ವರ್ಷದ ಅತ್ಯಂತ ಮಂಗಳಕರ ದಿನಗಳಲ್ಲಿ ಒಂದಾದ 'ಅಕ್ಷಯ ತೃತೀಯ' ಸಮೀಪಿಸುತ್ತಿದೆ. ಸಂಸ್ಕೃತದಲ್ಲಿ ಅಕ್ಷಯ ಅಂದ್ರೆ 'ಎಂದಿಗೂ ಕರಗದ' ಅಥವಾ 'ಶಾಶ್ವತ' ಅಂತ ಅರ್ಥ. ಅಂದ್ರೆ, ಈ ದಿನ ನೀವು ಏನೇ ಒಳ್ಳೆ ಕೆಲಸ ಮಾಡಿದ್ರೂ, ಹೂಡಿಕೆ ಮಾಡಿದ್ರೂ ಅದು ದಿನದಿಂದ ದಿನಕ್ಕೆ ಬೆಳೆಯುತ್ತಲೇ ಇರುತ್ತೆ ಅನ್ನೋದು ನಮ್ಮೆಲ್ಲರ ಅಚಲ ನಂಬಿಕೆ.
ಈ ಬಾರಿ ಅಕ್ಷಯ ತೃತೀಯ 19 ಏಪ್ರಿಲ್ 2026, ಭಾನುವಾರ ಬಂದಿದೆ. ವಿಶೇಷ ಅಂದ್ರೆ ಈ ದಿನ ಗ್ರಹಗಳ ಅಪರೂಪದ ಸಂಯೋಜನೆಯಿಂದ 'ಗಜಕೇಸರಿ' ಮತ್ತು 'ಮಾಲವ್ಯ' ರಾಜಯೋಗಗಳು ಕೂಡಿ ಬಂದಿವೆ.
ಚಿನ್ನ ಖರೀದಿಗೆ ಶುಭ ಮುಹೂರ್ತ ಯಾವಾಗ?
ಅಕ್ಷಯ ತೃತೀಯ ಅಂದ್ರೆ ಎಲ್ಲರಿಗೂ ಮೊದಲು ನೆನಪಾಗೋದೇ ಚಿನ್ನ! ಅಂದು ಚಿನ್ನ ತಂದ್ರೆ ಸಾಕ್ಷಾತ್ ಮಹಾಲಕ್ಷ್ಮಿಯೇ ಮನೆಗೆ ಬಂದ ಹಾಗೆ ಅಂತ ಜನ ಮುಗಿಬೀಳ್ತಾರೆ.
ತಿಥಿ ಆರಂಭ: ಏಪ್ರಿಲ್ 19ರ ಬೆಳಿಗ್ಗೆ 10:49ಕ್ಕೆ.
ತಿಥಿ ಅಂತ್ಯ: ಏಪ್ರಿಲ್ 20ರ ಬೆಳಿಗ್ಗೆ 07:27ಕ್ಕೆ.
ಖರೀದಿಗೆ ಬೆಸ್ಟ್ ಟೈಮ್: ಬೆಂಗಳೂರಿನ ಲೆಕ್ಕಾಚಾರದ ಪ್ರಕಾರ, ಏಪ್ರಿಲ್ 19ರ ಬೆಳಿಗ್ಗೆ 10:49 ರಿಂದ ಮಧ್ಯಾಹ್ನ 12:19 ರವರೆಗೆ ಚಿನ್ನ ಖರೀದಿಸಲು ಅತ್ಯಂತ ಶ್ರೇಷ್ಠವಾದ ಸಮಯ.
ಚಿನ್ನ ಕೊಳ್ಳಲು ಸಾಧ್ಯವಾಗದಿದ್ದರೆ ಇವುಗಳನ್ನು ಮನೆಗೆ ತನ್ನಿ!
ಇವತ್ತಿನ ದಿನಗಳಲ್ಲಿ ಚಿನ್ನದ ಬೆಲೆ ಗಗನಕ್ಕೇರಿದೆ. ಎಲ್ಲರಿಗೂ ಬಂಗಾರ ಕೊಳ್ಳುವುದು ಸಾಧ್ಯವಾಗದಿರಬಹುದು. ಆದರೆ ಸಂಪ್ರದಾಯ ಬಿಡಬೇಕಿಲ್ಲ! ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ, ಚಿನ್ನದ ಬದಲಿಗೆ ಈ ಕೆಳಗಿನ ವಸ್ತುಗಳನ್ನು ತಂದರೂ ಅಷ್ಟೇ ಪುಣ್ಯ ಲಭಿಸುತ್ತೆ:
ಕಲ್ಲುಪ್ಪು (ಲಕ್ಷ್ಮಿ ಸ್ವರೂಪ): ಅಕ್ಷಯ ತೃತೀಯ ದಿನ ಉಪ್ಪು ಖರೀದಿಸುವುದು ಚಿನ್ನಕ್ಕಿಂತಲೂ ಶ್ರೇಷ್ಠ ಎನ್ನುತ್ತಾರೆ ವಿದ್ವಾಂಸರು. ಉಪ್ಪು ಲಕ್ಷ್ಮಿಯ ಸಂಕೇತ. ಅಂದು ಮನೆಗೆ ಉಪ್ಪು ತಂದರೆ ನಕಾರಾತ್ಮಕ ಶಕ್ತಿ ಓಡಿಹೋಗಿ, ಸಂಪತ್ತು ಹೆಚ್ಚುತ್ತದೆ.
ಮಣ್ಣಿನ ಮಡಿಕೆ: ಬೇಸಿಗೆಯ ಈ ಸಮಯದಲ್ಲಿ ಹೊಸ ಮಣ್ಣಿನ ಪಾತ್ರೆ ಅಥವಾ ಮಡಿಕೆ ಖರೀದಿಸುವುದು ಬಹಳ ಶುಭದಾಯಕ. ಇದು ಸಮೃದ್ಧಿಯ ಸಂಕೇತ.
ಅರಿಶಿನ ಮತ್ತು ಕುಂಕುಮ: ಸೌಭಾಗ್ಯದ ಸಂಕೇತವಾಗಿರುವ ಅರಿಶಿನ-ಕುಂಕುಮವನ್ನು ಈ ದಿನ ಮನೆಗೆ ತರುವುದು ಲಕ್ಷ್ಮಿಗೆ ಪ್ರಿಯವಾದ ಕೆಲಸ.
ತುಳಸಿ ಗಿಡ: ನಿಮ್ಮ ಮನೆಯಲ್ಲಿ ತುಳಸಿ ಗಿಡ ಇಲ್ಲದಿದ್ದರೆ ಅಥವಾ ಹೊಸದು ಬೇಕಿದ್ದರೆ ಈ ದಿನ ಮನೆಗೆ ತನ್ನಿ. ಇದು ಮನೆಯಲ್ಲಿ ಧನಾತ್ಮಕ ಅಂಶಗಳನ್ನು ಹೆಚ್ಚಿಸುತ್ತದೆ.
ಪುಸ್ತಕಗಳು: ವಿದ್ಯೆಯೇ ಮಹಾಧನ. ಈ ದಿನ ಹೊಸ ಪುಸ್ತಕ ಖರೀದಿಸಿ ಓದುವ ಅಭ್ಯಾಸ ಮಾಡಿಕೊಂಡರೆ ಜ್ಞಾನದ ಸಂಪತ್ತು ಸದಾ ನಿಮ್ಮಲ್ಲಿ ಅಕ್ಷಯವಾಗಿರುತ್ತದೆ.
ದಾನದ ಮಹಿಮೆ ಮರೆಯಬೇಡಿ!
ಅಕ್ಷಯ ತೃತೀಯ ದಿನ ಕೇವಲ ಶಾಪಿಂಗ್ ಮಾಡೋದಷ್ಟೇ ಅಲ್ಲ, ದಾನ ಮಾಡೋದು ಕೂಡ ಅಷ್ಟೇ ಮುಖ್ಯ. ಈ ದಿನ ನೀವು ಮಾಡುವ ಸಣ್ಣ ಸಹಾಯ ಅಥವಾ ದಾನ ನಿಮಗೆ ಸಾವಿರ ಪಟ್ಟು ಪುಣ್ಯ ತಂದುಕೊಡುತ್ತದೆ.
ವಿಶೇಷ ಸೂಚನೆ: ಈ ದಿನಕ್ಕೆ ಯಾವುದೇ 'ಕಳಂಕ' ಇಲ್ಲ. ಹಾಗಾಗಿ ಮುಹೂರ್ತ ನೋಡದೆ ನೀವು ಮದುವೆ, ಗೃಹಪ್ರವೇಶ ಅಥವಾ ಹೊಸ ಬಿಸಿನೆಸ್ ಆರಂಭಿಸಬಹುದು. ಅಂದು ಮನೆಯನ್ನು ಸ್ವಚ್ಛವಾಗಿಟ್ಟುಕೊಂಡು ಮಹಾಲಕ್ಷ್ಮಿ ಮತ್ತು ಕುಬೇರನ ಪೂಜೆ ಮಾಡಿ, ನಿಮ್ಮ ಐಶ್ವರ್ಯ ದ್ವಿಗುಣಗೊಳ್ಳೋದು ಗ್ಯಾರಂಟಿ!
