ರಾಷ್ಟ್ರ ರಾಜಧಾನಿ ಹೊಸದಿಲ್ಲಿಯ ಐತಿಹಾಸಿಕ ಜಂತರ್ ಮಂತರ್ನಲ್ಲಿ ‘ಕಾಕ್ರೋಚ್ ಜನತಾ ಪಾರ್ಟಿ’ ನೇತೃತ್ವದಲ್ಲಿ ನಡೆದ ಬೃಹತ್ ಪ್ರತಿಭಟನೆಗಳು ಹಾಗೂ ನೀಟ್ ಪ್ರಶ್ನೆಪತ್ರಿಕೆ ಸೋರಿಕೆ ವಿವಾದದ ಕಾವು ತಣ್ಣಗಾಗುವ ಮುನ್ನವೇ ಕೇಂದ್ರ ಸರ್ಕಾರವು ಮಹತ್ವದ ಹಾಗೂ ಕಠಿಣ ನಿರ್ಧಾರವೊಂದನ್ನು ಕೈಗೊಂಡಿದೆ. ಪ್ರತಿಭಟನಾಕಾರರು ಸರ್ಕಾರದ ಕಣ್ತ ತಪ್ಪಿಸಿ ಸಂವಹನ ನಡೆಸಲು ಬಳಸುತ್ತಿದ್ದ ಅತ್ಯಾಧುನಿಕ ಹಾಗೂ ವಿವಾದಾತ್ಮಕ ಮೆಸೇಜಿಂಗ್ ಅಪ್ಲಿಕೇಶನ್ ಆದ 'ಬಿಟ್ಚಾಟ್' ಆಪ್ ಅನ್ನು ಕೇಂದ್ರ ಗೃಹ ಸಚಿವಾಲಯವು ದಿಢೀರ್ ನಿಷೇಧಿಸಿ ಆದೇಶ ಹೊರಡಿಸಿದೆ.
ಟ್ವಿಟರ್ನ ಮಾಜಿ ಸಿಇಒ ಜ್ಯಾಕ್ ಡೋರ್ಸಿ ಅವರು ಅಭಿವೃದ್ಧಿಪಡಿಸಿರುವ ಹಾಗೂ ಪ್ರಸಿದ್ಧ ಗಿಟ್ಹಬ್ ಒಡೆತನದ ಈ ವಿನೂತನ ಆಪ್ ನಿಷೇಧದ ಹಿಂದೆ ಪ್ರಮುಖ ರಾಷ್ಟ್ರೀಯ ಭದ್ರತಾ ಕಾರಣಗಳು ಅಡಗಿವೆ ಎಂದು ವರದಿಯಾಗಿದೆ. ಕಳೆದ ಜುಲೈ 20 ರಂದು ದೆಹಲಿಯಲ್ಲಿ ನಡೆದ ಆಕ್ರೋಶಭರಿತ ಪ್ರತಿಭಟನೆಯ ಸಂದರ್ಭದಲ್ಲಿ ಕಾನೂನು ಸುವ್ಯವಸ್ಥೆ ಕಾಪಾಡುವ ದೃಷ್ಟಿಯಿಂದ ಹಾಗೂ ಪರಿಸ್ಥಿತಿ ವಿಕೊಂಡೋಗುವುದನ್ನು ತಡೆಯಲು ಕೇಂದ್ರ ಸರ್ಕಾರವು ಜಂತರ್ ಮಂತರ್ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ತಾತ್ಕಾಲಿಕವಾಗಿ ಇಂಟರ್ನೆಟ್ ಸೇವೆಯನ್ನು ಸಂಪೂರ್ಣವಾಗಿ ನಿಷೇಧಿಸಿತ್ತು.
ಯಾವುದೇ ಮೊಬೈಲ್ ನೆಟ್ವರ್ಕ್ ಅಥವಾ ಇಂಟರ್ನೆಟ್ ಸಂಪರ್ಕವಿಲ್ಲದ ಕಾರಣ ಪ್ರತಿಭಟನಾ ನಿರತ ವಿದ್ಯಾರ್ಥಿಗಳು ಮತ್ತು ಯುವಕರು ಪರಸ್ಪರ ಸಂಪರ್ಕ ಕಳೆದುಕೊಳ್ಳುತ್ತಾರೆ ಎಂದು ಆಡಳಿತ ವ್ಯವಸ್ಥೆ ಭಾವಿಸಿತ್ತು. ಆದರೆ, ಆ ಎಲ್ಲಾ ನಿಷೇಧಗಳನ್ನು ಮೀರಿ ಪ್ರತಿಭಟನಾಕಾರರು ಯಾವುದೇ ಅಡೆತಡೆಯಿಲ್ಲದೆ ತಮ್ಮ ಸಂವಹನವನ್ನು ಅತ್ಯಂತ ಸುಲಭವಾಗಿ ಮತ್ತು ರಹಸ್ಯವಾಗಿ ಮುಂದುವರೆಸಿದರು. ಸರ್ಕಾರದ ಇಂಟರ್ನೆಟ್ ನಿರ್ಬಂಧವನ್ನೂ ವಿಫಲಗೊಳಿಸಿದ ಈ ಅಚ್ಚರಿಯ ಕೃತ್ಯದ ಹಿಂದೆ ‘ಬಿಟ್ಚಾಟ್’ ಎಂಬ ವಿಶೇಷ ಮೆಸೇಜಿಂಗ್ ಅಪ್ಲಿಕೇಶನ್ನ ಪ್ರಮುಖ ಪಾತ್ರವಿತ್ತು ಎಂಬುದು ತನಿಖಾ ಸಂಸ್ಥೆಗಳಿಗೆ ತಿಳಿದುಬಂದಿದೆ. ಇದರ ಬೆನ್ನಲ್ಲೇ ಎಚ್ಚೆತ್ತುಕೊಂಡ ಕೇಂದ್ರ ಸರ್ಕಾರವು ತಕ್ಷಣವೇ ಈ ಆಪ್ ಅನ್ನು ನಿಷೇಧಿಸಿದೆ.
ಸಾಮಾನ್ಯ ಮೆಸೇಜಿಂಗ್ ಆಪ್ಗಳಿಗಿಂತ ಸಂಪೂರ್ಣ ಭಿನ್ನವಾಗಿರುವ ಈ ಬಿಟ್ಚಾಟ್ ಹೇಗೆ ಕೆಲಸ ಮಾಡುತ್ತದೆ ಎಂಬ ಕುತೂಹಲ ಎಲ್ಲರಲ್ಲೂ ಮೂಡಿದೆ. ಈ ಆಪ್ ಸಂಪೂರ್ಣವಾಗಿ ಇಂಟರ್ನೆಟ್ ರಹಿತವಾಗಿ, ಅಂದರೆ ಆಫ್ಲೈನ್ನಲ್ಲಿ ಮಾತ್ರ ಕಾರ್ಯನಿರ್ವಹಿಸುವ ಒಂದು ಅತ್ಯಾಧುನಿಕ ಪೀರ್-ಟು-ಪೀರ್ ಮೆಶ್ ನೆಟ್ವರ್ಕ್ ತಂತ್ರಜ್ಞಾನವನ್ನು ಹೊಂದಿದೆ.
ಇದರ ಪ್ರಕಾರ, ಆಪ್ ಬಳಕೆದಾರರು ಇಂಟರ್ನೆಟ್ ಅಥವಾ ವೈ-ಫೈ ರೂಟರ್ಗಳ ಬದಲಿಗೆ ತಮ್ಮ ಸ್ಮಾರ್ಟ್ಫೋನ್ನಲ್ಲಿರುವ ಬ್ಲೂಟೂತ್ (Bluetooth) ಮತ್ತು ವೈ-ಫೈ ಡೈರೆಕ್ಟ್ (Wi-Fi Direct) ವೈಶಿಷ್ಟ್ಯಗಳನ್ನು ಬಳಸಿಕೊಳ್ಳುತ್ತಾರೆ. ಇದರಿಂದ ಒಂದು ಫೋನ್ನಿಂದ ಹೊರಡುವ ಸಿಗ್ನಲ್ ನೇರವಾಗಿ ಮತ್ತೊಂದು ಹತ್ತಿರದ ಫೋನ್ಗೆ ಕನೆಕ್ಟ್ ಆಗುತ್ತದೆ. ಹೀಗೆ ನೂರಾರು ಫೋನ್ಗಳು ಒಂದಕ್ಕೊಂದು ಬೆಸೆದುಕೊಂಡು ತಮ್ಮದೇ ಆದ ಸ್ವತಂತ್ರ ಹಾಗೂ ಪ್ರತ್ಯೇಕ ಲೋಕಲ್ ನೆಟ್ವರ್ಕ್ ಅನ್ನು ಸೃಷ್ಟಿಸುತ್ತವೆ.
ಉದಾಹರಣೆಗೆ, ನೀವು 'A' ಎಂಬ ವ್ಯಕ್ತಿಯಾಗಿದ್ದು, ಸ್ವಲ್ಪ ದೂರದಲ್ಲಿರುವ 'C' ಎಂಬ ವ್ಯಕ್ತಿಗೆ ಸಂದೇಶ ಕಳುಹಿಸಬೇಕು ಎಂದಿಟ್ಟುಕೊಳ್ಳಿ. ಆದರೆ 'C' ನಿಮ್ಮ ಬ್ಲೂಟೂತ್ ವ್ಯಾಪ್ತಿಯಿಂದ ಆಚೆಯಿದ್ದಾನೆ. ಆಗ ನಿಮ್ಮ ಸಂದೇಶವು ನಿಮ್ಮ ಹತ್ತಿರವೇ ಇರುವ ಅಪರಿಚಿತ 'B' ಎಂಬ ವ್ಯಕ್ತಿಯ ಫೋನ್ ಮೂಲಕ ಹಾದುಹೋಗಿ 'C' ಗೆ ತಲುಪುತ್ತದೆ.
ಈ ಇಡೀ ಪ್ರಕ್ರಿಯೆಯಲ್ಲಿ ಮಧ್ಯವರ್ತಿಯಾಗಿ ಕೆಲಸ ಮಾಡುವ 'B' ವ್ಯಕ್ತಿಗೆ ನೀವು ಕಳುಹಿಸಿದ ಸಂದೇಶದ ಒಳಗೆ ಏನಿದೆ ಎಂಬುದು ಖಂಡಿತವಾಗಿಯೂ ತಿಳಿಯುವುದಿಲ್ಲ; ಏಕೆಂದರೆ ಆ ಸಂದೇಶವು ಎಂಡ್-ಟು-ಎಂಡ್ ಎನ್ಕ್ರಿಪ್ಟ್ (Encrypted) ಆಗಿರುತ್ತದೆ. ಆತನ ಫೋನ್ ಕೇವಲ ಒಂದು ಸುರಕ್ಷಿತ ಬ್ರಿಡ್ಜ್ (Bridge) ಅಥವಾ ಸೇತುವೆಯಾಗಿ ಮಾತ್ರ ಕಾರ್ಯನಿರ್ವಹಿಸುತ್ತದೆ. ಇಂಟರ್ನೆಟ್ ಇಲ್ಲದೆಯೂ ಕಿಲೋಮೀಟರ್ಗಟ್ಟಲೆ ದೂರ ಸಂದೇಶ ಕಳುಹಿಸಲು ಇದು ಅನುವು ಮಾಡಿಕೊಡುತ್ತದೆ.
ಹಾಗಾದರೆ ಈ ಆಪ್ ಅನ್ನು ಕೇಂದ್ರ ಸರ್ಕಾರ ನಿಷೇಧಿಸಲು ಪ್ರಮುಖ ಕಾರಣವೇನು ಎಂಬ ಪ್ರಶ್ನೆಗೆ ಗೃಹ ಸಚಿವಾಲಯ ಸ್ಪಷ್ಟನೆ ನೀಡಿದೆ. ಈ ಬಿಟ್ಚಾಟ್ ಆಪ್ ಯಾವುದೇ ರೀತಿಯ ಸೆಂಟ್ರಲೈಜ್ಡ್ ಸರ್ವರ್ (Centralized Server) ಅಥವಾ ಮೊಬೈಲ್ ಟೆಲಿಕಾಂ ನೆಟ್ವರ್ಕ್ ಬಳಸದೆ, ನೇರವಾಗಿ ಫೋನ್ಗಳ ನಡುವೆ ವಿಕೇಂದ್ರೀಕೃತವಾಗಿ ಕಾರ್ಯನಿರ್ವಹಿಸುವುದರಿಂದ ದೇಶದ ಗುಪ್ತಚರ ಮತ್ತು ತನಿಖಾ ಸಂಸ್ಥೆಗಳಿಗೆ ಇದರ ಮೇಲ್ವಿಚಾರಣೆ (Monitoring) ನಡೆಸುವುದು ಅಥವಾ ಸಂದೇಶಗಳನ್ನು ಟ್ರ್ಯಾಕ್ ಮಾಡುವುದು ಅಸಾಧ್ಯವಾಗಿದೆ.
ಜೊತೆಗೆ, ಈ ಆಪ್ ಬಳಸಲು ಯಾವುದೇ ಮೊಬೈಲ್ ಫೋನ್ ನಂಬರ್ ಅಥವಾ ಇಮೇಲ್ ಐಡಿ ನೋಂದಣಿ (Registration) ಮಾಡುವ ಅಗತ್ಯವೇ ಇಲ್ಲ. ಈ ಕಾರಣದಿಂದಾಗಿ ಸಮಾಜಘಾತಕ ಶಕ್ತಿಗಳು ಅಥವಾ ಉಗ್ರರು ಇದರ ದುರುಪಯೋಗಪಡಿಸಿಕೊಳ್ಳುವ ಸಾಧ್ಯತೆಯಿದ್ದು, ಬಳಕೆದಾರರ ನೈಜ ಗುರುತನ್ನು ಪತ್ತೆಹಚ್ಚುವುದನ್ನು ಇದು ಸಂಪೂರ್ಣವಾಗಿ ತಡೆಯುವುದರಿಂದ ರಾಷ್ಟ್ರೀಯ ಭದ್ರತೆಯ ಹಿತಾಸಕ್ತಿಯಿಂದ ಕೇಂದ್ರ ಸರ್ಕಾರ ಈ ನಿಷೇಧ ಹೇರಿದೆ.
