ಬೆಂಗಳೂರು: ಮಲ್ಲೇಶ್ವರಂ ಪ್ರದೇಶದಲ್ಲಿ ವಾಹನ ಓಡಾಟ ಶೀಘ್ರದಲ್ಲೇ ದುಬಾರಿಯಾಗಲಿದೆ. ಇಷ್ಟು ದಿನ ರಸ್ತೆ ಪಕ್ಕದಲ್ಲಿ ಉಚಿತವಾಗಿ ವಾಹನ ನಿಲ್ಲಿಸುತ್ತಿದ್ದ ಜನರಿಗೆ ಇನ್ಮುಂದೆ ಪಾರ್ಕಿಂಗ್ ಶುಲ್ಕ ಪಾವತಿಸುವ ಬರೆ ಬಿದ್ದಿದೆ. ಮಲ್ಲೇಶ್ವರಂ 18ನೇ ಕ್ರಾಸ್ ರಸ್ತೆಯಲ್ಲಿ ಪೇ ಪಾರ್ಕಿಂಗ್ ವ್ಯವಸ್ಥೆ ಆರಂಭವಾಗುತ್ತಿದೆ. ಇದೇ ರೀತಿಯಾಗಿ 15ನೇ ರಸ್ತೆ, 11ನೇ ರಸ್ತೆ ಹಾಗೂ ಸಂಪಿಗೆ ರಸ್ತೆಯಲ್ಲೂ ಪೇ ಪಾರ್ಕಿಂಗ್ ಜಾರಿಗೆ ತರಲು ಪಶ್ಚಿಮ ನಗರ ಪಾಲಿಕೆ ಸಿದ್ಧತೆ ನಡೆಸುತ್ತಿದೆ. ಅತಿ ಹೆಚ್ಚು ಸಂಚಾರ ಇರುವ 18ನೇ ಕ್ರಾಸ್ನಲ್ಲಿ ಈ ವ್ಯವಸ್ಥೆ ಮೊದಲಿಗೆ ಜಾರಿಯಾಗಲಿದೆ.
ಪಶ್ಚಿಮ ನಗರ ಪಾಲಿಕೆ ಈಗಾಗಲೇ ಪೇ ಪಾರ್ಕಿಂಗ್ ಟೆಂಡರ್ ಕರೆದಿದೆ. ಬೆಂಗಳೂರು ಕೇಂದ್ರ ಪಾಲಿಕೆಯ 35 ರಸ್ತೆಗಳಲ್ಲಿ ಪೇ ಅಂಡ್ ಪಾರ್ಕ್ ವ್ಯವಸ್ಥೆ ಜಾರಿಗೆ ತರಲು ಯೋಜನೆ ರೂಪಿಸಲಾಗಿದೆ. ಇದರಿಂದ ನಗರದಲ್ಲಿ ವಾಹನ ಸಂಚಾರ ನಿಯಂತ್ರಣ ಹಾಗೂ ಪಾರ್ಕಿಂಗ್ ವ್ಯವಸ್ಥೆಗೆ ಶಿಸ್ತು ತರಲು ಪ್ರಯತ್ನಿಸಲಾಗುತ್ತಿದೆ. ಬೈಕುಗಳಿಗೆ ಗಂಟೆಗೆ ₹15, ಇಡೀ ದಿನಕ್ಕೆ ₹75 ಶುಲ್ಕ ನಿಗದಿಯಾಗಿದೆ. ಕಾರುಗಳಿಗೆ ಗಂಟೆಗೆ ₹30, ಇಡೀ ದಿನಕ್ಕೆ ₹150 ಶುಲ್ಕ ವಿಧಿಸಲಾಗುತ್ತದೆ. ಜೊತೆಗೆ ಮಾಸಿಕ ಪಾಸ್ ವ್ಯವಸ್ಥೆಯೂ ಇರಲಿದೆ – ಬೈಕುಗಳಿಗೆ ₹1,500 ಹಾಗೂ ಕಾರುಗಳಿಗೆ ₹3,000 ಪಾಸ್ ನೀಡಲಾಗುತ್ತದೆ.
ಇಷ್ಟು ದಿನ ಉಚಿತವಾಗಿ ವಾಹನ ನಿಲ್ಲಿಸುತ್ತಿದ್ದ ಜನರಿಗೆ ಇದೀಗ ಹೆಚ್ಚುವರಿ ವೆಚ್ಚ ಬರುವುದರಿಂದ ಬೇಸರ ವ್ಯಕ್ತವಾಗಿದೆ. “ಮಲ್ಲೇಶ್ವರಂಗೆ ಹೋಗೋರು ಈಗ ಪಾರ್ಕಿಂಗ್ ಶುಲ್ಕ ಜೇಬಲ್ಲಿ ಇಟ್ಟುಕೊಂಡೇ ಹೋಗಬೇಕು” ಎಂದು ಸ್ಥಳೀಯರು ಹೇಳುತ್ತಿದ್ದಾರೆ. ಆದರೆ ಕೆಲವರು, “ಪಾರ್ಕಿಂಗ್ ವ್ಯವಸ್ಥೆಗೆ ಶಿಸ್ತು ತರಲು ಇದು ಅಗತ್ಯ” ಎಂದು ಅಭಿಪ್ರಾಯಪಟ್ಟಿದ್ದಾರೆ. ಮಲ್ಲೇಶ್ವರಂ ಮಾತ್ರವಲ್ಲ, ನಗರದಾದ್ಯಂತ ಪೇ ಪಾರ್ಕಿಂಗ್ ವ್ಯವಸ್ಥೆ ಜಾರಿಗೆ ತರಲು ಯೋಜನೆ ರೂಪಿಸಲಾಗಿದೆ. ನಿಗದಿತ ರಸ್ತೆಗಳಲ್ಲಿ ಪಾರ್ಕಿಂಗ್ ಶುಲ್ಕ ಪಾವತಿಸಿ ವಾಹನ ನಿಲ್ಲಿಸುವ ವ್ಯವಸ್ಥೆ ಮುಂದಿನ ದಿನಗಳಲ್ಲಿ ಸಾಮಾನ್ಯವಾಗಲಿದೆ. ಮಲ್ಲೇಶ್ವರಂನಲ್ಲಿ ಪೇ ಪಾರ್ಕಿಂಗ್ ಆರಂಭವಾಗುತ್ತಿರುವುದು ಜನರಿಗೆ ಹೆಚ್ಚುವರಿ ವೆಚ್ಚ ತರಲಿದ್ದರೂ, ನಗರದಲ್ಲಿ ಸಂಚಾರ ನಿಯಂತ್ರಣ ಹಾಗೂ ಪಾರ್ಕಿಂಗ್ ವ್ಯವಸ್ಥೆಗೆ ಶಿಸ್ತು ತರಲು ಮಹತ್ವದ ಹೆಜ್ಜೆಯಾಗಿದೆ.
