ಸ್ಪೇನ್ ಫುಟ್ಬಾಲ್ ಜಗತ್ತಿನಲ್ಲಿ ದುರಂತ ಘಟನೆಯೊಂದು ಸಂಭವಿಸಿದೆ. ಟೆನೆರಿಫ್ ಫುಟ್ಬಾಲ್ ತಂಡದ ಪ್ರಮುಖ ಆಟಗಾರ ಜೀಸಸ್ ಡಿ ಮಿಗುಯೆಲ್ ಪಂದ್ಯವೊಂದರಲ್ಲಿ ಗಂಭೀರವಾಗಿ ಗಾಯಗೊಂಡು ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ. ಕೇವಲ 30ನೇ ವಯಸ್ಸಿನಲ್ಲೇ ಅವರ ಸಾವು ಫುಟ್ಬಾಲ್ ಅಭಿಮಾನಿಗಳು, ಆಟಗಾರರು ಮತ್ತು ಕ್ರೀಡಾ ವಲಯದಲ್ಲಿ ತೀವ್ರ ದುಃಖಕ್ಕೆ ಕಾರಣವಾಗಿದೆ.
ಸೋಮವಾರ ಟೆನೆರಿಫ್ ಮತ್ತು ಎಫ್‌ಸಿ ಅಂಡೋರಾ ತಂಡಗಳ ನಡುವೆ ಸ್ಪೇನ್‌ನ ಎರಡನೇ ಡಿವಿಷನ್ ಪಂದ್ಯ ನಡೆಯುತ್ತಿತ್ತು. ಪಂದ್ಯದಲ್ಲಿ ಉಭಯ ತಂಡಗಳು 2-2 ಗೋಲುಗಳಿಂದ ಸಮಬಲ ಸಾಧಿಸಿದ್ದವು. ಹೆಚ್ಚುವರಿ ಸಮಯದ ಏಳನೇ ನಿಮಿಷದಲ್ಲಿ ಈ ದುರಂತ ಸಂಭವಿಸಿತು. ಅಂಡೋರಾ ತಂಡದ ಗೋಲ್‌ಕೀಪರ್ ಜೀಸಸ್ ಓವೊನೊ ಅವರು ದೂರದಿಂದ ಬರುತ್ತಿದ್ದ ಚೆಂಡನ್ನು ತಡೆಯಲು ಮೈದಾನದ ಮಧ್ಯಭಾಗದವರೆಗೆ ಬಂದಿದ್ದರು. ಈ ವೇಳೆ ಅವರ ಮೊಣಕಾಲು ಡಿ ಮಿಗುಯೆಲ್ ಅವರ ದೇಹಕ್ಕೆ ಬಲವಾಗಿ ತಗುಲಿದ ಪರಿಣಾಮ ಡಿಕ್ಕಿ ಸಂಭವಿಸಿತು.
ಡಿಕ್ಕಿಯ ರಭಸಕ್ಕೆ ಡಿ ಮಿಗುಯೆಲ್ ಮೈದಾನದಲ್ಲೇ ಪ್ರಜ್ಞೆ ತಪ್ಪಿ ಕುಸಿದುಬಿದ್ದರು. ತಕ್ಷಣವೇ ಎರಡೂ ತಂಡಗಳ ವೈದ್ಯಕೀಯ ಸಿಬ್ಬಂದಿ ಅವರ ನೆರವಿಗೆ ಧಾವಿಸಿದರು. ತಲೆಗೆ ಮತ್ತು ಎದೆಗೆ ಗಂಭೀರ ಗಾಯಗಳಾಗಿದ್ದ ಅವರನ್ನು ಪ್ರಾಥಮಿಕ ಚಿಕಿತ್ಸೆ ಬಳಿಕ ಆಂಬುಲೆನ್ಸ್ ಮೂಲಕ ಟೆನೆರಿಫ್‌ನ ಎಸ್ಟಾಡಿಯೊ ಹೆಲಿಯೋಡೊರೊ ರೊಡ್ರಿಗಸ್ ಲೋಪೆಜ್ ಕ್ರೀಡಾಂಗಣದಿಂದ ಆಸ್ಪತ್ರೆಗೆ ಕರೆದೊಯ್ಯಲಾಯಿತು.
ಆಸ್ಪತ್ರೆಗೆ ಸಾಗಿಸುವಾಗ ಹೃದಯ ಸ್ತಂಭನ
ಸ್ಪೇನ್‌ನ ಮಾಧ್ಯಮ ವರದಿಗಳ ಪ್ರಕಾರ, ಆಸ್ಪತ್ರೆಗೆ ಕರೆದೊಯ್ಯುವ ಮಾರ್ಗದಲ್ಲಿ ಡಿ ಮಿಗುಯೆಲ್ ಅವರಿಗೆ ಹೃದಯ ಸ್ತಂಭನ ಸಂಭವಿಸಿತ್ತು. ಆಂಬುಲೆನ್ಸ್‌ನಲ್ಲಿದ್ದ ತುರ್ತು ವೈದ್ಯಕೀಯ ಸಿಬ್ಬಂದಿ ತಕ್ಷಣವೇ ಪುನಶ್ಚೇತನ ಚಿಕಿತ್ಸೆಯನ್ನು ನೀಡಿ ಅವರ ಹೃದಯ ಬಡಿತವನ್ನು ಮತ್ತೆ ಸ್ಥಾಪಿಸುವಲ್ಲಿ ಯಶಸ್ವಿಯಾಗಿದ್ದರು ಎಂದು ವರದಿಯಾಗಿದೆ.
ಸೋಮವಾರ ಅವರ ಆರೋಗ್ಯ ಸ್ಥಿತಿ ಸ್ಥಿರವಾಗಿದ್ದರೂ ಗಂಭೀರವಾಗಿದೆ ಎಂದು ತಿಳಿಸಲಾಗಿತ್ತು. ಆದರೆ ಮಂಗಳವಾರ ಬೆಳಗ್ಗೆ ಅವರ ಆರೋಗ್ಯದಲ್ಲಿ ಮತ್ತಷ್ಟು ಏರುಪೇರಾಯಿತು. ಚಿಕಿತ್ಸೆ ಮುಂದುವರಿದರೂ ಚೇತರಿಸಿಕೊಳ್ಳದ ಅವರು ಸ್ಥಳೀಯ ಸಮಯ ಬೆಳಗ್ಗೆ 8 ಗಂಟೆಗೆ ಮೃತಪಟ್ಟಿದ್ದಾರೆ.
ಈ ಘಟನೆಯಿಂದ ಮೈದಾನದಲ್ಲಿದ್ದ ಎರಡೂ ತಂಡಗಳ ಆಟಗಾರರು ಆಘಾತಕ್ಕೊಳಗಾಗಿದ್ದರು. ವೈದ್ಯಕೀಯ ಸಿಬ್ಬಂದಿ ಡಿ ಮಿಗುಯೆಲ್ ಅವರಿಗೆ ಚಿಕಿತ್ಸೆ ನೀಡುತ್ತಿದ್ದಾಗ ಅವರ ಹಲವು ಸಹ ಆಟಗಾರರು ಕಣ್ಣೀರಿಟ್ಟಿದ್ದರು. ಘಟನೆಯ ಬಳಿಕ ಪಂದ್ಯದ ರೆಫರಿ ಅಂಡೋರಾ ಗೋಲ್‌ಕೀಪರ್ ಜೀಸಸ್ ಓವೊನೊ ಅವರಿಗೆ ನೇರ ಕೆಂಪು ಕಾರ್ಡ್ ತೋರಿಸಿದರು. ಬಳಿಕ ಪಂದ್ಯವನ್ನು ಸ್ಥಗಿತಗೊಳಿಸಲಾಯಿತು.
ಸ್ಪೇನ್ ಕಪ್ ಪಂದ್ಯಗಳು ಮುಂದೂಡಿಕೆ
ಡಿ ಮಿಗುಯೆಲ್ ಅವರ ನಿಧನದ ಹಿನ್ನೆಲೆಯಲ್ಲಿ ಸ್ಪೇನ್ ಫುಟ್ಬಾಲ್ ಸಂಸ್ಥೆ ಮಂಗಳವಾರ ನಡೆಯಬೇಕಿದ್ದ ಕೆಲವು ಕಪ್ ಪಂದ್ಯಗಳನ್ನು ಮುಂದೂಡುವ ನಿರ್ಧಾರ ಕೈಗೊಂಡಿದೆ. ಪುರುಷರ ಕೋಪಾ ಡೆಲ್ ರೇ ಟೂರ್ನಿಯ ಮೊದಲ ಸುತ್ತಿನ ಎರಡು ಪಂದ್ಯಗಳು ಮಂಗಳವಾರ ನಿಗದಿಯಾಗಿದ್ದವು. ಇದರ ಜೊತೆಗೆ ಮಹಿಳೆಯರ ಕೋಪಾ ಡೆ ಲಾ ರೇನಾ ಟೂರ್ನಿಯಲ್ಲಿ ಎಸ್ಪಾನ್ಯೋಲ್ ಮತ್ತು ಎಎಸ್ ಸೆಲ್ಟಾಸ್ ತಂಡಗಳ ನಡುವಿನ ಪಂದ್ಯವೂ ನಡೆಯಬೇಕಿತ್ತು. ಆದರೆ ಆಟಗಾರನ ನಿಧನದ ಹಿನ್ನೆಲೆಯಲ್ಲಿ ಈ ಪಂದ್ಯಗಳನ್ನು ಮುಂದೂಡಲಾಗಿದೆ.
ಜೆರಾರ್ಡ್ ಪಿಕೆ, ಕಿಲಿಯನ್ ಎಂಬಾಪೆ ಸಂತಾಪ
ಡಿ ಮಿಗುಯೆಲ್ ಅವರ ನಿಧನಕ್ಕೆ ಫುಟ್ಬಾಲ್ ಜಗತ್ತಿನ ಹಲವು ಗಣ್ಯರು ಸಂತಾಪ ಸೂಚಿಸಿದ್ದಾರೆ. ಮಾಜಿ ಬಾರ್ಸಿಲೋನಾ ಡಿಫೆಂಡರ್ ಹಾಗೂ ಎಫ್‌ಸಿ ಅಂಡೋರಾದ ಸಹ ಮಾಲೀಕರೂ ಆಗಿರುವ ಜೆರಾರ್ಡ್ ಪಿಕೆ ಅವರು, “ನನ್ನ ಹೃದಯದಾಳದಿಂದ ಸಂತಾಪ ಸೂಚಿಸುತ್ತೇನೆ. ಜೀಸಸ್, ನಿಮ್ಮ ಆತ್ಮಕ್ಕೆ ಶಾಂತಿ ಸಿಗಲಿ” ಎಂದು ಹೇಳಿದ್ದಾರೆ.
ಲಾ ಲಿಗಾ ಅಧ್ಯಕ್ಷ ಜೇವಿಯರ್ ಟೆಬಾಸ್ ಕೂಡ ಸಂತಾಪ ವ್ಯಕ್ತಪಡಿಸಿದ್ದು, “ಇಂದು ನಾವು ತುಂಬಲಾರದ ನಷ್ಟದ ನೋವನ್ನು ಹಂಚಿಕೊಳ್ಳುತ್ತಿದ್ದೇವೆ. ಅವರ ಕುಟುಂಬ, ಆತ್ಮೀಯರು, ಸಹ ಆಟಗಾರರು ಮತ್ತು ಇಡೀ ಕ್ಲಬ್‌ಗೆ ನನ್ನ ಆಳವಾದ ಸಂತಾಪಗಳು” ಎಂದು ತಿಳಿಸಿದ್ದಾರೆ.
ರಿಯಲ್ ಮ್ಯಾಡ್ರಿಡ್ ಮತ್ತು ಫ್ರಾನ್ಸ್ ತಂಡದ ಸ್ಟಾರ್ ಆಟಗಾರ ಕಿಲಿಯನ್ ಎಂಬಾಪೆ ಕೂಡ ಸಾಮಾಜಿಕ ಜಾಲತಾಣದಲ್ಲಿ ದುಃಖ ಹಂಚಿಕೊಂಡಿದ್ದಾರೆ. “ತುಂಬಾ ದುಃಖವಾಗಿದೆ, ಹೇಳಲು ಪದಗಳೇ ಇಲ್ಲ” ಎಂದು ಅವರು ಬರೆದಿದ್ದಾರೆ.
30ನೇ ವಯಸ್ಸಿನಲ್ಲೇ ಫುಟ್ಬಾಲ್ ಆಟಗಾರನೊಬ್ಬನ ಜೀವನ ದುರಂತ ಅಂತ್ಯ ಕಂಡಿರುವುದು ಕ್ರೀಡಾ ಜಗತ್ತಿಗೆ ದೊಡ್ಡ ಆಘಾತವಾಗಿದೆ. ಮೈದಾನದಲ್ಲಿ ನಡೆದ ಈ ಘಟನೆ ಆಟಗಾರರ ಸುರಕ್ಷತೆ ಮತ್ತು ತುರ್ತು ವೈದ್ಯಕೀಯ ನೆರವಿನ ಮಹತ್ವದ ಬಗ್ಗೆಯೂ ಮತ್ತೆ ಗಮನ ಸೆಳೆದಿದೆ.
Comments