"ನೀಟ್ (NEET) ಪ್ರಶ್ನೆ ಪತ್ರಿಕೆ ಸೋರಿಕೆ ವಿಚಾರವನ್ನು ಮುಂದಿಟ್ಟುಕೊಂಡು ದೇಶಾದ್ಯಂತ ಪ್ರತಿಭಟನೆ ನಡೆಸಲು ಹೋದ ಕಾಂಗ್ರೆಸ್ ಪಕ್ಷವು ತನ್ನ ರಾಜಕೀಯ ದುರುದ್ದೇಶದಿಂದಾಗಿ ಇಂದು ಇಡೀ ಜಗತ್ತಿನ ಮುಂದೆ ಬೆತ್ತಲಾಗಿ ನಿಂತಿದೆ," ಎಂದು ಮಾಜಿ ಸಚಿವರೂ ಹಾಗೂ ಹಿರಿಯ ಬಿಜೆಪಿ ನಾಯಕರಾದ ಸಿ.ಸಿ. ಪಾಟೀಲ್ ಅವರು ಕಟುವಾಗಿ ವಾಗ್ದಾಳಿ ನಡೆಸಿದ್ದಾರೆ.
ನಗರದಲ್ಲಿ ಕರೆಯಲಾಗಿದ್ದ ಪತ್ರಿಕಾಗೋಷ್ಠಿಯನ್ನು ಉದ್ದೇಶಿಸಿ ಮಾತನಾಡಿದ ಅವರು, ಕಾಂಗ್ರೆಸ್ ಪಕ್ಷದ ನಾಯಕತ್ವ ಮತ್ತು ಇತ್ತೀಚೆಗೆ ದೆಹಲಿ ಹಾಗೂ ವಿವಿಧೆಡೆ ನಡೆದ ಪ್ರತಿಭಟನೆಗಳ ಹಿನ್ನೆಲೆಯನ್ನು ತೀವ್ರವಾಗಿ ತೊಳೆಯುತ್ತಾ, ವಿಪಕ್ಷಗಳ ನಡೆ ದೇಶದ ಸುಭದ್ರತೆ ಮತ್ತು ಶಿಸ್ತಿಗೆ ದಕ್ಕೆ ತರುತ್ತಿದೆ ಎಂದು ಆಕ್ರೋಶ ಹೊರಹಾಕಿದರು.
ಅಪ್ರಬುದ್ಧ ನಾಯಕತ್ವಕ್ಕೆ ನಿನ್ನೆಯ ಹೋರಾಟವೇ ಸಾಕ್ಷಿ
ಮಾಜಿ ಸಚಿವರು ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡುತ್ತಾ, "ಪಕ್ಷವೊಂದರಲ್ಲಿ ಅಪ್ರಬುದ್ಧ ನಾಯಕನಿದ್ದರೆ ಆ ಪಕ್ಷಕ್ಕೆ ಎಂತಹ ದುಸ್ಥಿತಿ ಎದುರಾಗುತ್ತದೆ ಎಂಬುದಕ್ಕೆ ನಿನ್ನೆ ಕಾಂಗ್ರೆಸ್ ನಡೆಸಿದ ಹೋರಾಟವೇ ಪ್ರತ್ಯಕ್ಷ ಸಾಕ್ಷಿಯಾಗಿದೆ. ದೇಶದ ಹಿತಾಸಕ್ತಿಯನ್ನು ಮರೆತು, ಕೇವಲ ರಾಜಕೀಯ ಲಾಭಕ್ಕಾಗಿ ಕಾಂಗ್ರೆಸ್ ವಿದ್ಯಾರ್ಥಿಗಳ ಭವಿಷ್ಯದ ಜೊತೆ ಚೆಲ್ಲಾಟವಾಡುತ್ತಿದೆ," ಎಂದು ಆಪಾದಿಸಿದರು.
"ಪ್ರತಿಭಟನೆ ಎಂಬ ಹೆಸರಿನಲ್ಲಿ ಕಾಂಗ್ರೆಸ್ ಬೀದಿಗೆ ಇಳಿದಿದೆ. ಆದರೆ ಅಲ್ಲಿ ನಡೆದದ್ದು ವಿದ್ಯಾರ್ಥಿಗಳ ನ್ಯಾಯಯುತ ಹೋರಾಟವಲ್ಲ. ಬದಲಾಗಿ, ಬೇರೆ ಬೇರೆ ರಾಜ್ಯಗಳಿಂದ ಬಂದಿದ್ದ ಗೂಂಡಾಗಳು ಈ ಪ್ರತಿಭಟನೆಯಲ್ಲಿ ಸಕ್ರಿಯವಾಗಿ ಭಾಗಿಯಾಗಿದ್ದರು."
ಕಾಂಗ್ರೆಸ್ ಸಂಘಟಿಸಿದ ಈ ಪ್ರತಿಭಟನೆಯಲ್ಲಿ ವಿದ್ಯಾರ್ಥಿಗಳಿಗಿಂತ ಹೆಚ್ಚಾಗಿ ಹೊರರಾಜ್ಯದ ಸಮಾಜಘಾತುಕ ಶಕ್ತಿಗಳೇ ತುಂಬಿದ್ದರು. ಅಷ್ಟೇ ಅಲ್ಲದೆ, ಪ್ರಚೋದನಾಕಾರಿ ಚಟುವಟಿಕೆಗಳು ನಡೆದಿದ್ದು, ವಾಟ್ಸಾಪ್ ಗ್ರೂಪ್ಗಳಲ್ಲಿ "ನರೇಂದ್ರ ಮೋದಿ ಅವರ ಕೊನೆಯ ದಿನಗಳು ಹತ್ತಿರವಾಗಿವೆ" ಎಂದೆಲ್ಲಾ ಅತ್ಯಂತ ಕೀಳುಮಟ್ಟದ ಸಂದೇಶಗಳನ್ನು ಹಂಚಿಕೊಳ್ಳಲಾಗಿದೆ ಎಂದು ಸಿ.ಸಿ. ಪಾಟೀಲ್ ಸಾಕ್ಷ್ಯಾಧಾರಗಳ ಸಹಿತ ಗಂಭೀರ ಆರೋಪ ಮಾಡಿದರು.
'ಮಾರೋ ಮಾರೋ' ಎಂಬ ಕೇಕೆ
ಪ್ರತಿಭಟನೆಯ ಹೆಸರಿನಲ್ಲಿ ನಡೆದ ಹಿಂಸಾಚಾರವನ್ನು ಎಳೆಎಳೆಯಾಗಿ ಬಿಚ್ಚಿಟ್ಟ ಸಿ.ಸಿ. ಪಾಟೀಲ್, "ಶಾಂತಿಯುತವಾಗಿ ನಡೆಯಬೇಕಿದ್ದ ಪ್ರತಿಭಟನೆಯಲ್ಲಿ ಸಿಆರ್ಪಿಎಫ್ (CRPF) ಪೊಲೀಸರ ಮೇಲೆಯೇ ಹಲ್ಲೆ ನಡೆಸಲಾಗಿದೆ. 'ಮಾರೋ ಮಾರೋ' ಎಂಬ ಉಗ್ರ ರೂಪದ ಶಬ್ದಗಳು ಹಾಗೂ ಘೋಷಣೆಗಳು ವೀಡಿಯೋಗಳಲ್ಲಿ ಸ್ಪಷ್ಟವಾಗಿ ಕೇಳಿಬರುತ್ತಿವೆ. ಸ್ವತಃ ನೀಟ್ ಪರೀಕ್ಷಾರ್ಥಿಗಳೇ ಮಾಧ್ಯಮಗಳ ಮುಂದೆ ಬಂದು 'ನಾವು ನ್ಯಾಯ ಕೇಳಲು ಬಂದೆವು, ಆದರೆ ಇಲ್ಲಿ ನಡೆಯುತ್ತಿರುವುದೇ ಬೇರೆ' ಎಂದು ಕಣ್ಣೀರಿಟ್ಟು ಹೇಳಿಕೊಂಡಿದ್ದಾರೆ. ಇದು ವಿದ್ಯಾರ್ಥಿಗಳ ದಂಗೆ ಎಂದು ಯಾರು ತಾನೇ ನಂಬಲು ಸಾಧ್ಯ?" ಎಂದು ಪ್ರಶ್ನಿಸಿದರು.
ರಾಹುಲ್ ಗಾಂಧಿ ಅವರ ನೇತೃತ್ವದಲ್ಲಿ ಬೆಂಬಲಿಗರನ್ನು ಮತ್ತು ಗೂಂಡಾಗಳನ್ನು ಲೋಕಸಭೆಗೆ ನುಗ್ಗಿಸುವ ದುಸ್ಸಾಹಸಕ್ಕೆ ಕೈಹಾಕಲಾಗಿದೆ. ಅಷ್ಟೇ ಅಲ್ಲದೆ, ಪ್ರಧಾನಮಂತ್ರಿಯವರ ಅಧಿಕೃತ ನಿವಾಸದ ಬಳಿ ಧರಣಿ ನಡೆಸಿ, ಅವರನ್ನು ಗೃಹಬಂಧನದಲ್ಲಿಡಬೇಕೆಂಬುದು ಕಾಂಗ್ರೆಸ್ನ ಯೋಜನೆಯಾಗಿತ್ತು.
"ಪ್ರಧಾನಿ ನಿವಾಸಕ್ಕೆ ಮುತ್ತಿಗೆ ಹಾಕಿ ಗೃಹಬಂಧನದಲ್ಲಿಡುವುದು ಈ ದೇಶಕ್ಕೆ ಶೋಭೆ ತರುವ ಕೆಲಸವೇ? ರಾಹುಲ್ ಗಾಂಧಿ ಮತ್ತು ಕರ್ನಾಟಕದ ಕಾಂಗ್ರೆಸ್ ನಾಯಕ ಬಿ.ಕೆ. ಹರಿಪ್ರಸಾದ್ ಅವರು ಈ ಬಗ್ಗೆ ದೇಶದ ಜನತೆಗೆ ಸ್ಪಷ್ಟನೆ ನೀಡಬೇಕು."
ತುಕಡೆ ತುಕಡೆ ಗ್ಯಾಂಗ್ ಹಾಗೂ ವಿದೇಶಿ ಪ್ರವಾಸದ ಲಿಂಕ್
ಪತ್ರಿಕಾಗೋಷ್ಠಿಯಲ್ಲಿ ಕಾಂಗ್ರೆಸ್ನ ಹಿನ್ನೆಲೆಯನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡ ನಾಯಕರು, "ಇದು ಭಾರತವನ್ನು ವಿಭಜಿಸಲು ಹೊರಟಿರುವ 'ತುಕಡೆ ತುಕಡೆ ಗ್ಯಾಂಗ್' ಮಾಡುತ್ತಿರುವ ಬೃಹತ್ ಸಂಚು. ರಾಹುಲ್ ಗಾಂಧಿ ಅವರು ವಿದೇಶ ಪ್ರವಾಸ ಮುಗಿಸಿ ಭಾರತಕ್ಕೆ ವಾಪಸ್ ಬಂದ ತಕ್ಷಣವೇ ದೇಶದಲ್ಲಿ ಇಂತಹ ದಂಗೆಗಳು ಮತ್ತು ಅಶಾಂತಿ ಶುರುವಾಗುತ್ತವೆ. ಇದು ಕೇವಲ ಕಾಕತಾಳೀಯವೇ ಅಥವಾ ಇದರಬೃಹತ್ ಗೂಢಚರ್ಯೆ ಅಥವಾ ವಿದೇಶಿ ಕೈಗಳಿವೆಯೇ?" ಎಂದು ಸಂಶಯ ವ್ಯಕ್ತಪಡಿಸಿದರು.
ಸಿಬಿಐ, ಎನ್ಐಎ ತನಿಖೆಗೆ ಆಗ್ರಹ
"ದೇಶವನ್ನು ವಿಭಜಿಸುವ ದೇಶದ್ರೋಹಿ ಶಕ್ತಿಗಳಿಗೆ ಕಾಂಗ್ರೆಸ್ ಪಕ್ಷವು ಬಹಿರಂಗವಾಗಿಯೇ ಬೆಂಬಲ ನೀಡುತ್ತಿದೆ. ರಾಹುಲ್ ಗಾಂಧಿ ಅವರ ನೇತೃತ್ವದಲ್ಲಿ ಭಾರತ ವಿಭಜಿಸುವ ಶಕ್ತಿಗಳಿಗೆ ಮತ್ತಷ್ಟು ಕುಮ್ಮಕ್ಕು ಸಿಗುತ್ತಿದೆ," ಎಂದು ಆಕ್ರೋಶ ಹೊರಹಾಕಿದ ಪಾಟೀಲ್, ಈ ಪ್ರಕರಣದ ಮೂಲವನ್ನು ಬೇರುಸಹಿತ ಕಿತ್ತುಹಾಕಲು ಸಿಬಿಐ (CBI) ಹಾಗೂ ಎನ್ಐಎ (NIA) ತನಿಖೆ ನಡೆಸಬೇಕು ಎಂದು ಒತ್ತಾಯಿಸಿದರು.
"ಒಂದು ವೇಳೆ ಈ ಇಡೀ ಹಿಂಸಾಚಾರ ಮತ್ತು ಪ್ರತಿಭಟನೆಯ ಹಿಂದೆ ರಾಷ್ಟ್ರದ್ರೋಹಿ ಕೃತ್ಯಗಳು ಇರುವುದು ತನಿಖೆಯಲ್ಲಿ ದೃಢಪಟ್ಟರೆ, ರಾಹುಲ್ ಗಾಂಧಿ ಅವರು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡುತ್ತಾರಾ? ಅಥವಾ ಇಲ್ಲಿ ಧರಣಿ ಕುಳಿತಿರುವ ನಮ್ಮ ಕರ್ನಾಟಕ ರಾಜ್ಯದ ಕಾಂಗ್ರೆಸ್ ನಾಯಕರು ರಾಜೀನಾಮೆ ಕೊಟ್ಟು ಮನೆಗೆ ಹೋಗುತ್ತಾರಾ?"
ತನಿಖೆಯ ಅಧಿಕೃತ ವರದಿ ಮತ್ತು ಸತ್ಯಾಂಶ ಹೊರಬಂದಾಗ ರಾಜ್ಯದ ಹಾಗೂ ದೇಶದ ಜನತೆ ಕಾಂಗ್ರೆಸ್ಗೆ ತಕ್ಕ ಪಾಠ ಕಲಿಸಲಿದ್ದಾರೆ ಮತ್ತು ಸರಿಯಾದ ತೀರ್ಮಾನ ಕೈಗೊಳ್ಳಲಿದ್ದಾರೆ ಎಂದು ಅವರು ತಿಳಿಸಿದರು.
ಅಭಿಜಿತ್ ದೀಪ್ಕೆ ಹಾಗೂ ಧರ್ಮೇಂದ್ರ ಪ್ರಧಾನ್ ವಿಚಾರ
ಕಾಂಗ್ರೆಸ್ ಪಕ್ಷದ ಇಬ್ಬಂದಿ ತನವನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡ ಸಿ.ಸಿ. ಪಾಟೀಲ್, "ಅಭಿಜಿತ್ ದೀಪ್ಕೆ ಎಂಬ ವ್ಯಕ್ತಿ ಕೆಲವೇ ದಿನಗಳ ಹಿಂದೆ ಪಾಕಿಸ್ತಾನಕ್ಕೆ ಹೋಗಿ ಬಂದಿದ್ದಾನೆ. ಈ ಹಿಂದೆ ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಅವರ ಜೊತೆ ಅಪಾರ ಗೆಳತನ ಹಾಗೂ ನಿಕಟ ಬಾಂಧವ್ಯ ಇಟ್ಟುಕೊಂಡಿದ್ದ ಅದೇ ನಾಯಕರು, ಇಂದು ತಮ್ಮ ರಾಜಕೀಯ ಬೇಳೆ ಬೇಯಿಸಿಕೊಳ್ಳಲು ಧರ್ಮೇಂದ್ರ ಪ್ರಧಾನ್ ಅವರನ್ನು ಕೆಟ್ಟವರೆಂದು ಬಿಂಬಿಸುತ್ತಿದ್ದಾರೆ," ಎಂದು ಕಿಡಿಕಾರಿದರು.
ದೇಶದಲ್ಲಿ ಗಲಭೆ ಮತ್ತು ದಂಗೆಗಳನ್ನು ಸೃಷ್ಟಿಸುವುದಕ್ಕಾಗಿಯೇ ವೀಡಿಯೋಗಳನ್ನು ಹರಿಬಿಡಲಾಗುತ್ತಿದೆ. "ಮಾರೋ ಮಾರೋ" ಎಂದು ಪ್ರಚೋದನೆ ನೀಡುತ್ತಿರುವ ದೃಶ್ಯಗಳು ಸ್ಪಷ್ಟವಾಗಿ ಕ್ಯಾಮೆರಾದಲ್ಲಿ ಸೆರೆಯಾಗಿವೆ. ಇಂತಹ ದಂಗೆಕೋರ ಚಟುವಟಿಕೆಗಳಿಗೆ ಒಂದು ರಾಷ್ಟ್ರೀಯ ಪಕ್ಷವಾಗಿ ಕಾಂಗ್ರೆಸ್ ಬೆಂಬಲ ನೀಡುತ್ತಾ ಹೋದರೆ, ಈ ದೇಶದ ಭವಿಷ್ಯ ಏನಾಗಬೇಕು? ಯುವಜನತೆಯ ದಾರಿ ತಪ್ಪಿಸುವ ಕೆಲಸವನ್ನು ಕಾಂಗ್ರೆಸ್ ತಕ್ಷಣವೇ ನಿಲ್ಲಿಸಬೇಕು ಎಂದು ಗದಗಿನಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾಜಿ ಸಚಿವ ಸಿ.ಸಿ. ಪಾಟೀಲ್ ಆಗ್ರಹಿಸಿದರು.
