ನಿರುದ್ಯೋಗಿಗಳಿಗೆ ಸಿದ್ದರಾಮಯ್ಯ ಸರ್ಕಾರದ ಬಂಪರ್ ಗಿಫ್ಟ್ - 56,432 ಸರ್ಕಾರಿ ಹುದ್ದೆಗಳ ಭರ್ತಿಗೆ ಕೊನೆಗೂ ಸಿಕ್ಕಿತು ಗ್ರೀನ್ ಸಿಗ್ನಲ್!!

ಕರ್ನಾಟಕದ ಸರ್ಕಾರಿ ಕೆಲಸದ ನಿರೀಕ್ಷೆಯಲ್ಲಿದ್ದ ಯುವಜನತೆಗೆ ಸಿದ್ದರಾಮಯ್ಯ ಸರ್ಕಾರವು ಭರ್ಜರಿ ಸಿಹಿ ಸುದ್ದಿ ನೀಡಿದೆ. ಬಹಳ ದಿನಗಳಿಂದ ಬಾಕಿ ಉಳಿದಿದ್ದ ಸರ್ಕಾರಿ ಹುದ್ದೆಗಳ ನೇಮಕಾತಿಗೆ ಈಗ ಕೊನೆಗೂ ಚಾಲನೆ ಸಿಕ್ಕಿದ್ದು, ಹೊಸ ಒಳಮೀಸಲಾತಿ ನೀತಿಯಡಿ ಬರೋಬ್ಬರಿ 56,432 ಹುದ್ದೆಗಳನ್ನ ಭರ್ತಿ ಮಾಡಲು ಸರ್ಕಾರ ಗ್ರೀನ್ ಸಿಗ್ನಲ್ ನೀಡಿದೆ!

56,432 ಹುದ್ದೆಗಳ ಭರ್ತಿಗೆ ಅಸ್ತು

ರಾಜ್ಯ ಸರ್ಕಾರವು ಹೊಸದಾಗಿ ಪರಿಷ್ಕರಿಸಿದ ಪರಿಶಿಷ್ಟ ಜಾತಿ (SC) ಆಂತರಿಕ ಮೀಸಲಾತಿ ನೀತಿಯನ್ನು ಅನುಷ್ಠಾನಕ್ಕೆ ತರುತ್ತಿದೆ. ಈ ಹೊಸ ನಿಯಮದ ಅಡಿಯಲ್ಲಿ 56,432 ಖಾಲಿ ಇರುವ ಸರ್ಕಾರಿ ಹುದ್ದೆಗಳನ್ನು ನೇರ ನೇಮಕಾತಿ ಮೂಲಕ ಭರ್ತಿ ಮಾಡಲು ಸಚಿವ ಸಂಪುಟ ಅನುಮೋದನೆ ನೀಡಿದೆ. ಇದರಿಂದಾಗಿ ಉದ್ಯೋಗದ ಕನಸು ಕಾಣುತ್ತಿದ್ದ ಲಕ್ಷಾಂತರ ಅಭ್ಯರ್ಥಿಗಳಲ್ಲಿ ಹೊಸ ಭರವಸೆ ಮೂಡಿದೆ!

ಹೊಸ ಒಳಮೀಸಲಾತಿ ಲೆಕ್ಕಾಚಾರ ಹೀಗಿದೆ;

ಪರಿಶಿಷ್ಟ ಜಾತಿಯ ಒಟ್ಟು ಮೀಸಲಾತಿಯನ್ನು ಈಗ ಶೇ. 15ಕ್ಕೆ ನಿಗದಿಪಡಿಸಲಾಗಿದ್ದು, ಅದರೊಳಗೆ ಮೂರು ಪ್ರವರ್ಗಗಳನ್ನು ಮಾಡಲಾಗಿದೆ:

ಪ್ರವರ್ಗ-ಎ: ಶೇ. 5.25 ಮೀಸಲಾತಿ.

ಪ್ರವರ್ಗ-ಬಿ: ಶೇ. 5.25 ಮೀಸಲಾತಿ.

ಪ್ರವರ್ಗ-ಸಿ: ಶೇ. 4.5 ಮೀಸಲಾತಿ.

ವಿಶೇಷವೆಂದರೆ, ಪ್ರವರ್ಗ-ಸಿ ಅಡಿಯಲ್ಲಿ ಬರುವ ಒಟ್ಟು ಹುದ್ದೆಗಳಲ್ಲಿ ಶೇಕಡಾ 20ರಷ್ಟನ್ನು ಆ ಪಂಗಡದ ಅತ್ಯಂತ ಹಿಂದುಳಿದಿರುವ 59 ಜಾತಿಗಳಿಗೆ ಮೀಸಲಿಡಲಾಗಿದೆ. ಒಂದು ವೇಳೆ ಈ ಜಾತಿಗಳ ಅಭ್ಯರ್ಥಿಗಳು ಸಿಗದಿದ್ದರೆ ಮಾತ್ರ ಆ ಹುದ್ದೆಗಳನ್ನು ಪ್ರವರ್ಗ-ಸಿಯ ಇತರರಿಗೆ ನೀಡಲಾಗುತ್ತದೆ.

ನೇಮಕಾತಿಯಲ್ಲಿ ಬದಲಾದ ನಿಯಮಗಳು:

3ಕ್ಕಿಂತ ಕಡಿಮೆ ಹುದ್ದೆಗಳಿದ್ದರೆ: ಯಾವುದಾದರೂ ಇಲಾಖೆಯ ನೇಮಕಾತಿ ಅಧಿಸೂಚನೆಯಲ್ಲಿ ಪರಿಶಿಷ್ಟ ಜಾತಿಗೆ ಮೀಸಲಾದ ಹುದ್ದೆಗಳು 3ಕ್ಕಿಂತ ಕಡಿಮೆ ಇದ್ದರೆ, ಆಗ ಒಳಮೀಸಲಾತಿ ಅನ್ವಯವಾಗುವುದಿಲ್ಲ. ಆಗ ಎಲ್ಲಾ 101 ಪರಿಶಿಷ್ಟ ಜಾತಿಗಳ ಅಭ್ಯರ್ಥಿಗಳು ಆ ಹುದ್ದೆಗಳಿಗೆ ಸ್ಪರ್ಧಿಸಬಹುದು.

3ಕ್ಕಿಂತ ಹೆಚ್ಚು ಹುದ್ದೆಗಳಿದ್ದರೆ: ಹುದ್ದೆಗಳ ಸಂಖ್ಯೆ 3ಕ್ಕಿಂತ ಹೆಚ್ಚಿದ್ದಾಗ ಮಾತ್ರ ಹೊಸ ಒಳಮೀಸಲಾತಿ ನಿಯಮಗಳು ಅನ್ವಯವಾಗುತ್ತವೆ.

ಹಳೆಯ ಅಧಿಸೂಚನೆಗಳ ರದ್ದು: ಈಗಾಗಲೇ ಒಳಮೀಸಲಾತಿ ಇಲ್ಲದೆ ಹೊರಡಿಸಲಾದ ಎಲ್ಲಾ ನೇಮಕಾತಿ ಅಧಿಸೂಚನೆಗಳನ್ನು ಹಿಂಪಡೆಯಲು ಸರ್ಕಾರ ಸೂಚಿಸಿದೆ. ಇವುಗಳ ಜಾಗದಲ್ಲಿ ಹೊಸ ನಿಯಮದಂತೆ ಪರಿಷ್ಕೃತ ಅಧಿಸೂಚನೆಗಳು ಹೊರಬರಲಿವೆ.

400 ಬಿಂದುಗಳ ರೋಸ್ಟರ್ ಸಿಸ್ಟಮ್:

ಸರ್ಕಾರವು ಈ ನೇಮಕಾತಿಗಾಗಿ 400 ಬಿಂದುಗಳ (Points) ರೋಸ್ಟರ್ ವ್ಯವಸ್ಥೆಯನ್ನು ಅಳವಡಿಸಿಕೊಂಡಿದೆ. ಈ ಹಿಂದೆ ನೇಮಕಾತಿ ಎಲ್ಲಿಗೆ ನಿಂತಿತ್ತೋ, ಅದರ ಮುಂದಿನ ಬಿಂದುವಿನಿಂದಲೇ ಹೊಸ ನೇಮಕಾತಿ ಪ್ರಕ್ರಿಯೆ ಆರಂಭವಾಗಲಿದೆ. ಇದೇ ಪದ್ಧತಿಯನ್ನು ಮಹಿಳಾ ಮೀಸಲಾತಿ ಅಥವಾ ಗ್ರಾಮೀಣ ಮೀಸಲಾತಿಯಂತಹ ಸಮತಳ ಮೀಸಲಾತಿಗೂ ಬಳಸಲಾಗುತ್ತದೆ.

ಬ್ಯಾಕ್‌ಲಾಗ್ ಹುದ್ದೆಗಳ ಭವಿಷ್ಯ:

ಪರಿಶಿಷ್ಟ ಜಾತಿ ಮತ್ತು ಪಂಗಡದವರಿಗೆ ಹೆಚ್ಚಿಸಲಾಗಿದ್ದ ಶೇ. 24ರಷ್ಟು ಮೀಸಲಾತಿಯನ್ನು ಭವಿಷ್ಯದಲ್ಲಿ ನ್ಯಾಯಾಲಯವು ಎತ್ತಿ ಹಿಡಿದರೆ, ಬಾಕಿ ಉಳಿಯುವ ಶೇ. 6ರಷ್ಟು ಹುದ್ದೆಗಳನ್ನು 'ಬ್ಯಾಕ್‌ಲಾಗ್' ಎಂದು ಪರಿಗಣಿಸಿ ನಂತರ ಭರ್ತಿ ಮಾಡಲಾಗುವುದು ಎಂದು ಸರ್ಕಾರ ತಿಳಿಸಿದೆ.

ಸದ್ಯಕ್ಕೆ ಆರ್ಥಿಕ ಇಲಾಖೆಯು ಅನುಮೋದನೆ ನೀಡಿರುವ ಈ 56,432 ಹುದ್ದೆಗಳ ಭರ್ತಿಗೆ ಸಂಬಂಧಿಸಿದಂತೆ ತುರ್ತು ಕ್ರಮ ಕೈಗೊಳ್ಳಲು ಸಮಾಜ ಕಲ್ಯಾಣ ಇಲಾಖೆ ಮತ್ತು ಸಚಿವ ಸಂಪುಟ ತೀರ್ಮಾನಿಸಿದೆ. ಇದು ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ಸಿದ್ಧತೆ ನಡೆಸುತ್ತಿರುವ ಅಭ್ಯರ್ಥಿಗಳಿಗೆ ದೊಡ್ಡ ಅವಕಾಶವಾಗಿದೆ.

ಸರ್ಕಾರಿ ಕೆಲಸದ ಅಪ್‌ಡೇಟ್‌ಗಳಿಗಾಗಿ ಇಲಾಖೆಯ ಅಧಿಕೃತ ವೆಬ್‌ಸೈಟ್‌ಗಳನ್ನು ಗಮನಿಸುತ್ತಿರಿ!