ನಟಿ ತ್ರಿಶಾಗೆ ಲೀಗಲ್ ನೋಟಿಸ್ ಭೀತಿ? ಪಾರ್ಥಿಬನ್ ಅವರ ಆ ಒಂದು ಹೇಳಿಕೆ ತಂದಿಟ್ಟ ಆಪತ್ತು ಏನು ಗೊತ್ತಾ?

ತಮಿಳು ಚಿತ್ರರಂಗದ ಖ್ಯಾತ ನಟ ದಳಪತಿ ವಿಜಯ್ ಮತ್ತು ತ್ರಿಶಾ ಕೃಷ್ಣನ್ ಅವರ ಸ್ನೇಹ ಹಾಗೂ ವೈಯಕ್ತಿಕ ಜೀವನದ ಕುರಿತಾದ ಚರ್ಚೆಗಳು ಈಗ ತಾರಕಕ್ಕೇರಿವೆ.

ಇತ್ತೀಚೆಗೆ ಖ್ಯಾತ ನಿರ್ಮಾಪಕರೊಬ್ಬರ ಪುತ್ರನ ಮದುವೆ ಆರತಕ್ಷತೆಗೆ ಇಬ್ಬರೂ ಒಂದೇ ಬಣ್ಣದ ಉಡುಗೆ ಧರಿಸಿ, ಒಂದೇ ಕಾರಿನಲ್ಲಿ ಆಗಮಿಸಿದ್ದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಟೀಕೆಗೆ ಗುರಿಯಾಗಿದೆ. ವಿಜಯ್ ಅವರ ವೈಯಕ್ತಿಕ ಬದುಕಿನ ಕುರಿತು ವದಂತಿಗಳು ಹಬ್ಬುತ್ತಿರುವ ಈ ಹೊತ್ತಿನಲ್ಲಿ, ಇಬ್ಬರೂ ಒಟ್ಟಾಗಿ ಕಾಣಿಸಿಕೊಂಡಿರುವುದು ಈ ಬೆಂಕಿಗೆ ತುಪ್ಪ ಸುರಿದಂತಾಗಿದೆ.

Seriously. Is this right ? How’s this man allowed to get away by this and what rights have the organisers got to exhibit this on stage ? @khushsundar @realradikaa @sandhyaravishan @TheBluePen25 @KasthuriShankar pic.twitter.com/0OjB9sTkj0

— kishore k swamy 🇮🇳 (@sansbarrier) March 8, 2026

ನಟ ಮತ್ತು ನಿರ್ದೇಶಕ ಪಾರ್ಥಿಬನ್ ಅವರು ತ್ರಿಶಾ ಕುರಿತು ನೀಡಿರುವ ಹೇಳಿಕೆ ಈಗ ಹೊಸ ವಿವಾದಕ್ಕೆ ನಾಂದಿ ಹಾಡಿದೆ. ಕಾರ್ಯಕ್ರಮವೊಂದರಲ್ಲಿ ತ್ರಿಶಾ ಅವರ ಫೋಟೋ ನೋಡಿ ನಿಮ್ಮ ಕುಂದವೈ ಬಗ್ಗೆ ಏನು ಹೇಳುತ್ತೀರಾ? ಎಂಬ ಪ್ರಶ್ನೆಗೆ ಉತ್ತರಿಸಿದ ಪಾರ್ಥಿಬನ್, ಈ ಕುಂದವೈ ಅನ್ನು ಕೆಲವು ದಿನಗಳ ಕಾಲ ಮನೆಯಲ್ಲಿಯೇ ಕೂಡಿ ಹಾಕುವುದು ಒಳ್ಳೆಯದು, ಆಗ ಯಾವುದೇ ಸಮಸ್ಯೆಗಳು ಉಂಟಾಗುವುದಿಲ್ಲ ಎಂದು ಮಾರ್ಮಿಕವಾಗಿ ನುಡಿದರು. ಪಾರ್ಥಿಬನ್ ಅವರ ಈ ಧೈರ್ಯದ ಮಾತಿಗೆ ಸಭೆಯಲ್ಲಿದ್ದವರು ಚಪ್ಪಾಳೆ ತಟ್ಟಿದರೂ, ವಿಜಯ್ ಮತ್ತು ತ್ರಿಶಾ ಅಭಿಮಾನಿಗಳು ಮಾತ್ರ ಕೆಂಡಾಮಂಡಲವಾಗಿದ್ದಾರೆ.

ಘಟನೆಯ ಮುಖ್ಯಾಂಶಗಳು

ಒಂದೇ ಕಾರಿನಲ್ಲಿ ಎಂಟ್ರಿ: ವಿಜಯ್ ಮತ್ತು ತ್ರಿಶಾ ಒಂದೇ ಕಾರಿನಲ್ಲಿ ಮದುವೆಗೆ ಬಂದಿದ್ದು ನೆಟ್ಟಿಗರ ಕೆಂಗಣ್ಣಿಗೆ ಗುರಿಯಾಗಿದೆ. "ಇಬ್ಬರ ಬಳಿಯೂ ಹತ್ತಾರು ಕಾರುಗಳಿದ್ದರೂ, ವಿವಾದದ ನಡುವೆಯೇ ಒಟ್ಟಿಗೆ ಬರಬೇಕಿತ್ತೇ?" ಎಂಬುದು ಸಿನಿಮಾ ಅಭಿಮಾನಿಗಳ ಪ್ರಶ್ನೆ.

ಅಭಿಮಾನಿಗಳ ಸಮರ್ಥನೆ: ಈ ಟೀಕೆಗಳಿಗೆ ವಿಜಯ್ ಅಭಿಮಾನಿಗಳು ಸ್ಪಷ್ಟನೆ ನೀಡಿದ್ದು, "ವಿಜಯ್ ಅವರ ಸ್ವಂತ ಕಾರಿನಲ್ಲಿ ಬಂದರೆ ಜನದಟ್ಟಣೆ ಹೆಚ್ಚಾಗುತ್ತದೆ ಮತ್ತು ಅಭಿಮಾನಿಗಳು ಹಿಂಬಾಲಿಸುತ್ತಾರೆ. ಜನಸಂದಣಿಯನ್ನು ತಪ್ಪಿಸಲು ಅವರು ತ್ರಿಶಾ ಅವರ ಕಾರಿನಲ್ಲಿ ಬಂದಿದ್ದಾರೆ" ಎಂದು ಸಮರ್ಥಿಸಿಕೊಂಡಿದ್ದಾರೆ.

ಪಾರ್ಥಿಬನ್ ವಿರುದ್ಧ ಆಕ್ರೋಶ: ಪಾರ್ಥಿಬನ್ ಅವರ ಹೇಳಿಕೆಯನ್ನು ವಿಜಯ್ ಅಭಿಮಾನಿಗಳು ಖಂಡಿಸಿದ್ದು, "ತ್ರಿಶಾ ಅವರು ವಕೀಲರ ಮೂಲಕ ನಿಮಗೆ ನೋಟಿಸ್ ನೀಡಲಿದ್ದಾರೆ, ಒಬ್ಬ ಮಹಿಳೆಯ ಬಗ್ಗೆ ಹೀಗೆ ಮಾತನಾಡುವುದು ಸರಿಯೇ?" ಎಂದು ಕಿಡಿಕಾರಿದ್ದಾರೆ.

ಸದ್ಯ ತಮಿಳುನಾಡು ರಾಜಕೀಯದಲ್ಲಿ ತಮಿಳಗ ವೆಟ್ರಿ ಕಳಗಂ (TVK) ಮೂಲಕ ಬ್ಯುಸಿಯಾಗಿರುವ ವಿಜಯ್ ಅವರಿಗೆ ಈ ವೈಯಕ್ತಿಕ ವದಂತಿಗಳು ತಲೆನೋವಾಗಿ ಪರಿಣಮಿಸಿವೆ. ಸಿನಿಮಾ ಮತ್ತು ರಾಜಕೀಯ ಎರಡನ್ನೂ ಸಮತೋಲನ ಮಾಡುತ್ತಿರುವ ದಳಪತಿಗೆ ಇಂತಹ ವಿವಾದಗಳು ಮುಂದಿನ ದಿನಗಳಲ್ಲಿ ಯಾವ ತಿರುವು ನೀಡಲಿವೆ ಎಂಬುದನ್ನು ಕಾದು ನೋಡಬೇಕಿದೆ.