ಶಬರಿಮಲೆಯ ಮಕರಜ್ಯೋತಿ ದರ್ಶನವು ಭಕ್ತರ ಜೀವನದಲ್ಲಿ ಅಪರೂಪದ ಅನುಭವ. ಪ್ರತಿವರ್ಷ ಸಂಕ್ರಾಂತಿ ದಿನದಂದು ಸೂರ್ಯನು ಮಕರ ರಾಶಿಗೆ ಪ್ರವೇಶಿಸುವ ಕ್ಷಣವನ್ನು ಪವಿತ್ರವೆಂದು ಪರಿಗಣಿಸಲಾಗುತ್ತದೆ. ಈ ಬಾರಿ ಜನವರಿ 14, 2026 ಬುಧವಾರ ಮಧ್ಯಾಹ್ನ 3 ಗಂಟೆ 13 ನಿಮಿಷಕ್ಕೆ ಸಂಕ್ರಾಂತಿ ಕ್ಷಣ ನಿಶ್ಚಿತವಾಗಿದೆ. ಇದೇ ದಿನದ ಸಂಜೆ 6:30 ರಿಂದ 6:45ರೊಳಗೆ ಮಕರಜ್ಯೋತಿ ಆಕಾಶದಲ್ಲಿ ಕಾಣಿಸಿಕೊಳ್ಳಲಿದೆ. ಹೌದು ಮಕರ ಜ್ಯೋತಿ ಎಂದರೆ ಹಬ್ಬದ ರಾತ್ರಿ ಆಕಾಶದಲ್ಲಿ ಕಾಣುವ ಪ್ರಕಾಶಮಾನ ನಕ್ಷತ್ರ. ಇದನ್ನು ಭಗವಾನ್ ಅಯ್ಯಪ್ಪನು ತಮ್ಮ ಭಕ್ತರಿಗೆ ಆಶೀರ್ವಾದ ನೀಡಲು ಕಾಣಿಸಿಕೊಳ್ಳುವ ದಿವ್ಯ ಸಂಕೇತವೆಂದು ನಂಬಲಾಗುತ್ತದೆ. ಲಕ್ಷಾಂತರ ಭಕ್ತರು ಈ ಕ್ಷಣವನ್ನು ಕಾತರದಿಂದ ಕಾಯುತ್ತಿದ್ದು, ದರ್ಶನದ ಸಮಯದಲ್ಲಿ “ಸ್ವಾಮಿಯೇ ಶರಣಂ ಅಯ್ಯಪ್ಪ” ಎಂಬ ಘೋಷಣೆ ಶಬರಿಮಲೆಯ ಗಾಳಿಯಲ್ಲಿ ಮೊಳಗುತ್ತದೆ.
ಮಕರಜ್ಯೋತಿಯ ಜೊತೆಗೆ ಮಕರವಿಳಕ್ಕು ಕೂಡಾ ಮಹತ್ವ ಹೊಂದಿದೆ. ಪೊನ್ನಂಬಲಮೇಡು ಬೆಟ್ಟದಲ್ಲಿ ಬೆಳಗುವ ಪವಿತ್ರ ದೀಪವನ್ನು ಲಕ್ಷಾಂತರ ಭಕ್ತರು ಉಸಿರು ಬಿಗಿಹಿಡಿದು ನೋಡುವ ಅದ್ಭುತ ಕ್ಷಣವೆಂದು ಪರಿಗಣಿಸುತ್ತಾರೆ. ಈ ದೀಪವು ಭಕ್ತರ ಭಕ್ತಿಗೆ ಪ್ರತೀಕವಾಗಿದ್ದು, ಶಬರಿಮಲೆಯ ಆಧ್ಯಾತ್ಮಿಕ ಶಕ್ತಿಯನ್ನು ಪ್ರತಿಬಿಂಬಿಸುತ್ತದೆ. ಮಕರಜ್ಯೋತಿ ದರ್ಶನಕ್ಕಾಗಿ ಭಕ್ತರು 41 ದಿನಗಳ ವ್ರತವನ್ನು ಆಚರಿಸುತ್ತಾರೆ. ಈ ಅವಧಿಯಲ್ಲಿ ಶುದ್ಧಾಚರಣೆ, ನಿಯಮ ಪಾಲನೆ, ಉಪವಾಸ ಮತ್ತು ಭಕ್ತಿ ಜೀವನದ ಭಾಗವಾಗುತ್ತದೆ. ಶಬರಿಮಲೆಯ ಪರ್ವತಾರೋಹಣದ ವೇಳೆ ಭಕ್ತರು ಕಠಿಣ ಶಿಸ್ತನ್ನು ಪಾಲಿಸುತ್ತಾರೆ. ಈ ಶಿಸ್ತು, ಭಕ್ತಿ ಮತ್ತು ತ್ಯಾಗವೇ ಮಕರಜ್ಯೋತಿಯ ಮಹಿಮೆಯನ್ನು ಹೆಚ್ಚಿಸುತ್ತದೆ.
ಮಕರಜ್ಯೋತಿ ಕಾಣುವ ಕ್ಷಣವು ಭಕ್ತರಿಗೆ ಆಧ್ಯಾತ್ಮಿಕ ಆನಂದವನ್ನು ನೀಡುತ್ತದೆ. ಆಕಾಶದಲ್ಲಿ ಕಾಣುವ ಪ್ರಕಾಶಮಾನ ನಕ್ಷತ್ರವನ್ನು ದಿವ್ಯ ಸಂಕೇತವೆಂದು ಭಾವಿಸಿ, ಭಕ್ತರು ತಮ್ಮ ಜೀವನದಲ್ಲಿ ಶಾಂತಿ, ಸಮೃದ್ಧಿ ಮತ್ತು ಆಶೀರ್ವಾದವನ್ನು ಪಡೆಯುತ್ತಾರೆ. ಈ ದರ್ಶನವು ಭಕ್ತರ ಮನಸ್ಸಿನಲ್ಲಿ ಶ್ರದ್ಧೆ ಮತ್ತು ಭಕ್ತಿಯನ್ನು ಮತ್ತಷ್ಟು ಗಾಢಗೊಳಿಸುತ್ತದೆ. ಶಬರಿಮಲೆಯ ಮಕರಜ್ಯೋತಿ ದರ್ಶನವು ಕೇವಲ ಒಂದು ಖಗೋಳೀಯ ಘಟನೆ ಅಲ್ಲ, ಅದು ಭಕ್ತರ ಭಾವನೆ, ನಂಬಿಕೆ ಮತ್ತು ಆಧ್ಯಾತ್ಮಿಕತೆಯ ಪ್ರತೀಕ. ಸಂಕ್ರಾಂತಿ ದಿನದಂದು ಲಕ್ಷಾಂತರ ಭಕ್ತರು ಶಬರಿಮಲೆಗೆ ಆಗಮಿಸಿ ಈ ದಿವ್ಯ ಕ್ಷಣವನ್ನು ಅನುಭವಿಸುತ್ತಾರೆ. “ಸ್ವಾಮಿಯೇ ಶರಣಂ ಅಯ್ಯಪ್ಪ” ಎಂಬ ಘೋಷಣೆಗಳ ನಡುವೆ ಮಕರಜ್ಯೋತಿ ಕಾಣುವ ಕ್ಷಣವು ಭಕ್ತರ ಜೀವನದಲ್ಲಿ ಅಚ್ಚಳಿಯದ ನೆನಪಾಗಿ ಉಳಿಯುತ್ತದೆ.
