ಜಗತ್ತಿನ ಅತ್ಯಂತ ಪ್ರತಿಷ್ಠಿತ ಸಿನಿಮಾ ಹಬ್ಬಗಳಲ್ಲಿ ಒಂದಾದ 79ನೇ ಕೇನ್ಸ್ ಚಲನಚಿತ್ರೋತ್ಸವ (Cannes Film Festival) ಫ್ರಾನ್ಸ್ನ ಕ್ಯಾನೆಸ್ನಲ್ಲಿರುವ ಪ್ಯಾಲೇಸ್ ಡೆಸ್ ಫೆಸ್ಟಿವಲ್ಸ್ನಲ್ಲಿ ನಿನ್ನೆ ಅತ್ಯಂತ ಅದ್ಧೂರಿಯಾಗಿ ಮುಕ್ತಾಯಗೊಂಡಿದೆ. ಪ್ರತಿ ವರ್ಷದಂತೆ ಈ ಬಾರಿಯೂ ಇಡೀ ವಿಶ್ವದ ಕಣ್ಣು ನೆಟ್ಟಿದ್ದ ಈ ವರ್ಣರಂಜಿತ ಸಮಾರೋಪ ಸಮಾರಂಭದಲ್ಲಿ, ಬಾಲಿವುಡ್ನ ಎವರ್ಗ್ರೀನ್ ಬ್ಯೂಟಿ ಮತ್ತು ಮಾಜಿ ವಿಶ್ವ ಸುಂದರಿ ಐಶ್ವರ್ಯಾ ರೈ ಬಚ್ಚನ್ (Aishwarya Rai Bachchan) ತಮ್ಮ ವಿಭಿನ್ನ ಲುಕ್ನಿಂದ ಎಲ್ಲರ ಗಮನ ಸೆಳೆದಿದ್ದಾರೆ.
ವಿಶೇಷ ಅಂದರೆ, ಐಶ್ವರ್ಯಾ ರೈ ಅವರು ತಮ್ಮ ಮೊದಲ ದಿನದ ರೆಡ್ ಕಾರ್ಪೆಟ್ ವಾಕಿಂಗ್ ವೇಳೆ ಧರಿಸಿದ್ದ ನೀಲಿ ಬಣ್ಣದ ಗೌನ್ಗೆ ಸಂಪೂರ್ಣ ಅಪೋಸಿಟ್ ಆಗಿರೋ ಔಟ್ಫಿಟ್ನಲ್ಲಿ ಈ ಬಾರಿ ಎಂಟ್ರಿ ಕೊಟ್ಟಿದ್ದರು. ಎರಡನೇ ದಿನದ ರೆಡ್ ಕಾರ್ಪೆಟ್ ನಡಿಗೆಗಾಗಿ ಅವರು ಭಿನ್ನವಾಗಿರೋ ಬಿಳಿ ಬಣ್ಣದ ‘ಪ್ಯಾಂಟ್ಸೂಟ್’ (Pantsuit) ಧರಿಸಿ ಮಿಂಚಿದ್ದು, ಫ್ಯಾಷನ್ ಪ್ರೇಮಿಗಳ ಹುಬ್ಬೇರಿಸುವಂತೆ ಮಾಡಿದ್ದಾರೆ.
ಚೀನಾ ಡಿಸೈನರ್ ಉಡುಪಿನಲ್ಲಿ ಐಶ್ ಬ್ಯೂಟಿಫುಲ್ ಪವರ್ ಸೂಟ್!
ಐಶ್ವರ್ಯಾ ರೈ ಅವರು ಧರಿಸಿದ್ದ ಈ ವಿಶಿಷ್ಟವಾದ ಬಿಳಿ ಬಣ್ಣದ ಡಿಸೈನರ್ ಉಡುಪನ್ನು ಚೀನಾ ಮೂಲದ ಖ್ಯಾತ ಫ್ಯಾಷನ್ ಡಿಸೈನರ್ ಚೆನ್ನಿ ಚಾನ್ (Cheney Chan) ಅವರು ಪ್ರತ್ಯೇಕವಾಗಿ ವಿನ್ಯಾಸಗೊಳಿಸಿದ್ದರು. ಸಖತ್ ಆಕರ್ಷಕವಾಗಿದ್ದ ಈ ಪವರ್ ಸೂಟ್ನಲ್ಲಿ ಒಂದು ಕ್ಲಾಸಿ ಬ್ಲೇಜರ್ ಮತ್ತು ಜೀನ್ಸ್ನಂತೆ ಕಸೂತಿ ಕೆಲಸ ಮಾಡಲಾಗಿದ್ದ ಸುಂದರವಾದ ಟ್ರೌಸರ್ ಇತ್ತು. ಅದರ ಜೊತೆಗೆ ಡಿಸೈನ್ಗೆ ಮ್ಯಾಚ್ ಆಗುವಂತೆ ರೆಕ್ಕೆಗಳ ತರಹದ ಗರಿಗಳ ವಿನ್ಯಾಸ ಮಾಡಲಾಗಿದ್ದು, ಉಡುಪಿನ ಅಂದವನ್ನು ಮತ್ತಷ್ಟು ಹೆಚ್ಚಿಸಿತ್ತು.
ಇದಷ್ಟೇ ಅಲ್ಲದೆ, ಐಶ್ವರ್ಯಾ ಧರಿಸಿದ್ದ ಕೋಟ್ನಲ್ಲಿ ಮಾಡಲಾಗಿದ್ದ ಕಟಿಂಗ್ ಮತ್ತು ಲ್ಯಾಪಲ್ ಡಿಸೈನ್ಗಳು ರೆಡ್ ಕಾರ್ಪೆಟ್ ಮೇಲೆ ಕ್ಯಾಮೆರಾ ಲೈಟ್ಗಳಿಗೆ ಅದ್ಭುತವಾಗಿ ಎದ್ದು ಕಾಣುತ್ತಿದ್ದವು. ಈ ಬೋಲ್ಡ್ ಮತ್ತು ಡಿಫರೆಂಟ್ ಉಡುಪನ್ನು ಐಶ್ವರ್ಯಾ ರೈ ಅವರು ಎಂದಿನಂತೆ ತಮ್ಮದೇ ಆದ ಸಿಕ್ಕಾಪಟ್ಟೆ ಕಾನ್ಫಿಡೆನ್ಸ್ ಮತ್ತು ಸ್ಟೈಲ್ನೊಂದಿಗೆ ಕ್ಯಾರಿ ಮಾಡಿದ್ದರು. ಯಾವುದೇ ಅತಿಯಾದ ಆಡಂಬರವಿಲ್ಲದೆ, ಮುಕ್ತವಾಗಿ ಬಿಟ್ಟ ಕೇಶವಿನ್ಯಾಸ (Open Hair) ಮತ್ತು ಮಿನಿಮಲ್ ಮೇಕಪ್ನೊಂದಿಗೆ ಅವರು ರೆಡ್ ಕಾರ್ಪೆಟ್ ಮೇಲೆ ಹೆಜ್ಜೆ ಹಾಕುತ್ತಿದ್ದರೆ ಫೋಟೋಗ್ರಾಫರ್ಗಳ ಕ್ಯಾಮೆರಾಗಳು ಬಿಡುವಿಲ್ಲದೆ ಫ್ಲ್ಯಾಶ್ ಆದವು.
ಅಮ್ಮನಿಗೆ ಸಾಥ್ ನೀಡಿದ ಮಗಳು ಆರಾಧ್ಯ!
ಈ ಬಾರಿಯ ಕೇನ್ಸ್ ಫಿಲ್ಮ್ ಫೆಸ್ಟಿವಲ್ನಲ್ಲಿ ಐಶ್ವರ್ಯಾ ರೈ ಒಬ್ಬಂಟಿಯಾಗಿರಲಿಲ್ಲ. ಅವರ ಪ್ರತಿ ಹೆಜ್ಜೆಯಲ್ಲೂ ನೆರಳಿನಂತೆ ಜೊತೆಗಿರುವ ಮಗಳು ಆರಾಧ್ಯ ಬಚ್ಚನ್ (Aaradhya Bachchan) ಇಲ್ಲೂ ಕೂಡ ಅಮ್ಮನ ಕೈ ಹಿಡಿದು ರೆಡ್ ಕಾರ್ಪೆಟ್ ಮೇಲೆ ಒಟ್ಟಿಗೆ ಕಾಣಿಸಿಕೊಂಡರು.
ಅಮ್ಮ ಬಿಳಿ ಬಣ್ಣದ ಸೂಟ್ನಲ್ಲಿ ಮಿಂಚಿದರೆ, ಇತ್ತ ಆರಾಧ್ಯ ಭಿನ್ನವಾಗಿರೋ ಕೆಂಪು ಬಣ್ಣದ ರೇಷ್ಮೆ ಗೌನ್ (Red Silk Gown) ಧರಿಸಿ ಸಖತ್ ಕ್ಯೂಟ್ ಆಗಿ ಕಾಣಿಸುತ್ತಿದ್ದರು. ಡ್ರೆಸ್ಗೆ ಮ್ಯಾಚ್ ಆಗುವಂತೆ ಕೆಂಪು ಲಿಪ್ಸ್ಟಿಕ್ ಹಾಗೂ ಸೈಡ್-ಪಾರ್ಟೆಡ್ ಹೇರ್ಸ್ಟೈಲ್ ಮಾಡಿಕೊಂಡಿದ್ದ ಆರಾಧ್ಯ, ಅಮ್ಮನ ಜೊತೆ ನಗುತ್ತಲೇ ಕ್ಯಾಮೆರಾಗಳಿಗೆ ಪೋಸ್ ನೀಡಿದರು. ಈ ತಾಯಿ-ಮಗಳ ಜೋಡಿಯ ಫೋಟೋಗಳು ಈಗ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ಟ್ರೆಂಡ್ ಆಗ್ತಿವೆ.
ಸಿನಿಮಾದಿಂದ ಸದ್ಯಕ್ಕೆ ದೂ ರ ಉಳಿದಿರುವ ವಿಶ್ವ ಸುಂದರಿ!
ಕಳೆದ ಕೆಲವು ವರ್ಷಗಳಿಂದ ಐಶ್ವರ್ಯಾ ರೈ ಬಚ್ಚನ್ ಅವರು ಬೆಳ್ಳಿ ಪರದೆಯಿಂದ ಸ್ವಲ್ಪ ಮಟ್ಟಿಗೆ ದೂರವೇ ಉಳಿದಿದ್ದಾರೆ. ಅವರು ಕೊನೆಯದಾಗಿ ಕಾಣಿಸಿಕೊಂಡಿದ್ದು ಸೌತ್ನ ಖ್ಯಾತ ನಿರ್ದೇಶಕ ಮಣಿರತ್ನಂ ಅವರ ದೃಶ್ಯಕಾವ್ಯ ‘ಪೊನ್ನಿಯಿನ್ ಸೆಲ್ವನ್: ಭಾಗ 1’ (2022) ಮತ್ತು ‘ಪೊನ್ನಿಯಿನ್ ಸೆಲ್ವನ್: ಭಾಗ 2’ (2023) ಸಿನಿಮಾಗಳಲ್ಲಿ. ಆ ಚಿತ್ರದಲ್ಲಿ ನಂದಿನಿ ಪಾತ್ರದಲ್ಲಿ ಐಶ್ವರ್ಯಾ ಅವರ ನಟನೆಗೆ ಇಡೀ ದೇಶವೇ ಫಿದಾ ಆಗಿತ್ತು.
ಆ ಸಿನಿಮಾಗಳ ನಂತರ ಅವರು ಮತ್ಯಾವ ಹೊಸ ಪ್ರಾಜೆಕ್ಟ್ಗೂ ಗ್ರೀನ್ ಸಿಗ್ನಲ್ ಕೊಟ್ಟಿಲ್ಲ. ಅವರ ಮುಂದಿನ ಸಿನಿಮಾಗಳು ಯಾವುವು ಮತ್ತು ಅವರು ಯಾವಾಗ ಮತ್ತೆ ಕಂಬ್ಯಾಕ್ ಮಾಡ್ತಾರೆ ಅನ್ನೋದರ ಬಗ್ಗೆಯೂ ಇದುವರೆಗೂ ಯಾವುದೇ ಅಧಿಕೃತ ಮಾಹಿತಿ ಹೊರಬಂದಿಲ್ಲ. ಸಿನಿಮಾಗಳಲ್ಲಿ ಬ್ಯುಸಿ ಇಲ್ಲದಿದ್ದರೂ, ಇಂತಹ ಇಂಟರ್ನ್ಯಾಷನಲ್ ವೇದಿಕೆಗಳಲ್ಲಿ ತಮ್ಮ ಫ್ಯಾಷನ್ ಸೆನ್ಸ್ ಮೂಲಕ ಐಶ್ವರ್ಯಾ ರೈ ಇಂದಿಗೂ ಟ್ರೆಂಡ್ ಸೆಟ್ಟರ್ ಆಗಿ ಮುಂದುವರಿದಿದ್ದಾರೆ.
