ನೀವು ಯಾವುದಾದರೂ ಪಾರ್ಟ್ನರ್ಶಿಪ್ ಫರ್ಮ್ ಅಥವಾ ಲಿಮಿಟೆಡ್ ಲೈಬಿಲಿಟಿ ಪಾರ್ಟ್ನರ್ಶಿಪ್ (LLP) ನಡೆಸುತ್ತಿದ್ದೀರಾ? ಹಾಗಿದ್ದರೆ ಈ ಏಪ್ರಿಲ್ 30 ನಿಮಗೆ ತುಂಬಾನೇ ಮುಖ್ಯ. ಯಾಕೆಂದರೆ, ಆದಾಯ ತೆರಿಗೆ ಇಲಾಖೆಯ ಹೊಸ ನಿಯಮಗಳ ಪ್ರಕಾರ, ಪಾರ್ಟ್ನರ್ಗಳಿಗೆ ನೀಡುವ ಹಣದ ಮೇಲೆ ಈಗ ಟಿಡಿಎಸ್ (TDS) ಕತ್ತರಿಸುವ ಸಮಯ ಬಂದಿದೆ.
ಸಾಮಾನ್ಯವಾಗಿ ಮಾರ್ಚ್ ತಿಂಗಳು ಮುಗಿದ ಮೇಲೆ ನಾವೆಲ್ಲಾ ಸ್ವಲ್ಪ ನಿರಾಳವಾಗಿರುತ್ತೇವೆ. ಆದರೆ ಟ್ಯಾಕ್ಸ್ ವಿಷಯದಲ್ಲಿ ಮಾರ್ಚ್ ತಿಂಗಳ ಲೆಕ್ಕಾಚಾರಗಳು ಏಪ್ರಿಲ್ನಲ್ಲಿ ಹೆಚ್ಚು ಸದ್ದು ಮಾಡುತ್ತವೆ. ಅದರಲ್ಲೂ ಈ ವರ್ಷ ಸೆಕ್ಷನ್ 194T ಅಡಿಯಲ್ಲಿ ಹೊಸ ಜವಾಬ್ದಾರಿಗಳು ಸಂಸ್ಥೆಗಳ ಮೇಲೆ ಬಿದ್ದಿವೆ.
ಏನಿದು ಹೊಸ ನಿಯಮ?
ಸರಳವಾಗಿ ಹೇಳಬೇಕೆಂದರೆ, ಒಂದು ಸಂಸ್ಥೆಯು ತನ್ನ ಪಾರ್ಟ್ನರ್ಗಳಿಗೆ ಸಂಬಳ (Salary), ಬೋನಸ್, ಕಮಿಷನ್ ಅಥವಾ ಬಂಡವಾಳದ ಮೇಲೆ ಬಡ್ಡಿಯನ್ನು ನೀಡುವಾಗ, ಆ ಮೊತ್ತವು ವರ್ಷಕ್ಕೆ ₹20,000 ದಾಟಿದರೆ, ಅದರ ಮೇಲೆ 10% ಟಿಡಿಎಸ್ ಕಡಿತಗೊಳಿಸಬೇಕು. ಇದು ತೆರಿಗೆ ಪಾವತಿಯಲ್ಲಿ ಪಾರದರ್ಶಕತೆ ತರಲು ಸರ್ಕಾರ ಹಮ್ಮಿಕೊಂಡಿರುವ ಕ್ರಮ. ಪಾರ್ಟ್ನರ್ ಕೈಗೆ ಹಣ ಸೇರುವ ಮೊದಲೇ ಸರ್ಕಾರದ ಪಾಲನ್ನು ಅಲ್ಲಿಯೇ ಕಡಿತಗೊಳಿಸಲಾಗುತ್ತದೆ.
ಇಲ್ಲೊಂದು ಸಣ್ಣ ಟ್ವಿಸ್ಟ್ ಇದೆ! ಸಾಮಾನ್ಯವಾಗಿ ಬೇರೆ ತಿಂಗಳಲ್ಲಿ ನೀವು ಟಿಡಿಎಸ್ (TDS) ಕಟ್ ಮಾಡಿದ್ರೆ, ಅದನ್ನ ಮುಂದಿನ ತಿಂಗಳ 7ನೇ ತಾರೀಖಿನ ಒಳಗಡೆ ಸರ್ಕಾರಕ್ಕೆ ಕಟ್ಟಿಬಿಡಬೇಕು. ಅಂದ್ರೆ, ಫೆಬ್ರವರಿಯಲ್ಲಿ ಕಟ್ ಮಾಡಿದ ಹಣ ಮಾರ್ಚ್ 7ರ ಒಳಗೆ ಸರ್ಕಾರಕ್ಕೆ ಸೇರಿರಬೇಕು.
ಆದ್ರೆ ಮಾರ್ಚ್ ತಿಂಗಳ ಕಥೆಯೇ ಬೇರೆ! ಮಾರ್ಚ್ ತಿಂಗಳಲ್ಲಿ ಕಟ್ ಮಾಡಿದ ಟಿಡಿಎಸ್ ಹಣವನ್ನ ಪಾವತಿಸಲು ಸರ್ಕಾರ ಏಪ್ರಿಲ್ 30ರ ವರೆಗೆ ಟೈಮ್ ಕೊಡುತ್ತೆ. ಅಂದ್ರೆ ನಮಗೆ ಒಂದು ತಿಂಗಳು ಎಕ್ಸ್ಟ್ರಾ ಟೈಮ್ ಸಿಕ್ಕ ಹಾಗೆ. ಆದ್ರೆ ಹುಷಾರ್! "ಇನ್ನೂ ಟೈಮ್ ಇದೆ ಅಲ್ವಾ" ಅಂತ ಆರಾಮಾಗಿ ಕೂತು ಏಪ್ರಿಲ್ 30 ಮಿಸ್ ಮಾಡಿದ್ರೆ ಸಾಕು, ಸುಮ್ಮನೆ ಬಡ್ಡಿ ಮತ್ತೆ ದಂಡದ ಹೊರೆ ಬೀಳುತ್ತೆ. ಕಷ್ಟಪಟ್ಟು ಲಾಭ ಮಾಡಿದ ಹಣನ ದಂಡ ಕಟ್ಟೋಕೆ ವೇಸ್ಟ್ ಮಾಡೋದು ಬೇಡ ಅಲ್ವಾ? ಅದಕ್ಕೇ ಈ ದಿನಾಂಕ ತುಂಬಾನೇ ಮುಖ್ಯ!
ಮುಂದಿನ ಹಂತಗಳೇನು?
ಕೇವಲ ಹಣ ಕಟ್ಟಿದರೆ ಕೆಲಸ ಮುಗಿಯಲಿಲ್ಲ. ಅದರ ಜೊತೆಗೆ ಕೆಲವು ಫಾರ್ಮ್ಗಳ ಕೆಲಸವೂ ಇದೆ:
ಫಾರ್ಮ್ 26Q: ಜನವರಿಯಿಂದ ಮಾರ್ಚ್ ವರೆಗಿನ ತ್ರೈಮಾಸಿಕ ಟಿಡಿಎಸ್ ರಿಟರ್ನ್ ಸಲ್ಲಿಸಲು ಮೇ 31 ಕೊನೆಯ ದಿನ.
ಫಾರ್ಮ್ 16A: ರಿಟರ್ನ್ ಸಲ್ಲಿಸಿದ 15 ದಿನಗಳ ಒಳಗೆ ಪಾರ್ಟ್ನರ್ಗಳಿಗೆ ಟಿಡಿಎಸ್ ಸರ್ಟಿಫಿಕೇಟ್ ನೀಡಬೇಕಾಗುತ್ತದೆ.
ಇಲ್ಲಿ ನೆನಪಿಡಬೇಕಾದ ಮುಖ್ಯ ವಿಷಯವೆಂದರೆ, ಸಂಸ್ಥೆಯ ಬಳಿ TAN (Tax Deduction and Collection Account Number) ಇರಲೇಬೇಕು. ಪಾರ್ಟ್ನರ್ಗೆ ಹಣ ನೀಡುವಾಗ ಅಥವಾ ಅವರ ಖಾತೆಗೆ ಹಣ ಜಮೆ ತೋರಿಸುವಾಗ (ಯಾವುದು ಮೊದಲೋ ಆಗ) ಟಿಡಿಎಸ್ ಕತ್ತರಿಸುವುದು ಕಡ್ಡಾಯ.
ಪಾರ್ಟ್ನರ್ಗಳಿಗೆ ಲಾಭವೇ ಅಥವಾ ನಷ್ಟವೇ?
ಮೇಲ್ನೋಟಕ್ಕೆ ಪಾರ್ಟ್ನರ್ಗಳಿಗೆ ಕೈಗೆ ಸಿಗುವ ನಗದು (Cash flow) ಸ್ವಲ್ಪ ಕಡಿಮೆ ಅನಿಸಬಹುದು. "ನನ್ನ ಸಂಬಳದಲ್ಲೇ 10% ಕಟ್ ಆಯ್ತಲ್ಲಾ" ಅನ್ನೋ ಬೇಸರ ಬೇಡ. ಯಾಕೆಂದರೆ, ನೀವು ನಿಮ್ಮ ವೈಯಕ್ತಿಕ ಆದಾಯ ತೆರಿಗೆ ರಿಟರ್ನ್ಸ್ (ITR) ಸಲ್ಲಿಸುವಾಗ, ಈ ರೀತಿ ಕಡಿತವಾದ ಟಿಡಿಎಸ್ ಹಣವನ್ನು 'ಟ್ಯಾಕ್ಸ್ ಕ್ರೆಡಿಟ್' ಆಗಿ ಬಳಸಿಕೊಳ್ಳಬಹುದು. ಅಂದರೆ ನೀವು ಕಟ್ಟಬೇಕಾದ ಒಟ್ಟು ತೆರಿಗೆಯಲ್ಲಿ ಈ ಮೊತ್ತವನ್ನು ಮೈನಸ್ ಮಾಡಿಕೊಳ್ಳಬಹುದು.
