ಕ್ಷಿಪಣಿಗಳ ಅಬ್ಬರದ ನಡುವೆ ನಡುಗುತ್ತಿದೆ ಆರ್ಥಿಕತೆ - ಅಸಲಿಗೆ ಯುದ್ಧದ ವೆಚ್ಚ ಕೇಳಿದರೆ ಬೆಚ್ಚಿಬೀಳ್ತೀರಾ!!

ಮಧ್ಯಪ್ರಾಚ್ಯದಲ್ಲಿ ಅಮೆರಿಕವು ಹೊಸದೊಂದು ಭೀಕರ ಯುದ್ಧಕ್ಕೆ ನಾಂದಿ ಹಾಡಿದೆ. ಆದರೆ ಈ 'ಆಪರೇಷನ್ ಎಪಿಕ್ ಫ್ಯೂರಿ' ಕೇವಲ ಶತ್ರುಗಳ ನಾಶಕ್ಕೆ ಸೀಮಿತವಾಗಿಲ್ಲ, ಇದು ಅಮೆರಿಕದ ಬೊಕ್ಕಸಕ್ಕೂ ಭಾರಿ ಪೆಟ್ಟು ನೀಡುತ್ತಿದೆ. ಯುದ್ಧದಲ್ಲಿ ಸೈನಿಕರ ಪ್ರಾಣಹಾನಿಯ ಜೊತೆಗೆ, ಈಗ ಆರ್ಥಿಕ ತಜ್ಞರು ಅಮೆರಿಕದ ರಾಷ್ಟ್ರೀಯ ಸಾಲವು ಮಿತಿಮೀರಬಹುದು ಎಂದು ಎಚ್ಚರಿಕೆ ನೀಡುತ್ತಿದ್ದಾರೆ.

ಒಂದೇ ತಿಂಗಳಲ್ಲಿ ₹18.87 ಲಕ್ಷ ಕೋಟಿ ನಷ್ಟ?

ಪೆನ್ ವಾರ್ಟನ್ ಬಜೆಟ್ ಮಾಡೆಲ್‌ನ (PWBM) ನಿರ್ದೇಶಕ ಕೆಂಟ್ ಸ್ಮೆಟರ್ಸ್ ಅವರ ವಿಶ್ಲೇಷಣೆಯ ಪ್ರಕಾರ, ಈ ಯುದ್ಧವು ಕೇವಲ ಒಂದು ತಿಂಗಳು ಮುಂದುವರಿದರೂ ಅಮೆರಿಕದ ಆರ್ಥಿಕತೆಯಿಂದ ಸುಮಾರು $210 ಬಿಲಿಯನ್ (ಅಂದಾಜು ₹18.87 ಲಕ್ಷ ಕೋಟಿ) ಹಣ ಖಾಲಿಯಾಗಲಿದೆ. ಯುದ್ಧದ ಮೊದಲ 24 ಗಂಟೆಗಳ ದಾಳಿಯ ವೆಚ್ಚವೇ ಬರೋಬ್ಬರಿ ₹6,900 ಕೋಟಿ ಎಂದು ಅಂದಾಜಿಸಲಾಗಿದೆ.

ಯುದ್ಧದ ದುಬಾರಿ ಲೆಕ್ಕಾಚಾರ ಇಲ್ಲಿದೆ

ಯುದ್ಧದಲ್ಲಿ ಬಳಸುತ್ತಿರುವ ಒಂದೊಂದು ಅಸ್ತ್ರವೂ ಕೋಟ್ಯಂತರ ರೂಪಾಯಿ ಬೆಲೆಬಾಳುವಂತದ್ದು. ಅದರ ವಿವರ ಹೀಗಿದೆ:

• ಬಿ-2 ಸ್ಟೆಲ್ತ್ ಬಾಂಬರ್‌ಗಳು: ಕೇವಲ ನಾಲ್ಕು ವಿಮಾನಗಳ ಹಾರಾಟ ಮತ್ತು ನಿರ್ವಹಣೆಗೆ $30.2 ಮಿಲಿಯನ್ ಖರ್ಚಾಗಿದೆ.
• ಟೊಮಾಹಾಕ್ ಕ್ಷಿಪಣಿಗಳು: ಅಮೆರಿಕ ಈಗಾಗಲೇ ಸುಮಾರು 200 ಕ್ಷಿಪಣಿಗಳನ್ನು ಉಡಾಯಿಸಿದ್ದು, ಇವುಗಳ ಬೆಲೆ $340.4 ಮಿಲಿಯನ್ (₹3,000 ಕೋಟಿಗೂ ಅಧಿಕ).
• ಯುದ್ಧ ನೌಕೆಗಳು: ಯುಎಸ್ಎಸ್ ಜೆರಾಲ್ಡ್ ಆರ್. ಫೋರ್ಡ್ ನಂತಹ ಬೃಹತ್ ಯುದ್ಧ ನೌಕೆಗಳ ಕಾರ್ಯಾಚರಣೆಗೆ ದಿನಕ್ಕೆ ಅಂದಾಜು $15 ಮಿಲಿಯನ್ ಖರ್ಚಾಗುತ್ತಿದೆ.

ಯುದ್ಧ ಆರಂಭಕ್ಕೂ ಮೊದಲೇ ₹5,556 ಕೋಟಿ ವ್ಯಯ

ಮೊದಲ ಕ್ಷಿಪಣಿ ಉಡಾವಣೆಯಾಗುವ ಮೊದಲೇ ಅಮೆರಿಕದ ತೆರಿಗೆದಾರರ ಹಣ ಹರಿದುಹೋಗಿತ್ತು. ಯುದ್ಧಕ್ಕೆ ಬೇಕಾದ ತಯಾರಿಗಾಗಿ, ಅಂದರೆ ವಿಮಾನಗಳ ಮರುಹಂಚಿಕೆ, ನೌಕಾ ಹಡಗುಗಳ ನಿಯೋಜನೆ ಮತ್ತು ಮದ್ದುಗುಂಡುಗಳ ಸಂಗ್ರಹಣೆಗಾಗಿ ಸುಮಾರು $630 ಮಿಲಿಯನ್ (₹5,556 ಕೋಟಿ) ಖರ್ಚು ಮಾಡಲಾಗಿತ್ತು. ಇದರಲ್ಲಿ ಥಾಡ್ (THAAD) ಮತ್ತು ಪೇಟ್ರಿಯಾಟ್ ಕ್ಷಿಪಣಿ ರಕ್ಷಣಾ ವ್ಯವಸ್ಥೆಗಳನ್ನು ಸ್ಥಳಾಂತರಿಸುವ ವೆಚ್ಚವೂ ಸೇರಿದೆ.

ಬಜೆಟ್ ಮೇಲೆ ಯುದ್ಧದ ಪ್ರಭಾವ

ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು "ನಾವು ನಿಗದಿತ ಸಮಯಕ್ಕಿಂತ ಮುಂದಿದ್ದೇವೆ" ಎಂದು ಹೇಳಿದ್ದರೂ, ಯುದ್ಧವು 5 ವಾರಗಳ ಕಾಲ ನಡೆದರೆ ಅದರ ವೆಚ್ಚ ಭರಿಸುವುದು ಸುಲಭವಲ್ಲ. ಈ $210 ಬಿಲಿಯನ್ ವೆಚ್ಚವನ್ನು ಎರಡು ಭಾಗಗಳಾಗಿ ನೋಡಬಹುದು:

• ನೇರ ಸೇನಾ ವೆಚ್ಚ ($95 ಬಿಲಿಯನ್): ಇದು ಕಾರ್ಯಾಚರಣೆ, ಮದ್ದುಗುಂಡುಗಳ ಖರೀದಿ ಮತ್ತು ಯುದ್ಧದಲ್ಲಿ ನಷ್ಟವಾದ ಎಫ್-15ಇ (F-15E) ಜೆಟ್‌ಗಳ ಬದಲಿಗೆ ಹೊಸದನ್ನು ತರುವ ವೆಚ್ಚವಾಗಿದೆ.
• ಆರ್ಥಿಕ ಪರಿಣಾಮ ($115 ಬಿಲಿಯನ್): ತೈಲ ಬೆಲೆ ಏರಿಕೆ ಮತ್ತು ಹಾರ್ಮುಜ್ ಜಲಸಂಧಿಯ ದಿಗ್ಬಂಧನದಿಂದ ಮಾರುಕಟ್ಟೆಯಲ್ಲಿ ಉಂಟಾಗುವ ಏರುಪೇರುಗಳು ಅಮೆರಿಕದ ಆರ್ಥಿಕ ಸ್ಥಿರತೆಗೆ ದೊಡ್ಡ ಸವಾಲಾಗಿವೆ.

ಟ್ರಂಪ್ ಸರ್ಕಾರವು ವಿದೇಶಿ ವ್ಯಾಪಾರದ ಮೇಲೆ ಸುಂಕ ವಿಧಿಸುವ ಮೂಲಕ ಸಂಗ್ರಹಿಸಿದ್ದ ಸುಮಾರು $133.5 ಬಿಲಿಯನ್ ಹಣವು ಈಗ ಈ ಯುದ್ಧದ ವೆಚ್ಚದ ಮುಂದೆ ಅಲ್ಪ ಎನಿಸುತ್ತಿದೆ. ಯುದ್ಧ ತೀವ್ರಗೊಂಡಂತೆ ಅಮೆರಿಕದ ಆಂತರಿಕ ಆರ್ಥಿಕ ಸ್ಥಿತಿ ಅಪಾಯಕ್ಕೆ ಸಿಲುಕುವ ಸಾಧ್ಯತೆ ದಟ್ಟವಾಗಿದೆ.