ರಾಮನಗರ ತಾಲೂಕಿನ ಸಾಂಗಬಸವನದೊಡ್ಡಿ ಗ್ರಾಮದಲ್ಲಿ ನಡೆದಿದ್ದ 75 ವರ್ಷದ ವೃದ್ಧೆಯ ನಿಗೂಢ ನಾಪತ್ತೆ ಪ್ರಕರಣವು ಈಗ ಭೀಕರ ಕೊಲೆಯಲ್ಲಿ ಅಂತ್ಯಗೊಂಡಿದೆ. ಕೇವಲ 20,000 ರೂಪಾಯಿ ಸಾಲದ ಬಡ್ಡಿ ಹಣದ ವಿವಾದಕ್ಕಾಗಿ ವೃದ್ಧೆಯನ್ನು ಕತ್ತು ಹಿಸುಕಿ ಕೊ*ಲೆ ಮಾಡಿ, ಆಕೆಯ ಮೈಮೇಲಿದ್ದ ಬಂಗಾರದ ಒಡವೆಗಳನ್ನು ದೋಚಿ, ಶವವನ್ನು ರೈಲ್ವೆ ಹಳಿ ಪಕ್ಕ ಎಸೆದಿದ್ದ ಆಘಾತಕಾರಿ ಘಟನೆಯನ್ನು ರಾಮನಗರ ಗ್ರಾಮಾಂತರ ಪೊಲೀಸರು ಭೇದಿಸಿದ್ದಾರೆ. ಈ ಕ್ರೂರ ಕೃತ್ಯಕ್ಕೆ ಸಂಬಂಧಿಸಿದಂತೆ ಅದೇ ಗ್ರಾಮದ ಗಿರಿಜಾ (36) ಮತ್ತು ಆಕೆಯ ಪ್ರಿಯಕರ ಮಹೇಶ್ (42) ಎಂಬುವವರನ್ನು ಪೊಲೀಸರು ಬಂಧಿಸಿದ್ದಾರೆ.
ಕೊಲೆಯಾದ ದುರ್ದೈವಿಯನ್ನು ಸಾಂಗಬಸವನದೊಡ್ಡಿ ನಿವಾಸಿ ಸುಶೀಲಮ್ಮ (75) ಎಂದು ಗುರುತಿಸಲಾಗಿದೆ. ಬಂಧಿತ ಆರೋಪಿಗಳಿಂದ ಪೊಲೀಸರು ₹5.45 ಲಕ್ಷ ಮೌಲ್ಯದ 39 ಗ್ರಾಂ ಚಿನ್ನದ ಆಭರಣಗಳನ್ನು ವಶಪಡಿಸಿಕೊಂಡಿದ್ದು, ಇಬ್ಬರನ್ನೂ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.
ಕೇವಲ ₹600 ಬಡ್ಡಿ ಹಣಕ್ಕಾಗಿ ಶುರುವಾದ ವಿವಾದ
ಪೊಲೀಸ್ ತನಿಖೆಯ ವೇಳೆ ಲಭ್ಯವಾಗಿರುವ ಮಾಹಿತಿಯ ಪ್ರಕಾರ, ಮೃತ ಸುಶೀಲಮ್ಮ ಅವರು ಅದೇ ಗ್ರಾಮದ ಗಿರಿಜಾಗೆ ₹20,000 ಹಣವನ್ನು ಸಾಲವಾಗಿ ನೀಡಿದ್ದರು. ಈ ಸಾಲಕ್ಕೆ ಪ್ರತಿಯಾಗಿ ಗಿರಿಜಾ ತಿಂಗಳಿಗೆ ₹600 ರಂತೆ ಸುಶೀಲಮ್ಮನಿಗೆ ನಿಯಮಿತವಾಗಿ ಬಡ್ಡಿ ಪಾವತಿಸುತ್ತಿದ್ದಳು. ಆದರೆ, ಇತ್ತೀಚಿನ ಜೂನ್ ತಿಂಗಳ ಬಡ್ಡಿ ಹಣವನ್ನು ನೀಡದೆ ಗಿರಿಜಾ ಸತಾಯಿಸುತ್ತಿದ್ದಳು. ಇದು ಇಬ್ಬರ ನಡುವೆ ತೀವ್ರ ಮಾತಿನ ಚಕಮಕಿಗೆ ಕಾರಣವಾಗಿತ್ತು.
ಜೂನ್ 15 ರಂದು ಮಧ್ಯಾಹ್ನ ಸುಮಾರು 2 ಗಂಟೆಯ ವೇಳೆಗೆ, ಸುಶೀಲಮ್ಮ ಅವರು ಬಾಕಿ ಇದ್ದ ಬಡ್ಡಿ ಹಣವನ್ನು ಕೇಳಲು ಗಿರಿಜಾಳ ಮನೆಗೆ ಹೋಗಿದ್ದರು. ಈ ವೇಳೆ ಇಬ್ಬರ ನಡುವೆ ಹಣದ ವಿಚಾರವಾಗಿ ಜೋರಾದ ಜಗಳ ಆರಂಭವಾಗಿದೆ. ಜಗಳ ವಿಕೋಪಕ್ಕೆ ತಿರುಗಿದಾಗ ಆಕ್ರೋಶಗೊಂಡ ಗಿರಿಜಾ, ವೃದ್ಧೆ ಸುಶೀಲಮ್ಮ ಅವರ ಕತ್ತು ಹಿಸುಕಿ ಮನೆಯೊಳಗೇ ಕ್ರೂರವಾಗಿ ಕೊಲೆ ಮಾಡಿದ್ದಾಳೆ.
ಪ್ರಿಯಕರನ ಕರೆಸಿ ಶವ ವಿಲೇವಾರಿ
ವೃದ್ಧೆ ಸುಶೀಲಮ್ಮ ಪ್ರಾಣ ಬಿಡುತ್ತಿದ್ದಂತೆ ಗಾಬರಿಗೊಂಡ ಗಿರಿಜಾ, ತಕ್ಷಣವೇ ತನ್ನ ಪ್ರಿಯಕರ ಮಹೇಶ್ಗೆ ಫೋನ್ ಮಾಡಿ ವಿಷಯ ತಿಳಿಸಿದ್ದಾಳೆ. ಕೂಡಲೇ ಸ್ಥಳಕ್ಕೆ ಧಾವಿಸಿದ ಮಹೇಶ್ ಮತ್ತು ಗಿರಿಜಾ ಸೇರಿ ಕೊ*ಲೆಯ ಸಾಕ್ಷ್ಯ ನಾಶಪಡಿಸಲು ಮುಂದಾಗಿದ್ದಾರೆ. ಇಬ್ಬರೂ ಸೇರಿ ವೃದ್ಧೆಯ ಮೃತದೇಹವನ್ನು ಒಂದು ದೊಡ್ಡ ಚೀಲದಲ್ಲಿ (Bag) ತುಂಡು ಇಟ್ಟು ಕಟ್ಟಿದ್ದಾರೆ. ಸಾರ್ವಜನಿಕರಿಗೆ ಅನುಮಾನ ಬಾರದಂತೆ ತಡರಾತ್ರಿಯವರೆಗೆ ಕಾಯ್ದು, ಕತ್ತಲಲ್ಲಿ ಶವವಿದ್ದ ಚೀಲವನ್ನು ತಂದು ಗ್ರಾಮದ ಬಳಿಯಿರುವ ರೈಲ್ವೆ ಹಳಿಗಳ ಪಕ್ಕದ ಪೊದೆಯಲ್ಲಿ ಎಸೆದು ಪರಾರಿಯಾಗಿದ್ದಾರೆ.
ಇತ್ತ ಸುಶೀಲಮ್ಮ ಅವರು ಸಂಜೆಯಾದರೂ ಮನೆಗೆ ಬಾರದಿದ್ದಾಗ ಆಕೆಯ ಪತಿ ಮಾದಯ್ಯ ಮತ್ತು ಗಂಡುಮಕ್ಕಳು ಆತಂಕಗೊಂಡು ಸುತ್ತಮುತ್ತಲಿನ ಹಳ್ಳಿಗಳಲ್ಲಿ ಹಾಗೂ ಸಂಬಂಧಿಕರ ಮನೆಗಳಲ್ಲಿ ಹುಡುಕಾಟ ನಡೆಸಿದ್ದಾರೆ. ಎಲ್ಲೂ ಸುಶೀಲಮ್ಮ ಪತ್ತೆಯಾಗದ ಕಾರಣ, ಆಕೆಯ ಮಗ ಮಹದೇವಯ್ಯ ಅವರು ರಾಮನಗರ ಮಹಿಳಾ ಪೊಲೀಸ್ ಠಾಣೆಗೆ ತೆರಳಿ ತಾಯಿ ನಾಪತ್ತೆಯಾಗಿದ್ದಾರೆ ಎಂದು ದೂರು ದಾಖಲಿಸಿದ್ದರು.
ಗ್ರಾಮಸ್ಥರ ಜೊತೆ ಸೇರಿ ನಾಟಕವಾಡಿದ ಕಿರಾತಕಿ
ಇಡೀ ಪ್ರಕರಣದಲ್ಲಿ ಅತ್ಯಂತ ಆಘಾತಕಾರಿ ವಿಷಯವೆಂದರೆ, ಕೊಲೆಗಾತಕಿ ಗಿರಿಜಾ ಪೊಲೀಸರು ಮತ್ತು ಗ್ರಾಮಸ್ಥರ ದಿಕ್ಕು ತಪ್ಪಿಸಲು ಭಾರಿ ನಾಟಕವಾಡಿದ್ದಾಳೆ. ಸುಶೀಲಮ್ಮ ನಾಪತ್ತೆಯಾಗಿದ್ದಾರೆ ಎಂದು ಅವರ ಕುಟುಂಬದವರು ಹಲುಬುತ್ತಿದ್ದಾಗ, ಏನೂ ತಿಳಿಯದವಳಂತೆ ನಟಿಸಿದ ಗಿರಿಜಾ, ಸ್ವತಃ ತಾನೇ ಮುಂದೆ ನಿಂತು ಗ್ರಾಮಸ್ಥರ ಜೊತೆ ಸೇರಿ ಸುಶೀಲಮ್ಮನ ಪತ್ತೆಗಾಗಿ ಹುಡುಕಾಟ ನಡೆಸುವಂತೆ ನಟಿಸಿದ್ದಾಳೆ. ಆಕೆಯ ಈ ಓವರ್ ಆಕ್ಟಿಂಗ್ನಿಂದಾಗಿ ಆರಂಭದಲ್ಲಿ ಯಾರಿಗೂ ಆಕೆಯ ಮೇಲೆ ಸಂಶಯ ಬಂದಿರಲಿಲ್ಲ.
ಆದರೆ, ಘಟನೆ ನಡೆದ ಐದು ದಿನಗಳ ನಂತರ ಅಂದರೆ ಜೂನ್ 20 ರಂದು, ರೈಲ್ವೆ ಹಳಿಯ ಪಕ್ಕದಲ್ಲಿ ವಿಪರೀತ ವಾಸನೆ ಬರುತ್ತಿರುವುದನ್ನು ಗಮನಿಸಿದ ಸ್ಥಳೀಯರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಪೊಲೀಸರು ಬಂದು ನೋಡಿದಾಗ ಕೊಳೆತು ನಾರುತ್ತಿದ್ದ ವೃದ್ಧೆಯ ಶವ ಪತ್ತೆಯಾಗಿದೆ. ತಕ್ಷಣವೇ ಸ್ಥಳಕ್ಕೆ ಬಂದ ಸುಶೀಲಮ್ಮನ ಕುಟುಂಬಸ್ಥರು ಅದು ತಮ್ಮ ತಾಯಿಯದ್ದೇ ಮೃತದೇಹ ಎಂದು ಗುರುತಿಸಿದ್ದಾರೆ.
ಮಾಂಗಲ್ಯ ಸರ ಮಾಯ
ಶವ ಪತ್ತೆಯಾದ ಆರಂಭದಲ್ಲಿ ಪೊಲೀಸರು ಇದನ್ನು ಸಂಶಯಾಸ್ಪದ ಸಾವು (Unnatural Death Report - UDR) ಎಂದು ಪ್ರಕರಣ ದಾಖಲಿಸಿಕೊಂಡಿದ್ದರು. ಆದರೆ, ಮೃತದೇಹವನ್ನು ಸೂಕ್ಷ್ಮವಾಗಿ ಗಮನಿಸಿದ ಸುಶೀಲಮ್ಮನ ಮಗ ಮಹದೇವಯ್ಯ, ತಾಯಿಯ ಕೊರಳಿನಲ್ಲಿದ್ದ ಚಿನ್ನದ ಮಾಂಗಲ್ಯ ಸರ (ತಾಳಿ ಚೈನ್) ನಾಪತ್ತೆಯಾಗಿರುವುದನ್ನು ಪೊಲೀಸರ ಗಮನಕ್ಕೆ ತಂದಿದ್ದಾರೆ. ತಾಯಿಗೆ ರೈಲು ಅಪಘಾತವಾಗಿದ್ದರೆ ಒಡವೆ ಎಲ್ಲಿ ಹೋಗುತ್ತದೆ? ಯಾರೋ ಒಡವೆಗಾಗಿ ಕೊಲೆ ಮಾಡಿದ್ದಾರೆ ಎಂಬ ಬಲವಾದ ಶಂಕೆ ವ್ಯಕ್ತಪಡಿಸಿದರು.
ಇದರಿಂದ ಅಲರ್ಟ್ ಆದ ರಾಮನಗರ ಗ್ರಾಮಾಂತರ ಪೊಲೀಸರು ತನಿಖೆಯನ್ನು ತೇಜಸ್ವಿಗೊಳಿಸಿದರು. ಸುಶೀಲಮ್ಮ ಕೊನೆಯದಾಗಿ ಯಾರ ಮನೆಗೆ ಹೋಗಿದ್ದರು ಎಂಬ ಬಗ್ಗೆ ಗ್ರಾಮದಲ್ಲಿ ಮಾಹಿತಿ ಕಲೆಹಾಕಿದಾಗ ಗಿರಿಜಾಳ ಹೆಸರು ಮುಂಚೂಣಿಗೆ ಬಂದಿದೆ. ತಕ್ಷಣವೇ ಪೊಲೀಸರು ಗಿರಿಜಾಳನ್ನು ವಶಕ್ಕೆ ಪಡೆದು ತಮ್ಮದೇ ಶೈಲಿಯಲ್ಲಿ ವಿಚಾರಣೆ ನಡೆಸಿದಾಗ, ಆಕೆ ಬಡ್ಡಿ ಹಣದ ಜಗಳಕ್ಕಾಗಿ ಪ್ರಿಯಕರನ ಜೊತೆ ಸೇರಿ ಕೊಲೆ ಮಾಡಿರುವುದನ್ನು ಒಪ್ಪಿಕೊಂಡಿದ್ದಾಳೆ.
ಕೇವಲ ಆರುನೂರು ರೂಪಾಯಿ ಬಡ್ಡಿ ಹಣದ ವಿವಾದಕ್ಕೆ ಹಾಗೂ ಚಿನ್ನದ ಆಸೆಗಾಗಿ 75 ವರ್ಷದ ಅಜ್ಜಿಯ ಜೀವ ತೆಗೆದ ಈ ಕ್ರೂರಿಗಳ ಕೃತ್ಯ ರಾಮನಗರ ಭಾಗದಲ್ಲಿ ಭಾರಿ ಸಂಚಲನ ಮೂಡಿಸಿದ್ದು, ಪೊಲೀಸರು ಮುಂದಿನ ಕಾನೂನು ಕ್ರಮ ಕೈಗೊಂಡಿದ್ದಾರೆ.
