ರಾಹುಲ್ ಪರ ನಿಂತಿದ್ದ ಸ್ಟಾಲಿನ್ ಕಾಲಕ್ಕೆ ಕಾಂಗ್ರೆಸ್ ಶಾಕ್ - ಸ್ಟಾಲಿನ್ ಕೈಬಿಟ್ಟು ವಿಜಯ್ ಬೆಂಬಲಿಸಲು ಕಾರಣವೇನು?

ದಶಕಗಳಿಂದ ದೋಸ್ತಿಗಳಾಗಿದ್ದ ಕಾಂಗ್ರೆಸ್ ಮತ್ತು ಡಿಎಂಕೆ (DMK) ಮೈತ್ರಿ ಈಗ ಅಧಿಕೃತವಾಗಿ ಅಂತ್ಯಗೊಂಡಿದೆ. ರಾಹುಲ್ ಗಾಂಧಿಯವರನ್ನು ಪ್ರಧಾನಿ ಅಭ್ಯರ್ಥಿ ಎಂದು ಮೊದಲು ಘೋಷಿಸಿದ್ದ ಎಂ.ಕೆ. ಸ್ಟಾಲಿನ್ ಅವರಿಗೇ ಈಗ ಕಾಂಗ್ರೆಸ್ ಶಾಕ್ ನೀಡಿದೆ. ಅಷ್ಟಕ್ಕೂ ಈ 'ಕೈ' ಪಡೆ ಡಿಎಂಕೆ ಜೊತೆಗಿನ ಸ್ನೇಹ ಕಡಿದುಕೊಂಡು, ನಟ ವಿಜಯ್ ಅವರ ಟಿವಿಕೆ (TVK) ಪಕ್ಷದ ಹಿಂದೆ ಹೋಗಿದ್ದು ಯಾಕೆ? ಇದರ ಕಂಪ್ಲೀಟ್ ಇತಿಹಾಸ ಮತ್ತು ಇಂದಿನ ಅಪ್ಡೇಟ್ ಇಲ್ಲಿದೆ ನೋಡಿ.

ಶತ್ರುತ್ವದಿಂದ ಆರಂಭವಾಗಿದ್ದ ಪಯಣ

1940 ರಿಂದ 60ರ ದಶಕದಲ್ಲಿ ಕಾಂಗ್ರೆಸ್ ಮತ್ತು ಡಿಎಂಕೆ ಕಡು ವೈರಿಗಳಾಗಿದ್ದವು. ಕಾಂಗ್ರೆಸ್ ಅನ್ನು "ಉತ್ತರ ಭಾರತದ ಪಕ್ಷ" ಎಂದು ಕರೆದು ಡಿಎಂಕೆ ಹೋರಾಟ ಮಾಡಿತ್ತು. 1967ರಲ್ಲಿ ಅಣ್ಣಾದೊರೈ ನೇತೃತ್ವದಲ್ಲಿ ಡಿಎಂಕೆ ಮೊದಲ ಬಾರಿಗೆ ಕಾಂಗ್ರೆಸ್ ಸೋಲಿಸಿ ಅಧಿಕಾರ ಹಿಡಿಯಿತು. ಅಂದಿನಿಂದ ಇಂದಿನವರೆಗೆ ತಮಿಳುನಾಡಿನಲ್ಲಿ ಕಾಂಗ್ರೆಸ್ ಸ್ವಂತ ಬಲದ ಮೇಲೆ ಅಧಿಕಾರಕ್ಕೆ ಬರಲೇ ಇಲ್ಲ.

ತುರ್ತು ಪರಿಸ್ಥಿತಿ ಮತ್ತು ರಾಜೀವ್ ಗಾಂಧಿ ಹ*ತ್ಯೆ

70ರ ದಶಕದಲ್ಲಿ ಇಂದಿರಾ ಗಾಂಧಿ ಮತ್ತು ಕರುಣಾನಿಧಿ ಮೈತ್ರಿ ಮಾಡಿಕೊಂಡರಾದರೂ, ತುರ್ತು ಪರಿಸ್ಥಿತಿ ಸಮಯದಲ್ಲಿ ಇಂದಿರಾ ಅವರು ಡಿಎಂಕೆ ಸರ್ಕಾರ ವಜಾ ಮಾಡಿದ್ದು ಬಿರುಕು ಮೂಡಿಸಿತು. ಇನ್ನು 1991ರಲ್ಲಿ ರಾಜೀವ್ ಗಾಂಧಿ ಹ*ತ್ಯೆಯಾದಾಗ, ಡಿಎಂಕೆಗೆ ಎಲ್‌ಟಿಟಿಇ (LTTE) ಮೇಲೆ ಮೃದುಧೋರಣೆ ಇದೆ ಎಂದು ಕಾಂಗ್ರೆಸ್ ಸ್ನೇಹ ಕಡಿದುಕೊಂಡಿತ್ತು.

ಯುಪಿಎ ಸುವರ್ಣ ಕಾಲ ಮತ್ತು 2G ಕಳಂಕ

2004ರಲ್ಲಿ ಸೋನಿಯಾ ಗಾಂಧಿ ಮತ್ತು ಕರುಣಾನಿಧಿ ಕೈಜೋಡಿಸಿದಾಗ ದೋಸ್ತಿ ಭರ್ಜರಿಯಾಗಿತ್ತು. ಯುಪಿಎ ಸರ್ಕಾರದಲ್ಲಿ ಡಿಎಂಕೆ ದೊಡ್ಡ ಪಾಲುದಾರ ಪಕ್ಷವಾಗಿತ್ತು. ಆದರೆ 2G ಹಗರಣದಲ್ಲಿ ಎ.ರಾಜಾ ಮತ್ತು ಕನಿಮೊಳಿ ಜೈಲು ಸೇರಿದ್ದು ಮೈತ್ರಿಗೆ ಕಪ್ಪು ಚುಕ್ಕೆಯಾಯಿತು. 2013ರಲ್ಲಿ ಶ್ರೀಲಂಕಾ ತಮಿಳರ ವಿಚಾರವಾಗಿ ಈ ಮೈತ್ರಿ ಮುರಿದುಬಿದ್ದಿತ್ತು.

ಸ್ಟಾಲಿನ್ - ರಾಹುಲ್ ನಿಕಟ ಸ್ನೇಹ

2019 ರಿಂದ 2024ರವರೆಗೆ ಸ್ಟಾಲಿನ್ ಮತ್ತು ಕಾಂಗ್ರೆಸ್ ಅತ್ಯಂತ ಆಪ್ತರಾಗಿದ್ದರು. ರಾಹುಲ್ ಗಾಂಧಿಯವರೇ ನಮ್ಮ ಮುಂದಿನ ಪ್ರಧಾನಿ ಎಂದು ಸ್ಟಾಲಿನ್ ಘೋಷಿಸಿದ್ದರು. 2019ರ ಲೋಕಸಭೆ ಮತ್ತು 2021ರ ಚುನಾವಣೆಯಲ್ಲಿ ಇವರು ಭರ್ಜರಿ ಜಯ ಗಳಿಸಿದ್ದರು.

ಈಗ ಮೈತ್ರಿ ಮುರಿಯಲು ಅಸಲಿ ಕಾರಣಗಳೇನು?

ಇತ್ತೀಚೆಗೆ ನಡೆದ 2026ರ ವಿಧಾನಸಭಾ ಚುನಾವಣೆಯಲ್ಲಿ ಸ್ಟಾಲಿನ್ ನೇತೃತ್ವದ ಮೈತ್ರಿಕೂಟ ಸೋತು ಸುಣ್ಣವಾಗಿದೆ. ಸ್ವತಃ ಮುಖ್ಯಮಂತ್ರಿ ಸ್ಟಾಲಿನ್ ತಮ್ಮ ಭದ್ರಕೋಟೆ ಕೊಳತ್ತೂರಿನಲ್ಲೇ ಸೋತಿದ್ದು ಮೈತ್ರಿಪಕ್ಷಗಳ ನಡುವೆ ಕಿತ್ತಾಟಕ್ಕೆ ನಾಂದಿ ಹಾಡಿತು.

ನಟ ವಿಜಯ್ ಎಂಟ್ರಿ: ಸೂಪರ್ ಸ್ಟಾರ್ ವಿಜಯ್ ಅವರ ಟಿವಿಕೆ (TVK) ಪಕ್ಷ 108 ಸ್ಥಾನ ಗೆದ್ದು ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿತು. ಮ್ಯಾಜಿಕ್ ಸಂಖ್ಯೆ (118) ತಲುಪಲು ಅವರಿಗೆ ಬೇರೆಯವರ ಬೆಂಬಲ ಬೇಕಿತ್ತು.

ಅಧಿಕಾರದ ಹಪಾಹಪಿ: ಕಾಂಗ್ರೆಸ್ ಮೊದಲಿನಿಂದಲೂ ಸರ್ಕಾರದಲ್ಲಿ ಅಧಿಕಾರ ಹಂಚಿಕೆ (Power Sharing) ಕೇಳುತ್ತಿತ್ತು, ಆದರೆ ಡಿಎಂಕೆ ಕೊಡುತ್ತಿರಲಿಲ್ಲ. ಈಗ ಸೋತ ಮೇಲೆ ಡಿಎಂಕೆ ಜೊತೆಗಿದ್ದರೆ ಲಾಭವಿಲ್ಲ ಎಂದು ಕಾಂಗ್ರೆಸ್ ನಿರ್ಧರಿಸಿತು.

ಹೊಸ ಸರ್ಕಾರ ರಚನೆ: ಜಾತ್ಯತೀತ ಸರ್ಕಾರದ ಹೆಸರಿನಲ್ಲಿ ವಿಜಯ್ ಅವರ ಟಿವಿಕೆ ಪಕ್ಷಕ್ಕೆ ಬೆಂಬಲ ನೀಡಿ, ತಮಿಳುನಾಡಿನ ಹೊಸ ಸರ್ಕಾರದಲ್ಲಿ ಭಾಗಿಯಾಗಲು ಕಾಂಗ್ರೆಸ್ ಹೈಕಮಾಂಡ್ ಗ್ರೀನ್ ಸಿಗ್ನಲ್ ನೀಡಿದೆ.

ರಾಹುಲ್ ಗಾಂಧಿಯವರ ಪರವಾಗಿ ಧ್ವನಿ ಎತ್ತಿದ್ದ ಸ್ಟಾಲಿನ್ ಈಗ ಏಕಾಂಗಿಯಾಗಿದ್ದಾರೆ. ತಮಿಳುನಾಡು ರಾಜಕೀಯದಲ್ಲಿ ಈಗ 'ವಿಜಯ್-ಕಾಂಗ್ರೆಸ್' ಯುಗ ಶುರುವಾಗಿದೆ.