ರಾಮನಗರ: ರಾಜ್ಯ ರಾಜಕೀಯದ ಬಹುದೊಡ್ಡ ಕುರ್ಚಿ ಫೈಟ್ಗೆ ಕೊನೆಗೂ ಕ್ಲೈಮ್ಯಾಕ್ಸ್ ಸಿಕ್ಕಿದ್ದು, ಕನಕಪುರದ ಬಂಡೆ, ಕೆಪಿಸಿಸಿ ಅಧ್ಯಕ್ಷ ಡಿ.ಕೆ. ಶಿವಕುಮಾರ್ (DK Shivakumar) ಅವರು ಕರ್ನಾಟಕದ ಮುಂದಿನ ಮುಖ್ಯಮಂತ್ರಿ ಆಗೋದು ಬಹುತೇಕ ಖಚಿತವಾಗಿದೆ. ಇತ್ತ ಈ ಬಿಗ್ ನ್ಯೂಸ್ ಸಿಗುತ್ತಿದ್ದಂತೆ, ಅತ್ತ ಡಿಕೆಶಿ ಅವರ ಸ್ವಂತ ಜಿಲ್ಲೆಯಾದ ರಾಮನಗರದಲ್ಲಿ ಹಬ್ಬದ ವಾತಾವರಣ ಸೃಷ್ಟಿಯಾಗಿದೆ. ಹೈಕಮಾಂಡ್ ಅಧಿಕೃತವಾಗಿ ಹೆಸರು ಘೋಷಣೆ ಮಾಡುವುದಕ್ಕಿಂತ ಮುಂಚಿತವಾಗಿಯೇ ರಾಮನಗರದ ಕಾಂಗ್ರೆಸ್ ಕಾರ್ಯಕರ್ತರು ಮತ್ತು ಅಭಿಮಾನಿಗಳು ತಮ್ಮ ನೆಚ್ಚಿನ ನಾಯಕನಿಗೆ ಜೈಕಾರ ಹಾಕುತ್ತಾ ಸಂಭ್ರಮಾಚರಣೆ ಶುರು ಮಾಡಿದ್ದಾರೆ.
ಡಿಕೆಶಿ ಅವರ ಪಟ್ಟಾಭಿಷೇಕದ ಖುಷಿಯಲ್ಲಿ ಇಡೀ ರಾಮನಗರ ಸಿಟಿ ಫುಲ್ ರಂಗೇರಿದ್ದು, ನಗರದ ಪ್ರಮುಖ ರಸ್ತೆ ಹಾಗೂ ವೃತ್ತಗಳಲ್ಲಿ ನೂತನ ಮುಖ್ಯಮಂತ್ರಿಗೆ ಶುಭ ಕೋರುವ ಬೃಹತ್ ಕಟೌಟ್ಗಳು ಮತ್ತು ಬ್ಯಾನರ್ಗಳು ರಾರಾಜಿಸುತ್ತಿವೆ.
ಐಜೂರು ವೃತ್ತದಲ್ಲಿ 25 ಅಡಿಯ ದೈತ್ಯ ಕಟೌಟ್!
ರಾಮನಗರದ ಹೃದಯಭಾಗದಂತಿರುವ ಪ್ರಸಿದ್ಧ ಐಜೂರು ವೃತ್ತದಲ್ಲಿ ಕಾಂಗ್ರೆಸ್ ಕಾರ್ಯಕರ್ತರು ಡಿ.ಕೆ. ಶಿವಕುಮಾರ್ ಅವರ ಬರೋಬ್ಬರಿ 25 ಅಡಿ ಎತ್ತರದ ದೈತ್ಯ ಕಟೌಟ್ ಅನ್ನು ತಂದು ನಿಲ್ಲಿಸಿದ್ದಾರೆ. ದೂರದಿಂದ ನೋಡಿದರೂ ಎದ್ದು ಕಾಣುವ ಈ ಬೃಹತ್ ಕಟೌಟ್ ಸದ್ಯ ಇಡೀ ನಗರದ ಜನರ ಗಮನ ಸೆಳೆಯುತ್ತಿದೆ. ರಸ್ತೆಯಲ್ಲಿ ಹೋಗುವವರೆಲ್ಲಾ ಗಾಡಿ ನಿಲ್ಲಿಸಿ ಈ ಕಟೌಟ್ ಮುಂಭಾಗ ನಿಂತು ಸೆಲ್ಫಿ ತಗೆದುಕೊಳ್ಳುತ್ತಿದ್ದಾರೆ.
ಕೇವಲ ಕಟೌಟ್ ಅಷ್ಟೇ ಅಲ್ಲದೆ, ವೃತ್ತದ ಸುತ್ತಮುತ್ತ ನೂತನ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರಿಗೆ ಹಾರ್ದಿಕ ಅಭಿನಂದನೆ ಸಲ್ಲಿಸುವ ನೂರಾರು ಫ್ಲೆಕ್ಸ್ ಮತ್ತು ಬ್ಯಾನರ್ಗಳನ್ನು ಅಳವಡಿಸಲಾಗಿದೆ. ಇಡೀ ವೃತ್ತ ಈಗ ಹಸ್ತದ ಧ್ವಜಗಳು ಮತ್ತು ಡಿಕೆಶಿ ಪೋಸ್ಟರ್ಗಳಿಂದ ಕಂಗೊಳಿಸುತ್ತಿದೆ.
‘ಪಕ್ಷ ನಿಷ್ಠೆಗೆ ಸಂದ ಗೌರವ’ ಎಂದು ಜೈಕಾರ!
ಕಾರ್ಯಕರ್ತರು ಹಾಕಿರುವ ಈ ಬ್ಯಾನರ್ಗಳಲ್ಲಿ ಬರೆದಿರುವ ಟ್ಯಾಗ್ಲೈನ್ಗಳು ಸಖತ್ ಹೈಲೈಟ್ ಆಗುತ್ತಿವೆ. "ಪಕ್ಷ ನಿಷ್ಠೆಗೆ ಸಂದ ಗೌರವ", "ಕನಕಪುರದ ಬಂಡೆಗೆ ಒಲಿದ ಸಿಎಂ ಗದ್ದುಗೆ", "ಟ್ರಬಲ್ ಶೂಟರ್ಗೆ ಸಿಕ್ಕ ನೈಜ ಪ್ರತಿಫಲ" ಎಂಬಿತ್ಯಾದಿ ಬರಹಗಳ ಮೂಲಕ ಡಿಕೆಶಿ ಅವರ ಕಷ್ಟದ ದಿನಗಳ ಹೋರಾಟವನ್ನು ಅಭಿಮಾನಿಗಳು ನೆನೆದಿದ್ದಾರೆ.
ಕಾರ್ಯಕರ್ತರ ಭಾವುಕ ನುಡಿ: "ಪಕ್ಷ ಸಂಕಷ್ಟದಲ್ಲಿದ್ದಾಗ, ನಾಯಕರೆಲ್ಲಾ ದಿಕ್ಕು ತೋಚದೆ ಕುಳಿತಿದ್ದಾಗ ಡಿಕೆಶಿ ಅವರು ಕೆಪಿಸಿಸಿ ಸಾರಥ್ಯ ವಹಿಸಿಕೊಂಡು ಹಗಲು ರಾತ್ರಿ ಶ್ರಮಿಸಿದರು. ಜೈಲು, ಕೇಸ್, ಐಟಿ-ಇಡಿ ದಾಳಿ ಯಾವುದಕ್ಕೂ ಹೆದರದೆ ಪಕ್ಷವನ್ನು ಅಧಿಕಾರಕ್ಕೆ ತಂದರು. ಹಾಗಾಗಿ, ಈ ಸಿಎಂ ಪಟ್ಟ ಅವರ ಕಠಿಣ ಪರಿಶ್ರಮ ಮತ್ತು ಪಕ್ಷ ನಿಷ್ಠೆಗೆ ಸಿಕ್ಕ ಅಸಲಿ ಗೌರವ" ಎಂದು ರಾಮನಗರದ ಸ್ಥಳೀಯ ಕಾಂಗ್ರೆಸ್ ಮುಖಂಡರು ಸಖತ್ ಜೋಶ್ನಲ್ಲಿ ಹೇಳುತ್ತಿದ್ದಾರೆ.
ಅಧಿಕೃತ ಘೋಷಣೆಗೂ ಮುನ್ನವೇ ಸಿಎಂ ಬಿಲ್ಡಪ್!
ಸಾಮಾನ್ಯವಾಗಿ ಹೈಕಮಾಂಡ್ ದಿಲ್ಲಿಯಲ್ಲಿ ಪ್ರೆಸ್ ಮೀಟ್ ಮಾಡಿ ಅಧಿಕೃತವಾಗಿ ಹೊಸ ಸಿಎಂ ಹೆಸರನ್ನು ಪ್ರಕಟಿಸಿದ ಮೇಲೆ ಇಂತಹ ಬ್ಯಾನರ್, ಕಟೌಟ್ಗಳನ್ನು ಹಾಕಲಾಗುತ್ತದೆ. ಆದರೆ ರಾಮನಗರದ ಕೈ ಕಾರ್ಯಕರ್ತರಿಗೆ ತಮ್ಮ 'ಡಿಕೆ ಅಣ್ಣ' ಸಿಎಂ ಆಗಿಯೇ ಬಿಟ್ಟಿದ್ದಾರೆ ಅನ್ನೋ ನೂರು ಪರ್ಸೆಂಟ್ ಗ್ಯಾರಂಟಿ ಸಿಕ್ಕಿಬಿಟ್ಟಿದೆ. ಹಾಗಾಗಿಯೇ, ಹೈಕಮಾಂಡ್ನಿಂದ ಫೈನಲ್ ಅನೌನ್ಸ್ಮೆಂಟ್ ಬರುವ ಮುನ್ನವೇ "ನೂತನ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರಿಗೆ ಹಾರ್ದಿಕ ಶುಭಾಶಯಗಳು" ಎಂದು ಬರೆದು ದೊಡ್ಡ ಮಟ್ಟದ ಬಿಲ್ಡಪ್ ಕೊಡುತ್ತಿದ್ದಾರೆ.
ಇನ್ನು ಜೂನ್ 3 ರಂದು ಬೆಂಗಳೂರಿನ ರಾಜಭವನದಲ್ಲಿ ನಡೆಯಲಿರುವ ಅದ್ಧೂರಿ ಪ್ರಮಾಣ ವಚನ ಸ್ವೀಕಾರ ಸಮಾರಂಭಕ್ಕೆ ಸಾಕ್ಷಿಯಾಗಲು ರಾಮನಗರ ಮತ್ತು ಕನಕಪುರ ಭಾಗದಿಂದ ಸಾವಿರಾರು ಸಂಖ್ಯೆಯಲ್ಲಿ ವಾಹನಗಳ ಮೂಲಕ ರಾಜಧಾನಿಗೆ ತೆರಳಲು ಅಭಿಮಾನಿಗಳು ಈಗಾಗಲೇ ಭರ್ಜರಿ ಪ್ಲಾನ್ ಮಾಡಿಕೊಂಡಿದ್ದಾರೆ. ಒಟ್ಟಿನಲ್ಲಿ, ಸಿದ್ದರಾಮಯ್ಯ ಯುಗ ಮುಗಿದು ಡಿಕೆಶಿ ಅವರ ಹೊಸ ಆಡಳಿತದ ಸುವರ್ಣ ಯುಗ ಆರಂಭವಾಗ್ತಿದೆ ಅಂತ ರಾಮನಗರದ ಜನ ಫುಲ್ ಖುಷಿಯಲ್ಲಿದ್ದಾರೆ.
