ರಾಜ್ ಬಿ. ಶೆಟ್ಟಿ ಅವರ ನಟನೆಯ ಬಹು ನಿರೀಕ್ಷಿತ ಸಿನಿಮಾ ‘ರಕ್ಕಸಪುರದೋಳ್’ ಫೆಬ್ರವರಿ 6ರಂದು ರಾಜ್ಯಾದ್ಯಂತ ತೆರೆಕಂಡಿದೆ. ಟ್ರೇಲರ್ ಮೂಲಕವೇ ಕುತೂಹಲ ಮೂಡಿಸಿದ್ದ ಈ ಸಿನಿಮಾ, ಬಿಡುಗಡೆಯ ದಿನವೇ ಪ್ರೇಕ್ಷಕರ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿದೆ ಎಂದು ಹೇಳಬಹುದು. ವಿಭಿನ್ನ ರೂಪದ ಕಲೆ ಹಾಗೂ ಹೊಸ ಪ್ರಯೋಗಗಳಿಗೆ ಹೆಸರುವಾಸಿಯಾದ ನಟ ರಾಜ್ ಬಿ. ಶೆಟ್ಟಿ, ಈ ಸಿನಿಮಾದಲ್ಲಿ ಡಿಫರೆಂಟ್ ಪೊಲೀಸ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.
ಹೌದು, ರವಿ ಸಾರಂಗ ನಿರ್ದೇಶನದ ಈ ಚಿತ್ರವನ್ನು ರವಿ ವರ್ಮಾರವರು ನಿರ್ಮಾಣ ಮಾಡಿದ್ದಾರೆ. ಶೀರ್ಷಿಕೆಯಲ್ಲೇ ಒಂದು ರಹಸ್ಯ ಅಡಗಿಸಿಕೊಂಡಿರುವ ‘ರಕ್ಕಸಪುರದೋಳ್’, ಮರ್ಡರ್ ಮಿಸ್ಟರಿ, ಸಸ್ಪೆನ್ಸ್, ಹಾರರ್ ಮತ್ತು ಕಾಮಿಡಿ ಅಂಶಗಳ ಮಿಶ್ರಣ ಹೊತ್ತಿರುವ ಕಥೆಯಾಗಿದೆ. ಮೊದಲಾರ್ಧವೇ ಪ್ರೇಕ್ಷಕರನ್ನು ಕಥೆಯೊಳಗೆ ಎಳೆದುಕೊಳ್ಳುವ ರೀತಿಯಲ್ಲಿ ಮೂಡಿಬಂದಿದೆ.
ಸಿನಿಮಾದ ಕಥೆ ಆರಂಭವಾಗುವುದೇ ಸಸ್ಪೆನ್ಸ್ ಮೂಲಕ. ಗ್ರಾಮೀಣ ಹಿನ್ನೆಲೆಯಲ್ಲಿನ ವಿಚಿತ್ರ ಘಟನೆಗಳು ನಿಧಾನವಾಗಿ ಗಾಢವಾಗುತ್ತಾ ಹೋಗುತ್ತವೆ. ಚಿತ್ರದಲ್ಲಿ ನಡೆಯುವ ಸರಣಿ ಅಪಘಾತ ಪ್ರಕರಣವೇ ಕಥೆಯ ಕೇಂದ್ರ ಬಿಂದುವಾಗಿದೆ. ಒಂದೊಂದೇ ಅಪಘಾತ ನಡೆಯುತ್ತಿದ್ದಂತೆ, “ಇದು ಮನುಷ್ಯನ ಕೃತ್ಯವೇ? ಅಥವಾ ಯಾವುದೋ ಅತೀಮಾನವ ಶಕ್ತಿ ಕೆಲಸ ಮಾಡುತ್ತಿದ್ಯಾ?” ಎಂಬ ಪ್ರಶ್ನೆ ಪ್ರೇಕ್ಷಕರಲ್ಲಿ ಕಾಡುತ್ತದೆ.
ಕೊಳ್ಳಿ ದೆವ್ವದ ಕಥೆಯನ್ನು ಹಾರರ್ ಎಲಿಮೆಂಟ್ ಆಗಿ ಬಳಸಿರುವುದು ಮೊದಲಾರ್ಧಕ್ಕೆ ಹೆಚ್ಚುವರಿ ರೋಮಾಂಚಕವಾಗಿದೆ. ಪ್ರೇಕ್ಷಕರು ಕಥೆಯೊಳಗೆ ಎಳೆಯಲ್ಪಡುವಂತೆ, ಪ್ರತಿಯೊಂದು ದೃಶ್ಯವೂ ಕುತೂಹಲವನ್ನು ಹೆಚ್ಚಿಸುತ್ತದೆ. ಮರ್ಡರ್ ಮಿಸ್ಟರಿ ಮತ್ತು ಸಸ್ಪೆನ್ಸ್ ಅಂಶಗಳು ಹಾರರ್ ಹಾಗೂ ಕಾಮಿಡಿ ಜೊತೆ ಬೆರೆತು, ವಿಭಿನ್ನ ಅನುಭವವನ್ನು ನೀಡುತ್ತವೆ.
ಹೌದು, ಮೂಢನಂಬಿಕೆ ವಿರುದ್ಧ ವಿಜ್ಞಾನ ಎಂಬ ಕಾನ್ಸೆಪ್ಟ್ನ ಮೇಲೆ ಕಟ್ಟಲಾದ ‘ರಕ್ಕಸಪುರದೋಳ್’ ಚಿತ್ರದ ಮೊದಲಾರ್ಧ, ರಾಜ್ ಬಿ. ಶೆಟ್ಟಿ ಅಭಿಮಾನಿಗಳಿಗೆ ಖಂಡಿತ ಇಷ್ಟವಾಗುವಂತಿದೆ ಎನ್ನಬಹುದು. ವಿಭಿನ್ನ ಕಥೆ, ಥ್ರಿಲ್ಲಿಂಗ್ ನಿರೂಪಣೆ ಮತ್ತು ನಿರಂತರ ಟ್ವಿಸ್ಟ್ಗಳು ಫಸ್ಟ್ ಹಾಫ್ನ ಪ್ರಮುಖ ಪ್ಲಸ್ ಪಾಯಿಂಟ್ಗಳಾಗಿವೆ.
ಈ ಸಿನಿಮಾ ಮನುಷ್ಯನಾ ಅಥವಾ ದೆವ್ವನಾ ಎಂಬ ಪ್ರಶ್ನೆಗೆ ಉತ್ತರ ಹುಡುಕುವ ಪ್ರಯತ್ನ ಮಾಡುತ್ತಿದ್ದು, ಪ್ರೇಕ್ಷಕರನ್ನು ಕೊನೆಯವರೆಗೂ ಕುತೂಹಲದಲ್ಲಿ ಇಡುತ್ತದೆ. ‘ರಕ್ಕಸಪುರದೋಳ್’ ಚಿತ್ರವು ತನ್ನ ಶೀರ್ಷಿಕೆಯಂತೆ ರಹಸ್ಯ, ಭಯ ಮತ್ತು ಹಾಸ್ಯದ ಮಿಶ್ರಣದೊಂದಿಗೆ ಕನ್ನಡ ಚಿತ್ರರಂಗದಲ್ಲಿ ಹೊಸ ಪ್ರಯೋಗವಾಗಿ ಹೊರಹೊಮ್ಮಿದೆ. ‘ರಕ್ಕಸಪುರದೋಳ್’ ಸಿನಿಮಾ ಪ್ರೇಕ್ಷಕರಿಗೆ ವಿಭಿನ್ನ ಅನುಭವ ನೀಡುವಂತಿದ್ದು, ಮೊದಲಾರ್ಧವೇ ಅದನ್ನು ಸಸ್ಪೆನ್ಸ್ ಮತ್ತು ರೋಮಾಂಚಕತೆಯೊಂದಿಗೆ ನೆನಪಿನಲ್ಲಿ ಉಳಿಯುವಂತೆ ಮಾಡುತ್ತದೆ.
