ಹಾವೇರಿ: ಕೃಷಿ ಕೆಲಸಗಳಿಗೆ ಡೀಸೆಲ್ ಅತ್ಯಗತ್ಯ. ಮಳೆಗಾಲದ ಕೃಷಿ ಚಟುವಟಿಕೆಗಳು ಜೋರಾಗಿ ನಡೆಯುತ್ತಿರುವ ಈ ಸಂದರ್ಭದಲ್ಲಿ, ಹಾವೇರಿ ಜಿಲ್ಲೆಯ ರೈತರು ತಮಗೆ ಡೀಸೆಲ್ ಸಿಗದೆ ಪರದಾಡುವಂತಾಗಿದೆ. ಬ್ಯಾಡಗಿ ತಾಲೂಕಿನ ಮೊಟ್ಟೆಬೆನ್ನೂರ ಗ್ರಾಮದಲ್ಲಿ ಡೀಸೆಲ್ ನೀಡಲು ಬಂಕ್ ಮಾಲೀಕರು ನಿರಾಕರಿಸುತ್ತಿರುವುದು ರೈತರ ಆಕ್ರೋಶಕ್ಕೆ ಕಾರಣವಾಗಿದೆ.
ಏನಿದು ಸಮಸ್ಯೆ?
ಬ್ಯಾಡಗಿ ತಾಲೂಕಿನ ಮೊಟ್ಟೆಬೆನ್ನೂರ-ಕಲ್ಲೇದೇವರ ರಸ್ತೆಯಲ್ಲಿರುವ ಪೆಟ್ರೋಲ್ ಬಂಕ್ನಲ್ಲಿ ಕಳೆದ ಕೆಲವು ದಿನಗಳಿಂದ ರೈತರಿಗೆ ಡೀಸೆಲ್ ಸಿಗುತ್ತಿಲ್ಲ. ರೈತರು ತಮ್ಮ ಟ್ರ್ಯಾಕ್ಟರ್ಗಳನ್ನು ಬಂಕ್ಗೆ ತರಲು ಸಾಧ್ಯವಾಗದಿದ್ದಾಗ, ಮನೆಯಲ್ಲಿರುವ ಕ್ಯಾನ್ಗಳನ್ನು ಹಿಡಿದು ಡೀಸೆಲ್ ಪಡೆಯಲು ಬಂಕ್ಗೆ ಹೋಗುತ್ತಾರೆ. ಆದರೆ, ಅಲ್ಲಿನ ಬಂಕ್ ಮಾಲೀಕರು ಮತ್ತು ಸಿಬ್ಬಂದಿ ಕ್ಯಾನ್ ತಂದ ರೈತರಿಗೆ ಡೀಸೆಲ್ ನೀಡಲು ಸ್ಪಷ್ಟವಾಗಿ ನಿರಾಕರಿಸುತ್ತಿದ್ದಾರೆ.
"ನೀವು ಟ್ರ್ಯಾಕ್ಟರ್ಗಳನ್ನು ತೆಗೆದುಕೊಂಡು ಬಂದರೆ ಮಾತ್ರ ಡೀಸೆಲ್ ಕೊಡುತ್ತೇವೆ, ಕ್ಯಾನ್ನಲ್ಲಿ ಡೀಸೆಲ್ ಕೊಡಲು ಸಾಧ್ಯವಿಲ್ಲ" ಎಂದು ಮಾಲೀಕರು ವಾದಿಸುತ್ತಿದ್ದಾರೆ. ಇದರಿಂದಾಗಿ ಸುತ್ತಮುತ್ತಲಿನ ಹತ್ತಾರು ಗ್ರಾಮಗಳ ರೈತರು ಕಂಗಾಲಾಗಿದ್ದಾರೆ.
ರೈತರ ಸಂಕಷ್ಟ
ಈ ಸಮಸ್ಯೆಯಿಂದ ಕಲ್ಲೇದೇವರ, ಅಳಲಗೇರಿ ಸೇರಿದಂತೆ ಮೊಟ್ಟೆಬೆನ್ನೂರ ಸುತ್ತಮುತ್ತಲ ಗ್ರಾಮದ ರೈತರು ತೀವ್ರ ತೊಂದರೆ ಅನುಭವಿಸುತ್ತಿದ್ದಾರೆ. ಕೃಷಿ ಕೆಲಸಗಳು ಸಮಯಕ್ಕೆ ಸರಿಯಾಗಿ ಆಗಬೇಕು. ದೂರದ ಗ್ರಾಮಗಳಿಂದ ಪ್ರತಿ ಬಾರಿ ಟ್ರ್ಯಾಕ್ಟರ್ ತೆಗೆದುಕೊಂಡು ಬಂಕ್ಗೆ ಬರುವುದು ರೈತರಿಗೆ ಆರ್ಥಿಕವಾಗಿಯೂ ಹೊರೆಯಾಗುತ್ತದೆ ಮತ್ತು ಸಮಯವೂ ವ್ಯರ್ಥವಾಗುತ್ತದೆ.
ಈ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿರುವ ರೈತರು, "ನಾವು ರೈತರು, ನಮಗೆ ಕೃಷಿ ಕೆಲಸಕ್ಕಾಗಿ ಡೀಸೆಲ್ ಬೇಕು. ದೂರದ ಊರುಗಳಿಂದ ಟ್ರ್ಯಾಕ್ಟರ್ ತರಲು ಸಾಧ್ಯವಾಗದೆ ಕ್ಯಾನ್ ತರುತ್ತಿದ್ದೇವೆ. ಆದರೆ ಬಂಕ್ ಮಾಲೀಕರು ನಿಯಮದ ಹೆಸರಿನಲ್ಲಿ ನಮಗೆ ದ್ರೋಹ ಮಾಡುತ್ತಿದ್ದಾರೆ" ಎಂದು ಕಿಡಿಕಾರಿದ್ದಾರೆ.
ಬಂಕ್ ಮಾಲೀಕರ ಸಬೂಬು!
ರೈತರು ಈ ಬಗ್ಗೆ ಪ್ರಶ್ನಿಸಿದಾಗ, ಬಂಕ್ ಮಾಲೀಕರು ಮತ್ತು ಸಿಬ್ಬಂದಿ ತಮಗೆ ಜಿಲ್ಲಾಧಿಕಾರಿಗಳ ಕಟ್ಟುನಿಟ್ಟಿನ ಆದೇಶವಿದೆ ಎಂದು ಹೇಳುತ್ತಿದ್ದಾರೆ. "ಜಿಲ್ಲಾಧಿಕಾರಿಗಳ ಆದೇಶದಂತೆ ಕ್ಯಾನ್ನಲ್ಲಿ ಡೀಸೆಲ್ ನೀಡಬಾರದು ಎಂದು ಸೂಚಿಸಲಾಗಿದೆ. ಹೀಗಾಗಿ ನಾವು ನಿಯಮ ಪಾಲಿಸುತ್ತಿದ್ದೇವೆ" ಎಂಬುದು ಬಂಕ್ ಮಾಲೀಕರ ಉತ್ತರವಾಗಿದೆ.
ಆದರೆ, ಕೃಷಿ ಚಟುವಟಿಕೆಗಳಿಗೆ ಅತಿ ಅವಶ್ಯಕವಾಗಿರುವ ಇಂಧನವನ್ನು ಪಡೆಯಲು ರೈತರಿಗೆ ಇಷ್ಟೊಂದು ಕಷ್ಟವಾಗುತ್ತಿರುವುದು ಯಾಕೆ? ಜಿಲ್ಲಾಡಳಿತ ಈ ಬಗ್ಗೆ ಸ್ಪಷ್ಟನೆ ನೀಡುವ ಬದಲು ಕೇವಲ ಬಂಕ್ ಮಾಲೀಕರ ಮನಸ್ಥಿತಿಗೆ ಬಿಟ್ಟಿರುವಂತಿದೆ ಎಂದು ರೈತರು ಆರೋಪಿಸುತ್ತಿದ್ದಾರೆ.
ರೈತರ ಅಳಲು ಮತ್ತು ಸರ್ಕಾರದತ್ತ ಚಿತ್ತ:
ಕ್ಯಾನ್ಗೆ ನೋ ಎಂಟ್ರಿ: ರೈತರು ತಂದಿದ್ದ ಕ್ಯಾನ್ಗಳಿಗೆ ಡೀಸೆಲ್ ಹಾಕಲು ಬಂಕ್ ಮಾಲೀಕರ ನಕಾರ.
ಪಟ್ಟು ಹಿಡಿದ ಮಾಲೀಕರು: ಟ್ರ್ಯಾಕ್ಟರ್ಗಳನ್ನು ಬಂಕ್ಗೆ ತಂದರೆ ಮಾತ್ರ ಡೀಸೆಲ್ ಎನ್ನುವ ಹಠ.
ಅನ್ನದಾತರ ಆಕ್ರೋಶ: ಹಗಲಿರುಳು ಕಷ್ಟಪಟ್ಟು ದುಡಿಯುವ ರೈತರಿಗೆ ಇಂಧನ ಸಿಗದೆ ಕೃಷಿ ಚಟುವಟಿಕೆಗಳಿಗೆ ಅಡ್ಡಿಯಾಗುತ್ತಿದೆ.
ಅಧಿಕಾರಿಗಳ ಮೌನ: ಜಿಲ್ಲಾಧಿಕಾರಿಗಳ ಆದೇಶದ ನೆಪ ಹೇಳಿ ರೈತರನ್ನು ಸತಾಯಿಸುತ್ತಿರುವ ಬಂಕ್ ಮಾಲೀಕರ ಕ್ರಮಕ್ಕೆ ಆಕ್ರೋಶ.
ಕೃಷಿಕರ ಪಾಲಿಗೆ ಡೀಸೆಲ್ ಎಂಬುದು ಕೇವಲ ಇಂಧನವಲ್ಲ, ಅದು ಅವರ ಹೊಲದ ಉಳುಮೆಗೆ ಜೀವನಾಡಿ. ಇಂತಹ ಸಮಯದಲ್ಲಿ ಜಿಲ್ಲಾಡಳಿತ ಮಧ್ಯಪ್ರವೇಶಿಸಿ, ರೈತರಿಗೆ ಯಾವುದೇ ತೊಂದರೆಯಾಗದಂತೆ ಸುಗಮವಾಗಿ ಡೀಸೆಲ್ ಸಿಗುವ ವ್ಯವಸ್ಥೆ ಮಾಡಬೇಕೆಂದು ಸ್ಥಳೀಯರು ಒತ್ತಾಯಿಸುತ್ತಿದ್ದಾರೆ. ಇಲ್ಲದಿದ್ದರೆ ಮುಂಬರುವ ದಿನಗಳಲ್ಲಿ ಪ್ರತಿಭಟನೆ ಹಾದಿ ಹಿಡಿಯಬೇಕಾಗುತ್ತದೆ ಎಂದು ರೈತ ಸಂಘಟನೆಗಳು ಎಚ್ಚರಿಕೆ ನೀಡಿವೆ.
ರೈತರ ಕಷ್ಟಗಳಿಗೆ ಸ್ಪಂದಿಸಬೇಕಾದವರು, ನಿಯಮಗಳ ನೆಪದಲ್ಲಿ ಅವರನ್ನು ಸತಾಯಿಸುವುದು ಎಷ್ಟರಮಟ್ಟಿಗೆ ಸರಿ? ಜಿಲ್ಲಾಧಿಕಾರಿಗಳು ಈ ವಿಚಾರವನ್ನು ಗಂಭೀರವಾಗಿ ಪರಿಗಣಿಸಿ ಸೂಕ್ತ ಕ್ರಮ ಕೈಗೊಳ್ಳಲೇಬೇಕಿದೆ.
