ಭಾರತವು ಜಾಗತಿಕ ತಾಂತ್ರಿಕ ನಕ್ಷೆಯಲ್ಲಿ ತನ್ನ ಸ್ಥಾನವನ್ನು ಗಟ್ಟಿಗೊಳಿಸುತ್ತಿದೆ. ಸೆಮಿಕಂಡಕ್ಟರ್ ಚಿಪ್ಗಳ ತಯಾರಿಕೆಯಲ್ಲಿ ಸ್ವಾವಲಂಬಿಯಾಗುವತ್ತ ಭಾರತ ಇಡುತ್ತಿರುವ ಹೆಜ್ಜೆಗಳು ಈಗ ಸಾಕಾರಗೊಳ್ಳುತ್ತಿವೆ. ಇದಕ್ಕೆ ಸಾಕ್ಷಿಯಾಗಿ, ಮುರುಗಪ್ಪ ಗ್ರೂಪ್ನ ಅಂಗಸಂಸ್ಥೆಯಾದ 'ಸಿಜಿ ಸೆಮಿ' (CG Semi), ಗುಜರಾತ್ನ ಸಾನಂದ್ನಲ್ಲಿರುವ ತನ್ನ ಘಟಕದಿಂದ ವಾಣಿಜ್ಯ ಚಿಪ್ಗಳನ್ನು ಮಲೇಷ್ಯಾಗೆ ರಫ್ತು ಮಾಡುವ ಮೂಲಕ ಹೊಸ ಇತಿಹಾಸ ಸೃಷ್ಟಿಸಿದೆ. ಪ್ರಧಾನಿ ನರೇಂದ್ರ ಮೋಟಿಯವರು ಜುಲೈ 4 ರಂದು ಈ ಘಟಕದ ಕಮರ್ಷಿಯಲ್ ಪ್ರೊಡಕ್ಷನ್ಗೆ ಅಧಿಕೃತ ಚಾಲನೆ ನೀಡಲಿದ್ದರೂ, ಸಂಸ್ಥೆಯು ಅದಕ್ಕೂ ಮೊದಲೇ ಜೂನ್ 19 ರಂದು ಮೊದಲ ಬ್ಯಾಚ್ ಅನ್ನು ಯಶಸ್ವಿಯಾಗಿ ಮಲೇಷ್ಯಾಗೆ ಕಳುಹಿಸಿಕೊಟ್ಟಿದೆ.
ಭಾರತದ ತಾಂತ್ರಿಕ ಸಾರ್ವಭೌಮತ್ವಕ್ಕೆ ಸಾಕ್ಷಿ
ಭಾರತದಲ್ಲಿ ಸೆಮಿಕಂಡಕ್ಟರ್ ಮಿಷನ್ (ISM) ಪ್ರಾರಂಭವಾಗಿ ಕೇವಲ ನಾಲ್ಕು ವರ್ಷಗಳಾಗಿವೆ. ಅಲ್ಪಾವಧಿಯಲ್ಲೇ ಇಂತಹ ಬೃಹತ್ ಸಾಧನೆ ಮಾಡಿರುವುದು ದೇಶದ ತಾಂತ್ರಿಕ ಪ್ರಗತಿಗೆ ಹಿಡಿದ ಕೈಗನ್ನಡಿಯಾಗಿದೆ. ಮಲೇಷ್ಯಾದ ಕೌಲಾಲಂಪುರಕ್ಕೆ ರಫ್ತಾಗಿರುವ ಈ ಚಿಪ್ಗಳು ಜಪಾನ್ನ ಪ್ರಮುಖ ಸಂಸ್ಥೆಯಾದ 'ರೆನೆಸಾಸ್ ಎಲೆಕ್ಟ್ರಾನಿಕ್ಸ್' (Renesas Electronics) ಗ್ರಾಹಕರಿಗೆ ತಲುಪಲಿವೆ. ಸಿಜಿ ಸೆಮಿ ಮತ್ತು ರೆನೆಸಾಸ್ ಎಲೆಕ್ಟ್ರಾನಿಕ್ಸ್ ನಡುವಿನ ಈ ಸಹಭಾಗಿತ್ವವು ಅಸೆಂಬ್ಲಿ, ಪ್ಯಾಕೇಜಿಂಗ್ ಮತ್ತು ಟೆಸ್ಟಿಂಗ್ (OSAT) ಕ್ಷೇತ್ರದಲ್ಲಿ ಭಾರತದ ಸಾಮರ್ಥ್ಯವನ್ನು ಜಗತ್ತಿಗೆ ಪರಿಚಯಿಸಿದೆ.
ಸಿಜಿ ಸೆಮಿಯ ಬೃಹತ್ ಯೋಜನೆ ಮತ್ತು ಹೂಡಿಕೆ
ಮುರುಗಪ್ಪ ಸಮೂಹದ ಸಿಜಿ ಪವರ್, ಜಪಾನ್ನ ರೆನೆಸಾಸ್ ಮತ್ತು ಥೈಲ್ಯಾಂಡ್ನ ಸ್ಟಾರ್ಸ್ ಮೈಕ್ರೋ ಎಲೆಕ್ಟ್ರಾನಿಕ್ಸ್ ಸಂಸ್ಥೆಗಳು ಈ ಜಂಟಿ ಉದ್ಯಮವನ್ನು ಮುನ್ನಡೆಸುತ್ತಿವೆ. ಮುಂದಿನ ಐದು ವರ್ಷಗಳಲ್ಲಿ ಈ ಯೋಜನೆಗಾಗಿ ಬರೋಬ್ಬರಿ 7,600 ಕೋಟಿ ರೂಪಾಯಿಗಳನ್ನು ಹೂಡಿಕೆ ಮಾಡಲಾಗುತ್ತಿದೆ. ಸಾನಂದ್ನಲ್ಲಿ ಸದ್ಯ ಕಾರ್ಯನಿರ್ವಹಿಸುತ್ತಿರುವ 'G1' ಘಟಕವು ಅತ್ಯಾಧುನಿಕ ತಂತ್ರಜ್ಞಾನವನ್ನು ಹೊಂದಿದ್ದು, ಪ್ರತಿದಿನ ಸುಮಾರು 5 ಲಕ್ಷ ಚಿಪ್ಗಳನ್ನು ಉತ್ಪಾದಿಸುವ ಸಾಮರ್ಥ್ಯವನ್ನು ಹೊಂದಿದೆ.
ಅಷ್ಟೇ ಅಲ್ಲ, ನಿರ್ಮಾಣ ಹಂತದಲ್ಲಿರುವ ದೊಡ್ಡದಾದ 'G2' ಘಟಕವು 2026ರ ಕೊನೆಯ ವೇಳೆಗೆ ಕಾರ್ಯಾರಂಭ ಮಾಡಲಿದೆ. ಆ ಘಟಕವು ದಿನಕ್ಕೆ ಸುಮಾರು 1.45 ಕೋಟಿ ಚಿಪ್ಗಳನ್ನು ಉತ್ಪಾದಿಸುವ ಗುರಿಯನ್ನು ಹೊಂದಿದೆ. ಇದು ಭಾರತದ ಉತ್ಪಾದನಾ ಸಾಮರ್ಥ್ಯವನ್ನು ಜಾಗತಿಕ ಮಟ್ಟಕ್ಕೆ ಕೊಂಡೊಯ್ಯಲಿದೆ.
ಈ ಚಿಪ್ಗಳ ಉಪಯುಕ್ತತೆ ಏನು?
ಮಲೇಷ್ಯಾಗೆ ರಫ್ತಾಗಿರುವ ಈ ಚಿಪ್ಗಳು ಕೇವಲ ಎಲೆಕ್ಟ್ರಾನಿಕ್ ಸಾಧನಗಳಿಗೆ ಸೀಮಿತವಲ್ಲ. ಇವುಗಳನ್ನು ಈ ಕೆಳಗಿನ ಕ್ಷೇತ್ರಗಳಲ್ಲಿ ಬಳಸಲಾಗುತ್ತದೆ:
ವಾಹನ ಉದ್ಯಮ: ಆಧುನಿಕ ಕಾರುಗಳ ಸುರಕ್ಷತೆ ಮತ್ತು ಕಾರ್ಯನಿರ್ವಹಣೆಗೆ ಅಗತ್ಯವಾದ ಎಲೆಕ್ಟ್ರಾನಿಕ್ ವ್ಯವಸ್ಥೆಗಳಲ್ಲಿ.
ಕನ್ಸೂಮರ್ ಎಲೆಕ್ಟ್ರಾನಿಕ್ಸ್: ಗೃಹೋಪಯೋಗಿ ವಸ್ತುಗಳ ಸ್ಮಾರ್ಟ್ ಅಪ್ಲಿಕೇಶನ್ಗಳಲ್ಲಿ.
5ಜಿ ತಂತ್ರಜ್ಞಾನ: ವೇಗದ ಇಂಟರ್ನೆಟ್ ಮತ್ತು ಕಮ್ಯುನಿಕೇಶನ್ ಸಾಧನಗಳಲ್ಲಿ.
ಐಒಟಿ (IoT): ಇಂಟರ್ನೆಟ್ ಆಫ್ ಥಿಂಗ್ಸ್ ಮೂಲಕ ಪರಸ್ಪರ ಸಂಪರ್ಕಿತವಾಗಿರುವ ಸಾಧನಗಳಲ್ಲಿ.
ಈ ಯೋಜನೆ ಮುಂಬರುವ ದಿನಗಳಲ್ಲಿ 5,000ಕ್ಕೂ ಅಧಿಕ ನೇರ ಮತ್ತು ಪರೋಕ್ಷ ಉದ್ಯೋಗಗಳನ್ನು ಸೃಷ್ಟಿಸಲಿದೆ, ಇದು ಸ್ಥಳೀಯ ಆರ್ಥಿಕತೆಗೆ ದೊಡ್ಡ ಉತ್ತೇಜನ ನೀಡಲಿದೆ.
ಸಾನಂದ್ ಈಗ 'ಸಿಲಿಕಾನ್ ಹಬ್'
ಗುಜರಾತ್ನ ಸಾನಂದ್ ಕೈಗಾರಿಕಾ ಪ್ರದೇಶವು ಇಂದು ಭಾರತದ ಸೆಮಿಕಂಡಕ್ಟರ್ ಹಬ್ ಆಗಿ ಹೊರಹೊಮ್ಮಿದೆ. ಮೈಕ್ರಾನ್ ಟೆಕ್ನಾಲಜಿ, ಕೇನ್ಸ್ ಸೆಮಿಕಾನ್ ಮತ್ತು ಸಿಜಿ ಸೆಮಿಯಂತಹ ದೈತ್ಯ ಸಂಸ್ಥೆಗಳು ಇಲ್ಲಿ ತಮ್ಮ ಬೇರುಗಳನ್ನು ಬಿಟ್ಟಿವೆ. ಪ್ರಧಾನಿ ಮೋದಿ ಅವರು 2025ರ ಆಗಸ್ಟ್ನಲ್ಲಿ ಉದ್ಘಾಟಿಸಿದ್ದ ಈ ಘಟಕವು ಕೇವಲ ಹತ್ತು ತಿಂಗಳ ಅಲ್ಪಾವಧಿಯಲ್ಲಿ ಇಷ್ಟು ವೇಗವಾಗಿ ಕಾರ್ಯಾರಂಭ ಮಾಡಿರುವುದು ಮತ್ತು ರಫ್ತು ಆರಂಭಿಸಿರುವುದು, ಭಾರತದಲ್ಲಿ ವ್ಯವಹಾರ ಮಾಡಲು ಲಭ್ಯವಿರುವ ಉತ್ತಮ ಮೂಲಸೌಕರ್ಯ ಮತ್ತು ಸರ್ಕಾರದ ಬೆಂಬಲಕ್ಕೆ ಸಾಕ್ಷಿಯಾಗಿದೆ.
ಭಾರತವು ಜಾಗತಿಕ ಸರಬರಾಜು ಸರಪಳಿಯಲ್ಲಿ (Global Supply Chain) ಪ್ರಮುಖ ಪಾತ್ರ ವಹಿಸಲು ಸಜ್ಜಾಗಿದೆ. ಈ ಹಿಂದೆ ಸೆಮಿಕಂಡಕ್ಟರ್ ಚಿಪ್ಗಳಿಗಾಗಿ ಇತರ ದೇಶಗಳ ಮೇಲೆ ಅವಲಂಬಿತವಾಗಿದ್ದ ಭಾರತ, ಈಗ ರಫ್ತು ಮಾಡುವ ಮಟ್ಟಕ್ಕೆ ಬೆಳೆದಿರುವುದು ಕ್ರಾಂತಿಕಾರಿ ಬದಲಾವಣೆ. ಮುರುಗಪ್ಪ ಗ್ರೂಪ್ನ ಈ ಸಾಧನೆಯು ದೇಶದ ಇತರ ಕೈಗಾರಿಕಾ ಸಂಸ್ಥೆಗಳಿಗೂ ಹೊಸ ಸ್ಫೂರ್ತಿ ನೀಡಿದೆ.
ಭಾರತವನ್ನು 'ಸೆಮಿಕಂಡಕ್ಟರ್ ಉತ್ಪಾದನಾ ಕೇಂದ್ರ'ವನ್ನಾಗಿ ಮಾಡುವ ಕನಸು ಇದೀಗ ನನಸಾಗುತ್ತಿದೆ. ತಾಂತ್ರಿಕ ಸ್ವಾವಲಂಬನೆಯ ಈ ಪಯಣವು ಭವಿಷ್ಯದಲ್ಲಿ ಭಾರತವನ್ನು ಜಾಗತಿಕ ಮಟ್ಟದಲ್ಲಿ ತಾಂತ್ರಿಕ ನಾಯಕನನ್ನಾಗಿ ರೂಪಿಸುವುದರಲ್ಲಿ ಸಂಶಯವಿಲ್ಲ.
