ ಆತಂಕವಾಗುವುದು ಸಹಜ. ಆಡಿರುವ 10 ಪಂದ್ಯಗಳಲ್ಲಿ ಕೇವಲ 4 ಜಯ ಸಾಧಿಸಿ, 8 ಅಂಕಗಳೊಂದಿಗೆ ಅಂಕಪಟ್ಟಿಯಲ್ಲಿ 7ನೇ ಸ್ಥಾನದಲ್ಲಿದೆ. ಪ್ಲೇಆಫ್ ರೇಸ್‌ನಲ್ಲಿ ಉಳಿಯಬೇಕಾದರೆ ಇನ್ನುಳಿದ ಪ್ರತಿ ಪಂದ್ಯವೂ ಡೆಲ್ಲಿಗೆ ಫೈನಲ್ ಇದ್ದಂತೆ. ಇಂತಹ ಸಮಯದಲ್ಲಿ ತಂಡದ ಬ್ಯಾಟಿಂಗ್ ಲೈನ್‌ಅಪ್‌ಗೆ ಹೆಚ್ಚಿನ ಶಕ್ತಿ ಬೇಕಿದೆ. ಪೃಥ್ವಿ ಶಾ ಅವರಂತಹ ಆಕ್ರಮಣಕಾರಿ ಬ್ಯಾಟರ್ ತಂಡಕ್ಕೆ ಬಂದರೆ ಪವರ್ ಪ್ಲೇನಲ್ಲಿ ರನ್ ಮಳೆ ಹರಿಸಬಹುದು ಎಂಬುದು ಅಭಿಮಾನಿಗಳ ಲೆಕ್ಕಾಚಾರ.

ಪೃಥ್ವಿ ಶಾಗೆ ಸಿಗುತ್ತಾ ಮತ್ತೊಂದು 'ಲೈಫ್'?

ಕಳೆದ ಪಂದ್ಯಗಳಲ್ಲಿ ಡೆಲ್ಲಿ ತಂಡ ಅಭಿಷೇಕ್ ಪೊರೆಲ್‌ಗೆ ಅವಕಾಶ ನೀಡಿತ್ತು. ಆದರೆ ಪೃಥ್ವಿ ಶಾ ಅವರ ಅನುಭವ ಮತ್ತು ವೇಗದ ಬ್ಯಾಟಿಂಗ್ ಶೈಲಿ ಪೊರೆಲ್‌ಗಿಂತ ಉತ್ತಮ ಆಯ್ಕೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಟಿ20 ಕ್ರಿಕೆಟ್‌ಗೆ ಬೇಕಾದ ಅಬ್ಬರದ ಬ್ಯಾಟಿಂಗ್ ಪೃಥ್ವಿ ಅವರಲ್ಲಿದೆ. ಒಂದು ವೇಳೆ ಇವತ್ತು ಅವರಿಗೆ ಅವಕಾಶ ಸಿಕ್ಕರೆ, ಅದು ಅವರ ವೃತ್ತಿಜೀವನಕ್ಕೆ ಸಿಗುವ ಮತ್ತೊಂದು ದೊಡ್ಡ 'ಲೈಫ್' ಎನ್ನಬಹುದು.

ಓಪನಿಂಗ್ ಸ್ಲಾಟ್‌ನಲ್ಲಿ ಜಾಗ ಎಲ್ಲಿದೆ?

ಡೆಲ್ಲಿ ತಂಡದ ಇಂದಿನ ದೊಡ್ಡ ಸಮಸ್ಯೆ ಎಂದರೆ ಆರಂಭಿಕ ಆಟಗಾರರ ಫಾರ್ಮ್. ಕೆ.ಎಲ್. ರಾಹುಲ್ ಮತ್ತು ಪಾತುಮ್ ನಿಸ್ಸಂಕಾ ಸದ್ಯ ಸಖತ್ ಫಾರ್ಮ್‌ನಲ್ಲಿದ್ದಾರೆ. ಇವರಿಬ್ಬರನ್ನು ಕೈಬಿಡುವುದು ಅಸಾಧ್ಯದ ಮಾತು. ಹೀಗಿರುವಾಗ ಪೃಥ್ವಿ ಶಾರನ್ನ ಯಾವ ಕ್ರಮಾಂಕದಲ್ಲಿ ಆಡಿಸಬೇಕು ಎಂಬುದು ಮ್ಯಾನೇಜ್‌ಮೆಂಟ್‌ಗೆ ದೊಡ್ಡ ತಲೆನೋವಾಗಿದೆ. ತಂಡವು ಈಗ ಪ್ರಯೋಗಗಳನ್ನು ಮಾಡಲು ಬಯಸದಿದ್ದರೂ, ಬ್ಯಾಟಿಂಗ್‌ಗೆ ಹೆಚ್ಚಿನ ವೇಗ ನೀಡಲು ಪೃಥ್ವಿ ಅವರನ್ನ ಮಿಡಲ್ ಆರ್ಡರ್‌ನಲ್ಲಾದರೂ ಬಳಸಿಕೊಳ್ಳುವ ಸಾಧ್ಯತೆ ಇದೆ.

ಪ್ರತಿಭೆ ಇದೆ, ಆದರೆ ಸ್ಥಿರತೆಯೇ ಶತ್ರು!

ಪೃಥ್ವಿ ಶಾ ಒಬ್ಬ ಅದ್ಭುತ ಬ್ಯಾಟ್ಸ್‌ಮನ್ ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ ಅವರ ದೊಡ್ಡ ಶತ್ರು ಎಂದರೆ ಅದು 'ಅಸ್ಥಿರತೆ'. ಒಂದು ಪಂದ್ಯದಲ್ಲಿ ಅಬ್ಬರಿಸಿದರೆ, ಮುಂದಿನ ನಾಲ್ಕು ಪಂದ್ಯಗಳಲ್ಲಿ ಬೇಗನೆ ವಿಕೆಟ್ ಒಪ್ಪಿಸುತ್ತಾರೆ. ಇದೇ ಕಾರಣಕ್ಕೆ ದೆಹಲಿ ಫ್ರಾಂಚೈಸಿ ಇವರನ್ನು ಬೆಂಚ್ ಮೇಲೆ ಕೂರಿಸಿದೆ. ಆದರೆ ಈಗ ತಂಡಕ್ಕೆ ಗೆಲುವು ಅನಿವಾರ್ಯವಾಗಿರುವುದರಿಂದ, ಪೃಥ್ವಿ ಅವರನ್ನ 'ಟ್ರಂಪ್ ಕಾರ್ಡ್' ಆಗಿ ಬಳಸಿಕೊಳ್ಳುವ ಸಾಧ್ಯತೆಯನ್ನು ತಳ್ಳಿಹಾಕುವಂತಿಲ್ಲ.

ಪೃಥ್ವಿ ಶಾಗೆ ಪ್ರತಿಭೆಯ ಶಾಪವಿದೆ. ಸರಿಯಾದ ಸಮಯದಲ್ಲಿ ರನ್ ಗಳಿಸದಿದ್ದರೆ ಇಂತಹ ಪರಿಸ್ಥಿತಿ ಎದುರಾಗುತ್ತದೆ. ಇಂದಿನ ಕೆಕೆಆರ್ ವಿರುದ್ಧದ ಪಂದ್ಯದಲ್ಲಿ ದೆಹಲಿ ಕ್ಯಾಪಿಟಲ್ಸ್ ಒಂದು ಸಾಹಸಕ್ಕೆ ಕೈಹಾಕುತ್ತಾ? ಅಥವಾ ಹಳೆ ತಂಡವನ್ನೇ ಕಣಕ್ಕಿಳಿಸುತ್ತಾ? ಎಂದು ಕಾದು ನೋಡಬೇಕಿದೆ. ಪೃಥ್ವಿ ಶಾಗೆ ಅವಕಾಶ ಸಿಕ್ಕರೆ ಅದು ಅಭಿಮಾನಿಗಳಿಗಂತೂ ಹಬ್ಬವೇ ಸರಿ.