ರಾಜ್ಯ ರಾಜಕೀಯದಲ್ಲಿ ಈಗ ಹೈವೋಲ್ಟೇಜ್ ಡ್ರಾಮಾ ಶುರುವಾಗಿದೆ. ಡಿಕೆ ಶಿವಕುಮಾರ್ ಸಿಎಂ ಆಗಿ ಅಧಿಕಾರ ವಹಿಸಿಕೊಂಡು, ಮಂತ್ರಿಗಳಿಗೆ ಖಾತೆ ಹಂಚಿಕೆ ಬೆನ್ನಲ್ಲೇ ಹೊಸ ಸರ್ಕಾರಕ್ಕೆ ಮೊದಲ ಬಿಗ್ ಶಾಕ್ ಎದುರಾಗಿದೆ. ಹಿರಿಯ ನಾಯಕ ರಾಮಲಿಂಗಾ ರೆಡ್ಡಿ ಅವರು ಶುಕ್ರವಾರ ಬೆಳಗ್ಗೆ ತಮ್ಮ ಸಚಿವ ಸ್ಥಾನಕ್ಕೆ ದಿಢೀರ್ ರಾಜೀನಾಮೆ ನೀಡಿದ್ದಾರೆ. ಈ ಮೂಲಕ ಡಿಕೆಶಿ ಸಂಪುಟದ ಮೊದಲ ವಿಕೆಟ್ ಪತನವಾದಂತಾಗಿದೆ. ಬೆಂಗಳೂರು ನಗರಾಭಿವೃದ್ಧಿ ಖಾತೆ ಸಿಗದ್ದಕ್ಕೆ ರೆಡ್ಡಿ ತೀವ್ರ ಅಸಮಾಧಾನಗೊಂಡಿದ್ದು, ಈ ನಿರ್ಧಾರ ತಗೆದುಕೊಂಡಿದ್ದಾರೆ.
ಕೋರಮಂಗಲದಲ್ಲಿ ರೆಡ್ಡಿ ಗರ್ಜನೆ: ಅಸಲಿ ಕಥೆ ಬಿಚ್ಚಿಟ್ಟ ಹಿರಿಯ ನಾಯಕ
ರಾಜೀನಾಮೆ ಘೋಷಿಸಿದ ಬೆನ್ನಲ್ಲೇ ಬೆಂಗಳೂರಿನ ಕೋರಮಂಗಲ ಕಚೇರಿಯಲ್ಲಿ ರಾಮಲಿಂಗಾ ರೆಡ್ಡಿ ಭರ್ಜರಿ ಪ್ರೆಸ್ಮೀಟ್ ಮಾಡಿದರು. ತಾವೇಕೆ ಈ ನಿರ್ಧಾರಕ್ಕೆ ಬಂದೆ ಅನ್ನೋ ಅಸಲಿ ಸತ್ಯವನ್ನು ಜನರ ಮುಂದೆ ಮುಕ್ತವಾಗಿ ತೆರೆದಿಟ್ಟರು.
"ನನಗೆ ಜಲಸಂಪನ್ಮೂಲ ಇಲಾಖೆ ಕೊಟ್ಟಿದ್ದಾರೆ ಅನ್ನೋ ಒಂದೇ ಒಂದು ಕಾರಣಕ್ಕೆ ನಾನು ಬೇಸರ ಮಾಡಿಕೊಂಡು ರಾಜೀನಾಮೆ ನೀಡುತ್ತಿಲ್ಲ. ಇದರ ಹಿಂದೆ ದೊಡ್ಡ ಕಥೆಯೇ ಇದೆ. ಈಗಿನ ಸಿಎಂ ಡಿಕೆ ಶಿವಕುಮಾರ್ ಅವರು ಹಿಂದೆ ತಾವಾಗಿಯೇ ಬಂದು ನನಗೆ ಬೆಂಗಳೂರು ನಗರಾಭಿವೃದ್ಧಿ ಖಾತೆ ಕೊಡುವುದಾಗಿ ಪ್ರಾಮಿಸ್ ಮಾಡಿದ್ದರು. ಆದರೆ, ಈಗ ಕೊಟ್ಟ ಮಾತಿನಂತೆ ನಡೆದುಕೊಂಡಿಲ್ಲ. ಈ ಮೋಸದ ವಿಚಾರ ಜನರಿಗೆ ತಿಳಿಯಬೇಕು ಅನ್ನೋದಷ್ಟೇ ನನ್ನ ಆಸೆ," ಎಂದು ರೆಡ್ಡಿ ನೇರವಾಗಿಯೇ ಸತ್ಯ ಬಿಚ್ಚಿಟ್ಟರು.
ಪ್ರೆಸ್ಮೀಟ್ನ ಟಾಪ್ ಹೈಲೈಟ್ಸ್:
ಶಾಸಕನಾಗಿ ಮುಂದುವರಿಕೆ: ಸಚಿವ ಸ್ಥಾನಕ್ಕೆ ರಾಜೀನಾಮೆ ಕೊಟ್ಟರೂ, ಕಾಂಗ್ರೆಸ್ ಶಾಸಕನಾಗಿಯೇ ಮುಂದುವರಿಯುತ್ತೇನೆ.
ಪಕ್ಷ ಬಿಡಲ್ಲ: ಹಸ್ತದ ಜೊತೆಗಿನ ನಂಟು ಮುಗಿಯಲ್ಲ, ಕಾಂಗ್ರೆಸ್ ಬಿಟ್ಟು ಹೋಗುವ ಪ್ರಶ್ನೆಯೇ ಇಲ್ಲ.
ಭಿಕ್ಷೆ ಬೇಡಿಲ್ಲ: ನನ್ನ ಇಡೀ ರಾಜಕೀಯ ಜೀವನದಲ್ಲಿ ಸಚಿವ ಸ್ಥಾನಕ್ಕಾಗಿ ಯಾರ ಮುಂದೆಯೂ ಭಿಕ್ಷೆ ಬೇಡಿಲ್ಲ.
"ಯಾರ ಮೇಲೂ ಕೋಪವಿಲ್ಲ, ನಾನು ಸಾಯೋವರೆಗೂ ಕಾಂಗ್ರೆಸ್ಸಿಗ"
"ನನಗೆ ಸಿಎಂ ಡಿ.ಕೆ.ಶಿವಕುಮಾರ್ ಮೇಲಾಗಲಿ ಅಥವಾ ಸಿದ್ದರಾಮಯ್ಯ ಅವರ ಮೇಲಾಗಲಿ ಯಾವುದೇ ಪರ್ಸನಲ್ ಕೋಪ ಇಲ್ಲ. ನಾನು ಯಾಕೆ ಸಚಿವ ಸ್ಥಾನ ಬೇಡ ಅಂದೆ ಅನ್ನೋ ಸತ್ಯ ನಮ್ಮ ಜನರಿಗೆ ಗೊತ್ತಾಗಬೇಕಷ್ಟೇ. ನಾನು ಕಳೆದ 53 ವರ್ಷಗಳಿಂದ ಕಾಂಗ್ರೆಸ್ ಪಕ್ಷದಲ್ಲಿ ಒಬ್ಬ ನಿಷ್ಠಾವಂತ ಕಾರ್ಯಕರ್ತನಾಗಿ ದುಡಿದಿದ್ದೇನೆ. ಪಕ್ಷ ನನಗೆ ಎಲ್ಲವನ್ನೂ ಕೊಟ್ಟಿದೆ. ನಾನು ರಾಜೀನಾಮೆ ನೀಡಿರೋದು ಮಂತ್ರಿ ಗಿರಿಗೆ ಮಾತ್ರ, ಕಾಂಗ್ರೆಸ್ ಪಕ್ಷಕ್ಕಲ್ಲ. ನನ್ನ ಲೈಫ್ನಲ್ಲಿ ಎಂದಿಗೂ ಕಾಂಗ್ರೆಸ್ಗೆ ರಾಜೀನಾಮೆ ನೀಡಿಲ್ಲ, ಮುಂದೆಯೂ ನೀಡಲ್ಲ," ಎಂದು ತಮ್ಮ ನಿಷ್ಠೆಯನ್ನು ಮತ್ತೊಮ್ಮೆ ಸಾಬೀತುಪಡಿಸಿದರು.
ಡಿಕೆಶಿ ಕೊಟ್ಟಿದ್ದ ಆ ಒಂದು ಭರವಸೆ ಏನಾಗಿತ್ತು?
ತಮ್ಮ ಹಳೆಯ ರಾಜಕೀಯ ದಿನಗಳನ್ನು ನೆನೆಸಿಕೊಂಡ ರಾಮಲಿಂಗಾ ರೆಡ್ಡಿ, "ನಾನು ಸತತವಾಗಿ 8 ಬಾರಿ ಶಾಸಕನಾಗಿ ಗೆದ್ದಿದ್ದೇನೆ. ವೀರಪ್ಪ ಮೊಯ್ಲಿ ಅವರ ಸಂಪುಟದಲ್ಲಿ ಫಸ್ಟ್ ಟೈಮ್ ಮಂತ್ರಿಯಾಗಿದ್ದೆ. ಅದಾದ ಮೇಲೆ ಸಿದ್ದರಾಮಯ್ಯ ಅವರ ಕ್ಯಾಬಿನೆಟ್ನಲ್ಲಿ 2 ಬಾರಿ ಸಚಿವನಾಗಿ ಕೆಲಸ ಮಾಡಿದ್ದೇನೆ. ನನಗೆ ಈ ಹಿಂದೆ ಕೊಟ್ಟಿದ್ದ ಎಲ್ಲಾ ಇಲಾಖೆಗಳನ್ನು ಅತ್ಯಂತ ಸೂಪರ್ ಆಗಿ ನಿಭಾಯಿಸಿದ ರೆಕಾರ್ಡ್ ನನ್ನಲ್ಲಿದೆ. ನಾನು ಯಾವತ್ತೂ ಯಾವುದೇ ಸಿಎಂ ಹತ್ತಿರ ಹೋಗಿ 'ನನಗೆ ಮಂತ್ರಿ ಮಾಡಿ' ಅಥವಾ 'ಇದೇ ಖಾತೆ ಬೇಕು' ಅಂತ ಹಠ ಹಿಡಿದವನಲ್ಲ," ಎಂದರು.
ಮುಂದುವರಿದು ಮಾತನಾಡಿದ ಅವರು, "ಈ ಬಾರಿಯೂ ನಾನು ಶಿವಕುಮಾರ್ ಅವರ ಬಳಿಯಾಗಲಿ ಅಥವಾ ಹೈಕಮಾಂಡ್ ಬಳಿಯಾಗಲಿ ಮಂತ್ರಿ ಸ್ಥಾನಕ್ಕಾಗಿ ಬೇಡಿಕೆ ಇಟ್ಟಿರಲಿಲ್ಲ. ಆದರೆ, ಹಿಂದೆ ಡಿಕೆ ಶಿವಕುಮಾರ್ ಅವರೇ ಸ್ವತಃ ನನ್ನ ಬಳಿ ಬಂದು, 'ನಾನು ಎರಡುವರೆ ವರ್ಷಗಳ ಆದ ಮೇಲೆ ಸಿಎಂ ಆಗುತ್ತೇನೆ. ಆ ಟೈಮ್ನಲ್ಲಿ ನನ್ನ ಬಳಿ ಇರುವ ಬೆಂಗಳೂರು ನಗರಾಭಿವೃದ್ಧಿ ಖಾತೆಯನ್ನು ನಿಮಗೇ ಗಿಫ್ಟ್ ಆಗಿ ಕೊಡುತ್ತೇನೆ' ಅಂತ ಮಾತು ಕೊಟ್ಟಿದ್ದರು. ಆದರೆ ಈಗ ನೋಡಿದರೆ ನನಗೆ ಜಲಸಂಪನ್ಮೂಲ ಖಾತೆ ನೀಡಿದ್ದಾರೆ," ಎಂದು ಬೇಸರದಿಂದ ನುಡಿದರು.
Already teething trouble for DK Shivakumar govt - Minister Ramalinga Reddy miffed with portfolios given to him- tenders his resignation-
— 🦏 Payal M/પાયલ મેહતા/ पायल मेहता/ পাযেল মেহতা (@payalmehta100) June 5, 2026
Said to his supporters was promised many of the departments now given to Krishna Byregowda
No end to Nataka in Karanataka…. pic.twitter.com/yKKtMG80Jp
ಕಾಂಗ್ರೆಸ್ ಸರ್ಕಾರಕ್ಕೆ ತಲೆನೋವು!
ರಾಮಲಿಂಗಾ ರೆಡ್ಡಿ ಅವರ ಈ ದಿಢೀರ್ ರಾಜೀನಾಮೆ ಮೂವ್, ಕಾಂಗ್ರೆಸ್ ಸರ್ಕಾರದಲ್ಲಿ ಎಲ್ಲವೂ ಅಂದುಕೊಂಡಷ್ಟು ಸರಿ ಇಲ್ಲ ಅನ್ನೋದನ್ನು ಜಗಜ್ಜಾಹೀರು ಮಾಡಿದೆ. ಖಾತೆ ಹಂಚಿಕೆ ಬೆನ್ನಲ್ಲೇ ಅಸಮಾಧಾನದ ಹೊಗೆ ಆಡುತ್ತಿರುವುದು ಹೈಕಮಾಂಡ್ಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ.
ಅದರಲ್ಲೂ ವಿಶೇಷವಾಗಿ, ಕಾಂಗ್ರೆಸ್ನ ಬಿಗ್ ಬಾಸ್ ರಾಹುಲ್ ಗಾಂಧಿ ಅವರು ಬೆಂಗಳೂರಿಗೆ ಬರುತ್ತಿರುವ ದಿನವೇ ಈ ಹೈಡ್ರಾಮಾ ನಡೆದಿರುವುದು ರಾಜ್ಯ ನಾಯಕರಿಗೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ. ಒಟ್ಟಿನಲ್ಲಿ, ಬೆಂಗಳೂರು ಖಾತೆಯ 'ಕೈ' ತಪ್ಪಿದ್ದಕ್ಕೆ ರೆಡ್ಡಿ ಕೆಂಡಾಮಂಡಲವಾಗಿದ್ದು, ಮುಂದಿನ ದಿನಗಳಲ್ಲಿ ಈ ರಾಜಕೀಯ ಹಗ್ಗಜಗ್ಗಾಟ ಯಾವ ತಿರುವು ಪಡೆದುಕೊಳ್ಳುತ್ತದೆ ಅನ್ನೋದನ್ನು ಕಾದು ನೋಡಬೇಕಿದೆ.
