ಕನ್ನಡ ಕಿರುತೆರೆಯ ಜನಪ್ರಿಯ ಧಾರಾವಾಹಿ ‘ಲಕ್ಷ್ಮೀ ನಿವಾಸ’ ಖ್ಯಾತಿಯ ನಟಿ ದಿಶಾ ಮದನ್ ತಮ್ಮ ಜೀವನದ ಬಹುದಿನದ ಕನಸನ್ನು ಇದೀಗ ನನಸು ಮಾಡಿಕೊಂಡಿದ್ದಾರೆ. ಬಾಲಿವುಡ್ನ ಖ್ಯಾತ ನಿರ್ಮಾಪಕ ಹಾಗೂ ನಿರ್ದೇಶಕ ಕರಣ್ ಜೋಹರ್ ಅವರನ್ನು ಭೇಟಿ ಮಾಡಿ, ಅವರ ಜೊತೆಗೆ ತೆಗೆಸಿಕೊಂಡಿರುವ ಫೋಟೋಗಳನ್ನು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಈ ಕ್ಷಣ ದಿಶಾ ಅವರಿಗೆ ಮಾತ್ರವಲ್ಲ, ಅವರ ಅಭಿಮಾನಿಗಳಿಗೆ ಕೂಡ ವಿಶೇಷವಾಗಿದೆ.
ಲಕ್ಷ್ಮೀನಿವಾಸದ ಭಾವನಾ
ಕಿರುತೆರೆ ವೀಕ್ಷಕರಿಗೆ ದಿಶಾ ಮದನ್ ಎಂದರೆ ತಕ್ಷಣ ನೆನಪಾಗೋದು ಲಕ್ಷ್ಮೀ ನಿವಾಸದ ಭಾವನಾ. ಸಿದ್ದೇಗೌಡ್ರ ಮುದ್ದಿನ ಹೆಂಡತಿ, ತುಂಬಾ ಮಿತವಾಗಿ ಮಾತನಾಡುವ, ಸಾಫ್ಟ್ ಸ್ವಭಾವದ ಹುಡುಗಿ ಎಂಬ ಪಾತ್ರದಲ್ಲಿ ದಿಶಾ ಮನ ಗೆದ್ದಿದ್ದಾರೆ. ಆದರೆ ರಿಯಲ್ ಲೈಫ್ನಲ್ಲಿ ಅವರು ಸಂಪೂರ್ಣ ವಿಭಿನ್ನ – ಸ್ಟೈಲಿಷ್, ಕಾನ್ಫಿಡೆಂಟ್ ಮತ್ತು ಮಾಡರ್ನ್ ವ್ಯಕ್ತಿತ್ವ ಹೊಂದಿದ್ದಾರೆ.
ಕೇನ್ಸ್ ರೆಡ್ ಕಾರ್ಪೆಟ್ನಲ್ಲಿ ಮಿಂಚಿದ ನಟಿ
ಕಳೆದ ವರ್ಷ ಕೇನ್ಸ್ ಫಿಲ್ಮ್ ಫೆಸ್ಟಿವಲ್ನಲ್ಲಿ ರೆಡ್ ಕಾರ್ಪೆಟ್ ಮೇಲೆ ನಡೆಯುವ ಮೂಲಕ ದಿಶಾ ಮದನ್ ಕರ್ನಾಟಕಕ್ಕೂ ಕೀರ್ತಿ ತಂದಿದ್ದರು. ಇಬ್ಬರು ಮಕ್ಕಳ ತಾಯಿಯಾಗಿದ್ದರೂ, ನಟಿ ತನ್ನ ಫಿಟ್ನೆಸ್ ಮತ್ತು ಫ್ಯಾಷನ್ ಸೆನ್ಸ್ನಿಂದ ಬಣ್ಣದ ಲೋಕದಲ್ಲಿ ಮಿಂಚುತ್ತಿದ್ದಾರೆ.
ಬಾಲ್ಯದ ಕನಸಿಗೆ ರೆಕ್ಕೆ
ಇತ್ತೀಚೆಗೆ ದಿಶಾ ಮದನ್ ಹಂಚಿಕೊಂಡ ಪೋಸ್ಟ್ನಲ್ಲಿ, “ಬಾಲ್ಯದಿಂದಲೇ ಕರಣ್ ಜೋಹರ್ ಅವರನ್ನು ನೋಡಿ ಬೆಳೆದವಳು ನಾನು. ಇಂದು ಅವರ ಪಕ್ಕದಲ್ಲಿ ನಿಂತು ಫೋಟೋ ತೆಗೆಸಿಕೊಳ್ಳುವ ಅವಕಾಶ ಸಿಕ್ಕಿದೆ ಎಂದರೆ ಅದು ನನ್ನ ಭಾಗ್ಯ” ಎಂದು ಭಾವುಕರಾಗಿ ಬರೆದುಕೊಂಡಿದ್ದಾರೆ. ಈ ಅವಕಾಶಕ್ಕಾಗಿ ಅವರು ದಿ ಹಾಲಿವುಡ್ ರಿಪೋರ್ಟರ್ ಇಂಡಿಯಾಗೆ ವಿಶೇಷ ಧನ್ಯವಾದ ಸಲ್ಲಿಸಿದ್ದಾರೆ.
ಹಾಲಿವುಡ್ ರಿಪೋರ್ಟರ್ ಇಂಡಿಯಾ ಪಾತ್ರ
ದಿ ಹಾಲಿವುಡ್ ರಿಪೋರ್ಟರ್ ಇಂಡಿಯಾ ಎಂಬುದು ಜಾಗತಿಕ ಮನರಂಜನಾ ಬ್ರ್ಯಾಂಡ್ನ ಭಾರತೀಯ ಆವೃತ್ತಿ. 2024ರಲ್ಲಿ RPSG ಲೈಫ್ಸ್ಟೈಲ್ ಮೀಡಿಯಾ ಆರಂಭಿಸಿದ ಈ ಪ್ಲಾಟ್ಫಾರ್ಮ್, ಸಿನಿಮಾ, ವೆಬ್ ಸಿರೀಸ್, ಟಿವಿ, ಫ್ಯಾಷನ್ ಮತ್ತು ಲೈಫ್ಸ್ಟೈಲ್ ಕುರಿತ ಸುದ್ದಿ ಹಾಗೂ ಸಂದರ್ಶನಗಳಿಗೆ ಹೆಸರುವಾಸಿ. ಇದೇ ವೇದಿಕೆಯ ಮೂಲಕ ದಿಶಾ ಅವರಿಗೆ ಕರಣ್ ಜೋಹರ್ ಅವರನ್ನು ಭೇಟಿಯಾಗುವ ಅವಕಾಶ ದೊರೆತಿದೆ.
ಸೀರಿಯಲ್ನಿಂದ ಸ್ಟ್ರಾಂಗ್ ಪಾತ್ರದವರೆಗೂ
ದಿಶಾ ಮದನ್ ಕುಲವಧು ಧಾರಾವಾಹಿ ಮೂಲಕ ಕನ್ನಡಿಗರಿಗೆ ಪರಿಚಿತರಾದರು. ಬಳಿಕ ಕೆಲ ಕಾಲ ನಟನೆಯಿಂದ ಬ್ರೇಕ್ ತೆಗೆದುಕೊಂಡು, ಒಂದೆರಡು ಸಿನಿಮಾಗಳಲ್ಲೂ ಅಭಿನಯಿಸಿದ್ದಾರೆ. ಈಗ ಲಕ್ಷ್ಮೀ ನಿವಾಸದಲ್ಲಿ ಭಾವನಾ ಪಾತ್ರ ನಿಧಾನವಾಗಿ ಸ್ಟ್ರಾಂಗ್ ಆಗಿ ಹೊರಹೊಮ್ಮಿದ್ದು, ಅಳುಮುಂಜಿ ಹುಡುಗಿಯಿಂದ ಆತ್ಮವಿಶ್ವಾಸಿ ಮಹಿಳೆಯಾಗಿ ಕಾಣಿಸಿಕೊಂಡಿದ್ದಾಳೆ.
