ಅಸ್ಸಾಂ ರಾಜ್ಯದ ಗುವಾಹಟಿಯಲ್ಲಿ ನಡೆದ ಒಂದು ಆಘಾತಕಾರಿ ಘಟನೆ ಇದೀಗ ಸಮಾಜವನ್ನು ಒಂದು ಕ್ಷಣ ಬೆಚ್ಚಿಬೀಳಿಸಿದೆ. ಪಂಜಾಬರಿ ಪ್ರದೇಶದಲ್ಲಿರುವ ಅಮ್ರಿನ್ ಅಖ್ತರ್ ಅವರ ಮನೆಯಲ್ಲಿ 13 ವರ್ಷದ ಅಪ್ರಾಪ್ತ ಬಾಲಕಿಯನ್ನು ಮನೆ ಕೆಲಸಕ್ಕೆ ಬಳಸುತ್ತಿದ್ದ ಪ್ರಕರಣವನ್ನು ಜಿಲ್ಲಾ ಕಾರ್ಮಿಕ ಕಾರ್ಯಪಡೆ ಪತ್ತೆಹಚ್ಚಿದ್ದು ಶೋಧ ಕಾರ್ಯ ಯಶಸ್ವಿ ಆಗುವಂತೆ ಮಾಡಿದ್ದಾರೆ
ಮಾಹಿತಿಯ ಪ್ರಕಾರ, ಕಳೆದ 6 ವರ್ಷಗಳಿಂದ ಈ ಬಾಲಕಿ ಮನೆ ಕೆಲಸ ಮಾಡುತ್ತಿದ್ದಾಳೆ ಎಂಬ ದೂರು ಅಧಿಕಾರಿಗಳಿಗೆ ತಲುಪಿತ್ತು. ವಿಚಾರ ತಿಳಿದ ಕೂಡಲೇ ಕಾರ್ಮಿಕ ಕಾರ್ಯಪಡೆ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ದಾಳಿ ನಡೆಸಿದರು. ಅಧಿಕಾರಿಗಳು ಮನೆಗೆ ಬಂದಾಗ, ಮಾಲೀಕರು ಮಗುವನ್ನು ಹಾಸಿಗೆಯೊಳಗೆ ಬಚ್ಚಿಟ್ಟು ನಾಟಕವಾಡಿರುವುದು ಬಯಲಾಗಿದೆ. ಆದರೆ ಅಧಿಕಾರಿಗಳ ಪರಿಶೀಲನೆಯ ನಂತರ ಬಾಲಕಿಯನ್ನು ರಕ್ಷಿಸಲಾಯಿತು.
ಈ ಘಟನೆ ಸಮಾಜದಲ್ಲಿ ಆಕ್ರೋಶ ಮೂಡಿಸಿದೆ. ಅಪ್ರಾಪ್ತ ಮಕ್ಕಳನ್ನು ಮನೆ ಕೆಲಸಕ್ಕೆ ಬಳಸುವುದು ಕಾನೂನುಬಾಹಿರವಾಗಿದ್ದು, ಅವರ ಬಾಲ್ಯವನ್ನು ಕಸಿದುಕೊಳ್ಳುವ ಕ್ರೂರ ಕೃತ್ಯವಾಗಿದೆ. 13 ವರ್ಷದ ಬಾಲಕಿ ತನ್ನ ಬಾಲ್ಯದ ಆಟ, ಓದು, ಕನಸುಗಳನ್ನು ಅನುಭವಿಸಬೇಕಾದ ಸಮಯದಲ್ಲಿ, ಮನೆ ಕೆಲಸದ ಹೊರೆ ಹೊತ್ತಿದ್ದಾಳೆ ಎಂಬುದು ಹೃದಯ ಕಲುಕುವ ಸಂಗತಿ ಎನ್ನಬಹುದು.
ಸ್ಥಳೀಯರು ಈ ಘಟನೆಯನ್ನು ಖಂಡಿಸಿ, “ಮಕ್ಕಳನ್ನು ಕೆಲಸಕ್ಕೆ ಬಳಸುವುದು ಮಾನವೀಯತೆಯ ವಿರುದ್ಧ. ಇಂತಹವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕು” ಎಂದು ಹೇಳಿದ್ದಾರೆ. ಅಧಿಕಾರಿಗಳು ಈಗ ಪ್ರಕರಣದ ತನಿಖೆ ಮುಂದುವರಿಸುತ್ತಿದ್ದು, ಬಾಲಕಿಗೆ ಸುರಕ್ಷಿತ ವಾತಾವರಣ ಒದಗಿಸಲು ಕ್ರಮ ಕೈಗೊಳ್ಳುತ್ತಿದ್ದಾರೆ. ಗುವಾಹಟಿಯಲ್ಲಿ 13 ವರ್ಷದ ಅಪ್ರಾಪ್ತ ಬಾಲಕಿಯನ್ನು ಮನೆ ಕೆಲಸಕ್ಕೆ ಬಳಸುತ್ತಿದ್ದ ಪ್ರಕರಣ, ಸಮಾಜಕ್ಕೆ ಎಚ್ಚರಿಕೆಯ ಗಂಟೆ. ಮಕ್ಕಳಿಗೆ ಶಿಕ್ಷಣ, ಆಟ, ಕನಸುಗಳ ಹಕ್ಕು ಇದೆ. ಅವರನ್ನು ಕೆಲಸಕ್ಕೆ ಬಳಸುವುದು ಕಾನೂನುಬಾಹಿರ ಮಾತ್ರವಲ್ಲ, ಮಾನವೀಯತೆಯ ವಿರುದ್ಧವೂ ಆಗಿದೆ. ಈ ಘಟನೆ, ಮಕ್ಕಳ ಹಕ್ಕುಗಳನ್ನು ಕಾಪಾಡುವ ಅಗತ್ಯವನ್ನು ಮತ್ತೊಮ್ಮೆ ನೆನಪಿಸಿದೆ.
