ಸ್ಯಾಂಡಲ್ವುಡ್ನಲ್ಲಿ ಸದ್ಯಕ್ಕೆ ಎಲ್ಲೂ ನೋಡಿದ್ರೂ ಒಂದೇ ಚರ್ಚೆ. ಅದು 'ಧುರಂಧರ್-2' ಸಿನಿಮಾ ವಿಚಾರವಾಗಿ ನಟಿ ರಮ್ಯಾ ಮತ್ತು ಸೋಶಿಯಲ್ ಮೀಡಿಯಾ ಕಿಂಗ್ ಪ್ರಶಾಂತ್ ಸಂಬರಗಿ ನಡುವೆ ಶುರುವಾಗಿರುವ 'ಟ್ವೀಟ್ ವಾರ್'. ಸಿನಿಮಾ ರಿಲೀಸ್ ಆದ್ಮೇಲೆ ವಿಮರ್ಶೆ ಬರೋದು ಕಾಮನ್, ಆದ್ರೆ ಈ ಸಲದ ಜಗಳ ಮಾತ್ರ ಸಿನಿಮಾ ಮೀರಿ ವೈಯಕ್ತಿಕ ದಾಳಿ ಮತ್ತು ರಾಜಕೀಯದ ಮಟ್ಟಕ್ಕೆ ಹೋಗಿ ನಿಂತಿದೆ.
ಈ ಎಲ್ಲ ರಂಪಾಟಕ್ಕೆ ಕಾರಣವಾಗಿದ್ದು ಸ್ಯಾಂಡಲ್ವುಡ್ ಕ್ವೀನ್ ರಮ್ಯಾ ಅವರ ಒಂದು ಪೋಸ್ಟ್. ಸಿನಿಮಾ ನೋಡಿದ ರಮ್ಯಾ ಅವರು, "ಧುರಂಧರ್-2 ಸಿನಿಮಾ ಅತಿ ದೊಡ್ಡ ಬೋರ್. ಈ ಚಿತ್ರ ನೋಡೋಕೆ ಹೋಗಿ ನಿಮ್ಮ ಕಷ್ಟಪಟ್ಟು ಸಂಪಾದಿಸಿದ ಹಣ ಮತ್ತು ಅಮೂಲ್ಯವಾದ ಸಮಯವನ್ನು ವ್ಯರ್ಥ ಮಾಡಿಕೊಳ್ಳಬೇಡಿ" ಅಂತ ನೇರವಾಗಿ ಬರೆದುಕೊಂಡಿದ್ದರು. ಅಷ್ಟೇ ಅಲ್ಲದೆ, ಚಿತ್ರದ ಬಗ್ಗೆ ಸ್ವಲ್ಪ ವ್ಯಂಗ್ಯವಾಗಿಯೇ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದರು. ಯಾವಾಗ ಸಿನಿಮಾ ಬಗ್ಗೆ ನೆಗೆಟಿವ್ ರಿವ್ಯೂ ಬಂತೋ, ಚಿತ್ರರಂಗದ ವಿತರಕರೂ ಆಗಿರುವ ಪ್ರಶಾಂತ್ ಸಂಬರಗಿ ಅವರು ಸುಮ್ಮನೆ ಕೂರಲಿಲ್ಲ. ರಮ್ಯಾ ಅವರಿಗೆ ಸಖತ್ ಖಾರವಾಗಿಯೇ ತಿರುಗೇಟು ನೀಡಿದ್ದಾರೆ.
ಸಂಬರಗಿ ಅವರು ರಮ್ಯಾ ಅವರಿಗೆ ಒಂದು 'ವೇಕ್-ಅಪ್ ಕಾಲ್' ಕೊಟ್ಟಿದ್ದಾರೆ. "ನೋಡಿ ರಮ್ಯಾ ಅವರೇ, ನೀವು ಸಿನಿಮಾ ತಜ್ಞರಲ್ಲ. ನೀವು ಕೇವಲ ನಟಿಯ ವೇಷ ಹಾಕಿಕೊಂಡಿರುವ ಕಾಂಗ್ರೆಸ್ ಪಕ್ಷದ ಚಿಯರ್ಲೀಡರ್ ಅಷ್ಟೇ" ಅಂತ ನೇರವಾಗಿ ವಾಗ್ದಾಳಿ ನಡೆಸಿದ್ದಾರೆ. ಸಿನಿಮಾ ಇಂಡಸ್ಟ್ರಿಯಲ್ಲಿ ಒಬ್ಬ ವಿತರಕನಾಗಿ, ನಿರ್ಮಾಪಕನಾಗಿ ತಮಗಿರುವ ಅನುಭವವನ್ನು ನೆನಪಿಸಿರುವ ಸಂಬರಗಿ, ರಮ್ಯಾ ಅವರ ವಿಮರ್ಶೆ ಸಿನಿಮಾ ಪ್ರೇಕ್ಷಕಿಯದ್ದಲ್ಲ, ಬದಲಾಗಿ ಅದೊಂದು ರಾಜಕೀಯ ಪ್ರೇರಿತ ಟೀಕೆ ಅಂತ ಗುಡುಗಿದ್ದಾರೆ.
ಜಗಳ ಇಲ್ಲಿಗೇ ನಿಲ್ಲಲಿಲ್ಲ. ಸಂಬರಗಿ ಅವರು ರಮ್ಯಾ ಅವರ ಹಳೆಯ ಹೇಳಿಕೆಯೊಂದನ್ನು ಕೆದಕಿದ್ದಾರೆ. "ಹಿಂದೆ ಪಾಕಿಸ್ತಾನಕ್ಕೆ ಹೋಗಿ ಬಂದು ಅದು ನರಕವಲ್ಲ, ಸ್ವರ್ಗ ಅಂದಿದ್ರಿ. ಆದ್ರೆ ಇವತ್ತು ಗ್ಲೋಬಲ್ ಟೆರರಿಸಂ ಇಂಡೆಕ್ಸ್ ನೋಡಿದ್ರೆ ಪಾಕಿಸ್ತಾನ ಭಯೋತ್ಪಾದನೆಯಲ್ಲಿ ಟಾಪ್ನಲ್ಲಿದೆ. ನಮ್ಮ ಸಿನಿಮಾ ಇರೋದೇ ಇಂತಹ ಭಯೋತ್ಪಾದನೆಯ ಬಗ್ಗೆ. ಸಿನಿಮಾ ಬಗ್ಗೆ ಟೀಕೆ ಮಾಡೋ ಮೊದಲು ಸತ್ಯ ತಿಳ್ಕೊಳ್ಳಿ" ಅಂತ ಕ್ಲಾಸ್ ತಗೊಂಡಿದ್ದಾರೆ. ಅಷ್ಟೇ ಅಲ್ಲದೆ, "ಸಿನಿಮಾದಲ್ಲಿ ಯಾವುದಾದರೂ ಒಂದು ಸೀನ್ ಅಥವಾ ವಿಷಯ ಸುಳ್ಳು ಅಂತ ಬೆರಳು ಮಾಡಿ ತೋರಿಸಿ ನೋಡೋಣ? ನಾನು ನಿಮಗೊಂದು ಓಪನ್ ಚಾಲೆಂಜ್ ಮಾಡ್ತೀನಿ" ಅಂತ ಸವಾಲು ಹಾಕಿದ್ದಾರೆ.
ಕೊನೆಯಲ್ಲಿ ಪ್ರಶಾಂತ್ ಸಂಬರಗಿ ಅವರು ರಮ್ಯಾ ಅವರಿಗೆ "ಗೆಟ್ ವೆಲ್ ಸೂನ್" (ಬೇಗ ಗುಣಮುಖರಾಗಿ) ಅಂತ ಹಾರೈಸಿದ್ದಾರೆ. ಇದಕ್ಕೆ ಕಾರಣ ರಮ್ಯಾ ಅವರ 'ಜಾತ್ಯತೀತ' ನಿಲುವು. "ಭಾರತದಲ್ಲಿ ಜಾತ್ಯತೀತ ಹಿಂದೂ ಆಗಿರೋದು ಒಂದು ಕಾಯಿಲೆ ಇದ್ದಂತೆ. ಅದಕ್ಕೆ ಆದಷ್ಟು ಬೇಗ ಚಿಕಿತ್ಸೆ ತಗೊಳ್ಳಿ. ನಿಮ್ಮ ಬಗ್ಗೆ ನನಗೆ ವಿಷಾದ ಇದೆ" ಅಂತ ಹೇಳುವ ಮೂಲಕ ವಿವಾದಕ್ಕೆ ಹೊಸ ತಿರುವು ಕೊಟ್ಟಿದ್ದಾರೆ.
ಒಟ್ಟಿನಲ್ಲಿ, ಒಂದು ಸಿನಿಮಾದ ವಿಮರ್ಶೆ ಇಷ್ಟೊಂದು ದೊಡ್ಡ ಮಟ್ಟದ ರಾಜಕೀಯ ಮತ್ತು ವೈಯಕ್ತಿಕ ಕೆಸರೆರಚಾಟಕ್ಕೆ ಕಾರಣವಾಗಿದ್ದು ನಿಜಕ್ಕೂ ಆಶ್ಚರ್ಯಕರ. ಸಿನಿಮಾ ಚೆನ್ನಾಗಿದೆಯೋ ಇಲ್ವೋ ಅನ್ನೋದು ಪ್ರೇಕ್ಷಕರ ತೀರ್ಪು, ಆದ್ರೆ ಈ ಇಬ್ಬರ ನಡುವಿನ ಮಾತಿನ ಚಕಮಕಿ ಮಾತ್ರ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ಸೌಂಡ್ ಮಾಡ್ತಿದೆ.
