ಫೆಬ್ರವರಿ 28 ರಿಂದ ನಡೆಯುತ್ತಿರುವ ಇರಾನ್ ಮತ್ತು ಅಮೆರಿಕ-ಇಸ್ರೇಲ್ ನಡುವಿನ ಯುದ್ಧವು ಈಗ ಅಪಾಯಕಾರಿ ಘಟ್ಟಕ್ಕೆ ತಲುಪಿದೆ. ಬುಧವಾರ ಇರಾನ್ನಿಂದ ಉಡಾವಣೆಯಾದ ಬ್ಯಾಲಿಸ್ಟಿಕ್ ಕ್ಷಿಪಣಿಯೊಂದು ಟರ್ಕಿಯ ವಾಯುಪ್ರದೇಶದೊಳಗೆ ನುಗ್ಗಿದ್ದು, ಇದನ್ನು ನ್ಯಾಟೋ ವಾಯು ರಕ್ಷಣಾ ವ್ಯವಸ್ಥೆಯು ಯಶಸ್ವಿಯಾಗಿ ಹೊಡೆದುರುಳಿಸಿದೆ. ಯುದ್ಧ ಆರಂಭವಾದ ನಂತರ ನ್ಯಾಟೋ ಸದಸ್ಯ ರಾಷ್ಟ್ರವೊಂದರ ಮೇಲೆ ಇರಾನ್ ನೇರ ಬೆದರಿಕೆ ಒಡ್ಡಿದ ಮೊದಲ ಘಟನೆ ಇದಾಗಿದೆ.
ಪೂರ್ವ ಮೆಡಿಟರೇನಿಯನ್ನಲ್ಲಿ ಹದ್ದಿನ ಕಣ್ಣಿಟ್ಟಿದ್ದ ನ್ಯಾಟೋ ಪಡೆಗಳು, ಇರಾನ್ನಿಂದ ಉಡಾವಣೆಯಾಗಿ ಟರ್ಕಿಯತ್ತ ನುಗ್ಗುತ್ತಿದ್ದ ಕ್ಷಿಪಣಿಯನ್ನು ಆಕಾಶದಲ್ಲೇ ಹೊಡೆದುರುಳಿಸಿವೆ. ಇರಾಕ್ ಮತ್ತು ಸಿರಿಯಾ ವಾಯುಪ್ರದೇಶವನ್ನು ದಾಟಿಬಂದಿದ್ದ ಈ ಕ್ಷಿಪಣಿಯ ಅವಶೇಷಗಳು ಹಟೇಯ್ ಪ್ರಾಂತ್ಯದ ದೋರ್ಟಿಯೋಲ್ನಲ್ಲಿ ಬಿದ್ದಿದ್ದು, ಯಾವುದೇ ಜೀವಹಾನಿ ಸಂಭವಿಸದಿದ್ದರೂ ಸ್ಥಳೀಯರು ತೀವ್ರ ಭಯಭೀತರಾಗಿದ್ದಾರೆ.
ಈ ಘಟನೆಯ ನಂತರ ಟರ್ಕಿ ಸರ್ಕಾರವು ಇರಾನ್ ರಾಯಭಾರಿಯನ್ನು ಕರೆಸಿ ತೀವ್ರ ಪ್ರತಿರೋಧ ವ್ಯಕ್ತಪಡಿಸಿತು. ಇದಕ್ಕೆ ಪ್ರತಿಕ್ರಿಯಿಸಿದ ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಾಕ್ಚಿ, "ಟರ್ಕಿಯು ನಮ್ಮ ಗುರಿಯಲ್ಲ" ಎಂದು ಸ್ಪಷ್ಟಪಡಿಸಿದ್ದಾರೆ. ತಾಂತ್ರಿಕ ದೋಷ ಅಥವಾ ಸಿಗ್ನಲ್ ಜಾಮಿಂಗ್ ಕಾರಣದಿಂದ ಕ್ಷಿಪಣಿಯು ದಾರಿ ತಪ್ಪಿರಬಹುದು ಎಂದು ಅವರು ತಿಳಿಸಿದ್ದಾರೆ. ಈ ಕ್ಷಿಪಣಿಯು ವಾಸ್ತವವಾಗಿ ಗ್ರೀಕ್ ಸೈಪ್ರಸ್ನಲ್ಲಿರುವ ಸೈನಿಕ ನೆಲೆಗೆ ಗುರಿಯಾಗಿಸಲಾಗಿತ್ತು ಎನ್ನಲಾಗಿದೆ. ಕೇವಲ ಅಮೆರಿಕ ಮತ್ತು ಇಸ್ರೇಲ್ ಹಿತಾಸಕ್ತಿಗಳ ಮೇಲೆ ಮಾತ್ರ ತಮ್ಮ ದಾಳಿ ಇರುತ್ತದೆ ಎಂದು ಇರಾನ್ ಪುನರುಚ್ಚರಿಸಿದೆ.
ಟರ್ಕಿ ಅಧ್ಯಕ್ಷ ರೆಸೆಪ್ ತಯ್ಯಿಪ್ ಎರ್ಡೋಗನ್ ಅವರು ಈ ಸಂಘರ್ಷವು "ಪ್ರಾದೇಶಿಕ ಮಹಾಯುದ್ಧ"ವಾಗಿ ಬದಲಾಗಬಾರದು ಎಂದು ಎಚ್ಚರಿಸಿದ್ದಾರೆ. ಇರಾನ್ನೊಂದಿಗೆ ಸುಮಾರು 500 ಕಿಲೋಮೀಟರ್ಗಳಷ್ಟು ಉದ್ದದ ಗಡಿಯನ್ನು ಹಂಚಿಕೊಂಡಿರುವ ಟರ್ಕಿಗೆ ಈ ಬೆಳವಣಿಗೆ ನುಂಗಲಾರದ ತುತ್ತಾಗಿದೆ. ಟರ್ಕಿಯ ವಿದೇಶಾಂಗ ಸಚಿವ ಹಕನ್ ಫಿಡಾನ್ ಅವರು ಇರಾನ್ನ ದಾಳಿಯ ತಂತ್ರವನ್ನು "ಭಾರಿ ತಪ್ಪು" ಎಂದು ಕರೆದಿದ್ದಾರೆ. "ನಾನು ಮುಳುಗಿದರೆ ಇಡೀ ಪ್ರಾಂತ್ಯವನ್ನೇ ನನ್ನೊಂದಿಗೆ ಮುಳುಗಿಸುತ್ತೇನೆ ಎನ್ನುವ ಇರಾನ್ನ ಧೋರಣೆಯು ಎಲ್ಲರಿಗೂ ಅಪಾಯಕಾರಿ" ಎಂದು ಅವರು ಕಟುವಾಗಿ ಟೀಕಿಸಿದ್ದಾರೆ.
ಸದ್ಯಕ್ಕೆ ನ್ಯಾಟೋ ಈ ದಾಳಿಯನ್ನು ಗಂಭೀರವಾಗಿ ಪರಿಗಣಿಸಿದ್ದು, ತನ್ನ ರಕ್ಷಣಾ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸಿದೆ. ಟರ್ಕಿಯ ಇನ್ಸಿರ್ಲಿಕ್ ವಾಯುನೆಲೆಯ ಬಳಿಯೇ ಈ ಅವಶೇಷಗಳು ಬಿದ್ದಿರುವುದು ಪರಿಸ್ಥಿತಿಯ ಗಂಭೀರತೆಯನ್ನು ಹೆಚ್ಚಿಸಿದೆ. ನ್ಯಾಟೋ ವಕ್ತಾರೆ ಅಲಿಸನ್ ಹಾರ್ಟ್ ಅವರು "ನಾವು ಯಾವುದೇ ದಾಳಿಯನ್ನು ಎದುರಿಸಲು ಸಿದ್ಧರಿದ್ದೇವೆ" ಎಂದು ತಿಳಿಸಿದ್ದಾರೆ. ಗುರುವಾರ ಮಧ್ಯಾಹ್ನದಿಂದ ಟರ್ಕಿ ಸೇನೆಯು ಪೂರ್ವ ಗಡಿಯಲ್ಲಿ ಸತತ ಗಸ್ತು ತಿರುಗುತ್ತಿದ್ದು, ಯುದ್ಧ ವಿಮಾನಗಳು ಹದ್ದಿನ ಕಣ್ಣಿಟ್ಟಿವೆ.
