ಬೆಂಗಳೂರಿನಲ್ಲಿ ಸೋಮವಾರ ಸುರಿದ ಮಳೆ ಬಿಸಿಲಿನ ಬೇಗೆಯಿಂದ ಕಂಗಾಲಾಗಿದ್ದ ಜನರಿಗೆ ಕೊಂಚ ತಂಪು ತಂದಿಟ್ಟರೂ, ನಗರದ ರಸ್ತೆಗಳನ್ನು ಮಾತ್ರ ಕೆರೆಯಂತು ಮಾಡಿದೆ. ಹವಾಮಾನ ಇಲಾಖೆ ನೀಡಿರುವ ಮಾಹಿತಿ ಪ್ರಕಾರ, ಈ ಮಳೆಯ ಅಬ್ಬರ ಇಲ್ಲಗೇ ಮುಗಿಯುವುದಿಲ್ಲ; ಮುಂದಿನ 48 ಗಂಟೆಗಳ ಕಾಲ ಅಂದರೆ ಗುರುವಾರದವರೆಗೂ (ಮೇ 21) ಸಿಲಿಕಾನ್ ಸಿಟಿಯಲ್ಲಿ ವರುಣನ ಆರ್ಭಟ ಮುಂದುವರಿಯಲಿದೆ. ಹೀಗಾಗಿ, ಹವಾಮಾನ ಇಲಾಖೆ ಬೆಂಗಳೂರಿಗೆ 'ಯೆಲ್ಲೋ ಅಲರ್ಟ್' ಘೋಷಿಸಿದೆ.
ನೀವು ಮುಂದಿನ ಎರಡು ದಿನ ಸಂಜೆ ವೇಳೆ ಆಚೆ ಹೋಗುವ ಪ್ಲಾನ್ ಮಾಡಿಕೊಂಡಿದ್ದರೆ, ಕೈಯಲ್ಲೊಂದು ಕೊಡೆ ಅಥವಾ ರೇನ್ಕೋಟ್ ಇಟ್ಟುಕೊಳ್ಳುವುದು ತುಂಬಾ ಒಳ್ಳೆಯದು. ಯಾಕಂದರೆ, ಗುಡುಗು, ಮಿಂಚು ಸಹಿತ ಹಗುರದಿಂದ ಸಾಧಾರಣ ಮಳೆ, ಇನ್ನು ಕೆಲವು ಕಡೆ ಭರ್ಜರಿ ಮಳೆಯಾಗುವ ಸಾಧ್ಯತೆ ದಟ್ಟವಾಗಿದೆ.
ಎಲ್ಲಿ ಎಷ್ಟು ಮಳೆಯಾಗಿದೆ?
ಕಳೆದ 24 ಗಂಟೆಗಳಲ್ಲಿ ಬೆಂಗಳೂರಿನ ಹಲವು ಭಾಗಗಳಲ್ಲಿ ಭಾರೀ ಮಳೆಯಾಗಿದೆ. ಅದರಲ್ಲಿಯೂ ಮುಖ್ಯವಾಗಿ ಬ್ಯಾಟರಾಯನಪುರದಲ್ಲಿ ಅತಿ ಹೆಚ್ಚು ಅಂದರೆ ಬರೋಬ್ಬರಿ 65.5 ಮಿ.ಮೀ. ಮಳೆ ದಾಖಲಾಗಿದೆ. ಉಳಿದಂತೆ ನಗರದ ಪ್ರಮುಖ ಏರಿಯಾಗಳಲ್ಲಿ ಬಿದ್ದ ಮಳೆಯ ವಿವರ ಹೀಗಿದೆ:
ಕಳೆದ 24 ಗಂಟೆಗಳಲ್ಲಿ ಬೆಂಗಳೂರಿನ ಹಲವು ಭಾಗಗಳಲ್ಲಿ ವರುಣ ಅಬ್ಬರಿಸಿದ್ದು, ವಿವಿಧ ಏರಿಯಾಗಳಲ್ಲಿ ಭರ್ಜರಿ ಮಳೆ ದಾಖಲಾಗಿದೆ. ಎಲ್ಲಕ್ಕಿಂತ ಹೆಚ್ಚಾಗಿ ಬ್ಯಾಟರಾಯನಪುರದಲ್ಲಿ ಅತಿ ಗರಿಷ್ಠ ಅಂದರೆ 65.5 ಮಿ.ಮೀ. ಮಳೆಯಾಗಿದೆ. ಇದರ ಬೆನ್ನಲ್ಲೇ ಬಾಣಸವಾಡಿಯಲ್ಲಿ 61.6 ಮಿ.ಮೀ. ಹಾಗೂ ಎಚ್ಎಸ್ಆರ್ ಬಡಾವಣೆಯಲ್ಲಿ 61.5 ಮಿ.ಮೀ. ನಷ್ಟು ದೊಡ್ಡ ಪ್ರಮಾಣದ ಮಳೆ ಬಿದ್ದಿದೆ. ಇನ್ನುಳಿದಂತೆ, ಮನೋರಾಯನಪಾಳ್ಯದಲ್ಲಿ 55.5 ಮಿ.ಮೀ., ವಿ.ನಾಗೇನಹಳ್ಳಿಯಲ್ಲಿ 46.5 ಮಿ.ಮೀ., ಮತ್ತು ಪುಲಕೇಶಿನಗರದಲ್ಲಿ 46 ಮಿ.ಮೀ. ಮಳೆಯಾಗಿರುವುದು ವರದಿಯಾಗಿದೆ. ನಗರದ ಇತರ ಪ್ರಮುಖ ಬಡಾವಣೆಗಳಾದ ಕಮ್ಮನಹಳ್ಳಿ ಮತ್ತು ಹೊಯ್ಸಳನಗರದಲ್ಲಿ ತಲಾ 43 ಮಿ.ಮೀ. ಮಳೆಯಾಗಿದ್ದರೆ, ಹೊರಮಾವುನಲ್ಲಿ 40.5 ಮಿ.ಮೀ., ನಾಗಪುರದಲ್ಲಿ 37 ಮಿ.ಮೀ. ಹಾಗೂ ಕೊಡಿಗೇಹಳ್ಳಿಯಲ್ಲಿ 35 ಮಿ.ಮೀ. ನಷ್ಟು ಸಾಧಾರಣದಿಂದ ಭಾರೀ ಮಳೆ ಸುರಿದು ಜನರನ್ನು ಹೈರಾಣಾಗಿಸಿದೆ.
ಎಂದಿನಂತೆ ಟ್ರಾಫಿಕ್ ಕಷ್ಟ, ವಾಹನ ಸವಾರರ ಪರದಾಟ!
ಸೋಮವಾರ ಸಂಜೆ ಹಠಾತ್ತನೆ ಸುರಿದ ಜೋರು ಮಳೆಗೆ ಬಾಣಸವಾಡಿ, ನಾಗಪುರ, ಹೆಬ್ಬಾಳ ಹಾಗೂ ಯಲಹಂಕದ ರಸ್ತೆಗಳು ಅಕ್ಷರಶಃ ನೀರಿನಿಂದ ತುಂಬಿ ಹೋಗಿದ್ದವು. ಕಚೇರಿ ಮುಗಿಸಿ ಮನೆಗೆ ಹೊರಟಿದ್ದ ಐಟಿ ಉದ್ಯೋಗಿಗಳು ಮತ್ತು ವಾಹನ ಸವಾರರು ಗಂಟೆಗಟ್ಟಲೆ ಟ್ರಾಫಿಕ್ ಜಾಮ್ನಲ್ಲಿ ಸಿಲುಕಿ ಪರದಾಡಬೇಕಾಯಿತು. ತಗ್ಗು ಪ್ರದೇಶಗಳ ಮನೆಗಳಿಗೆ ನೀರು ನುಗ್ಗಿ ಸಣ್ಣಪುಟ್ಟ ಅವಾಂತರಗಳು ಸೃಷ್ಟಿಯಾಗಿವೆ. ಮುಂದಿನ ಎರಡು ದಿನವೂ ಮಳೆ ಹೆಚ್ಚಾಗಿ ಮಧ್ಯಾಹ್ನದ ನಂತರ ಅಥವಾ ಸಂಜೆ ವೇಳೆ ಬರುವುದರಿಂದ ವ್ಯಾಪಾರಸ್ಥರಿಗೆ ಹಾಗೂ ಆಫೀಸ್ನಿಂದ ಮನೆಗೆ ಮರಳುವ ಜನರಿಗೆ ಸಂಚಾರದ ಅಡಚಣೆ ತಪ್ಪಿದ್ದಲ್ಲ.
ಒಂದು ಸಣ್ಣ ಗಮನ ಇರಲಿ: ಹವಾಮಾನ ತಜ್ಞರ ಪ್ರಕಾರ, ದಿನವಿಡೀ ತಾಪಮಾನವು ಗರಿಷ್ಠ 33 ಡಿಗ್ರಿ ಸೆಲ್ಸಿಯಸ್ನಿಂದ ಕನಿಷ್ಠ 34 ಡಿಗ್ರಿ ಸೆಲ್ಸಿಯಸ್ ಆಸುಪಾಸಿನಲ್ಲಿರಲಿದೆ. ಬೆಳಗ್ಗೆಯಿಂದ ಮಧ್ಯಾಹ್ನದವರೆಗೆ ಬಿಸಿಲು ಮತ್ತು ಸಾಧಾರಣ ಸೆಕೆ ಇದ್ದರೂ, ಮಧ್ಯಾಹ್ನದ ನಂತರ ದಿಢೀರನೆ ಮೋಡ ಕವಿದ ವಾತಾವರಣ ನಿರ್ಮಾಣವಾಗಿ ಮಳೆ ಸುರಿಯಲಿದೆ. ಕೆಲವು ಕಡೆ ತಡರಾತ್ರಿಯವರೆಗೂ ಜಿಟಿಜಿಟಿ ಮಳೆ ಮುಂದುವರಿಯುವ ಚಾನ್ಸಸ್ ಇದೆ.
ದಿಢೀರ್ ಮಳೆಗೆ ಕಾರಣವೇನು?
ಬೇಸಿಗೆಯ ದಿನಗಳಲ್ಲಿ ಈ ತರಹದ ವಾತಾವರಣ ಬದಲಾವಣೆಗೆ ಪ್ರಮುಖ ಕಾರಣ ವಾಯುಭಾರ ಕುಸಿತ. ಪ್ರಸ್ತುತ ಅರಬ್ಬಿ ಸಮುದ್ರದ ಆಗ್ನೇಯ ಭಾಗ, ಬಂಗಾಳಕೊಲ್ಲಿಯ ನೈಋತ್ಯ ಮತ್ತು ಆಗ್ನೇಯ ಭಾಗ ಹಾಗೂ ಲಕ್ಷದ್ವೀಪದ ಸಮೀಪದ ಸಮುದ್ರದಲ್ಲಿ ವಾಯು ಚಂಡಮಾರುತದ ಪರಿಚಲನೆ (Cyclonic Circulation) ಉಂಟಾಗಿದೆ. ಇದರ ನೇರ ಪ್ರಭಾವ ತಮಿಳುನಾಡು ಕರಾವಳಿ ಹಾಗೂ ಕರ್ನಾಟಕದ ರಾಜಧಾನಿ ಬೆಂಗಳೂರಿನ ಮೇಲಾಗುತ್ತಿರುವುದರಿಂದಲೇ ವರುಣದೇವ ನಗರದಲ್ಲಿ ಜಿನುಗಲು ಶುರು ಮಾಡಿದ್ದಾನೆ ಎಂದು ವಿಜ್ಞಾನಿಗಳು ಸ್ಪಷ್ಟಪಡಿಸಿದ್ದಾರೆ.
ದಿನವಿಡೀ ಇದ್ದ ಬಿಸಿಲಿನ ಝಳಕ್ಕೆ ಈ ಮಳೆ ತಂಪು ನೀಡಿದ್ದರೂ, ಬೆಂಗಳೂರಿನ ಇನ್ಫ್ರಾಸ್ಟ್ರಕ್ಚರ್ ಮತ್ತು ಟ್ರಾಫಿಕ್ ವ್ಯವಸ್ಥೆಯಿಂದಾಗಿ ಜನಸಾಮಾನ್ಯರು ಹೈರಾಣಾಗುವುದು ಮಾತ್ರ ಗ್ಯಾರಂಟಿ. ಹಾಗಾಗಿ, ರಸ್ತೆಗಿಳಿಯುವ ಮುನ್ನ ಟ್ರಾಫಿಕ್ ಅಪ್ಡೇಟ್ಸ್ ಗಮನಿಸಿ, ಸುರಕ್ಷಿತವಾಗಿ ಪ್ರಯಾಣಿಸಿ!
