ರಾಜಧಾನಿ ಬೆಂಗಳೂರಿನಲ್ಲಿ ಮತ್ತೊಂದು ಭೀಕರ ಕೊ*ಲೆ ಪ್ರಕರಣ ಬೆಳಕಿಗೆ ಬಂದಿದ್ದು, ಪ್ರೀತಿ ಮತ್ತು ನಂಬಿಕೆಯ ಹೆಸರಿನಲ್ಲಿ ಯುವತಿಯೊಬ್ಬಳು ದುರಂತ ಅಂತ್ಯ ಕಂಡಿದ್ದಾಳೆ. ಬೆಂಗಳೂರಿನ ತಿಗಳರಪಾಳ್ಯದ ತುಳಸಿನಗರದಲ್ಲಿ ಈ ಘಟನೆ ನಡೆದಿದ್ದು, ಈಗಾಗಲೇ ವಿವಾಹಿತನಾಗಿದ್ದ ವ್ಯಕ್ತಿಯೊಬ್ಬ ತಾನು ಗುಟ್ಟಾಗಿ ಮದುವೆಯಾಗಿದ್ದ ಪ್ರೇಯಸಿಯನ್ನು ಕತ್ತು ಹಿಸುಕಿ ಬರ್ಬರವಾಗಿ ಕೊ*ಲೆ ಮಾಡಿದ್ದಾನೆ. ಆ ಬಳಿಕ ತಾನೂ ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ್ದು, ಸದ್ಯ ಪೊಲೀಸರ ವಶದಲ್ಲಿದ್ದಾನೆ.
ಮೃತರ ಗುರುತು ಮತ್ತು ಹಿನ್ನೆಲೆ
ಕೊಲೆಯಾದ ದುರ್ದೈವಿ ಯುವತಿಯನ್ನು ಭವಾನಿ (22) ಎಂದು ಗುರುತಿಸಲಾಗಿದೆ. ಈಕೆ ಮೊಬೈಲ್ ಶೋ ರೂಂ ಒಂದರಲ್ಲಿ ಕೆಲಸ ಮಾಡುತ್ತಿದ್ದಳು. ಈ ಕೆಲಸದಲ್ಲಿದ್ದಾಗಲೇ ಆಕೆಗೆ ಚಂದನ್ ಅಲಿಯಾಸ್ ಚಂದ್ರಶೇಖರ್ ಎಂಬಾತನ ಪರಿಚಯವಾಗಿತ್ತು. ಈ ಪರಿಚಯ ದಿನಕಳೆದಂತೆ ಪ್ರೀತಿಗೆ ತಿರುಗಿತ್ತು.
ಆರೋಪಿ ಚಂದ್ರಶೇಖರ್ಗೆ ಹತ್ತು ವರ್ಷಗಳ ಹಿಂದೆಯೇ ಮದುವೆಯಾಗಿದ್ದು, ಆತನಿಗೆ 6 ವರ್ಷದ ಒಂದು ಮಗುವೂ ಇದೆ. ಈ ಕಹಿ ಸತ್ಯವನ್ನು ಮುಚ್ಚಿಟ್ಟು ಅಥವಾ ಭವಾನಿಯನ್ನು ಒಪ್ಪಿಸಿ, ಕಳೆದ ನಾಲ್ಕೈದು ವರ್ಷಗಳಿಂದ ಆಕೆಯೊಂದಿಗೆ ಪ್ರೀತಿಯ ನಾಟಕವಾಡಿದ್ದ. ಅಷ್ಟೇ ಅಲ್ಲದೆ, ಕಳೆದ ಒಂದು ವರ್ಷದ ಹಿಂದೆ ಇವರಿಬ್ಬರೂ ಯಾರಿಗೂ ತಿಳಿಯದಂತೆ ಗುಟ್ಟಾಗಿ ಮದುವೆಯೂ ಆಗಿದ್ದರು.
ಕೊ*ಲೆಗೆ ಕಾರಣವಾದ ಎಂಗೇಜ್ಮೆಂಟ್ ವಿಚಾರ
ಭವಾನಿ ಮತ್ತು ಚಂದ್ರಶೇಖರ್ ಅವರ ಗುಪ್ತ ಮದುವೆಯ ವಿಷಯ ಭವಾನಿಯ ಕುಟುಂಬಸ್ಥರಿಗೆ ತಿಳಿದಿರಲಿಲ್ಲ. ಹೀಗಾಗಿ, ಭವಾನಿಗೆ ಬೇರೆ ಕಡೆ ಮದುವೆ ಮಾಡಲು ಪೋಷಕರು ನಿರ್ಧರಿಸಿದ್ದರು. ಮುಂದಿನ ವಾರ ಆಕೆಯ ಎಂಗೇಜ್ಮೆಂಟ್ (ನಿಶ್ಚಿತಾರ್ಥ) ನಡೆಸಲು ಮನೆಯವರು ಎಲ್ಲಾ ಸಿದ್ಧತೆಗಳನ್ನು ಮಾಡಿಕೊಳ್ಳುತ್ತಿದ್ದರು.
ಈ ವಿಷಯ ತಿಳಿದ ಚಂದ್ರಶೇಖರ್ ತೀವ್ರ ಆಕ್ರೋಶಗೊಂಡಿದ್ದ. ನಿನ್ನೆ ರಾತ್ರಿ ಭವಾನಿ ವಾಸವಿದ್ದ ರೂಂಗೆ ತೆರಳಿದ ಆತ, ಈ ಬಗ್ಗೆ ಸುದೀರ್ಘ ಚರ್ಚೆ ನಡೆಸಿದ್ದಾನೆ. "ನಮ್ಮ ಮನೆಯಲ್ಲಿ ವಿಷಯ ಗೊತ್ತಾದರೆ ದೊಡ್ಡ ಜಗಳವಾಗುತ್ತದೆ, ತಂದೆ ಒಪ್ಪುವುದಿಲ್ಲ" ಎಂದು ಭವಾನಿ ಅಳಲು ತೋಡಿಕೊಂಡಿದ್ದಾಳೆ. ಇದರಿಂದ ರೋಸಿಹೋದ ಚಂದ್ರಶೇಖರ್, "ಹಾಗಾದರೆ ನೀನು ಬೇರೆಯವನನ್ನು ಮದುವೆಯಾಗಬೇಡ, ಇಬ್ಬರೂ ಒಟ್ಟಿಗೇ ವಿಷ ಕುಡಿದು ಆತ್ಮಹತ್ಯೆ ಮಾಡಿಕೊಳ್ಳೋಣ" ಎಂದು ಭವಾನಿಯನ್ನು ಒಪ್ಪಿಸಿದ್ದಾನೆ.
ಆತ್ಮಹ*ತ್ಯೆ ನಿರ್ಧಾರದ ನಡುವೆ ನಡೆದ ಹತ್ಯೆ
ಇಬ್ಬರ ಒಪ್ಪಂದದಂತೆ ಇಂದು ಮುಂಜಾನೆ ಸುಮಾರು 7.30ರ ವೇಳೆಗೆ ಇಬ್ಬರೂ ವಿಷ ಕುಡಿದಿದ್ದಾರೆ. ಆದರೆ ವಿಷ ಕುಡಿದ ತಕ್ಷಣ ಅದರ ತೀವ್ರತೆ ತಡೆಯಲಾಗದೆ ಭವಾನಿ ವಾಂತಿ ಮಾಡಿಕೊಂಡಿದ್ದಾಳೆ. ತಾನು ಬದುಕಿ ಭವಾನಿ ಸತ್ತರೆ ಅಥವಾ ಭವಾನಿ ಬದುಕಿ ಬೇರೆಯವನನ್ನು ಮದುವೆಯಾದರೆ ಎಂಬ ಸಂಶಯ ಹಾಗೂ ಹತಾಶೆಯಿಂದ ಚಂದ್ರಶೇಖರ್, ವಾಂತಿ ಮಾಡಿಕೊಳ್ಳುತ್ತಿದ್ದ ಭವಾನಿಯ ಕುತ್ತಿಗೆಯನ್ನು ಬಲವಾಗಿ ಹಿಸುಕಿ, ಉಸಿರುಗಟ್ಟಿಸಿ ಸ್ಥಳದಲ್ಲೇ ಕೊಲೆ ಮಾಡಿದ್ದಾನೆ. ಆ ಬಳಿಕ ತಾನೂ ಹೆಚ್ಚಿನ ಪ್ರಮಾಣದಲ್ಲಿ ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿ ನರಳಾಡಿದ್ದಾನೆ.
ಇನ್ಸ್ಟಾಗ್ರಾಂ ಸ್ಟೋರಿಯಿಂದ ಹೊರಬಿದ್ದ ಸತ್ಯ
ಕೊ*ಲೆ ಮಾಡುವ ಮುನ್ನವೇ ಚಂದ್ರಶೇಖರ್ ಒಂದು ಸಂಚು ರೂಪಿಸಿದ್ದ. ಇವರಿಬ್ಬರ ಗುಪ್ತ ಮದುವೆಯ ಮೊದಲ ವರ್ಷದ ವಾರ್ಷಿಕೋತ್ಸವ (1st Anniversary) ಎಂಬ ನೆಪದಲ್ಲಿ, ಭವಾನಿಯ ಇನ್ಸ್ಟಾಗ್ರಾಂ ಅಕೌಂಟ್ನಿಂದಲೇ ಅವರಿಬ್ಬರೂ ಒಟ್ಟಿಗಿರುವ ಫೋಟೋವನ್ನು ಇನ್ಸ್ಟಾ ಸ್ಟೋರಿಯಲ್ಲಿ ಅಪ್ಲೋಡ್ ಮಾಡಿದ್ದ.
ಬೆಳಗ್ಗೆ ಇದನ್ನು ಗಮನಿಸಿದ ಭವಾನಿಯ ಅಕ್ಕ ಶಾರದ, ತಕ್ಷಣ ಅದರ ಸ್ಕ್ರೀನ್ಶಾಟ್ ತೆಗೆದು ತಾಯಿ ಹಾಗೂ ತಂದೆ ಶ್ರೀನಿವಾಸ್ ಅವರಿಗೆ ಕಳುಹಿಸಿದ್ದಾರೆ. ಆತಂಕಗೊಂಡ ತಂದೆ ಶ್ರೀನಿವಾಸ್ ಬೆಳಗ್ಗೆಯಿಂದಲೇ ಮಗಳು ಭವಾನಿಗೆ ಸತತವಾಗಿ ಫೋನ್ ಕರೆ ಮಾಡಿದ್ದಾರೆ. ಆದರೆ ಭವಾನಿ ಫೋನ್ ರಿಸೀವ್ ಮಾಡದಿದ್ದಾಗ ಅವರಿಗೆ ತೀವ್ರ ಅನುಮಾನ ಮೂಡಿದೆ.
ಮನೆ ಮಾಲೀಕರು ಹೋದಾಗ ಕಂಡ ಭೀಕರ ದೃಶ್ಯ
ಮಗಳು ಕರೆ ಸ್ವೀಕರಿಸದಿದ್ದಾಗ ತಂದೆ ಶ್ರೀನಿವಾಸ್ ತಕ್ಷಣವೇ ಭವಾನಿ ವಾಸವಿದ್ದ ಮನೆ ಮಾಲೀಕರಿಗೆ (ಓನರ್) ಕರೆ ಮಾಡಿ ವಿಷಯ ತಿಳಿಸಿ, ರೂಂ ಬಳಿ ಹೋಗಿ ನೋಡುವಂತೆ ವಿನಂತಿಸಿದ್ದಾರೆ. ಮನೆ ಮಾಲೀಕರು ಭವಾನಿ ಇದ್ದ ರೂಂ ಬಳಿ ಹೋಗಿ ನೋಡಿದಾಗ ಒಳಗಿನಿಂದ ಬಾಗಿಲು ಲಾಕ್ ಆಗಿತ್ತು ಮತ್ತು ಒಳಗಿನಿಂದ ಯಾರೋ ನರಳಾಡುತ್ತಿರುವ ಶಬ್ದ ಕೇಳಿಸಿದೆ. ತಕ್ಷಣವೇ ಬಾಗಿಲು ಮುರಿದು ಒಳಹೋದಾಗ ಇಡೀ ಘಟನೆ ಬೆಳಕಿಗೆ ಬಂದಿದೆ. ಅಲ್ಲಿ ಭವಾನಿ ಶವವಾಗಿ ಮಲಗಿದ್ದರೆ, ಆರೋಪಿ ಚಂದ್ರಶೇಖರ್ ವಿಷ ಕುಡಿದು ಒದ್ದಾಡುತ್ತಿದ್ದ.
ಮನೆ ಮಾಲೀಕರು ನೀಡಿದ ಮಾಹಿತಿ ಮೇರೆಗೆ ಸ್ಥಳಕ್ಕೆ ಧಾವಿಸಿದ ಬ್ಯಾಡರಹಳ್ಳಿ ಪೊಲೀಸ್ ಠಾಣೆಯ ಪೊಲೀಸರು ಭವಾನಿ ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ರವಾನಿಸಿದ್ದಾರೆ. ಇನ್ನು ತೀವ್ರವಾಗಿ ನರಳಾಡುತ್ತಿದ್ದ ಆರೋಪಿ ಚಂದ್ರಶೇಖರ್ನನ್ನು ಪೊಲೀಸರು ವಶಕ್ಕೆ ಪಡೆದು ತಕ್ಷಣವೇ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಸದ್ಯ ಚಿಕಿತ್ಸೆಯ ನಂತರ ಆರೋಪಿ ಚಂದ್ರಶೇಖರ್ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ ಎಂದು ವೈದ್ಯರು ತಿಳಿಸಿದ್ದಾರೆ. ಬ್ಯಾಡರಹಳ್ಳಿ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕಾನೂನು ಕ್ರಮ ಕೈಗೊಂಡಿದ್ದಾರೆ.
