ಹಾಸನ ಜಿಲ್ಲೆಯ ಚನ್ನರಾಯಪಟ್ಟಣ ತಾಲೂಕಿನ ಮಡಬ ಗ್ರಾಮದಲ್ಲಿ ಆಂಜನೇಯ ಭಕ್ತರ ವಿಭಿನ್ನ ಆಚರಣೆ ಜನರ ಗಮನ ಸೆಳೆಯುತ್ತಿದೆ. ಇಲ್ಲಿ ಭಕ್ತರು ತಮ್ಮ ಹರಕೆ ತೀರಿಸಲು ಬೆಂಕಿ ಉಂಡೆಗಳಲ್ಲಿ ಹೊಡೆದಾಟ ನಡೆಸಿ, ಮೈಮೇಲೆ ಬೆಂಕಿ ಎರಚಿಕೊಂಡು ಆಂಜನೇಯನಿಗೆ ಹರಕೆ ಸಲ್ಲಿಸುತ್ತಾರೆ. ಮಡಬ ಗ್ರಾಮದ ಈ ಆಚರಣೆ ವಿಶಿಷ್ಟವಾಗಿದೆ. ಸಾಮಾನ್ಯವಾಗಿ ಜಾನುವಾರುಗಳನ್ನು ಬೆಂಕಿಯಲ್ಲಿ ಹಾಯಿಸುವುದನ್ನು ನಾವು ನೋಡಿದ್ದೇವೆ. ಆದರೆ ಇಲ್ಲಿ ಮನುಷ್ಯರೇ ಜಾನುವಾರುಗಳಂತೆ ಬೆಂಕಿ ಹಾಯುವ ಪದ್ದತಿ ಅನುಸರಿಸುತ್ತಾರೆ. ಹರಕೆ ಹೊತ್ತ ಭಕ್ತರು ಬೆಂಕಿಯನ್ನೆ ಹಾಯುತ್ತಾರೆ. ಬಳಿಕ ಲಂಕಾದಹನದ ಸ್ಥಳದಿಂದ ದೇವಾಲಯದ ಮೇಲ್ಭಾಗಕ್ಕೆ, ದೇವಾಲಯದ ಮೇಲಿಂದ ಮತ್ತೆ ಲಂಕಾದಹನದ ಸ್ಥಳಕ್ಕೆ ಬೆಂಕಿ ಉಂಡೆಗಳನ್ನು ಮೈಮೇಲೆ ಎರಚಾಡುತ್ತಾರೆ.
ಈ ಸಂದರ್ಭದಲ್ಲಿ ಗರ್ಭಗುಡಿಯಲ್ಲಿರುವ ಆಂಜನೇಯ ಸನ್ನಿಧಿಯಲ್ಲಿ ಹೂವಿನ ಪ್ರಸಾದವಾಗುತ್ತದೆ. ಈ ಆಚರಣೆಯಲ್ಲಿ ಭಕ್ತರು ತಮ್ಮ ವೈಯಕ್ತಿಕ ಹರಕೆಗಳನ್ನು ತೀರಿಸುತ್ತಾರೆ. ವಿವಾಹ, ಸಂತಾನ ಭಾಗ್ಯ, ಚರ್ಮರೋಗ ಸಮಸ್ಯೆ, ಜಮೀನು ವ್ಯಾಜ್ಯ, ವ್ಯಾಪಾರಾಭಿವೃದ್ದಿ ಸೇರಿದಂತೆ ಹಲವು ರೀತಿಯ ಹರಕೆಗಳನ್ನು ಹೊತ್ತ ಭಕ್ತರು ಇಲ್ಲಿ ಭಾಗವಹಿಸುತ್ತಾರೆ. ಬೆಂಕಿ ಹಾಯುವುದು, ಬೆಂಕಿ ಉಂಡೆಗಳನ್ನು ಮೈಮೇಲೆ ಎರಚಿಕೊಳ್ಳುವುದು, ದೇವಾಲಯದ ಸುತ್ತಲೂ ಹರಕೆ ತೀರಿಸುವುದು ಇದೆಲ್ಲವೂ ಇಲ್ಲಿ ನಡೆಯುತ್ತವೆ. ಗ್ರಾಮದ ಜನರು ಈ ಆಚರಣೆಯನ್ನು ಶ್ರದ್ಧೆಯಿಂದ ಪಾಲಿಸುತ್ತಾರೆ. ಭಕ್ತರು ತಮ್ಮ ಹರಕೆ ತೀರಿಸಲು ಬೆಂಕಿಯ ಕಷ್ಟವನ್ನು ಸಹಿಸುತ್ತಾರೆ. ಇದು ಅವರ ನಂಬಿಕೆ, ಭಕ್ತಿ ಮತ್ತು ಆಂಜನೇಯನಿಗೆ ಸಲ್ಲಿಸುವ ಸಮರ್ಪಣೆಯ ಸಂಕೇತವಾಗಿದೆ. ಈ ಆಚರಣೆ ಗ್ರಾಮದಲ್ಲಿ ಶತಮಾನಗಳಿಂದ ನಡೆಯುತ್ತಿದ್ದು, ಭಕ್ತರ ನಂಬಿಕೆಗೆ ಬಲ ನೀಡುತ್ತಿದೆ.
ಮಡಬ ಗ್ರಾಮದ ಈ ವಿಶೇಷ ಆಚರಣೆ ಧಾರ್ಮಿಕ ಭಕ್ತಿಯ ಜೊತೆಗೆ ಜನಪದ ಸಂಸ್ಕೃತಿಯನ್ನೂ ಪ್ರತಿಬಿಂಬಿಸುತ್ತದೆ. ಭಕ್ತರು ತಮ್ಮ ಹರಕೆ ತೀರಿಸಲು ಬೆಂಕಿಯನ್ನೇ ಆರಾಧನೆಯ ರೂಪದಲ್ಲಿ ಸ್ವೀಕರಿಸುತ್ತಾರೆ. ಗ್ರಾಮದಲ್ಲಿ ನಡೆಯುವ ಈ ಆಚರಣೆ ಜನರಲ್ಲಿ ಕುತೂಹಲ ಮೂಡಿಸುತ್ತಿದ್ದು, ಭಕ್ತರ ಭಕ್ತಿ ಶ್ರದ್ಧೆಗೆ ಸಾಕ್ಷಿಯಾಗಿದೆ.
