ಭಾರತೀಯ ಆಟೊಮೊಬೈಲ್ ಮಾರುಕಟ್ಟೆಯಲ್ಲಿ 2026ರ ಫೆಬ್ರುವರಿ ತಿಂಗಳು ಅತ್ಯಂತ ಆಶಾದಾಯಕವಾಗಿ ಮೂಡಿಬಂದಿದೆ. ವಾಹನಗಳ ರೀಟೇಲ್ ಮಾರಾಟದಲ್ಲಿ ಶೇ. 25ರಷ್ಟು ಭರ್ಜರಿ ಏರಿಕೆ ಕಂಡಿದ್ದು, ಒಟ್ಟು ಮಾರಾಟವಾದ ವಾಹನಗಳ ಸಂಖ್ಯೆ 24 ಲಕ್ಷ ದಾಟಿದೆ.
ಆಟೊಮೊಬೈಲ್ ಡೀಲರ್ ಅಸೋಷಿಯೇಶನ್ಗಳ ಒಕ್ಕೂಟವಾದ ಫಾಡಾ (FADA) ಬಿಡುಗಡೆ ಮಾಡಿರುವ ಈ ಅಂಕಿಅಂಶಗಳು ದೇಶದ ಆರ್ಥಿಕ ಚೇತರಿಕೆ ಮತ್ತು ಗ್ರಾಹಕರ ಖರೀದಿ ಸಾಮರ್ಥ್ಯ ಹೆಚ್ಚಾಗಿರುವುದನ್ನು ಎತ್ತಿ ತೋರಿಸುತ್ತಿವೆ. ಕಳೆದ ವರ್ಷದ ಫೆಬ್ರುವರಿಗೆ ಹೋಲಿಸಿದರೆ ಈ ಬಾರಿ ಮಾರಾಟದ ವೇಗ ಅಚ್ಚರಿ ಮೂಡಿಸುವಂತಿದೆ.
ಒಟ್ಟು ಮಾರಾಟವಾದ ವಾಹನಗಳಲ್ಲಿ ಎಂದಿನಂತೆ ದ್ವಿಚಕ್ರ ವಾಹನಗಳದ್ದೇ ಮೇಲುಗೈ. ಫೆಬ್ರುವರಿಯಲ್ಲಿ ಬರೋಬ್ಬರಿ 17,00,505 ದ್ವಿಚಕ್ರ ವಾಹನಗಳು ರಸ್ತೆಗಿಳಿದಿವೆ. ವಿಶೇಷವೆಂದರೆ, ನಗರ ಪ್ರದೇಶಗಳಲ್ಲಿ ವಾಹನ ಮಾರಾಟ ಶೇ. 28.96ರಷ್ಟು ಹೆಚ್ಚಿದ್ದರೆ, ಗ್ರಾಮೀಣ ಭಾಗದಲ್ಲೂ ಶೇ. 22.16ರಷ್ಟು ಪ್ರಗತಿ ಕಂಡುಬಂದಿದೆ.
ಇದು ಕೇವಲ ನಗರಗಳಿಗೆ ಸೀಮಿತವಾಗದೆ ಹಳ್ಳಿಗಳಲ್ಲೂ ಜನರ ಜೀವನಮಟ್ಟ ಸುಧಾರಿಸುತ್ತಿರುವುದಕ್ಕೆ ಸಾಕ್ಷಿಯಾಗಿದೆ. ಪ್ಯಾಸೆಂಜರ್ ವಾಹನಗಳು ಮತ್ತು ಕಮರ್ಷಿಯಲ್ ವಾಹನಗಳ ವಿಭಾಗದಲ್ಲೂ ಶೇ. 26ರಿಂದ 28ರಷ್ಟು ಪ್ರಗತಿ ದಾಖಲಾಗಿದೆ.
ಕೃಷಿ ಕ್ಷೇತ್ರದ ದೃಷ್ಟಿಯಿಂದ ಗಮನಿಸುವುದಾದರೆ, ಟ್ರ್ಯಾಕ್ಟರ್ಗಳ ಮಾರಾಟದಲ್ಲಿ ಕಂಡುಬಂದಿರುವ ಶೇ. 36.35ರಷ್ಟು ಗಣನೀಯ ಏರಿಕೆ ಅತ್ಯಂತ ಪ್ರಮುಖ ಅಂಶವಾಗಿದೆ. ರೈತರು ಕೃಷಿ ಯಾಂತ್ರೀಕರಣಕ್ಕೆ ಹೆಚ್ಚಿನ ಒತ್ತು ನೀಡುತ್ತಿರುವುದು ಇದರಿಂದ ಸ್ಪಷ್ಟವಾಗುತ್ತದೆ.
ವಾಹನಗಳ ರೀಟೇಲ್ ಮಾರಾಟದಲ್ಲಿ ಶೇ. 25ರಷ್ಟು ಭರ್ಜರಿ ಏರಿಕೆ ಕಂಡಿದ್ದು, ಒಟ್ಟು ಮಾರಾಟವಾದ ವಾಹನಗಳ ಸಂಖ್ಯೆ 24 ಲಕ್ಷ ದಾಟಿದೆ. ಈ ಹಣಕಾಸು ವರ್ಷದಲ್ಲಿ ಇಲ್ಲಿಯವರೆಗೆ ಒಟ್ಟು 2.69 ಕೋಟಿಗೂ ಅಧಿಕ ವಾಹನಗಳು ಮಾರಾಟವಾಗಿದ್ದು, ಕಳೆದ ವರ್ಷಕ್ಕಿಂತ ಶೇ. 12.13ರಷ್ಟು ಒಟ್ಟಾರೆ ಬೆಳವಣಿಗೆ ಸಾಧಿಸಲಾಗಿದೆ. ಕಟ್ಟಡ ನಿರ್ಮಾಣ ವಾಹನಗಳ (CE) ವಿಭಾಗದಲ್ಲಿ ಮಾತ್ರ ಶೇ. 11ರಷ್ಟು ಇಳಿಕೆ ಕಂಡಿರುವುದು ಹೊರತುಪಡಿಸಿದರೆ, ಉಳಿದೆಲ್ಲಾ ಕ್ಷೇತ್ರಗಳು ಲಾಭದಲ್ಲಿವೆ.
ಫೆಬ್ರುವರಿಯ ಈ ಭರ್ಜರಿ ಯಶಸ್ಸು ಮಾರ್ಚ್ ತಿಂಗಳಿನಲ್ಲೂ ಮುಂದುವರಿಯುವ ಸಾಧ್ಯತೆ ದಟ್ಟವಾಗಿದೆ. ಮಾರ್ಚ್ ತಿಂಗಳು ಹಣಕಾಸು ವರ್ಷದ ಅಂತ್ಯವಾಗಿದ್ದರಿಂದ, ಅನೇಕ ಡೀಲರ್ಗಳು ಆಕರ್ಷಕ ಆಫರ್ ಮತ್ತು ರಿಯಾಯಿತಿಗಳನ್ನು ನೀಡುತ್ತಾರೆ. ಹೀಗಾಗಿ, ಶೇ. 95ಕ್ಕೂ ಹೆಚ್ಚು ಡೀಲರ್ಗಳು ಈ ತಿಂಗಳು 'ಮಾರಾಟದ ಸುಗ್ಗಿ' ನಡೆಯಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಯುಗಾದಿ ಹಬ್ಬದ ಸಂಭ್ರಮವೂ ಇರುವುದರಿಂದ ಹೊಸ ವಾಹನಗಳ ಖರೀದಿಗೆ ಜನ ಹೆಚ್ಚಿನ ಆಸಕ್ತಿ ತೋರಿಸುವ ನಿರೀಕ್ಷೆಯಿದೆ.
