ಹೊಸ ದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರು ತಮ್ಮ ಸಚಿವ ಸಂಪುಟದ ಜೊತೆ ನಡೆಸಿರುವ ಮ್ಯಾರಥಾನ್ ಸಭೆ ಈಗ ದೇಶಾದ್ಯಂತ ಭಾರಿ ಚರ್ಚೆಗೆ ಕಾರಣವಾಗಿದೆ. ಸತತ ನಾಲ್ಕೂವರೆ ಗಂಟೆಗಳ ಕಾಲ ನಡೆದ ಈ ಹೈವೋಲ್ಟೇಜ್ ಮೀಟಿಂಗ್ ಅತ್ಯಂತ ಫಲಪ್ರದವಾಗಿತ್ತು ಎಂದು ಸ್ವತಃ ಪ್ರಧಾನಿ ಮೋದಿ ಅವರೇ ಹೇಳಿದ್ದಾರೆ. ಸಭೆಯ ಬೆನ್ನಲ್ಲೇ ಸೋಶಿಯಲ್ ಮೀಡಿಯಾ ಎಕ್ಸ್ (ಟ್ವಿಟ್ಟರ್) ಖಾತೆಯಲ್ಲಿ ಪೋಸ್ಟ್ ಹಾಕಿರುವ ಅವರು, ಈ ಮೀಟಿಂಗ್ನಲ್ಲಿ ಚರ್ಚೆಯಾದ ಪ್ರಮುಖ ವಿಷಯಗಳನ್ನು ಹಂಚಿಕೊಂಡಿದ್ದಾರೆ.
ಸಭೆಯ ಅಸಲಿ ಅಜೆಂಡಾ ಏನು?
ಇದು ಈ ವರ್ಷದ ಮೊದಲ ಸಚಿವ ಸಂಪುಟ ಸಭೆಯಾಗಿದ್ದು, ಗುರುವಾರ ಸಂಜೆ ಶುರುವಾಗಿ ರಾತ್ರಿಯವರೆಗೂ ಸತತವಾಗಿ ನಡೆದಿದೆ. ಇದರಲ್ಲಿ ಕೇಂದ್ರ ಸಂಪುಟ ಸಚಿವರು, ಸ್ವತಂತ್ರ ಉಸ್ತುವಾರಿ ಹೊಂದಿರುವ ರಾಜ್ಯ ಸಚಿವರು ಹಾಗೂ ಇಲಾಖಾ ರಾಜ್ಯ ಸಚಿವರು ಸೇರಿದಂತೆ ಇಡೀ ಮಂತ್ರಿಮಂಡಲವೇ ಭಾಗವಹಿಸಿತ್ತು.
ಈ ಸಭೆಯಲ್ಲಿ ಪ್ರಧಾನಿ ಮೋದಿ ಅವರು ಮುಖ್ಯವಾಗಿ ಎರಡು ವಿಷಯಗಳ ಮೇಲೆ ಫೋಕಸ್ ಮಾಡಿದ್ದರು.
Ease of Living: ಅಂದರೆ ಸಾಮಾನ್ಯ ಜನರಿಗೆ ಸುಲಭವಾಗಿ ಬಾಳ್ವೆ ನಡೆಸಲು ಸರ್ಕಾರ ಏನು ಮಾಡಬೇಕು?
Ease of Doing Business: ದೇಶದಲ್ಲಿ ವ್ಯಾಪಾರ-ವ್ಯವಹಾರಗಳನ್ನು ಯಾವುದೇ ಕಿರಿಕಿರಿ ಇಲ್ಲದೆ ಸುಗಮವಾಗಿ ನಡೆಸಲು ಹೇಗೆ ಹೆಲ್ಪ್ ಮಾಡಬೇಕು?
ಈ ಎರಡು ವಿಚಾರಗಳನ್ನು ಇನ್ನಷ್ಟು ಉತ್ತಮಗೊಳಿಸುವ ಮೂಲಕ 2047 ರ ವೇಳೆಗೆ ಭಾರತವನ್ನು 'ವಿಕಸಿತ ಭಾರತ' ಅಂದರೆ ಸಂಪೂರ್ಣ ಅಭಿವೃದ್ಧಿ ಹೊಂದಿದ ರಾಷ್ಟ್ರವನ್ನಾಗಿ ಮಾಡುವುದು ನಮ್ಮ ಸಾಮೂಹಿಕ ಕನಸು ಎಂದು ಮೋದಿ ಸಚಿವರಿಗೆ ನೆನಪಿಸಿದ್ದಾರೆ.
"ಹಳೇ ಸಾಧನೆ ಸಾಕು, ಭವಿಷ್ಯದ ಕಡೆ ನೋಡಿ!"
ಮೂಲಗಳ ಪ್ರಕಾರ, ಸಭೆಯಲ್ಲಿ ಪ್ರಧಾನಿ ಮೋದಿ ಅವರು ಸಚಿವರಿಗೆ ಕೆಲವು ಖಡಕ್ ಸೂಚನೆಗಳನ್ನು ನೀಡಿದ್ದಾರೆ. "ನಾವು 2014 ರಿಂದ ಅಧಿಕಾರದಲ್ಲಿದ್ದೇವೆ ನಿಜ. ಆದರೆ, ಹಳೇ ಸಾಧನೆಗಳನ್ನೇ ಸದಾ ಗುಣಗಾನ ಮಾಡುತ್ತಾ ಕೂರುವ ಅಗತ್ಯವಿಲ್ಲ. ಅದರ ಬದಲು ಭವಿಷ್ಯದ ಗುರಿಗಳತ್ತ ಹೆಚ್ಚು ಗಮನ ಹರಿಸಿ" ಎಂದು ಸಚಿವರಿಗೆ ಕಿವಿಮಾತು ಹೇಳಿದ್ದಾರೆ.
ಜನರ ದೈನಂದಿನ ಜೀವನದಲ್ಲಿ ಸರ್ಕಾರದ ಅನಗತ್ಯ ಹಸ್ತಕ್ಷೇಪ ಇರಬಾರದು. ಸರ್ಕಾರದ ಪ್ರತಿಯೊಂದು ಕಲ್ಯಾಣ ಯೋಜನೆಗಳು ದೇಶದ ಕಟ್ಟಕಡೆಯ ಫಲಾನುಭವಿಗೂ ತಲುಪುವಂತೆ ನೋಡಿಕೊಳ್ಳುವುದು ಪ್ರತಿಯೊಬ್ಬ ಸಚಿವರ ಜವಾಬ್ದಾರಿ ಎಂದಿದ್ದಾರೆ. ಅಲ್ಲದೆ, ಯಾವುದೇ ಇಲಾಖೆಯ ಸರ್ಕಾರಿ ಕೆಲಸಗಳಲ್ಲಿ ವಿಳಂಬ ಧೋರಣೆ ಇರಬಾರದು. ಫೈಲ್ಗಳು ಬಾಕಿ ಉಳಿಯದಂತೆ ಸಕಾಲದಲ್ಲಿ ಕೆಲಸ ಮುಗಿಸಿ, ಸಮಯೋಚಿತ ಆಡಳಿತ ನೀಡಬೇಕು ಎಂದು ಕಟ್ಟುನಿಟ್ಟಾಗಿ ಆರ್ಡರ್ ಮಾಡಿದ್ದಾರೆ.
ಜೈಶಂಕರ್ ಕೊಟ್ಟ ಅಪ್ಡೇಟ್ಸ್, ಸೆಕ್ರೆಟರಿಗಳ ರಿಪೋರ್ಟ್ ಕಾರ್ಡ್
ಈ ಸುದೀರ್ಘ ಸಭೆಯಲ್ಲಿ ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಅವರು ಪ್ರಧಾನಿ ಮೋದಿಯವರ ಇತ್ತೀಚಿನ ವಿದೇಶಿ ಪ್ರವಾಸಗಳ ಯಶಸ್ಸಿನ ಬಗ್ಗೆ ಸಂಪುಟಕ್ಕೆ ಮಾಹಿತಿ ನೀಡಿದರು. ಯುಎಇ, ನೆದರ್ಲ್ಯಾಂಡ್ಸ್, ಸ್ವೀಡನ್, ನಾರ್ವೆ ಮತ್ತು ಇಟಲಿ ದೇಶಗಳಿಗೆ ಮೋದಿ ಭೇಟಿ ನೀಡಿದಾಗ ಭಾರತಕ್ಕೆ ಸಿಕ್ಕ ಮನ್ನಣೆ ಮತ್ತು ಒಪ್ಪಂದಗಳ ಬಗ್ಗೆ ಅವರು ವಿವರಿಸಿದರು. ಇನ್ನು ವಿವಿಧ ಸಚಿವಾಲಯಗಳು ಮತ್ತು ಇಲಾಖೆಗಳ ಪರ್ಫಾರ್ಮೆನ್ಸ್ ಹೇಗಿದೆ ಎಂಬುದರ ಬಗ್ಗೆ ಒಂಬತ್ತು ಜನ ಪ್ರಮುಖ ಇಲಾಖಾ ಕಾರ್ಯದರ್ಶಿಗಳು (Secretaries) ಪಿಪಿಟಿ ಪ್ರೆಸೆಂಟೇಷನ್ ನೀಡಿ ರಿಪೋರ್ಟ್ ಕಾರ್ಡ್ ಒಪ್ಪಿಸಿದರು.
ಇತ್ತೀಚೆಗೆ ನಡೆದ ಪಶ್ಚಿಮ ಬಂಗಾಳ ಮತ್ತು ಅಸ್ಸಾಂ ವಿಧಾನಸಭಾ ಚುನಾವಣೆಗಳಲ್ಲಿ ಬಿಜೆಪಿ ಭರ್ಜರಿ ಪ್ರದರ್ಶನ ನೀಡಿದ ಬೆನ್ನಲ್ಲೇ ಹಾಗೂ ಪುದುಚೆರಿಯಲ್ಲಿ ಮತ್ತೆ ಅಧಿಕಾರ ಹಿಡಿದ ತಕ್ಷಣವೇ ಈ ಸಭೆ ನಡೆದಿರುವುದು ರಾಜಕೀಯವಾಗಿಯೂ ಸಖತ್ ಇಂಪಾರ್ಟೆಂಟ್ ಎನಿಸಿಕೊಂಡಿದೆ. ಚುನಾವಣೆ ಗೆದ್ದ ಜೋಶ್ನಲ್ಲಿರುವಾಗಲೇ, ಮುಂದಿನ ಭವಿಷ್ಯದ ರೋಡ್ ಮ್ಯಾಪ್ ರೆಡಿ ಮಾಡಲು ಮೋದಿ ಈ ಮ್ಯಾರಥಾನ್ ಮೀಟಿಂಗ್ ಮಾಡಿದ್ದಾರೆ ಎನ್ನಲಾಗಿದೆ.
