2026ರ ಟಿ20 ವಿಶ್ವಕಪ್ನ ಆರಂಭಿಕ ಪಂದ್ಯಗಳಲ್ಲಿ ಅಭಿಷೇಕ್ ಶರ್ಮಾ ಸತತವಾಗಿ ಮೂರು ಬಾರಿ ಶೂನ್ಯಕ್ಕೆ ಔಟ್ ಆಗಿದ್ದಾಗ, ಪಾಕಿಸ್ತಾನದ ಮಾಜಿ ವೇಗಿ ಮೊಹಮ್ಮದ್ ಅಮೀರ್ ಈ ಯುವ ಆಟಗಾರನನ್ನು ಟೀಕಿಸಿದ್ದರು. ಅಭಿಷೇಕ್ ಬ್ಯಾಟಿಂಗ್ನಲ್ಲಿ ಯಾವುದೇ ತಾಂತ್ರಿಕತೆ ಇಲ್ಲ, ಅವರು ಕೇವಲ ಅಡ್ಡಾದಿಡ್ಡಿ ಬ್ಯಾಟ್ ಬೀಸುವ 'ಸ್ಲಾಗರ್' ಅಂದರೆ ಅಡ್ಡಾದಿಡ್ಡಿ ಬ್ಯಾಟ್ ಬೀಸುವ ಎಂದರ್ಥದಲ್ಲಿ ಕರೆದಿದ್ದರು. ಆದರೆ, ಜಿಂಬಾಬ್ವೆ ವಿರುದ್ಧದ ಮಹತ್ವದ ಸೂಪರ್ 8 ಪಂದ್ಯದಲ್ಲಿ ಕೇವಲ 30 ಎಸೆತಗಳಲ್ಲಿ 55 ರನ್ ಸಿಡಿಸುವ ಮೂಲಕ ಅಭಿಷೇಕ್ ತಮ್ಮ ಬ್ಯಾಟಿಂಗ್ ಪರಾಕ್ರಮವನ್ನು ಸಾಬೀತುಪಡಿಸಿದರು. ಈ ಬೆನ್ನಲ್ಲೇ ಭಾರತದ ಅನುಭವಿ ಸ್ಪಿನ್ನರ್ ಆರ್. ಅಶ್ವಿನ್, ಅಭಿಷೇಕ್ ಪರವಾಗಿ ನಿಂತು ಅಮೀರ್ಗೆ ತಕ್ಕ ಪ್ರತ್ಯುತ್ತರ ನೀಡಿದ್ದಾರೆ.
ತಮ್ಮ ಯೂಟ್ಯೂಬ್ ಚಾನೆಲ್ 'ಆಶ್ ಕಿ ಬಾತ್' ನಲ್ಲಿ ಮಾತನಾಡಿದ ಅಶ್ವಿನ್, "ಯಾರೋ ಒಬ್ಬರನ್ನು ಸ್ಲಾಗರ್ ಎಂದು ಕರೆಯುವುದು ಸುಲಭ, ಆದರೆ ಅಭಿಷೇಕ್ ಶರ್ಮಾ ಖಂಡಿತವಾಗಿಯೂ ಅಂತಹ ಆಟಗಾರನಲ್ಲ" ಎಂದು ಸ್ಪಷ್ಟಪಡಿಸಿದರು. ಅಭಿಷೇಕ್ ಅವರ ಬ್ಯಾಟಿಂಗ್ ಶೈಲಿಯು ಅತ್ಯಂತ ಸುಂದರ ಮತ್ತು ಪರಿಣಾಮಕಾರಿಯಾಗಿದೆ. ಅವರ ಗುರುವಾಗಿರುವ ಯುವರಾಜ್ ಸಿಂಗ್ ಅವರ ಪ್ರಭಾವ ಇವರ ಆಟದ ಮೇಲೆ ಎದ್ದು ಕಾಣುತ್ತಿದೆ. ವಾಸ್ತವವಾಗಿ, ಬ್ಯಾಟ್ ಬೀಸುವ ವೇಗ ಮತ್ತು ಶೈಲಿಯಲ್ಲಿ ಅಭಿಷೇಕ್ ಅವರು ತಮ್ಮ ಮಾರ್ಗದರ್ಶಕ ಯುವರಾಜ್ ಸಿಂಗ್ ಅವರಿಗಿಂತಲೂ ಒಂದು ಹೆಜ್ಜೆ ಮುಂದಿದ್ದಾರೆ ಎಂದು ಅಶ್ವಿನ್ ಅಚ್ಚರಿಯ ಹೇಳಿಕೆ ನೀಡಿದ್ದಾರೆ.
ಅಭಿಷೇಕ್ ಶರ್ಮಾ ಅವರು ಚೆಂಡನ್ನು ಹೊಡೆದಾಗ ಅದು ಅತಿ ಸುಲಭವಾಗಿ ದೂರ ಹೋಗುತ್ತದೆ. ಈ ಕಾರಣಕ್ಕಾಗಿಯೇ ಜನರು ಅವರನ್ನು ಕೇವಲ ಸ್ಲಾಗರ್ ಎಂದು ತಪ್ಪು ತಿಳಿದುಕೊಳ್ಳುತ್ತಿದ್ದಾರೆ. ಪ್ರತಿಯೊಂದು ಎಸೆತದಲ್ಲೂ ಬೌಂಡರಿ ಬಾರಿಸುವ ಅವರ ಉತ್ಸಾಹ ಕೆಲವೊಮ್ಮೆ ಅವರಿಗೆ ಮುಳುವಾಗಬಹುದು, ಆದರೆ ಅದನ್ನು ಸ್ಲಾಗ್ ಎಂದು ಕರೆಯಲು ಸಾಧ್ಯವಿಲ್ಲ. ಅವರ ತಾಂತ್ರಿಕತೆ ಮತ್ತು ಹೊಡೆತಗಳ ಮೇಲೆ ಅವರಿಗೆ ಇರುವ ಹಿಡಿತ ಅದ್ಭುತವಾಗಿದೆ ಎಂದು ಅಶ್ವಿನ್ ಸಮರ್ಥಿಸಿಕೊಂಡಿದ್ದಾರೆ.
ಕ್ರಿಕೆಟ್ ದಿಗ್ಗಜ ಸುನೀಲ್ ಗವಾಸ್ಕರ್ ಕೂಡ ಅಭಿಷೇಕ್ ಶರ್ಮಾ ಅವರ ಆಟದ ಬದಲಾವಣೆಯನ್ನು ಗಮನಿಸಿ ಶ್ಲಾಘಿಸಿದ್ದಾರೆ. ಜಿಂಬಾಬ್ವೆ ವಿರುದ್ಧದ ಪಂದ್ಯದಲ್ಲಿ ಅಭಿಷೇಕ್ ಕೇವಲ ಆಕ್ರಮಣಕಾರಿಯಾಗಿ ಆಡದೆ, ಸಂದರ್ಭಕ್ಕೆ ತಕ್ಕಂತೆ ರಕ್ಷಣಾತ್ಮಕ ಆಟವನ್ನೂ ಪ್ರದರ್ಶಿಸಿದರು. "ಅಭಿಷೇಕ್ ರಕ್ಷಣಾತ್ಮಕ ಹೊಡೆತಗಳನ್ನು ಆಡುವುದನ್ನು ನೋಡಿ ನನಗೆ ಆಶ್ಚರ್ಯವಾಯಿತು" ಎಂದು ಗವಾಸ್ಕರ್ ಹೇಳಿದ್ದಾರೆ. ಅವರು ಸ್ಪಿನ್ನರ್ಗಳನ್ನು ಗೌರವಿಸಿ, ಆರಂಭದಲ್ಲಿ ಸಮಯ ತೆಗೆದುಕೊಂಡು ನಂತರ ಸ್ಫೋಟಕವಾಗಿ ಆಡಿದ್ದು ಅವರ ಪ್ರಬುದ್ಧತೆಯನ್ನು ತೋರಿಸುತ್ತದೆ ಎಂದು ಗವಾಸ್ಕರ್ ಅಭಿಪ್ರಾಯಪಟ್ಟಿದ್ದಾರೆ.
ಜಿಂಬಾಬ್ವೆ ವಿರುದ್ಧದ ಅರ್ಧಶತಕದ ಮೂಲಕ ಅಭಿಷೇಕ್ ಶರ್ಮಾ ತಮ್ಮ ಮೇಲಿದ್ದ ಟೀಕೆಗಳಿಗೆ ತೆರೆ ಎಳೆದಿದ್ದಾರೆ. ಅಶ್ವಿನ್ ಮತ್ತು ಗವಾಸ್ಕರ್ ಅಂತಹ ಹಿರಿಯ ಆಟಗಾರರ ಬೆಂಬಲವು ಈ ಯುವ ಪ್ರತಿಭೆಗೆ ಮುಂದಿನ ಪಂದ್ಯಗಳಲ್ಲಿ ಹೆಚ್ಚಿನ ಆತ್ಮವಿಶ್ವಾಸ ನೀಡಲಿದೆ. ಟೀಂ ಇಂಡಿಯಾದ ಭವಿಷ್ಯದ ಆರಂಭಿಕ ಆಟಗಾರನಾಗಿ ಅಭಿಷೇಕ್ ಭರವಸೆ ಮೂಡಿಸುತ್ತಿದ್ದಾರೆ.
