ನಾಳೆಯೇ ದರ್ಶನ್ ಭವಿಷ್ಯ ನಿರ್ಧಾರ - ಪೊಲೀಸರ ಈ ಮಿಸ್ಟೇಕ್ ನಿಂದ ನಟ ದರ್ಶನ್ ಆಚೆ ಬರ್ತಾರಾ?

ರೇಣುಕಾ ಸ್ವಾಮಿ ಜೀವಹಾನಿ ಪ್ರಕರಣದಲ್ಲಿ ದಿನಕ್ಕೊಂದು ತಿರುವುಗಳು ಸಿಗುತ್ತಿದ್ದು, ಇದೀಗ ಪೊಲೀಸರು ಮಾಡಿರುವ ಒಂದು 'ತಾಂತ್ರಿಕ ಯಡವಟ್ಟು' ನಟ ದರ್ಶನ್ ಪಾಲಿಗೆ ವರದಾನವಾಗುವ ಲಕ್ಷಣಗಳು ಕಾಣಿಸುತ್ತಿವೆ. ತನಿಖಾಧಿಕಾರಿಗಳ ಈ ಒಂದು ಮಿಸ್ಟೇಕ್‌ನಿಂದಾಗಿ ದರ್ಶನ್ ಜೈಲಿನಿಂದ ಹೊರಬರುವುದು ಬಹುತೇಕ ಖಚಿತ ಎಂಬ ಮಾತುಗಳು ಕಾನೂನು ವಲಯದಲ್ಲಿ ಕೇಳಿಬರುತ್ತಿವೆ.

ಚಿತ್ರದುರ್ಗದ ರೇಣುಕಾ ಸ್ವಾಮಿ ಜೀವಹಾನಿ ಪ್ರಕರಣದಲ್ಲಿ ಎದುರಾಗಿರುವ ಹೊಸ ಬೆಳವಣಿಗೆಯು ಇಡೀ ಪೊಲೀಸ್ ಇಲಾಖೆಗೆ ತಲೆನೋವಾಗಿ ಪರಿಣಮಿಸಿದೆ. ಈ ಕೇಸ್‌ನ ತನಿಖೆ ನಡೆಸಿದ್ದ ಇನ್‌ಸ್ಪೆಕ್ಟರ್ ಗಿರೀಶ್ ನಾಯಕ್ ಅವರು ನ್ಯಾಯಾಲಯಕ್ಕೆ ಸಲ್ಲಿಸಿರುವ ವರದಿಯಲ್ಲಿ ಮಹತ್ವದ ಲೋಪದೋಷಗಳು ಕಂಡುಬಂದಿವೆ ಎನ್ನಲಾಗಿದೆ. ಈ ಹಿನ್ನೆಲೆಯಲ್ಲಿ ಅವರ ವಿರುದ್ಧವೇ ಕ್ರಿಮಿನಲ್ ಕೇಸ್ ದಾಖಲಿಸಲು ಅರ್ಜಿ ಸಲ್ಲಿಕೆಯಾಗಿದ್ದು, ಪ್ರಕರಣಕ್ಕೆ ಈಗ ಕುತೂಹಲಕಾರಿ ತಿರುವು ಸಿಕ್ಕಿದೆ.

ಏನಿದು ಪೊಲೀಸರ ಯಡವಟ್ಟು?

ಪ್ರಕರಣದ ತನಿಖೆಯ ಭಾಗವಾಗಿ ಆರೋಪಿಗಳ ಮೊಬೈಲ್ ಫೋನ್‌ಗಳನ್ನು ವಶಪಡಿಸಿಕೊಂಡು ಸ್ಥಳ ಮಹಜರ್ ಮಾಡುವ ಪ್ರಕ್ರಿಯೆಯಲ್ಲಿ ಪೊಲೀಸರು ತಪ್ಪು ಮಾಹಿತಿ ನೀಡಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ಹಿರಿಯ ವಕೀಲ ಸುಧನ್ವ ಅವರು ನ್ಯಾಯಾಲಯದಲ್ಲಿ ಮಂಡಿಸಿರುವ ವಾದದ ಪ್ರಕಾರ, ಪೊಲೀಸರು ಕಾಮಾಕ್ಷಿಪಾಳ್ಯ ಪೊಲೀಸ್ ಠಾಣೆಯಲ್ಲಿ ಮಹಜರು ನಡೆಸಲಾಗಿದೆ ಎಂದು ದಾಖಲೆ ಸಲ್ಲಿಸಿದ್ದಾರೆ. ಆದರೆ, ಮಹಜರು ಸಂದರ್ಭದಲ್ಲಿ ತೆಗೆಯಲಾದ ಫೋಟೋಗಳಲ್ಲಿ ಕಾಣಿಸುವ ಫ್ಲೋರಿಂಗ್ (ಟೈಲ್ಸ್) ಕಾಮಾಕ್ಷಿಪಾಳ್ಯ ಠಾಣೆಯಲ್ಲಿ ಇಲ್ಲ ಎಂಬುದು ಕ್ರಾಸ್ ಎಕ್ಸಾಮಿನೇಷನ್ ವೇಳೆ ಬಹಿರಂಗವಾಗಿದೆ.

ಅಂದರೆ, ಪೊಲೀಸರು ಆರೋಪಿಗಳನ್ನು ಬೇರೆ ಯಾವುದೋ ಜಾಗದಲ್ಲಿ ನಿಲ್ಲಿಸಿ ಮಹಜರ್ ಪ್ರಕ್ರಿಯೆ ನಡೆಸಿ, ಅದನ್ನು ದಾಖಲೆಗಳಲ್ಲಿ ಕಾಮಾಕ್ಷಿಪಾಳ್ಯ ಠಾಣೆ ಎಂದು ಸುಳ್ಳು ಮಾಹಿತಿ ನೀಡಿದ್ದಾರೆ ಎಂಬುದು ರಕ್ಷಣಾ ಪರ ವಕೀಲರ ಪ್ರಬಲ ವಾದವಾಗಿದೆ.

ಫೆಬ್ರವರಿ 25ರಂದು ಸ್ಥಳ ಪರಿಶೀಲನೆ: ದರ್ಶನ್ ಭವಿಷ್ಯ ನಿರ್ಧಾರ?

ಈ ಗಂಭೀರವಾದ ಆರೋಪವನ್ನು ಗಮನಿಸಿದ CCH 64 ನ್ಯಾಯಾಲಯವು ಕೂಡಲೇ ಸ್ಥಳ ಪರಿಶೀಲನೆ ನಡೆಸಿ ವರದಿ ನೀಡುವಂತೆ ಆದೇಶಿಸಿದೆ. ನಾಳೆ, ಅಂದರೆ ಫೆಬ್ರವರಿ 25ರಂದು ವಕೀಲರ ಸಮ್ಮುಖದಲ್ಲೇ ಕಾಮಾಕ್ಷಿಪಾಳ್ಯ ಪೊಲೀಸ್ ಠಾಣೆಯ ವಾಸ್ತವ ಸ್ಥಿತಿಯ ಪರಿಶೀಲನೆ ನಡೆಯಲಿದೆ. ಒಂದು ವೇಳೆ ಮಹಜರರ್ ನಡೆದ ಜಾಗ ಮತ್ತು ಠಾಣೆಯ ಫ್ಲೋರಿಂಗ್ ವ್ಯತ್ಯಾಸವಾಗಿರುವುದು ದೃಢಪಟ್ಟರೆ, ತನಿಖಾಧಿಕಾರಿ ಗಿರೀಶ್ ನಾಯಕ್ ಮೇಲೆ ಕ್ರಿಮಿನಲ್ ಮೊಕದ್ದಮೆ ದಾಖಲಾಗುವುದು ಖಚಿತ.

ದರ್ಶನ್ ಅಭಿಮಾನಿಗಳಲ್ಲಿ ಚಿಗುರಿದ ಭರವಸೆ

ಪೊಲೀಸರ ಈ ಒಂದು ತಪ್ಪು ಇಡೀ ಪ್ರಕರಣದ ಅಡಿಪಾಯವನ್ನೇ ಅಲುಗಾಡಿಸಬಹುದು. ನ್ಯಾಯಾಲಯಕ್ಕೆ ಸುಳ್ಳು ವರದಿ ನೀಡಿರುವುದು ಸಾಬೀತಾದರೆ, ಪೊಲೀಸರು ಸಂಗ್ರಹಿಸಿದ ಸಾಕ್ಷ್ಯಗಳ ವಿಶ್ವಾಸಾರ್ಹತೆ ಕುಂದುತ್ತದೆ. ಇದು ನಟ ದರ್ಶನ್ ಅವರಿಗೆ ಜಾಮೀನು ಸಿಗಲು ದೊಡ್ಡ ಶಕ್ತಿಯಾಗಲಿದೆ. ಪೊಲೀಸರು ದರ್ಶನ್ ಮೇಲೆ ಇದ್ದ ದ್ವೇಷಕ್ಕಾಗಿ ಇಂತಹ ಕುತಂತ್ರ ಮಾಡಿದ್ದಾರಾ ಅಥವಾ ಯಾರದ್ದೋ ಪಿತೂರಿಯಿಂದ ಹೀಗಾಗಿದೆಯೇ ಎಂಬ ಪ್ರಶ್ನೆಗಳು ಈಗ ಕಾಡುತ್ತಿವೆ.

ಒಟ್ಟಾರೆಯಾಗಿ ಹೇಳಬೇಕು ಅಂದರೆ, ಅನ್ಯಾಯಕ್ಕೊಳಗಾದವರಿಗೆ ನ್ಯಾಯ ಸಿಗಬೇಕು ಎನ್ನುವುದು ಎಷ್ಟು ಮುಖ್ಯವೋ, ತನಿಖೆಯು ಕೂಡ ಕಾನೂನುಬದ್ಧವಾಗಿ ನಡೆಯುವುದು ಅಷ್ಟೇ ಮುಖ್ಯ. ಫೆಬ್ರವರಿ 25ರ ವರದಿ ಈ ಕೇಸ್‌ನ ಅಂತಿಮ ಫಲಿತಾಂಶದ ಮೇಲೆ ಭಾರಿ ಪ್ರಭಾವ ಬೀರಲಿದೆ.