ಚಿಕ್ಕಬಳ್ಳಾಪುರ: ಇದು ಮನುಷ್ಯರ ಬಾಯಾರಿಕೆಯ ಕತೆಯಲ್ಲ, ತಮ್ಮ ದಾಹವನ್ನು ಹೇಳಿಕೊಳ್ಳಲಾಗದ ಅರಣ್ಯದ ಮೂಕಜೀವಿಗಳ ದಾರುಣ ಕತೆ. ಬಿಸಿಲಿನ ಬೇಗೆ ಹೆಚ್ಚಾಗುತ್ತಿದ್ದಂತೆ ಅರಣ್ಯದಲ್ಲಿ ನೀರು ಸಿಗದೆ ಪ್ರಾಣಿಗಳು ಒಂದೊಂದಾಗಿ ಪ್ರಾಣ ಬಿಡುತ್ತಿವೆ. ಚಿಕ್ಕಬಳ್ಳಾಪುರ ಜಿಲ್ಲೆಯ ಗೌರಿಬಿದನೂರು ತಾಲೂಕಿನ ಎಮ್ಮೆ ಗುಡ್ಡ ಅರಣ್ಯ ಈಗ ಕಾಡು ಪ್ರಾಣಿಗಳ ಪಾಲಿಗೆ ಮಸಣವಾಗಿ ಮಾರ್ಪಡುತ್ತಿದೆ.
ನೀರಿನ ಹನಿಗಾಗಿ ಪ್ರಾಣಿಗಳ ಪರದಾಟ
ಈ ವರ್ಷದ ಬಿರು ಬೇಸಿಗೆಗೆ ಭೂಮಿ ಕೆಂಡದಂತಾಗಿದೆ. ಅರಣ್ಯದಲ್ಲಿರುವ ಕಿರು ಕೆರೆಗಳು, ಹಳ್ಳಗಳು ಮತ್ತು ಕುಂಟೆಗಳು ಸಂಪೂರ್ಣವಾಗಿ ಬತ್ತಿ ಹೋಗಿವೆ. ನೀರು ಹುಡುಕಿಕೊಂಡು ಕೆರೆಗಳ ಬಳಿ ಬರುವ ಪ್ರಾಣಿಗಳು, ಅಲ್ಲಿ ಹನಿ ನೀರೂ ಸಿಗದೆ ಬಸವಳಿದು ಮೃತಪಡುತ್ತಿವೆ. ಕಳೆದ ಕೆಲವೇ ದಿನಗಳಲ್ಲಿ 5 ಕಾಡು ಹಂದಿಗಳು ಹಾಗೂ 4 ಮೊಲಗಳು ಸೇರಿದಂತೆ ಹಲವು ಕಾಡು ಪ್ರಾಣಿಗಳು ಧಾರುಣವಾಗಿ ಸಾವನ್ನಪ್ಪಿವೆ. ಅರಣ್ಯದ ಒಳಗಡೆ ಇನ್ನೂ ಹತ್ತಾರು ಪ್ರಾಣಿಗಳು ಬಲಿಯಾಗಿರುವ ಶಂಕೆ ವ್ಯಕ್ತವಾಗುತ್ತಿದೆ.
ಅರಣ್ಯ ಇಲಾಖೆಯ 'ಬೇಜವಾಬ್ದಾರಿತನ'
ಒಂದೆಡೆ ಪ್ರಾಣಿಗಳು ಸಾಯುತ್ತಿದ್ದರೆ, ಮತ್ತೊಂದೆಡೆ ಅರಣ್ಯ ಇಲಾಖೆಯ ಅಧಿಕಾರಿಗಳು ಮಾತ್ರ ಈ ಬಗ್ಗೆ ದಿವ್ಯ ನಿರ್ಲಕ್ಷ್ಯ ವಹಿಸಿದ್ದಾರೆ. ಕಾಡು ಪ್ರಾಣಿಗಳ ರಕ್ಷಣೆ ಮಾಡಬೇಕಾದ ಅಧಿಕಾರಿಗಳು ಸ್ಥಳಕ್ಕೆ ಬಂದು ಪರಿಶೀಲನೆ ನಡೆಸುವ ಕನಿಷ್ಠ ಸೌಜನ್ಯವನ್ನೂ ತೋರುತ್ತಿಲ್ಲ. ಪ್ರಾಣಿಗಳು ಸಾಯುತ್ತಿದ್ದರೂ ಕಂಡೂ ಕಾಣದಂತೆ ವರ್ತಿಸುತ್ತಿರುವ ಅಧಿಕಾರಿಗಳ ವಿರುದ್ಧ ಸ್ಥಳೀಯರು ಕೆಂಡಾಮಂಡಲವಾಗಿದ್ದಾರೆ.
ಪ್ರಮುಖ ಪ್ರಶ್ನೆಗಳು:
- ಬೇಸಿಗೆ ಆರಂಭವಾಗುವ ಮೊದಲೇ ಪ್ರಾಣಿಗಳಿಗೆ ನೀರಿನ ವ್ಯವಸ್ಥೆ ಮಾಡುವುದು ಇಲಾಖೆಯ ಜವಾಬ್ದಾರಿಯಲ್ಲವೇ?
- ಅರಣ್ಯದ ಒಳಗಡೆ ಕೃತಕ ತೊಟ್ಟಿಗಳನ್ನು ನಿರ್ಮಿಸಿ ನೀರು ತುಂಬಿಸುವ ಕೆಲಸ ಯಾಕೆ ನಡೆಯುತ್ತಿಲ್ಲ?
- ಆಪತ್ಕಾಲದಲ್ಲಿ ಕಾಡಿನ ಮಕ್ಕಳನ್ನು ಕಾಪಾಡಬೇಕಿದ್ದ ಅಧಿಕಾರಿಗಳು ಈಗ ಎಲ್ಲಿದ್ದಾರೆ?
ಸ್ಥಳೀಯರ ಆಗ್ರಹ ಮತ್ತು ಸಚಿವರಿಗೆ ಮನವಿ
ಎಮ್ಮೆ ಗುಡ್ಡ ಅರಣ್ಯದಲ್ಲಿ ಪ್ರಾಣಿಗಳು ಸಾಯುತ್ತಿರುವ ದೃಶ್ಯ ಕಂಡು ಅಕ್ಕಪಕ್ಕದ ಗ್ರಾಮಸ್ಥರು ಕಣ್ಣೀರು ಹಾಕುತ್ತಿದ್ದಾರೆ. "ನಮಗೆ ಅನ್ನ ನೀಡುವ ಈ ಕಾಡಿನ ಪ್ರಾಣಿಗಳು ಹೀಗೆ ನೀರಿಲ್ಲದೆ ಸಾಯುತ್ತಿರುವುದು ಪಾಪದ ಕೆಲಸ. ಅಧಿಕಾರಿಗಳು ಕೂಡಲೇ ಎಚ್ಚೆತ್ತುಕೊಂಡು ಟ್ಯಾಂಕರ್ ಮೂಲಕವಾದರೂ ನೀರಿನ ತೊಟ್ಟಿಗಳನ್ನು ತುಂಬಿಸಬೇಕು" ಎಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.
ಅರಣ್ಯ ಸಚಿವ ಈಶ್ವರ್ ಖಂಡ್ರೆ ಅವರೇ, ನಿಮ್ಮ ಇಲಾಖೆಯ ಕೆಳಮಟ್ಟದ ಅಧಿಕಾರಿಗಳ ಬೇಜವಾಬ್ದಾರಿತನದಿಂದಾಗಿ ಅಮಾಯಕ ಜೀವಿಗಳು ಬಲಿಯಾಗುತ್ತಿವೆ. ಈ ಕೂಡಲೇ ನೀವು ಹಸ್ತಕ್ಷೇಪ ಮಾಡಿ, ರಾಜ್ಯದ ಎಲ್ಲಾ ಅರಣ್ಯ ಪ್ರದೇಶಗಳಲ್ಲಿ ಪ್ರಾಣಿಗಳಿಗೆ ನೀರಿನ ವ್ಯವಸ್ಥೆ ಸಮರ್ಪಕವಾಗಿದೆಯೇ ಎಂದು ಪರಿಶೀಲಿಸಲು ಆದೇಶಿಸಬೇಕಿದೆ.
