ಕರಾವಳಿ ಶೈಲಿಯ ಮೀನು ಫ್ರೈ ಮನೆಯಲ್ಲೇ ಮಾಡಬೇಕೆ? ಇಲ್ಲಿದೆ ಸಾದಾ ಸೀದಾ ಟಿಪ್ಸ್‌, ನಾಳೆಯೇ ರೆಡಿ ಮಾಡಿ ತಿನ್ನಿ!!

ಭಾನುವಾರ ಬಂತು ಅಂದರೆ ಸಾಕು, ಮಾಂಸಾಹಾರಿಗಳ ಮನೆಯಲ್ಲಿ ಹಬ್ಬದ ವಾತಾವರಣ ಸೃಷ್ಟಿಯಾಗುತ್ತದೆ. ಕೋಳಿ ಮಾಂಸ, ಮಟನ್ ಜೊತೆಗೆ ಸೀಫುಡ್ (Sea Food) ಪ್ರಿಯರ ವೀಕೆಂಡ್ ಮೂಡ್ ಅನ್ನು ಮತ್ತಷ್ಟು ರಂಗಾಗಿಸಲು ಬಿಸಿಬಿಸಿ ಫಿಶ್ ಫ್ರೈ ಇದ್ದರೆ ಊಟದ ಮಜಾವೇ ಬೇರೆ. ಆದರೆ, ಎಷ್ಟೋ ಜನ ಮನೆಯಲ್ಲಿ ಎಷ್ಟು ಬಾರಿ ಮೀನು ಫ್ರೈ ಮಾಡಿದರೂ ಅದಕ್ಕೆ ಉಪ್ಪು-ಖಾರ ಸರಿಯಾಗಿ ಹಿಡಿಯುವುದಿಲ್ಲ, ಹೋಟೆಲ್‌ನಲ್ಲಿ ಸಿಗುವಂತೆ ಕ್ರಿಸ್ಪಿಯಾಗಿ (Crispy) ಬರುವುದಿಲ್ಲ ಎಂದು ಬೇಸರ ಮಾಡಿಕೊಳ್ಳುತ್ತಾರೆ. ಅಂಥವರಿಗಾಗಿ ಯಾವುದೇ ಪ್ರಸಿದ್ಧ ರೆಸ್ಟೋರೆಂಟ್‌ಗೂ ಕಮ್ಮಿ ಇಲ್ಲದಂತೆ ಪಕ್ಕಾ ಮಸಾಲೆಯುಕ್ತ, ಗರಿಗರಿಯಾದ ಕರಾವಳಿ ಶೈಲಿಯ ತವಾ ಫಿಶ್ ಫ್ರೈ ಮಾಡುವ ಅತ್ಯಂತ ಸರಳ ವಿಧಾನವನ್ನು ಸಾಗರ್ ಪೂಜಾರಿಯವರು ತಿಳಿಸಿಕೊಟ್ಟಿದ್ದಾರೆ.

ಬೆರಳೆಣಿಕೆಯ ಪದಾರ್ಥಗಳನ್ನು ಬಳಸಿ, ಯಾವುದೇ ಕೃತಕ ರಾಸಾಯನಿಕ ಬಣ್ಣಗಳನ್ನು (Chemical Color) ಬಳಸದೆ ಮನೆಯಲ್ಲೇ ಅತ್ಯಂತ ಹೈಜೀನಿಕ್ ಆಗಿ ಹೋಟೆಲ್ ಮಟ್ಟದ ಫಿಶ್ ಫ್ರೈ ಮಾಡುವ ಸೀಕ್ರೆಟ್ ರೆಸಿಪಿ ಇಲ್ಲಿದೆ.

ಮೀನು ಸ್ವಚ್ಛಗೊಳಿಸುವಿಕೆ ಮತ್ತು ಮಸಾಲೆ ಸಿದ್ಧತೆ

ಅತ್ಯುತ್ತಮ ರುಚಿಯ ಫಿಶ್ ಫ್ರೈ ಮಾಡಲು ಮೊದಲ ಹಂತವೇ ಮೀನನ್ನು ಸರಿಯಾಗಿ ಸ್ವಚ್ಛಗೊಳಿಸುವುದು. ಮಾರುಕಟ್ಟೆಯಿಂದ ತಂದ ಮೀನನ್ನು ಚೆನ್ನಾಗಿ ತೊಳೆದು, ಅದಕ್ಕೆ ಕಲ್ಲುಪ್ಪು ಮತ್ತು ನೀರು ಹಾಕಿ ನೀಟಾಗಿ ತೊಳೆದರೆ ಮೀನಿನ ಮೇಲಿರುವ ಲೋಳೆ ಮತ್ತು ಕಲ್ಮಶ ದೂರವಾಗುತ್ತದೆ. ನಂತರ ನಿಮಗೆ ಬೇಕಾದ ಗಾತ್ರಕ್ಕೆ ಮೀನನ್ನು ಕಟ್ ಮಾಡಿ ಇಟ್ಟುಕೊಳ್ಳಿ.

ಮುಂದಿನ ಹಂತ ಮಸಾಲೆ ಸಿದ್ಧತೆ. ಒಂದು ಅಗಲವಾದ ಬೌಲ್‌ನಲ್ಲಿ ಸ್ವಚ್ಛಗೊಳಿಸಿದ ಮೀನಿನ ಪೀಸ್‌ಗಳನ್ನು ಹಾಕಿಕೊಳ್ಳಿ. ಅದಕ್ಕೆ ಈ ಕೆಳಗಿನ ಮಸಾಲೆಗಳನ್ನು ಸೇರಿಸಿ:

• ಒಂದು ದೊಡ್ಡ ಚಮಚ ಅಚ್ಚಖಾರದ ಪುಡಿ
• ಒಂದು ಚಮಚ ಧನಿಯಾ ಪುಡಿ
• ಒಂದು ಚಮಚ ಕಾಳುಮೆಣಸಿನ ಪುಡಿ (Pepper Powder)
• ಒಂದು ಚಿಟಿಕೆ ಅರಿಶಿನ ಪುಡಿ
• ರುಚಿಗೆ ತಕ್ಕಷ್ಟು ಉಪ್ಪು

ಸಾಗರ್ ಪೂಜಾರಿ ಅವರ ವಿಶೇಷ ಟಿಪ್ಸ್: ತವಾ ಫಿಶ್ ಫ್ರೈಗೆ ಕಡ್ಡಾಯವಾಗಿ ಪೆಪ್ಪರ್ ಪುಡಿ ಬಳಸಬೇಕು. ಇದು ಮೀನಿನಲ್ಲಿರುವ ಒಂದು ರೀತಿಯ ಹಸಿ ಅಥವಾ ನೀಚೆ ವಾಸನೆಯನ್ನು ಸಂಪೂರ್ಣವಾಗಿ ಹೋಗಲಾಡಿಸಿ, ಮೀನಿನ ಖಾರದ ರುಚಿಯನ್ನು ದುಪ್ಪಟ್ಟು ಮಾಡುತ್ತದೆ.

ಗರಿಗರಿ ಕೋಟಿಂಗ್‌ಗೆ ಬೇಕಾದ ಸೀಕ್ರೆಟ್ ಟ್ರಿಕ್

ಹೋಟೆಲ್‌ಗಳಲ್ಲಿ ಮೀನಿನ ಮೇಲ್ಭಾಗದ ಲೇಯರ್ ಸಖತ್ ಕ್ರಿಸ್ಪಿಯಾಗಿ ಮತ್ತು ಮಸಾಲೆ ಬಿಟ್ಟುಕೊಳ್ಳದಂತೆ ಇರಲು ಒಂದು ಅದ್ಭುತ ಟ್ರಿಕ್ ಇದೆ. ನಾವು ಸಿದ್ಧಪಡಿಸಿದ ಮಸಾಲೆಗಳ ಜೊತೆಗೆ ಒಂದು ಚಮಚ ಕಾರ್ನ್ ಫ್ಲೋರ್ (Corn Flour) ಮತ್ತು ಒಂದು ಚಮಚ ಅಕ್ಕಿ ಹಿಟ್ಟನ್ನು (Rice Flour) ಕಡ್ಡಾಯವಾಗಿ ಸೇರಿಸಬೇಕು. ಈ ಎರಡು ಹಿಟ್ಟುಗಳು ಮೀನಿಗೆ ಗಟ್ಟಿಯಾದ ಮತ್ತು ಗರಿಗರಿಯಾದ ಕೋಟಿಂಗ್ ನೀಡುತ್ತವೆ.

ಇದರೊಂದಿಗೆ ಒಂದು ಚಮಚ ಫ್ರೆಶ್ ಆದ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಮತ್ತು ಅರ್ಧ ನಿಂಬೆಹಣ್ಣಿನ ರಸವನ್ನು ಹಿಂಡಬೇಕು. ಒಂದು ವೇಳೆ ಮನೆಯಲ್ಲಿ ನಿಂಬೆಹಣ್ಣು ತಕ್ಷಣಕ್ಕೆ ಲಭ್ಯವಿಲ್ಲದಿದ್ದರೆ, ಅಡುಗೆಗೆ ಬಳಸುವ ವಿನೆಗರ್ ಅನ್ನು ಕೂಡ ಬಳಸಬಹುದು. ಈಗ ಈ ಎಲ್ಲಾ ಒಣ ಮಸಾಲೆಗಳು, ಹಿಟ್ಟು ಮತ್ತು ನಿಂಬೆ ರಸವನ್ನು ಕೈಯಿಂದಲೇ ಚೆನ್ನಾಗಿ ಮಿಕ್ಸ್ ಮಾಡಿ, ಪ್ರತಿ ಮೀನಿನ ಪೀಸ್‌ಗಳ ಎರಡೂ ಬದಿಗೆ, ಒಳಗಿನವರೆಗೂ ಸರಿಯಾಗಿ ತಾಗುವಂತೆ ಹಚ್ಚಬೇಕು.

ಮಸಾಲೆ ಹಚ್ಚಿದ ತಕ್ಷಣವೇ ಮೀನನ್ನು ತವಾ ಮೇಲೆ ಹಾಕಿ ಫ್ರೈ ಮಾಡಬಾರದು. ಇದು ಫಿಶ್ ಫ್ರೈ ಮಾಡುವಾಗ ಬಹುತೇಕರು ಮಾಡುವ ದೊಡ್ಡ ತಪ್ಪು. ಮೀನಿನ ಒಳಗಿನ ಸೌಟಿನವರೆಗೂ ಉಪ್ಪು, ಖಾರ ಮತ್ತು ಹುಳಿ ಸರಿಯಾಗಿ ಇಳಿಯಬೇಕೆಂದರೆ ಕನಿಷ್ಠ 1 ಗಂಟೆಯಿಂದ 3 ಗಂಟೆಗಳ ಕಾಲ ಅದನ್ನು ಮ್ಯಾರಿನೇಟ್ ಆಗಲು (ನೆನೆಯಲು) ಬಿಡಬೇಕು. ನಿಮ್ಮ ಮನೆಯಲ್ಲಿ ರೆಫ್ರಿಜರೇಟರ್ (Fridge) ಇದ್ದರೆ, ಮಸಾಲೆ ಹಚ್ಚಿದ ಮೀನನ್ನು ಫ್ರಿಡ್ಜ್ ಒಳಗಡೆ ಇಡುವುದರಿಂದ ಮಸಾಲೆಯು ಮೀನಿನ ಮಾಂಸಕ್ಕೆ ಗಟ್ಟಿಯಾಗಿ ಹಿಡಿದುಕೊಳ್ಳುತ್ತದೆ ಮತ್ತು ಫ್ರೈ ಮಾಡುವಾಗ ಎಣ್ಣೆಯಲ್ಲಿ ಮಸಾಲೆ ಸುಲಭವಾಗಿ ಬಿಟ್ಟುಕೊಳ್ಳುವುದಿಲ್ಲ.

ತವಾ ಫ್ರೈ ಮಾಡುವ ವಿಧಾನ

ಮೀನು ಚೆನ್ನಾಗಿ ಮ್ಯಾರಿನೇಟ್ ಆದ ನಂತರ, ಒಲೆಯ ಮೇಲೆ ಒಂದು ದಪ್ಪ ತಳದ ತವಾವನ್ನು (Tawa) ಇಟ್ಟು ಬಿಸಿ ಮಾಡಿ. ತವಾ ಬಿಸಿಯಾದ ನಂತರ ಅದಕ್ಕೆ ಸ್ವಲ್ಪ ಎಣ್ಣೆಯನ್ನು ಹಾಕಿ ಹರಡಿ. ಈಗ ಮ್ಯಾರಿನೇಟ್ ಆಗಿರುವ ಮೀನಿನ ಪೀಸ್‌ಗಳನ್ನು ತವಾ ಮೇಲಿಟ್ಟು, ಮಧ್ಯಮ ಉರಿಯಲ್ಲಿ (Medium Flame) ಬೇಯಿಸಬೇಕು.

ಮೀನಿನ ಒಂದು ಬದಿ ಆಕರ್ಷಕ ಚಿನ್ನದ ಬಣ್ಣಕ್ಕೆ ತಿರುಗಿ ಗರಿಗರಿಯಾದ ನಂತರ, ಮೆಲ್ಲನೆ ಇನ್ನೊಂದು ಬದಿಗೆ ತಿರುಗಿಸಿ ಹಾಕಿ ಹದವಾಗಿ ಬೇಯಿಸಿ. ಎರಡು ಕಡೆ ಎಣ್ಣೆಯಲ್ಲಿ ಸಮನಾಗಿ ಬೆಂದ ನಂತರ, ಬಿಸಿಬಿಸಿ ಹಾಗೂ ಕ್ರಿಸ್ಪಿಯಾದ ಕರಾವಳಿ ಸ್ಟೈಲ್ ತವಾ ಫಿಶ್ ಫ್ರೈ ಸವಿಯಲು ಸಿದ್ಧವಾಗುತ್ತದೆ. ಇದರ ಮೇಲೆ ಸ್ವಲ್ಪ ಕೊತ್ತಂಬರಿ ಸೊಪ್ಪು ಮತ್ತು ಈರುಳ್ಳಿ ಸ್ಲೈಸ್ ಇಟ್ಟು ಸರ್ವ್ ಮಾಡಿದರೆ, ತಿನ್ನುವವರು ಖಂಡಿತವಾಗಿಯೂ ನಿಮ್ಮ ಕೈರುಚಿಗೆ ಫಿದಾ ಆಗಿ ಮತ್ತೆ ಮತ್ತೆ ಕೇಳಿ ತಿನ್ನುತ್ತಾರೆ. ನಿಮ್ಮ ಮುಂದಿನ ವೀಕೆಂಡ್‌ನಲ್ಲಿ ಈ ಸಿಂಪಲ್ ರೆಸಿಪಿಯನ್ನು ಖಂಡಿತಾ ಟ್ರೈ ಮಾಡಿ ನೋಡಿ!