ಬೇಸಿಗೆ ಕಾಲ ಬಂತೆಂದರೆ ಸಾಕು, ಮನೆಯ ಹೊರಗೆ ಮಾತ್ರವಲ್ಲದೆ ಮನೆಯ ಒಳಗೂ ಬಿಸಿಲಿನ ತಾಪ ಕಾಡತೊಡಗುತ್ತದೆ. ಅದರಲ್ಲೂ ಮಧ್ಯಾಹ್ನದ ಸಮಯದಲ್ಲಿ ಸ್ನಾನ ಮಾಡಲು ಅಥವಾ ಮುಖ ತೊಳೆಯಲು ನಲ್ಲಿ (Tap) ಬಿಟ್ಟರೆ ಕುದಿಯುವ ನೀರು ಬರುತ್ತದೆ. ಮನೆಯ ಮೇಲ್ಛಾವಣಿಯ ಮೇಲಿರುವ ನೀರಿನ ಟ್ಯಾಂಕ್ ಸೂರ್ಯನ ನೇರ ಬಿಸಿಲಿಗೆ ಒಡ್ಡಿಕೊಳ್ಳುವುದರಿಂದ ಹೀಗಾಗುತ್ತದೆ. ಆದರೆ, ಕೆಲವು ಸುಲಭ ಮತ್ತು ಕಡಿಮೆ ಖರ್ಚಿನ ಉಪಾಯಗಳನ್ನು ಬಳಸುವ ಮೂಲಕ ನೀವು ಈ ಬೇಸಿಗೆಯಲ್ಲಿಯೂ ಟ್ಯಾಂಕ್ ನೀರನ್ನು ತಂಪಾಗಿರಿಸಬಹುದು.
ಬೇಸಿಗೆಯಲ್ಲಿ ನೀರಿನ ಟ್ಯಾಂಕ್ ತಂಪಾಗಿರಿಸಲು ಇಲ್ಲಿವೆ ಸರಳ ಉಪಾಯಗಳು
೧. ಸೂರ್ಯನ ನೇರ ಬಿಸಿಲು ತಡೆಯಿರಿ
ಟ್ಯಾಂಕ್ ನೀರು ಬಿಸಿಯಾಗಲು ಮುಖ್ಯ ಕಾರಣ ಸೂರ್ಯನ ಪ್ರಖರ ಕಿರಣಗಳು. ಟ್ಯಾಂಕ್ ಯಾವಾಗಲೂ ಪೂರ್ತಿಯಾಗಿ ಮುಚ್ಚಲ್ಪಟ್ಟಿರಲಿ. ಟ್ಯಾಂಕ್ ಸುತ್ತಲೂ ಗೋಣಿಚೀಲ ಅಥವಾ ದಪ್ಪವಾದ ಬಟ್ಟೆಯ ಹೊದಿಕೆಯನ್ನು ಸುತ್ತುವುದರಿಂದ ಸೂರ್ಯನ ಶಾಖ ನೇರವಾಗಿ ಟ್ಯಾಂಕ್ ಒಳಗೆ ಹೋಗುವುದನ್ನು ತಡೆಯಬಹುದು. ಈ ಬಟ್ಟೆಯನ್ನು ಆಗಾಗ ನೀರಿನಿಂದ ಒದ್ದೆ ಮಾಡುತ್ತಿದ್ದರೆ ನೀರು ಇನ್ನೂ ಹೆಚ್ಚು ತಂಪಾಗಿರುತ್ತದೆ.
೨. ಬಿಳಿ ಬಣ್ಣದ ಬಳಕೆ
ನಮಗೆಲ್ಲ ತಿಳಿದಿರುವಂತೆ, ಕಪ್ಪು ಬಣ್ಣವು ಶಾಖವನ್ನು ಅತಿ ವೇಗವಾಗಿ ಹೀರಿಕೊಳ್ಳುತ್ತದೆ. ಮಾರುಕಟ್ಟೆಯಲ್ಲಿ ಸಿಗುವ ಹೆಚ್ಚಿನ ಟ್ಯಾಂಕ್‌ಗಳು ಕಪ್ಪು ಬಣ್ಣದ್ದಾಗಿರುತ್ತವೆ. ಹೀಗಾಗಿ, ನಿಮ್ಮ ಟ್ಯಾಂಕ್‌ಗೆ ಬಿಳಿ ಬಣ್ಣವನ್ನು ಬಳಿಯಿರಿ. ಬಿಳಿ ಬಣ್ಣವು ಸೂರ್ಯನ ಕಿರಣಗಳನ್ನು ಪ್ರತಿಫಲಿಸುವುದರಿಂದ (Reflect), ಟ್ಯಾಂಕ್ ಒಳಗಿನ ನೀರು ಬೇಗನೆ ಬಿಸಿಯಾಗುವುದಿಲ್ಲ.
೩. ಥರ್ಮಾಕೋಲ್ ಅಳವಡಿಕೆ
ಥರ್ಮಾಕೋಲ್ ಶಾಖವನ್ನು ತಡೆಯುವ ಗುಣವನ್ನು ಹೊಂದಿದೆ. ಟ್ಯಾಂಕ್ ಸುತ್ತಲೂ ಥರ್ಮಾಕೋಲ್ ಶೀಟ್‌ಗಳನ್ನು ಅಂಟಿಸಿ ಅದರ ಮೇಲೆ ಪ್ಲಾಸ್ಟಿಕ್ ಕವರ್ ಅಥವಾ ಟೇಪ್ ಸುತ್ತುವುದರಿಂದ ಶಾಖವು ಟ್ಯಾಂಕ್ ತಲುಪದಂತೆ ಮಾಡಬಹುದು. ಇದು ಒಂದು ರೀತಿಯ ಇನ್ಸುಲೇಷನ್ ಅಥವಾ ಶಾಖ ನಿರೋಧಕವಾಗಿ ಕೆಲಸ ಮಾಡುತ್ತದೆ.
೪. ಟ್ಯಾಂಕ್ ಮೇಲೆ ಸಣ್ಣ ಛಾವಣಿ
ಇದು ಶಾಶ್ವತವಾದ ಪರಿಹಾರವಾಗಿದೆ. ಟ್ಯಾಂಕ್ ಇಟ್ಟಿರುವ ಜಾಗದಲ್ಲಿ ನಾಲ್ಕು ಕಂಬಗಳನ್ನು ನಿಲ್ಲಿಸಿ ಅದರ ಮೇಲೆ ತಗಡು ಅಥವಾ ಸಿಮೆಂಟ್ ಶೀಟ್‌ಗಳ ಸಹಾಯದಿಂದ ಸಣ್ಣದೊಂದು ಶೆಡ್ ಅಥವಾ ಛಾವಣಿ ನಿರ್ಮಿಸಿ. ಇದರಿಂದ ಟ್ಯಾಂಕ್‌ಗೆ ನೆರಳು ಸಿಗುತ್ತದೆ ಮತ್ತು ನೀರು ನೈಸರ್ಗಿಕವಾಗಿಯೇ ತಂಪಾಗಿರುತ್ತದೆ.
೫. ಪೈಪ್‌ಗಳ ರಕ್ಷಣೆ
ಕೇವಲ ಟ್ಯಾಂಕ್ ಅಷ್ಟೇ ಅಲ್ಲ, ಟ್ಯಾಂಕ್‌ನಿಂದ ನಲ್ಲಿಗೆ ನೀರು ತರುವ ಪೈಪ್‌ಗಳು ಕೂಡ ಬಿಸಿಲಿಗೆ ತೆರೆದುಕೊಂಡಿರುತ್ತವೆ. ಇದರಿಂದ ಪೈಪ್‌ನಲ್ಲಿ ಉಳಿದ ನೀರು ಬಿಸಿಯಾಗಿರುತ್ತದೆ. ಈ ಪೈಪ್‌ಗಳಿಗೂ ಇನ್ಸುಲೇಷನ್ ಕವರ್ ಅಥವಾ ಹಳೆಯ ಬಟ್ಟೆಗಳನ್ನು ಸುತ್ತುವ ಮೂಲಕ ಬಿಸಿ ನೀರು ಬರದಂತೆ ತಡೆಯಬಹುದು.
ಬೇಸಿಗೆಯಲ್ಲಿ ಸಾಧ್ಯವಾದಷ್ಟು ಮುಂಜಾನೆ ಅಥವಾ ರಾತ್ರಿಯ ಸಮಯದಲ್ಲಿ ಟ್ಯಾಂಕ್‌ಗೆ ನೀರು ತುಂಬಿಸಿ. ಇದರಿಂದ ನೀರು ದಿನವಿಡೀ ತಂಪಾಗಿರಲು ಸಹಾಯವಾಗುತ್ತದೆ.
Comments