ಕನ್ನಡ ಚಿತ್ರರಂಗದ ‘ಸಲಗ’ ದುನಿಯಾ ವಿಜಯ್ ಅವರು ಕೇವಲ ನಟನಾಗಿ ಮಾತ್ರವಲ್ಲದೆ, ಒಬ್ಬ ಯಶಸ್ವಿ ನಿರ್ದೇಶಕನಾಗಿಯೂ ಈಗ ಸದ್ದು ಮಾಡುತ್ತಿದ್ದಾರೆ. ಈಗ ತಮ್ಮ ಕುಟುಂಬದ ಮತ್ತೊಂದು ಪ್ರತಿಭೆಯನ್ನು ಬೆಳ್ಳಿಪರದೆಗೆ ಪರಿಚಯಿಸುವ ಹೊಣೆ ಹೊತ್ತಿದ್ದಾರೆ. ವಿಜಯ್ ಅವರ ಎರಡನೇ ಮಗಳು ಮೋನಿಷಾ ಈಗ ‘ಸಿಟಿ ಲೈಟ್ಸ್’ ಎಂಬ ಸಿನಿಮಾದ ಮೂಲಕ ಚಿತ್ರರಂಗಕ್ಕೆ ಎಂಟ್ರಿ ಕೊಡುತ್ತಿದ್ದು, ಇದರ ಫಸ್ಟ್ ಲುಕ್ ಪೋಸ್ಟರ್ ಗಾಂಧಿನಗರದಲ್ಲಿ ಹೊಸ ಚರ್ಚೆ ಶುರು ಮಾಡಿದೆ.
ಸಾಮಾನ್ಯವಾಗಿ ಸ್ಟಾರ್ ನಟರ ಮಕ್ಕಳು ಲಾಂಚ್ ಆಗುವಾಗ ಅದ್ದೂರಿ ಡ್ಯಾನ್ಸ್, ಕಲರ್ ಫುಲ್ ಕಾಸ್ಟ್ಯೂಮ್ ಇರುತ್ತೆ. ಆದರೆ ಮೋನಿಷಾ ಅವರ ‘ಸಿಟಿ ಲೈಟ್ಸ್’ ಪೋಸ್ಟರ್ ನೋಡಿದರೆ ಇದು ಪಕ್ಕಾ ರಿಯಲಿಸ್ಟಿಕ್ ಸಿನಿಮಾ ಅನ್ನೋದು ಅರ್ಥವಾಗುತ್ತೆ. ಬ್ಯುಸಿ ರಸ್ತೆಯಲ್ಲಿ ಒಬ್ಬ ಸಾಮಾನ್ಯ ಮಧ್ಯಮ ವರ್ಗದ ಹುಡುಗಿಯಂತೆ ಮೋನಿಷಾ ನಡೆದು ಬರುತ್ತಿರುವುದು, ಅವರ ಕಣ್ಣಲ್ಲಿರೋ ಆಳವಾದ ಯೋಚನೆಗಳು ಯಾವುದೋ ಒಂದು ಗಂಭೀರವಾದ ಕಥೆಯ ಮುನ್ಸೂಚನೆ ನೀಡುತ್ತಿವೆ. ಈ ಚಿತ್ರಕ್ಕೆ ಸ್ವತಃ ವಿಜಯ್ ಅವರೇ ನಿರ್ದೇಶನ ಮಾಡುತ್ತಿರುವುದರಿಂದ ಸಿನಿಮಾದ ಮೇಲೆ ನಿರೀಕ್ಷೆ ಬೆಟ್ಟದಷ್ಟಿದೆ.
ಸದ್ಯಕ್ಕೆ ಬರೀ ಸಸ್ಪೆನ್ಸ್.. ಸಸ್ಪೆನ್ಸ್..
ಈ ಚಿತ್ರದ ಕಥೆ ಏನು? ಮೋನಿಷಾ ಪಾತ್ರದ ಹೈಲೈಟ್ಸ್ ಏನು? ಈ ಬಗ್ಗೆ ವಿಜಯ್ ಎಲ್ಲಿಯೂ ತುಟಿ ಬಿಚ್ಚಿಲ್ಲ. ಈಗಾಗಲೇ ಇವರ ಹಿರಿಯ ಮಗಳು ಮೋನಿಕಾ ‘ರಿತನ್ಯಾ’ ಅನ್ನೋ ಹೆಸರಿನಲ್ಲಿ ಸಿನಿಮಾ ಜರ್ನಿ ಶುರು ಮಾಡಿದ್ದಾರೆ. ಈಗ ಎರಡನೇ ಮಗಳು ಕೂಡ ಅಪ್ಪನ ನಿರ್ದೇಶನದಲ್ಲೇ ಲಾಂಚ್ ಆಗುತ್ತಿರುವುದು ವಿಜಯ್ ಅಭಿಮಾನಿಗಳಿಗೆ ಡಬಲ್ ಖುಷಿ ಕೊಟ್ಟಿದೆ. ಸಿಟಿ ಲೈಟ್ಸ್ ಅಡಿಯಲ್ಲಿ ಅಡಗಿರುವ ಕರಾಳ ಸತ್ಯಗಳನ್ನ ವಿಜಯ್ ಹೇಗೆ ತೋರಿಸಲಿದ್ದಾರೆ ಎಂಬ ಕುತೂಹಲ ಎಲ್ಲರಲ್ಲೂ ಇದೆ.
ವಿಜಯ್ ಅವರ ‘ವಿಜಯಯಾತ್ರೆ’
ಇತ್ತೀಚೆಗಷ್ಟೇ ತೆರೆಕಂಡು ಭರ್ಜರಿ ಯಶಸ್ಸು ಕಂಡ ‘ಭೀಮ’ ಚಿತ್ರದ ನಂತರ ವಿಜಯ್ ಅವರ ಡಿಮ್ಯಾಂಡ್ ಹೆಚ್ಚಾಗಿದೆ. ‘ಭೀಮ’ ಈಗ ಒಟಿಟಿಯಲ್ಲೂ ಧೂಳೆಬ್ಬಿಸುತ್ತಿದೆ. ಇದರ ನಡುವೆ ವಿಜಯ್ ಅವರ 30ನೇ ಸಿನಿಮಾ ಕೂಡ ಘೋಷಣೆಯಾಗಿದ್ದು, ಅವರ ಶಿಷ್ಯ ವೆಟ್ರಿವೇಲ್ ಇದಕ್ಕೆ ಆಕ್ಷನ್ ಕಟ್ ಹೇಳ್ತಿದ್ದಾರೆ. ಅಪ್ಪನಾಗಿ ಮಗಳನ್ನು ಲಾಂಚ್ ಮಾಡುವುದು ಮತ್ತು ನಟನಾಗಿ ತನ್ನ ಸಿನಿಮಾಗಳನ್ನು ನಿಭಾಯಿಸುವುದು ಎರಡನ್ನೂ ವಿಜಿ ಬ್ಯಾಲೆನ್ಸ್ ಮಾಡುತ್ತಿದ್ದಾರೆ.
ದುನಿಯಾ ವಿಜಯ್ ಅವರ ಫ್ಯಾಮಿಲಿ ಸ್ಯಾಂಡಲ್ವುಡ್ನಲ್ಲಿ ಒಂದು ದೊಡ್ಡ ಶಕ್ತಿಯಾಗಿ ಬೆಳೆಯುತ್ತಿದೆ. ಮಕ್ಕಳನ್ನ ಕೇವಲ ನಟಿಯರನ್ನಾಗಿ ಅಷ್ಟೇ ಅಲ್ಲದೆ, ಒಳ್ಳೆ ಪರ್ಫಾರ್ಮರ್ ಆಗಿ ಚಿತ್ರರಂಗಕ್ಕೆ ತರುತ್ತಿರುವ ವಿಜಯ್ ಅವರ ಪ್ರಯತ್ನಕ್ಕೆ ಎಲ್ಲೆಡೆ ಮೆಚ್ಚುಗೆ ವ್ಯಕ್ತವಾಗುತ್ತಿದೆ..
