ವಿಶ್ವದಾದ್ಯಂತ ತೈಲ ಬೆಲೆ ಏರಿಕೆ ಸಾಮಾನ್ಯ ಜನರ ಜೇಬಿಗೆ ಕತ್ತರಿ ಹಾಕುತ್ತಿದ್ದರೆ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮಾತ್ರ ಈ ಬಗ್ಗೆ ವಿಭಿನ್ನವಾಗಿ ಪ್ರತಿಕ್ರಿಯಿಸಿದ್ದಾರೆ. "ಸದ್ಯ ತೈಲ ಬೆಲೆ ಹೆಚ್ಚಾಗಿರುವುದು ನನಗೆ ಖುಷಿಯೇ ತಂದಿದೆ, ಆದರೆ ಇರಾನ್ ಜೊತೆಗಿನ ಯುದ್ಧ ಮುಗಿದ ತಕ್ಷಣ ಪೆಟ್ರೋಲ್-ಡೀಸೆಲ್ ದರ ಭಾರಿ ಪ್ರಮಾಣದಲ್ಲಿ ಕುಸಿಯಲಿದೆ" ಎಂದು ಅವರು ಭವಿಷ್ಯ ನುಡಿದಿದ್ದಾರೆ.
ಟ್ರಂಪ್ ಹೇಳಿದ್ದೇನು?
ಫಾಕ್ಸ್ ನ್ಯೂಸ್ನ ಮಾರಿಯಾ ಬಾರ್ಟಿರೊಮೊ ಅವರೊಂದಿಗೆ ನಡೆಸಿದ ಇತ್ತೀಚಿನ ಸಂದರ್ಶನದಲ್ಲಿ ಟ್ರಂಪ್ ಇಂಧನ ಬೆಲೆಗಳ ಬಗ್ಗೆ ಮನಬಿಚ್ಚಿ ಮಾತನಾಡಿದ್ದಾರೆ. ಸದ್ಯ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ತೈಲ ಬೆಲೆ ಪ್ರತಿ ಬ್ಯಾರೆಲ್ಗೆ ಸುಮಾರು 92 ಡಾಲರ್ ಆಸುಪಾಸಿನಲ್ಲಿದೆ. ಈ ದರದ ಬಗ್ಗೆ ತಮಗೆ ಯಾವುದೇ ಅಸಮಾಧಾನವಿಲ್ಲ ಎಂದು ಹೇಳುವ ಮೂಲಕ ಅವರು ಅಚ್ಚರಿ ಮೂಡಿಸಿದ್ದಾರೆ.
ಆದರೆ, ಇದೇ ಸಂದರ್ಶನದಲ್ಲಿ ಒಂದು ಮಹತ್ವದ ಪಾಯಿಂಟ್ ಹೇಳಿದ್ದಾರೆ. ಇರಾನ್ ಜೊತೆಗಿನ ಸಂಘರ್ಷ ಶೀಘ್ರದಲ್ಲೇ ಅಂತ್ಯಗೊಳ್ಳುವ ಸಾಧ್ಯತೆಯಿದೆ. ಆ ಯುದ್ಧ ಮುಗಿದ ತಕ್ಷಣ ಇಂಧನ ಬೆಲೆಗಳು 'ಬಹಳ ದೊಡ್ಡ ಪ್ರಮಾಣದಲ್ಲಿ' ಇಳಿಯುತ್ತವೆ ಎಂಬುದು ಟ್ರಂಪ್ ಅವರ ಲೆಕ್ಕಾಚಾರ.
ಚುನಾವಣೆ ಹೊತ್ತಿಗೆ ಬೆಲೆ ಇಳಿಕೆ?
ಅಮೆರಿಕದಲ್ಲಿ ನವೆಂಬರ್ನಲ್ಲಿ ಕಾಂಗ್ರೆಸ್ ಚುನಾವಣೆ ನಡೆಯಲಿದೆ. ಈ ಸಂದರ್ಭದಲ್ಲಿ ಇಂಧನ ಬೆಲೆಗಳು ಹೇಗಿರಬಹುದು ಎಂಬ ಪ್ರಶ್ನೆಗೆ ಉತ್ತರಿಸಿದ ಟ್ರಂಪ್, "ಚುನಾವಣೆಯ ಹೊತ್ತಿಗೆ ಬೆಲೆಗಳು ಇದೇ ರೀತಿ ಇರಬಹುದು ಅಥವಾ ಸ್ವಲ್ಪ ಹೆಚ್ಚಾಗಬಹುದು" ಎಂದು ಮೊದಲು ಹೇಳಿದ್ದರು. ಆದರೆ ನಂತರ ತಮ್ಮ ಹೇಳಿಕೆಯನ್ನು ಸ್ಪಷ್ಟಪಡಿಸಿದ ಅವರು, ಅನಿಲ (Gas) ಬೆಲೆಗಳು ಚುನಾವಣೆಯ ಹೊತ್ತಿಗೆ ತುಂಬಾ ಕಡಿಮೆಯಾಗಲಿವೆ ಎಂದು ಭವಿಷ್ಯ ನುಡಿದಿದ್ದಾರೆ.
ಸದ್ಯ ಅಮೆರಿಕದಲ್ಲಿ ಅನಿಲ ಬೆಲೆ ಸರಾಸರಿ 4 ಡಾಲರ್ಗಿಂತ ಸ್ವಲ್ಪ ಹೆಚ್ಚಿದೆ. ಯುದ್ಧದ ವಾತಾವರಣ ತಿಳಿಯಾದಂತೆ ಇದು ಸಾಮಾನ್ಯ ಜನರ ಕೈಗೆಟುಕುವ ದರಕ್ಕೆ ಬರಲಿದೆ ಎಂದು ಅವರು ಆಶಯ ವ್ಯಕ್ತಪಡಿಸಿದ್ದಾರೆ.
ತಪ್ಪಾಗಿ ಅರ್ಥೈಸಬೇಡಿ!
ತಮ್ಮ ಹಳೆಯ ಹೇಳಿಕೆಗಳ ಬಗ್ಗೆ ಕ್ಲಾರಿಟಿ ಕೊಟ್ಟ ಟ್ರಂಪ್, "ಇಂಧನ ಬೆಲೆಗಳ ಬಗ್ಗೆ ನಾನು ಈ ಹಿಂದೆ ಹೇಳಿದ್ದನ್ನು ಕೆಲವರು ತಪ್ಪಾಗಿ ಅರ್ಥೈಸಿಕೊಂಡಿದ್ದಾರೆ. ಯುದ್ಧ ನಿಲ್ಲುವುದು ಮತ್ತು ಬೆಲೆ ಕುಸಿಯುವುದು ಒಂದಕ್ಕೊಂದು ಲಿಂಕ್ ಆಗಿದೆ" ಎಂದಿದ್ದಾರೆ. ಇರಾನ್ ಸಂಘರ್ಷ ಶೀಘ್ರದಲ್ಲೇ ಮುಗಿಯಬಹುದು ಎಂಬ ವಿಶ್ವಾಸವನ್ನು ಅವರು ವ್ಯಕ್ತಪಡಿಸಿದ್ದು, ಅದರ ಲಾಭ ಇಂಧನ ಮಾರುಕಟ್ಟೆಗೆ ಸಿಗಲಿದೆ ಎಂಬುದು ಅವರ ಅಭಿಮತ.
