ಡೆಲಿವರಿ ಬಾಯ್ ಹಸಿವು ನೀಗಿಸಿದ ಗ್ರಾಹಕರು: ವೈರಲ್ ಆದ ಕಣ್ಣೀರಿನ ವಿಡಿಯೋ
ನಮ್ಮ ಮನೆ ಬಾಗಿಲಿಗೆ ಆಹಾರ ತಲುಪಿಸುವ ಡೆಲಿವರಿ ಬಾಯ್ಗಳ ಹಿಂದೆ ಎಷ್ಟೊಂದು ಕಷ್ಟ ಮತ್ತು ಶ್ರಮ ಅಡಗಿರುತ್ತದೆ ಎಂಬುದು ನಮಗೆ ಅನೇಕ ಬಾರಿ ಮರೆತೇ ಹೋಗುತ್ತದೆ. ಸಮಯಕ್ಕೆ ಸರಿಯಾಗಿ ಆಹಾರ ತಲುಪದಿದ್ದರೆ ರೇಗಾಡುವವರೇ ಹೆಚ್ಚು. ಆದರೆ, ದೆಹಲಿಯಲ್ಲಿ ನಡೆದ ಇತ್ತೀಚಿನ ಘಟನೆಯೊಂದು ಇಡೀ ಸಾಮಾಜಿಕ ಜಾಲತಾಣದ ಮನಸ್ಸುಗಳನ್ನು ಕರಗಿಸಿದೆ. ಆಹಾರ ತಲುಪಿಸಲು ಹೋದ ಡೆಲಿವರಿ ಬಾಯ್ಗೆ ಗ್ರಾಹಕರು ಪ್ರೀತಿಯಿಂದ ಊಟ ಬಡಿಸಿ, ಅವರ ಹಸಿವನ್ನು ನೀಗಿಸಿದ ದೃಶ್ಯ ಇದೀಗ ವೈರಲ್ ಆಗಿದೆ.
ಗ್ರಾಹಕರ ಒಳ್ಳೆತನಕ್ಕೆ ಭಾವುಕನಾದ ಡೆಲಿವರಿ ಬಾಯ್
ಆದಿತ್ಯ ಎಂಬುವವರ ಎಕ್ಸ್ (X) ಖಾತೆಯಲ್ಲಿ ಹಂಚಿಕೊಳ್ಳಲಾದ ಈ ವಿಡಿಯೋದಲ್ಲಿ, ಡೆಲಿವರಿ ಬಾಯ್ ಒಬ್ಬರು ಆರ್ಡರ್ ನೀಡಲು ಗ್ರಾಹಕರ ಮನೆಗೆ ಹೋಗುತ್ತಾರೆ. ಅಲ್ಲಿನ ಗ್ರಾಹಕರು ಆತನನ್ನು ಪ್ರೀತಿಯಿಂದ ಕರೆದು, ತಟ್ಟೆಯಲ್ಲಿ ಊಟ ಬಡಿಸಿ ಊಟ ಮಾಡುವಂತೆ ಮನವಿ ಮಾಡುತ್ತಾರೆ. ಹಠಾತ್ತಾಗಿ ಸಿಕ್ಕ ಈ ಪ್ರೀತಿ ಮತ್ತು ಉಣಬಡಿಸಿದ ಊಟವನ್ನು ನೋಡಿ ಆತ ಭಾವುಕನಾಗುತ್ತಾನೆ. ಕಣ್ಣೀರು ಒರೆಸುತ್ತಾ, "ನಾನು ಬೆಳಿಗ್ಗೆ ಮನೆಯಿಂದ ಹೊರಡುವಾಗ ಕೇವಲ ಒಂದು ಕಪ್ ಚಹಾ ಮಾತ್ರ ಕುಡಿದಿದ್ದೆ. ನನಗೆ ಹಸಿವಾಗಿದೆ ಎಂಬುದೇ ತಿಳಿದಿರಲಿಲ್ಲ. ನನಗೆ ಇಬ್ಬರು ಮಕ್ಕಳಿದ್ದಾರೆ, ಅವರಿಗಾಗಿ ನಾನು ದುಡಿಯಲೇಬೇಕು" ಎಂದು ತನ್ನ ಕಷ್ಟದ ಬದುಕನ್ನು ಬಿಚ್ಚಿಡುತ್ತಾನೆ. ಆ ಕ್ಷಣದ ಭಾವುಕ ದೃಶ್ಯವನ್ನು ನೋಡಿದ ಯಾರ ಕಣ್ಣಲ್ಲೂ ನೀರು ಬರುವುದು ಸಹಜ.
When people invited the Swiggy delivery rider to sit and eat with them while delivering the parcel, he said, “I didn’t even realize that I was hungry.”
— Aditya (@Warlock_Aditya) March 9, 2026
A man stays hungry to take care of and provide for his family, and the wife starts crying after cooking just two meals a day… pic.twitter.com/9qok1HkEZl
ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಎಂಭತ್ತು ಸಾವಿರಕ್ಕೂ ಅಧಿಕ ವೀಕ್ಷಣೆಗಳನ್ನು ಪಡೆದುಕೊಂಡಿದೆ. ಆದರೆ, ವಿಡಿಯೋ ನೋಡಿದ ನೆಟ್ಟಿಗರ ಅಭಿಪ್ರಾಯಗಳು ಎರಡು ರೀತಿಯಾಗಿವೆ:
ಸಕಾರಾತ್ಮಕ ಸ್ಪಂದನೆ - ಹಲವರು ಗ್ರಾಹಕರ ಈ ಮಾನವೀಯ ಕಾರ್ಯವನ್ನು ಶ್ಲಾಘಿಸಿದ್ದಾರೆ. "ಒಬ್ಬ ವ್ಯಕ್ತಿಯ ಹಸಿವು ನೀಗಿಸಿದ್ದು ನಿಜಕ್ಕೂ ಪುಣ್ಯದ ಕೆಲಸ, ಈ ದೃಶ್ಯ ನೋಡಿ ಕಣ್ಣಲ್ಲಿ ನೀರು ಬಂತು" ಎಂದು ಭಾವುಕರಾಗಿ ಪ್ರತಿಕ್ರಿಯಿಸಿದ್ದಾರೆ.
ಟೀಕೆಗಳು - ಇನ್ನು ಕೆಲವರು, "ಯಾರೋ ಬಡತನವನ್ನು ನೋಡಿ ಸಹಾಯ ಮಾಡುವುದು ಒಳ್ಳೆಯದೇ, ಆದರೆ ಅದನ್ನು ವಿಡಿಯೋ ಮಾಡಿ ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಳ್ಳುವ ಅಗತ್ಯವಿತ್ತೇ? ಬೇರೆಯವರ ಬಡತನವನ್ನು ಬಳಸಿಕೊಂಡು ವೀಕ್ಷಣೆಗಳನ್ನು (Views) ಗಳಿಸುವುದು ನಾಚಿಕೆಗೇಡಿನ ವಿಷಯ" ಎಂದು ಕಿಡಿಕಾರಿದ್ದಾರೆ.
