ಐಟಿ (IT) ವಲಯದ ಉದ್ಯೋಗಿಗಳಿಗೆ ಮತ್ತೊಂದು ಆಘಾತಕಾರಿ ಸುದ್ದಿ ಎದುರಾಗಿದೆ. ಜಗತ್ತಿನ ಪ್ರಮುಖ ಸಾಫ್ಟ್ವೇರ್ ಅಪ್ಲಿಕೇಶನ್ ಸಂಸ್ಥೆಯಾದ ಒರಾಕಲ್ (Oracle), ತನ್ನ ಕಂಪನಿಯ ಇತಿಹಾಸದಲ್ಲೇ ಅತ್ಯಂತ ದೊಡ್ಡ ಮಟ್ಟದ ಲೇ ಆಫ್ (Layoff) ಪ್ರಕ್ರಿಯೆಗೆ ಕೈಹಾಕಿದೆ. ಜಾಗತಿಕವಾಗಿ ತನ್ನ ಒಟ್ಟು ಉದ್ಯೋಗಿಗಳ ಪೈಕಿ ಸುಮಾರು ಶೇಕಡಾ 18 ರಷ್ಟು ಮಂದಿಯನ್ನು, ಅಂದರೆ ಬರೋಬ್ಬರಿ 30,000 ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಹಾಕಲು ಕಂಪನಿ ನಿರ್ಧರಿಸಿದೆ. ಜೂನ್ 1 ರಿಂದಲೇ ಈ ಪ್ರಕ್ರಿಯೆ ಆರಂಭವಾಗಿದ್ದು, ಜೂನ್ 15ರೊಳಗೆ ಸಂಪೂರ್ಣವಾಗಿ ಮುಕ್ತಾಯಗೊಳ್ಳಲಿದೆ ಎಂದು ವರದಿಯಾಗಿದೆ.
ಕಂಪನಿ ಲಾಭದಲ್ಲಿದ್ದರೂ ಕೆಲಸ ಕಡಿತ! ಇದೇನಪ್ಪಾ ಆಶ್ಚರ್ಯ?
ಸಾಮಾನ್ಯವಾಗಿ ಯಾವುದೇ ಕಂಪನಿಯು ನಷ್ಟದಲ್ಲಿದ್ದಾಗ ಅಥವಾ ಆರ್ಥಿಕ ಮಂದಗತಿ ಎದುರಾದಾಗ ಉದ್ಯೋಗಿಗಳನ್ನು ಮನೆಗೆ ಕಳುಹಿಸುತ್ತದೆ. ಆದರೆ ಒರಾಕಲ್ ವಿಷಯದಲ್ಲಿ ಕಥೆ ಉಲ್ಟಾ ಆಗಿದೆ! ಕಂಪನಿಯು ಸದ್ಯ ಭರ್ಜರಿ ಲಾಭ ಗಳಿಸುತ್ತಿದೆ. ಇತ್ತೀಚಿನ ಮೂರನೇ ತ್ರೈಮಾಸಿಕದ ವರದಿಯ ಪ್ರಕಾರ, ಕಂಪನಿಯ ಆದಾಯದಲ್ಲಿ ಶೇಕಡಾ 22 ರಷ್ಟು ಭಾರಿ ಏರಿಕೆ ಕಂಡಿದೆ. ಕ್ಲೌಡ್ ಮತ್ತು ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್ (AI) ವಿಭಾಗದಲ್ಲೂ ಕಂಪನಿ ಸಖತ್ ಆಗಿ ಗ್ರೋ ಆಗುತ್ತಿದೆ. ಆದರೂ ಕೂಡ ಒರಾಕಲ್ ಇಷ್ಟೊಂದು ದೊಡ್ಡ ಮಟ್ಟದಲ್ಲಿ ಉದ್ಯೋಗಿಗಳಿಗೆ ಪಿಂಕ್ ಸ್ಲಿಪ್ ನೀಡುತ್ತಿರುವುದು ಐಟಿ ಉದ್ಯಮದಲ್ಲಿ ಎಲ್ಲರಿಗೂ ಆಶ್ಚರ್ಯ ಮೂಡಿಸಿದೆ.
ಒರಾಕಲ್ನ ಈ 'ಕತ್ತರಿ' ಪ್ರಯೋಗಕ್ಕೆ ಅಸಲಿ ಕಾರಣವೇನು?
ಕಂಪನಿ ಲಾಭದಲ್ಲಿದ್ದರೂ ಇಷ್ಟೊಂದು ಜನರನ್ನು ಕೆಲಸದಿಂದ ತೆಗೆಯುತ್ತಿರುವುದರ ಹಿಂದೆ ದೊಡ್ಡದೊಂದು ಬಿಸಿನೆಸ್ ಪ್ಲಾನ್ ಇದೆ. ಒರಾಕಲ್ ಈಗ ಸಾಂಪ್ರದಾಯಿಕ ಸಾಫ್ಟ್ವೇರ್ ವ್ಯವಸ್ಥೆಯಿಂದ ಸಂಪೂರ್ಣವಾಗಿ ಭವಿಷ್ಯದ ತಂತ್ರಜ್ಞಾನವಾದ ಕೃತಕ ಬುದ್ಧಿಮತ್ತೆ (AI) ಕಡೆಗೆ ಶಿಫ್ಟ್ ಆಗಲು ರೆಡಿಯಾಗುತ್ತಿದೆ.
ಮುಂದಿನ ದಿನಗಳಲ್ಲಿ ಕ್ಲೌಡ್ ಇನ್ಫ್ರಾಸ್ಟ್ರಕ್ಚರ್ ಮತ್ತು ಎಐ ಡೇಟಾ ಸೆಂಟರ್ಗಳನ್ನು (AI Data Centers) ಪ್ರಪಂಚದಾದ್ಯಂತ ವಿಸ್ತರಿಸಲು ಕಂಪನಿಯು ಬರೋಬ್ಬರಿ 50 ಬಿಲಿಯನ್ ಡಾಲರ್ (ಸುಮಾರು 4 ಲಕ್ಷ ಕೋಟಿ ರೂಪಾಯಿಗೂ ಅಧಿಕ) ಹೂಡಿಕೆ ಮಾಡಲು ಮಾಸ್ಟರ್ ಪ್ಲಾನ್ ಮಾಡಿಕೊಂಡಿದೆ. ಈ ಹೊಸ ತಂತ್ರಜ್ಞಾನದ ಹೂಡಿಕೆಗೆ ಹಣ ಹೊಂದಿಸಲು ಮತ್ತು ಹಳೆಯ ವಿಭಾಗಗಳ ವೆಚ್ಚವನ್ನು ಕಡಿಮೆ ಮಾಡಲು ಕಂಪನಿಯು ಪ್ರಸ್ತುತ ಇರುವ ಮಾನವ ಸಂಪನ್ಮೂಲವನ್ನು ತೀವ್ರವಾಗಿ ಕಡಿತಗೊಳಿಸುತ್ತಿದೆ.
ಉದ್ಯೋಗಿಗಳಲ್ಲಿ ಆತಂಕ, ಪರಿಹಾರ ಪ್ಯಾಕೇಜ್ ಮೇಲೂ ವಿವಾದ!
ಒರಾಕಲ್ ಕಂಪನಿಯ ಈ ದಿಢೀರ್ ನಿರ್ಧಾರದಿಂದಾಗಿ ಸಾವಿರಾರು ಐಟಿ ಉದ್ಯೋಗಿಗಳು ಮತ್ತು ಅವರ ಕುಟುಂಬಗಳು ಬೀದಿಗೆ ಬೀಳುವಂತಾಗಿದ್ದು, ತೀವ್ರ ಆತಂಕಕ್ಕೆ ಒಳಗಾಗಿದ್ದಾರೆ. ಇದರ ನಡುವೆ ಕಂಪನಿ ನೀಡುತ್ತಿರುವ ಪರಿಹಾರ ಪ್ಯಾಕೇಜ್ (Severance Package) ಕೂಡ ತಾರತಮ್ಯದಿಂದ ಕೂಡಿದೆ ಎಂಬ ಗಂಭೀರ ಆರೋಪಗಳು ಕೇಳಿಬರುತ್ತಿವೆ.
ವೇತನ ಪರಿಹಾರ: ಕೆಲಸ ಕಳೆದುಕೊಂಡ ಹಿರಿಯ (Senior) ಉದ್ಯೋಗಿಗಳಿಗೆ ಕಂಪನಿಯು ಗರಿಷ್ಠ 26 ವಾರಗಳವರೆಗಿನ ವೇತನವನ್ನು ಪರಿಹಾರವಾಗಿ ನೀಡುತ್ತಿದೆ. ಆದರೆ ಕಿರಿಯ (Junior) ಉದ್ಯೋಗಿಗಳಿಗೆ ನೀಡುತ್ತಿರುವ ಪ್ಯಾಕೇಜ್ ತುಂಬಾ ಕಡಿಮೆ ಇದೆ ಎಂದು ನೌಕರರು ಆಕ್ರೋಶ ಹೊರಹಾಕಿದ್ದಾರೆ.
ಷೇರುಗಳ ವಂಚನೆ: ಎಲ್ಲಕ್ಕಿಂತ ಮುಖ್ಯವಾಗಿ, ಕಂಪನಿಯು ಕೆಲಸಕ್ಕೆ ಸೇರಿಸಿಕೊಳ್ಳುವಾಗ ಪ್ರಾಮಿಸ್ ಮಾಡಿದ್ದ ಅನ್ವೆಸ್ಟೆಡ್ ಸ್ಟಾಕ್ ಅವಾರ್ಡ್ಸ್ (Unvested stock awards - ಕಂಪನಿಯ ಉದ್ಯೋಗಿಗಳಿಗೆ ಸಿಗುವ ಷೇರುಗಳು) ಅನ್ನು ನೀಡಲು ನಿರಾಕರಿಸಿದೆ. ಇದು ಈಗ ದೊಡ್ಡ ವಿವಾದಕ್ಕೆ ಕಾರಣವಾಗಿದೆ.
ಭವಿಷ್ಯದ ಎಐ ತಂತ್ರಜ್ಞಾನದ ರೇಸ್ನಲ್ಲಿ ಮುಂಚೂಣಿಯಲ್ಲಿರಲು ಒರಾಕಲ್ ಕಂಪನಿಯು ತನ್ನದೇ ಉದ್ಯೋಗಿಗಳನ್ನು ಬಲಿಗೊಡುತ್ತಿದೆ. ತಂತ್ರಜ್ಞಾನ ಬದಲಾದಂತೆ ಮನುಷ್ಯರ ಕೆಲಸಗಳಿಗೆ ಹೇಗೆ ಕಂಟಕ ಎದುರಾಗುತ್ತದೆ ಎಂಬುದಕ್ಕೆ ಒರಾಕಲ್ನ ಈ ಲೇ ಆಫ್ ಒಂದು ಜೀವಂತ ಉದಾಹರಣೆಯಾಗಿದೆ.
