ನಾವು ಯಾರನ್ನು ಅತಿಯಾಗಿ ಪ್ರೀತಿಸುತ್ತೇವೆಯೋ, ಅವರೇ ನಮಗೆ ಮೋಸ ಮಾಡಿದಾಗ ಆಗುವ ನೋವು ನಿಜಕ್ಕೂ ತಡೆದುಕೊಳ್ಳಲು ಸಾಧ್ಯವಿಲ್ಲ. ಸದ್ಯ ಯೂಟ್ಯೂಬ್ ಹಾಗೂ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ಫೇಮಸ್ ಆಗಿರುವ ಮತ್ತು ಕ್ರಿಕೆಟರ್ ಚಹಾಲ್ ಅವರ ರೂಮರ್ಡ್ ಗರ್ಲ್ಫ್ರೆಂಡ್ ಅಂತಲೇ ಗುರುತಿಸಿಕೊಂಡಿರುವ ಆರ್ಜೆ ಮಹ್ವಿಶ್ (RJ Mahvash) ಬದುಕಿನಲ್ಲೂ ಇಂತದ್ದೇ ಒಂದು ಕಹಿ ಘಟನೆ ನಡೆದಿದೆ.
ಯಾವ ಹುಡುಗನಿಗಾಗಿ ಅವಳು ಇಡೀ ಕುಟುಂಬದ ಎದುರು ನಿಂತು ಹೋರಾಡಿದ್ದಳೋ, ಅದೇ ಹುಡುಗ ಮಹ್ವಿಶ್ಗೆ ಪದೇ ಪದೇ ದ್ರೋಹ ಮಾಡಿದ್ದಾನೆ. ಅಷ್ಟೇ ಅಲ್ಲದೆ, ಅವಳು ಮಾನಸಿಕವಾಗಿ ಕುಗ್ಗಿ ಹೋಗಿದ್ದಾಗ “ನೀನೊಬ್ಬ ಮೆಂಟಲ್ ಪೇಷಂಟ್” ಎಂದು ಹೇಳಿ ಅವಳ ಹೃದಯವನ್ನೇ ಚೂರು ಚೂರು ಮಾಡಿದ್ದಾನೆ. ಸದ್ಯ ಮಹ್ವಿಶ್ ಅವರ ಈ ಕಣ್ಣೀರಿನ ಕಥೆ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗ್ತಾ ಇದೆ.
19ನೇ ವಯಸ್ಸಿನ ಕಣ್ಣು ಮುಚ್ಚಿದ ಪ್ರೀತಿ!
ಮಹ್ವಿಶ್ಗೆ ಕೇವಲ 19 ವರ್ಷ ವಯಸ್ಸಾಗಿದ್ದಾಗ ಆ ಹುಡುಗನ ಮೇಲೆ ಪ್ರೀತಿಯಾಗಿತ್ತು. ಆ ವಯಸ್ಸಿನಲ್ಲಿ ಪ್ರೀತಿ ಎಷ್ಟು ತಲೆಗೆ ಹತ್ತಿತ್ತೆಂದರೆ, ಆ ಹುಡುಗನಿಗಾಗಿ ಅವಳು ಏನನ್ನು ಬೇಕಾದರೂ ಮಾಡಲು ರೆಡಿಯಾಗಿದ್ದಳು. ತನ್ನ ಸ್ವಂತ ಫ್ಯಾಮಿಲಿ ಬೇಡ ಅಂದರೂ ಅವರ ಜೊತೆ ಜಗಳ ಆಡಿ ಆ ಹುಡುಗನ ಕೈ ಹಿಡಿಯಲು ಮುಂದಾಗಿದ್ದಳು. ಇಬ್ಬರಿಗೂ ಎಂಗೇಜ್ಮೆಂಟ್ ಕೂಡ ಆಗಿತ್ತು. ಆದರೆ, ಅವಳು ಯಾರನ್ನು ಪ್ರಾಣಕ್ಕಿಂತ ಹೆಚ್ಚಾಗಿ ನಂಬಿದ್ದಳೋ, ಆ ನಿಶ್ಚಿತ ವರ (Fiance) ಅವಳಿಗೆ ಪದೇ ಪದೇ ನಂಬಿಕೆ ದ್ರೋಹ ಮಾಡುತ್ತಲೇ ಬಂದಿದ್ದನಂತೆ ಎಂದು ಕೇಳಿಬಂದಿದೆ.
ಡಿಪ್ರೆಷನ್, ಪ್ಯಾನಿಕ್ ಅಟ್ಯಾಕ್ ಹಾಗೂ ಆಸ್ಪತ್ರೆ ವಾಸ!
ಪ್ರೀತಿಸಿದ ಹುಡುಗನಿಂದ ನಿರಂತರವಾಗಿ ಸಿಗುತ್ತಿದ್ದ ದ್ರೋಹ ಮತ್ತು ಮಾನಸಿಕ ಕಿರುಕುಳವನ್ನು ತಡೆದುಕೊಳ್ಳಲು ಮಹ್ವಿಶ್ಗೆ ಸಾಧ್ಯವಾಗಲಿಲ್ಲ. ಆ ತೀವ್ರವಾದ ಮಾನಸಿಕ ಹಿಂಸೆ (Mental Trauma) ಅವಳನ್ನು ಡಿಪ್ರೆಷನ್ಗೆ ತಳ್ಳಿತು. ಪ್ರತಿದಿನ ಸಿಕ್ಕಾಪಟ್ಟೆ ಪ್ಯಾನಿಕ್ ಅಟ್ಯಾಕ್ (Panic Attacks) ಆಗಲು ಶುರುವಾಯಿತು.
ಪರಿಸ್ಥಿತಿ ಎಷ್ಟು ಕೈಮೀರಿ ಹೋಯಿತೆಂದರೆ, ಹೆವಿ ಮೆಡಿಸಿನ್ಗಳನ್ನು ತೆಗೆದುಕೊಳ್ಳಬೇಕಾಗಿ ಬಂತು. ಕೊನೆಗೆ ಮಾನಸಿಕ ಮತ್ತು ದೈಹಿಕ ಆರೋಗ್ಯ ಸಂಪೂರ್ಣ ಹದಗೆಟ್ಟು ಮಹ್ವಿಶ್ ಆಸ್ಪತ್ರೆಗೆ ದಾಖಲಾಗಬೇಕಾದ ಪರಿಸ್ಥಿತಿ ಬಂದೊದಗಿತು ಎಂದು ಕೇಳಿಬಂದಿದೆ.
ಕಣ್ಣೀರು ತರಿಸುವ ಆ ಒಂದು ಕೊನೆಯ ಮಾತು;
ಮಹ್ವಿಶ್ ಬದುಕಿನಲ್ಲಿ ಅತ್ಯಂತ ನೋವಿನ ಕ್ಷಣ ಎದುರಾಗಿದ್ದು ಅವಳು ತನ್ನ ಆರೋಗ್ಯದ ಪರಿಸ್ಥಿತಿಯನ್ನು ಆ ಹುಡುಗನ ಜೊತೆ ಹಂಚಿಕೊಂಡಾಗ. ಆಸ್ಪತ್ರೆಯಲ್ಲಿದ್ದ ಮಹ್ವಿಶ್ ತನ್ನ ನಿಶ್ಚಿತ ವರನಿಗೆ ಫೋನ್ ಮಾಡಿ, "ನನ್ನ ಪರಿಸ್ಥಿತಿ ಹೀಗಾಗಿದೆ, ನನಗೆ ನಿನ್ನ ಸಪೋರ್ಟ್ ಬೇಕು" ಎಂದು ಕೇಳಿಕೊಂಡಿದ್ದಾಳೆ.
ಆದರೆ, ಆ ಕಲ್ಲೆದೆಯ ಹುಡುಗನಿಂದ ಬಂದ ಉತ್ತರ ಮಾತ್ರ ಇಡೀ ಜನ್ಮಕ್ಕೆ ಮರೆಯಲಾಗದ ಗಾಯ ಮಾಡಿತು. ಅವನು ಕರುಣೆಯೇ ಇಲ್ಲದೆ, “ಒಂದು ವೇಳೆ ನೀನೊಬ್ಬ ಮೆಂಟಲ್ ಪೇಷಂಟ್ ಅಂತ ನಿನ್ನ ಫ್ಯಾಮಿಲಿಗೆ ಗೊತ್ತಾದ್ರೆ ಏನಾಗುತ್ತೆ ಯೋಚನೆ ಮಾಡಿದ್ದೀಯಾ?” ಎಂದು ಅತ್ಯಂತ ಕೆಟ್ಟದಾಗಿ ಅವಹೇಳನ ಮಾಡಿದ್ದನು ಎನ್ನಲಾಗುತ್ತಿದೆ.
ಮಾತುಗಳು ಕೊಡುವ ಲೈಫ್ಟೈಮ್ ಪೇನ್!
ಮಹ್ವಿಶ್ ತನ್ನ ನೋವಿನ ಕಥೆಯನ್ನು ಶೇರ್ ಮಾಡಿಕೊಂಡಾಗ ನೆಟ್ಟಿಗರ ಕಣ್ಣಾಲಿಗಳು ಕೂಡ ತುಂಬಿ ಬಂದಿವೆ. ನಿಜ ಹೇಳಬೇಕೆಂದರೆ, ಪ್ರೀತಿಯ ಸಂಬಂಧಗಳಲ್ಲಿ ಒಮ್ಮೊಮ್ಮೆ ಆಡುವ ಮಾತುಗಳು ಮನುಷ್ಯನಿಗೆ ಇಡೀ ಜೀವನ ಪೂರ್ತಿ ಮರೆಯಲಾಗದ ನೋವನ್ನು ನೀಡಿಬಿಡುತ್ತವೆ. ದೈಹಿಕವಾಗಿ ಮಾಡಿದ ಗಾಯ ಬೇಗ ಮಾಯಬಹುದು, ಆದರೆ ನಂಬಿದವರೇ ಆಡುವ ಇಂತಹ ಕ್ರೂರ ಮಾತುಗಳು ಮನಸ್ಸಿನ ಮೇಲೆ ಲೈಫ್ಟೈಮ್ ಕಲೆಯಾಗಿ ಉಳಿದುಬಿಡುತ್ತವೆ.
ಸದ್ಯ ಆ ಹಳೇ ಕಹಿ ನೆನಪುಗಳಿಂದ ಹೊರಬಂದಿರುವ ಆರ್ಜೆ ಮಹ್ವಿಶ್, ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ಆಕ್ಟಿವ್ ಆಗಿದ್ದು, ತನ್ನ ಕೆರಿಯರ್ ಕಡೆ ಫುಲ್ ಫೋಕಸ್ ಮಾಡುತ್ತಿದ್ದಾರೆ. ಇವರ ಈ ಕಥೆ ನೋಡಿ ಜನರು, "ಯಾರನ್ನೂ ಕಣ್ಣು ಮುಚ್ಚಿ ನಂಬಬೇಡಿ, ನಿಮಗಿಂತ ಹೆಚ್ಚಾಗಿ ಯಾರನ್ನೂ ಪ್ರೀತಿಸಬೇಡಿ" ಎಂದು ಕಮೆಂಟ್ ಮಾಡ್ತಾ ಇದ್ದಾರೆ..
