ಇರಾನ್ ಜೊತೆಗಿನ ಯುದ್ಧ ನಿಲ್ಲಿಸಲು ಜೆಡಿ ವ್ಯಾನ್ಸ್ ಎಂಟ್ರಿ - ಪಾಕಿಸ್ತಾನಕ್ಕೆ ಅಮೆರಿಕ ಉಪಾಧ್ಯಕ್ಷರ ತುರ್ತು ಭೇಟಿ?

ಅಮೆರಿಕ ಮತ್ತು ಇರಾನ್ ನಡುವಿನ ಜಗಳ ಈಗ ಐದನೇ ವಾರಕ್ಕೆ ಕಾಲಿಟ್ಟಿದೆ. ರಕ್ತಪಾತ, ಮಿಸೈಲ್ ದಾಳಿಗಳಿಂದಾಗಿ ಇಡೀ ಮಧ್ಯಪ್ರಾಚ್ಯ ನಲುಗಿ ಹೋಗಿದೆ. ಈ ಭೀಕರ ಯುದ್ಧಕ್ಕೆ ಒಂದು 'ಎಂಡ್ ಕಾರ್ಡ್' ಹಾಕೋಕೆ ಈಗ ಅಮೆರಿಕದ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ (JD Vance) ಅವರೇ ಖುದ್ದಾಗಿ ಫೀಲ್ಡಿಗಿಳಿದಿದ್ದಾರೆ. ಹೌದು, ಈ ವಾರಾಂತ್ಯದಲ್ಲಿ ಅವರು ಪಾಕಿಸ್ತಾನಕ್ಕೆ ಭೇಟಿ ನೀಡಿ ಇರಾನ್ ಜೊತೆ ಗುಪ್ತ ಮಾತುಕತೆ ನಡೆಸುವ ಸಾಧ್ಯತೆ ಇದೆ ಎಂದು ವರದಿಗಳು ಹೇಳ್ತಿವೆ.

ಇರಾನ್ ಅಧಿಕಾರಿಗಳು ಅಮೆರಿಕದ ಇತರ ಪ್ರತಿನಿಧಿಗಳಾದ ಸ್ಟೀವ್ ವಿಟ್ಕಾಫ್ ಮತ್ತು ಜಾರೆಡ್ ಕುಶ್ನರ್ ಜೊತೆ ಮಾತನಾಡಲು ಅಷ್ಟಾಗಿ ಆಸಕ್ತಿ ತೋರಿಸುತ್ತಿಲ್ಲವಂತೆ. ಈ ಮಧ್ಯೆ ಪಾಕಿಸ್ತಾನವೇ ಮಧ್ಯಸ್ಥಿಕೆ ವಹಿಸಿ, "ನೋಡಿ ಸಾಹೇಬ್ರೇ, ಜೆಡಿ ವ್ಯಾನ್ಸ್ ಅವರು ಬಂದರೆ ಇರಾನ್ ಮಾತುಕತೆಗೆ ಒಪ್ಪಬಹುದು" ಎಂದು ಐಡಿಯಾ ಕೊಟ್ಟಿದೆ. ಪಾಕಿಸ್ತಾನ ಮತ್ತು ಟರ್ಕಿ ದೇಶಗಳು ಇರಾನ್ ಮತ್ತು ಅಮೆರಿಕದ ನಡುವೆ ಸಂಧಾನ ಮಾಡಿಸಲು ಸರಿಯಾದ ಜಾಗ ಅಂತ ಟ್ರಂಪ್ ಸರ್ಕಾರ ಕೂಡ ಯೋಚಿಸ್ತಿದೆ.

ವೈಟ್ ಹೌಸ್ ಪ್ರೆಸ್ ಸೆಕ್ರೆಟರಿ ಕ್ಯಾರೋಲಿನ್ ಲೀವಿಟ್ ಹೇಳುವ ಪ್ರಕಾರ, ಜೆಡಿ ವ್ಯಾನ್ಸ್ ಅವರು ಕೇವಲ ಉಪಾಧ್ಯಕ್ಷರಲ್ಲ, ಅವರು ಅಧ್ಯಕ್ಷ ಟ್ರಂಪ್ ಅವರ ಬಲಗೈ ಬಂಟ. ವಿದೇಶಾಂಗ ನೀತಿಯಿರಲಿ ಅಥವಾ ದೇಶದ ಆಂತರಿಕ ವಿಚಾರವಿರಲಿ, ಟ್ರಂಪ್ ಅವರು ವ್ಯಾನ್ಸ್ ಅವರ ಸಲಹೆ ಇಲ್ಲದೆ ಹೆಜ್ಜೆ ಇಡಲ್ಲ. ಹಾಗಾಗಿ, ಈ ಯುದ್ಧ ನಿಲ್ಲಿಸುವ ಜವಾಬ್ದಾರಿಯನ್ನು ವ್ಯಾನ್ಸ್ ಅವರಿಗೆ ವಹಿಸಿರುವುದು ದೊಡ್ಡ ಮಟ್ಟದ ಬದಲಾವಣೆಗೆ ಕಾರಣವಾಗಬಹುದು ಎನ್ನಲಾಗುತ್ತಿದೆ.

ಇತ್ತ ಪಾಕಿಸ್ತಾನದ ಪ್ರಧಾನಿ ಶೆಹಬಾಜ್ ಶರೀಫ್ ಅವರು, "ನಾವು ಈ ಶಾಂತಿ ಮಾತುಕತೆಗೆ ಸಂಪೂರ್ಣ ಸಾಥ್ ಕೊಡ್ತೀವಿ" ಅಂತ ರೆಡಿಯಾಗಿ ಕೂತಿದ್ದಾರೆ. ಇಸ್ಲಾಮಾಬಾದ್‌ನಲ್ಲಿ ಈ ಮೀಟಿಂಗ್ ಈ ವಾರವೇ ನಡೆಯುವ ಸಾಧ್ಯತೆ ಇದೆ. ಪಾಕಿಸ್ತಾನ ಈಗ ಜಗತ್ತಿನ ಮುಂದೆ ತನ್ನ ಇಮೇಜ್ ಸರಿ ಮಾಡಿಕೊಳ್ಳಲು ಇದೊಂದು ಒಳ್ಳೆ ಚಾನ್ಸ್ ಅಂತ ಭಾವಿಸಿದೆ.

ಟ್ವಿಸ್ಟ್ ಅಂದ್ರೆ ಇಲ್ಲಿದೆ ನೋಡಿ. ಒಂದೆಡೆ ಶಾಂತಿ ಮಾತುಕತೆ ನಡೆಯುತ್ತಿದ್ದರೆ, ಇನ್ನೊಂದೆಡೆ ಅಮೆರಿಕ ತನ್ನ ಸೇನಾ ಬಲವನ್ನು ಹೆಚ್ಚಿಸುತ್ತಿದೆ. ಸುಮಾರು 1,000 ಅಮೆರಿಕನ್ ಸೈನಿಕರನ್ನು (82nd Airborne Division) ಮಧ್ಯಪ್ರಾಚ್ಯಕ್ಕೆ ರವಾನಿಸಲು ತಯಾರಿ ನಡೆದಿದೆ. ಇದು "ನಮಗೆ ಶಾಂತಿ ಬೇಕು, ಒಂದು ವೇಳೆ ನೀವು ಒಪ್ಪದಿದ್ದರೆ ಯುದ್ಧಕ್ಕೂ ರೆಡಿ" ಅನ್ನೋ ಸನ್ನೆ ನೀಡಿದಂತಿದೆ.

ಮಧ್ಯಪ್ರಾಚ್ಯದ ಇತರ ದೇಶಗಳು (Gulf Allies) ಅಮೆರಿಕಕ್ಕೆ ಒಂದು ಕಿವಿಮಾತು ಹೇಳಿವೆ. "ದಯವಿಟ್ಟು ನೆಲದ ಮೇಲೆ ಸೈನಿಕರನ್ನು ಇಳಿಸಿ ಯುದ್ಧ ಮಾಡಬೇಡಿ, ಅಥವಾ ಇರಾನ್‌ನ ಪ್ರಮುಖ ತೈಲ ಕೇಂದ್ರಗಳ ಮೇಲೆ ದಾಳಿ ಮಾಡಬೇಡಿ.  ಹಾಗೇನಾದ್ರೂ ಆದರೆ ಇಡೀ ಜಗತ್ತಿನ ಆರ್ಥಿಕತೆ ಉಲ್ಟಾಪಲ್ಟಾ ಆಗುತ್ತೆ" ಅಂತ ಎಚ್ಚರಿಸಿವೆ.

ಈಗಾಗ್ಲೇ ಯುದ್ಧ ಶುರುವಾಗಿ ಒಂದು ತಿಂಗಳು ಕಳೆದಿದೆ. ಜೆಡಿ ವ್ಯಾನ್ಸ್ ಅವರ ಈ ಭೇಟಿ ಯಶಸ್ವಿಯಾದರೆ ಮಾತ್ರ ಸಾವಿರಾರು ಜನರ ಜೀವ ಉಳಿಯುತ್ತೆ ಮತ್ತು ಪೆಟ್ರೋಲ್-ಡೀಸೆಲ್ ಬೆಲೆ ಇಳಿಕೆಯಾಗುತ್ತೆ. ವ್ಯಾನ್ಸ್ ಅವರು ಇರಾನ್ ಮನವೊಲಿಸುವಲ್ಲಿ ಸಫಲರಾಗ್ತಾರಾ? ಅಥವಾ ಯುದ್ಧ ಇನ್ನು ಭೀಕರವಾಗುತ್ತಾ? ಅನ್ನೋದು ಈ ವಾರಾಂತ್ಯದಲ್ಲಿ ಗೊತ್ತಾಗಲಿದೆ.