ಬೆಂಗಳೂರು ಅಂದ್ರೆ ಕ್ರಿಕೆಟ್ ಹುಚ್ಚು ಇರೋರಿಗೆ ಸ್ವರ್ಗ. ಕಳೆದ ವರ್ಷ ನಮ್ಮ ಆರ್ಸಿಬಿ (RCB) ಕಪ್ ಗೆದ್ದ ಸಂಭ್ರಮ ಇನ್ನೂ ಕಣ್ಣಮುಂದೆ ಇದೆ. ಐಪಿಎಲ್ ನಿಯಮದ ಪ್ರಕಾರ, ಕಳೆದ ಬಾರಿ ಯಾರು ಚಾಂಪಿಯನ್ ಆಗಿರುತ್ತಾರೋ ಅವರ ಹೋಮ್ ಗ್ರೌಂಡ್ನಲ್ಲಿ ಈ ವರ್ಷದ ಫೈನಲ್ ಪಂದ್ಯ ನಡೆಯಬೇಕು. ಆ ಪ್ರಕಾರ ಮೇ 31ರಂದು ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಫೈನಲ್ ನಡೆಯಬೇಕಿತ್ತು. ಆದರೆ ಈಗ ಈ ಪಂದ್ಯ ಬೇರೆ ಕಡೆ ಶಿಫ್ಟ್ ಆಗುವ ಭೀತಿ ಎದುರಾಗಿದೆ!
ಏನಿದು ಟಿಕೆಟ್ ಫೈಟ್?
ಬೆಂಗಳೂರಿನಲ್ಲಿ ಪಂದ್ಯ ನಡೆಯದಿರಲು ಕಾರಣ ಮಳೆ ಅಥವಾ ಭದ್ರತೆ ಅಂದುಕೊಂಡ್ರೆ ತಪ್ಪು. ಅಸಲಿ ಮ್ಯಾಟರ್ ಇರೋದು ನಮ್ಮ ಶಾಸಕರು (MLAs) ಕೇಳುತ್ತಿರೋ ಟಿಕೆಟ್ ವಿಷಯದಲ್ಲಿ. ಐಪಿಎಲ್ 2026ರ ಮೊದಲ ಪಂದ್ಯ ನಡೆಯುವ ಮುನ್ನವೇ ಕಾಂಗ್ರೆಸ್ ಶಾಸಕ ವಿಜಯಾನಂದ ಕಾಶಪ್ಪನವರ್ ಒಂದು ಡಿಮ್ಯಾಂಡ್ ಇಟ್ಟಿದ್ದರು. ಅದೇನೆಂದರೆ, ರಾಜ್ಯದ ಪ್ರತಿಯೊಬ್ಬ ಶಾಸಕರಿಗೂ ಕನಿಷ್ಠ 5 ಐಪಿಎಲ್ ಟಿಕೆಟ್ಗಳನ್ನು ಕೊಡಬೇಕು. "ನಾವೆಲ್ಲಾ ವಿಐಪಿಗಳು, ನಮಗೇನು ಸಾಲಿನಲ್ಲಿ ನಿಂತು ಟಿಕೆಟ್ ತಗೊಳ್ಳೋ ಪರಿಸ್ಥಿತಿ ಬರಬಾರದು" ಅನ್ನೋದು ಅವರ ವಾದವಾಗಿತ್ತು.
ಇದಕ್ಕೆ ಪ್ರತಿಕ್ರಿಯಿಸಿದ್ದ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು, ಶಾಸಕರು ಮತ್ತು ಸಂಸದರಿಗೆ ಆರ್ಸಿಬಿ ಪಂದ್ಯಗಳ ತಲಾ 3 ಟಿಕೆಟ್ ನೀಡಲಾಗುವುದು ಎಂದು ಹೇಳಿದ್ದರು. ಆದರೆ ಟಿಕೆಟ್ಗಾಗಿ ಈ ರಾಜಕೀಯ ಕಿತ್ತಾಟ ಈಗ ಬಿಸಿಸಿಐ (BCCI) ಗಮನಕ್ಕೆ ಬಂದಿದ್ದು, ಅವರಿಗಿದು ತಲೆನೋವಾಗಿ ಪರಿಣಮಿಸಿದೆ.
ಬಿಸಿಸಿಐ ಪ್ಲಾನ್ ಏನು?
ಇನ್ನೂ ಪ್ಲೇ-ಆಫ್ಸ್ ಮತ್ತು ಫೈನಲ್ ಪಂದ್ಯಗಳ ಅಧಿಕೃತ ವೆನ್ಯೂ ಅನೌನ್ಸ್ ಆಗಿಲ್ಲ. ಒಳಗಿನ ಮಾಹಿತಿ ಪ್ರಕಾರ, ಪಂದ್ಯಗಳನ್ನ ಪಂಜಾಬ್ ಮತ್ತು ಕರ್ನಾಟಕದ ನಡುವೆ ಹಂಚಿಕೆ ಮಾಡಬಹುದು ಎನ್ನಲಾಗುತ್ತಿದೆ. ಆದರೆ ಬೆಂಗಳೂರಿನಲ್ಲಿ ಈ ಟಿಕೆಟ್ ಗಲಾಟೆ ಹೀಗೇ ಮುಂದುವರಿದರೆ, ಬಿಸಿಸಿಐ ಫೈನಲ್ ಪಂದ್ಯವನ್ನ ಬೆಂಗಳೂರಿನಿಂದ ಬೇರೆ ನಗರಕ್ಕೆ ವರ್ಗಾಯಿಸುವ ಸಾಧ್ಯತೆ ದಟ್ಟವಾಗಿದೆ.
ಬಿಸಿಸಿಐ ಮೂಲವೊಂದು ತಿಳಿಸಿರುವಂತೆ, 'ನಿಯಮದ ಪ್ರಕಾರ ವಿನ್ನರ್ ಸಿಟಿಯಲ್ಲೇ ಫೈನಲ್ ನಡೆಯಬೇಕು, ಆದರೆ ಈ ಎಂಎಲ್ಎ ಟಿಕೆಟ್ ಇಶ್ಯೂ ದೊಡ್ಡ ಸಮಸ್ಯೆಯಾಗಿದೆ. ಇದಕ್ಕೆ ಪರಿಹಾರ ಸಿಗದಿದ್ದರೆ ಫೈನಲ್ ಪಂದ್ಯವನ್ನು ಬೇರೆ ಕಡೆ ನಡೆಸದೆ ಬೇರೆ ದಾರಿಯಿಲ್ಲ'.
ಕಳೆದ ವರ್ಷ ಆರ್ಸಿಬಿ ಗೆದ್ದಾಗ ಬೆಂಗಳೂರಿನಲ್ಲಿ ನಡೆದ ವಿಜಯೋತ್ಸವದ ವೇಳೆ ನೂಕುನುಗ್ಗಲು ಉಂಟಾಗಿತ್ತು. ಆ ಕಾರಣಕ್ಕೆ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಪಂದ್ಯ ನಡೆಸಲು ಸ್ವಲ್ಪ ಗೊಂದಲವಿತ್ತು. ಆದರೆ ಸರ್ಕಾರಿ ಏಜೆನ್ಸಿಗಳ ಸುರಕ್ಷತಾ ಪರಿಶೀಲನೆಯ ನಂತರ, ಫೈನಲ್ ಸೇರಿದಂತೆ ಒಟ್ಟು 7 ಪಂದ್ಯಗಳಿಗೆ ಗ್ರೀನ್ ಸಿಗ್ನಲ್ ಸಿಕ್ಕಿತ್ತು. ಈಗ ಸುರಕ್ಷತೆಗಿಂತ ರಾಜಕೀಯ ಟಿಕೆಟ್ ಗಲಾಟೆಯೇ ಫೈನಲ್ ಮ್ಯಾಚ್ಗೆ ಅಡ್ಡಿಯಾಗುತ್ತಿರುವುದು ಅಭಿಮಾನಿಗಳಿಗೆ ಬೇಸರ ಮೂಡಿಸಿದೆ.
ಸದ್ಯ ಆರ್ಸಿಬಿ ಪಾಯಿಂಟ್ಸ್ ಟೇಬಲ್ನಲ್ಲಿ ಎರಡನೇ ಸ್ಥಾನದಲ್ಲಿದ್ದು, ಪ್ಲೇ-ಆಫ್ಸ್ ತಲುಪುವ ಫೇವರೆಟ್ ಟೀಮ್ ಆಗಿದೆ. ನಮ್ಮ ಹುಡುಗರು ಫೈನಲ್ ತಲುಪಿದಾಗ ಬೆಂಗಳೂರಿನಲ್ಲೇ ಮ್ಯಾಚ್ ನಡೆದರೆ ಆ ಕಿಕ್ಕೇ ಬೇರೆ ಅಲ್ವಾ? ಆದರೆ ಇದೆಲ್ಲಾ ಈಗ ನಮ್ಮ ರಾಜಕಾರಣಿಗಳ ಕೈಯಲ್ಲಿದೆ.
ಈ ಬಾರಿ ಬೆಂಗಳೂರಿನಲ್ಲಿ ಫೈನಲ್ ಹಬ್ಬ ನಡೆಯುತ್ತಾ ಅಥವಾ ಟಿಕೆಟ್ ಕಿತ್ತಾಟದಿಂದಾಗಿ ಬೇರೆ ರಾಜ್ಯಕ್ಕೆ ಶಿಫ್ಟ್ ಆಗುತ್ತಾ ಅನ್ನೋದನ್ನ ಕಾದು ನೋಡಬೇಕು.
