ಬೆಂಗಳೂರಿನ ವಿವೇಕ್ನಗರ ನಿವಾಸಿ ರವಿಬಾಬು ಎಂಬುವವರು ಕಳೆದ ಕೆಲವು ದಿನಗಳ ಹಿಂದೆ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದರು. ನನ್ನ ಪತ್ನಿ ನಮ್ಮ ಮಗುವನ್ನು ಮಾರಿಬಿಟ್ಟಿದ್ದಾಳೆ, ಅವಳನ್ನು ಪತ್ತೆ ಹಚ್ಚಿಕೊಡಿ" ಎಂದು ಕಣ್ಣೀರು ಹಾಕಿ ದೂರು ಕೊಟ್ಟಿದ್ದರು. ಮಗು ಮಾರಾಟದ ಕೇಸ್ ಅಂದ ಕೂಡಲೇ ಪೊಲೀಸರು ಸೀರಿಯಸ್ ಆಗಿ ತನಿಖೆ ಶುರು ಮಾಡಿದ್ದರು. ಆದರೆ, ಕಥೆ ಹೋಗುತ್ತಾ ಹೋಗುತ್ತಾ ಸಿನಿಮಾಕ್ಕಿಂತ ಕ್ರೇಜಿಯಾಗಿ ಬದಲಾಗಿದೆ.
ಪೊಲೀಸರು ಹಗಲಿರುಳು ಹುಡುಕಾಟ ನಡೆಸಿ ಕೊನೆಗೂ ರವಿಬಾಬು ಪತ್ನಿಯನ್ನು ಪತ್ತೆ ಹಚ್ಚಿದ್ದಾರೆ. ಅಲ್ಲಿ ಕಂಡ ದೃಶ್ಯವೇ ಬೇರೆ ಇತ್ತು. ಆಕೆ ಯಾವುದೇ ಮಗುವನ್ನು ಮಾರಿರಲಿಲ್ಲ, ಬದಲಾಗಿ ತನ್ನ ಮೂವರು ಮಕ್ಕಳೊಂದಿಗೆ ಸುರಕ್ಷಿತವಾಗಿದ್ದರು. ಪೊಲೀಸರನ್ನು ನೋಡಿದ ತಕ್ಷಣ ಆ ಮಹಿಳೆ ತನ್ನ ಕಣ್ಣೀರಿನ ಕಥೆಯನ್ನು ಬಿಚ್ಚಿಟ್ಟಿದ್ದಾರೆ.
16 ವರ್ಷಗಳ ದಾಂಪತ್ಯ ಜೀವನ ನಡೆಸಿದ್ದರೂ ರವಿಬಾಬು ತನ್ನ ಪತ್ನಿಗೆ ಕೊಟ್ಟಿದ್ದು ಬರೀ ದೈಹಿಕ ಮತ್ತು ಮಾನಸಿಕ ಹಿಂಸೆ ಮಾತ್ರ. ಪತ್ನಿಯ ಆರೋಪದ ಪ್ರಕಾರ, ರವಿಬಾಬುನಿಗೆ ಬೇರೆ ಮಹಿಳೆಯರ ಜೊತೆ ಅಕ್ರಮ ಸಂಬಂಧವಿತ್ತು.
ಎರಡೆರಡು ಮೊಬೈಲ್ಗಳನ್ನು ಬಳಸಿಕೊಂಡು ತನಗೆ ವಂಚಿಸುತ್ತಿದ್ದ ಎಂದು ಆಕೆ ಪೊಲೀಸರ ಮುಂದೆ ಹೇಳಿಕೆ ನೀಡಿದ್ದಾರೆ. ಈ ವಿಷಯ ಗೊತ್ತಾಗಿ ಪ್ರಶ್ನಿಸಿದಾಗಲೆಲ್ಲಾ ರವಿಬಾಬು ಪತ್ನಿಯ ಮೇಲೆ ಕೈ ಮಾಡುತ್ತಿದ್ದನಂತೆ.
ಮನೆಯಲ್ಲಿ ಗಂಡನ ಕಿರುಕುಳ, ಇತ್ತ ತವರು ಮನೆಯಲ್ಲೂ ಜಗಳವಾಗಿ ಅವರ ಬೆಂಬಲವೂ ಸಿಗಲಿಲ್ಲ. ಹೀಗಾಗಿ 16 ವರ್ಷಗಳ ನಿರಂತರ ಜಗಳದಿಂದ ಕಂಗಾಲಾಗಿದ್ದ ಈ ಮಹಿಳೆ, ಮಕ್ಕಳ ಭವಿಷ್ಯ ಕಾಪಾಡಲು ಯಾರೊಬ್ಬರಿಗೂ ಹೇಳದೆ ಮಕ್ಕಳನ್ನು ಕರೆದುಕೊಂಡು ನಾಪತ್ತೆಯಾಗಿದ್ದರು. ತನ್ನನ್ನು ಪೊಲೀಸರು ಎಲ್ಲಿ ಅರೆಸ್ಟ್ ಮಾಡುತ್ತಾರೋ ಎಂಬ ಭಯಕ್ಕೆ ತನ್ನ ಮೇಲೆ ತಾನೇ ಕಥೆ ಕಟ್ಟಿಕೊಂಡಿದ್ದ ರವಿಬಾಬು, "ಮಗು ಮಾರಾಟ" ಎಂಬ ಸುಳ್ಳು ದೂರು ನೀಡಿ ಹೈಡ್ರಾಮಾ ಮಾಡಿದ್ದ.
ಮಹಿಳೆ ಮತ್ತು ಮಕ್ಕಳನ್ನು ಪತ್ತೆ ಹಚ್ಚಿದ ವಿವೇಕ್ನಗರ ಪೊಲೀಸರು ಅವರಿಗೆ ಸೂಕ್ತ ರಕ್ಷಣೆ ನೀಡಿದ್ದಾರೆ. ಪತಿಯ ಬಣ್ಣ ತನಿಖೆಯಲ್ಲಿ ಬಯಲಾದ ಮೇಲೆ ಪೊಲೀಸರು ರವಿಬಾಬುನನ್ನು ಸರಿಯಾಗಿ ವಿಚಾರಣೆಗೆ ಒಳಪಡಿಸಿದ್ದಾರೆ. ಸುಳ್ಳು ದೂರು ನೀಡಿ ಇಡೀ ಪೊಲೀಸ್ ಇಲಾಖೆಯನ್ನು ದಾರಿ ತಪ್ಪಿಸಿದ ಪತಿಗೆ ಈಗ ತಕ್ಕ ಶಾಸ್ತಿಯಾಗುವ ಲಕ್ಷಣ ಕಾಣುತ್ತಿದೆ.
"ಬೇಲಿ ಎದ್ದು ಹೊಲ ಮೇಯ್ದ ಹಾಗೆ" ಎಂಬ ಗಾದೆಯಂತೆ, ಹೆಂಡತಿಯನ್ನು ಕಾಪಾಡಬೇಕಾದ ಗಂಡನೇ ಅವಳ ಮೇಲೆ ಸುಳ್ಳು ಆರೋಪ ಹೊರಿಸಿ ಸಮಾಜದ ಮುಂದೆ ಕೆಟ್ಟವಳನ್ನಾಗಿ ಮಾಡಲು ಹೋಗಿ ತಾನೇ ಸಿಕ್ಕಿಬಿದ್ದಿದ್ದಾನೆ. ಸದ್ಯ ತಾಯಿ ಮತ್ತು ಮಕ್ಕಳು ನೆಮ್ಮದಿಯ ನಿಟ್ಟುಸಿರು ಬಿಟ್ಟಿದ್ದಾರೆ.
