ಸ್ಯಾಂಡಲ್ವುಡ್ನ ಚಾಕೊಲೇಟ್ ಹೀರೊ, ಅಭಿಮಾನಿಗಳ ಪ್ರೀತಿಯ 'ಲವ್ಲಿ ಸ್ಟಾರ್' ಪ್ರೇಮ್ ಅವರು ಚಿತ್ರರಂಗಕ್ಕೆ ಕಾಲಿಟ್ಟು ಇಂದಿಗೆ 24 ವರ್ಷಗಳು ಆಗಿದೆ. ಈ ವಿಶೇಷ ಸಂದರ್ಭವನ್ನು ತಮ್ಮ ಅಭಿಮಾನಿಗಳೊಂದಿಗೆ ಹಂಚಿಕೊಂಡಿರುವ ನಟ ಪ್ರೇಮ್, ಸೋಷಿಯಲ್ ಮೀಡಿಯಾದಲ್ಲಿ ಭಾವುಕ ಪೋಸ್ಟ್ ಹಾಕುವ ಜೊತೆಗೆ ದೊಡ್ಡದೊಂದು 'ಸರ್ಪ್ರೈಸ್' ನೀಡುವ ಸುಳಿವು ಕೊಟ್ಟಿದ್ದಾರೆ.
2004ರಲ್ಲಿ 'ಪ್ರಾಣ' ಚಿತ್ರದ ಮೂಲಕ ಕನ್ನಡಿಗರ ಮನ ಗೆದ್ದ ಪ್ರೇಮ್, ಆನಂತರ 'ನೆನಪಿರಲಿ', 'ಜೊತೆ ಜೊತೆಯಲಿ', 'ಪಲ್ಲಕ್ಕಿ'ಯಂತಹ ಸಾಲು ಸಾಲು ಹಿಟ್ ಚಿತ್ರಗಳನ್ನು ನೀಡಿದ್ದಾರೆ. ತಮ್ಮ ವಿಭಿನ್ನ ನಟನೆ ಮತ್ತು ಮಂದಹಾಸದಿಂದಲೇ 'ಲವ್ಲಿ ಸ್ಟಾರ್' ಎಂಬ ಬಿರುದು ಪಡೆದ ಅವರು, ಎರಡು ದಶಕಗಳಿಗೂ ಹೆಚ್ಚು ಕಾಲ ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದಾರೆ. "ನನ್ನ ಸಿನಿಮಾ ಜೀವನಕ್ಕೆ ಇಂದಿಗೆ 24 ವರ್ಷದ ಸಂಭ್ರಮ. ಆಶೀರ್ವದಿಸಿದ, ಹಾರೈಸಿದ ಮತ್ತು ಅಭಿಮಾನಿಸಿದ ಎಲ್ಲರಿಗೂ ಧನ್ಯವಾದಗಳು. ಲವ್ ಯೂ ಆಲ್" ಎಂದು ಅವರು ಅಭಿಮಾನಿಗಳಿಗೆ ಕೃತಜ್ಞತೆ ಸಲ್ಲಿಸಿದ್ದಾರೆ.
ಕೇವಲ ಸಂಭ್ರಮವಷ್ಟೇ ಅಲ್ಲದೆ, ಪ್ರೇಮ್ ಅವರು ತಮ್ಮ ಮುಂದಿನ ನಡೆಯ ಬಗ್ಗೆ ಕುತೂಹಲ ಕೆರಳಿಸಿದ್ದಾರೆ. ಇತ್ತೀಚೆಗೆ ಅವರು ಹಂಚಿಕೊಂಡಿರುವ ಫೋಟೋಗಳಲ್ಲಿ ಸಖತ್ ಡಿಫರೆಂಟ್ ಆಗಿ ಕಾಣಿಸಿಕೊಂಡಿದ್ದು, "ಹೊಸ ಲುಕ್ಕು, ಹೊಸ ಪ್ರಯತ್ನ ಏನು ಅಂತ ಸದ್ಯದಲ್ಲೇ ರಿವೀಲ್ ಮಾಡ್ತೀನಿ. ನಿಮ್ಮ ಆಶೀರ್ವಾದ ದೊಡ್ಡದಾಗಿರಲಿ" ಎಂದು ಬರೆದುಕೊಂಡಿದ್ದಾರೆ. ಈ ಪೋಸ್ಟ್ ನೋಡಿದ ಅಭಿಮಾನಿಗಳು, ಪ್ರೇಮ್ ಅವರು ಯಾವುದಾದರೂ ಹೊಸ ಸಿನಿಮಾ ಅಥವಾ ಪ್ಯಾನ್ ಇಂಡಿಯಾ ಪ್ರಾಜೆಕ್ಟ್ನಲ್ಲಿ ಬ್ಯುಸಿಯಾಗಿದ್ದಾರಾ? ಎಂಬ ಚರ್ಚೆ ಆರಂಭಿಸಿದ್ದಾರೆ.
ಪ್ರೇಮ್ ಅವರ ಈ ಪೋಸ್ಟ್ಗೆ ಸೋಷಿಯಲ್ ಮೀಡಿಯಾದಲ್ಲಿ ಶುಭಾಶಯಗಳ ಮಹಾಪೂರವೇ ಹರಿದುಬರುತ್ತಿದೆ. ಸ್ಯಾಂಡಲ್ವುಡ್ನ ಗಣ್ಯರು ಹಾಗೂ ಅಭಿಮಾನಿಗಳು ಅವರ 24 ವರ್ಷಗಳ ಯಶಸ್ವಿ ಹಾದಿಯನ್ನು ಕೊಂಡಾಡುತ್ತಿದ್ದಾರೆ. ಲವ್ಲಿ ಸ್ಟಾರ್ ಅವರ ಈ 'ಹೊಸ ಪ್ರಯತ್ನ' ಏನಾಗಿರಬಹುದು ಎಂಬ ಸಸ್ಪೆನ್ಸ್ ಸದ್ಯದಲ್ಲೇ ಕಳಚಲಿದೆ.
