ರಾಜ್ಯ ರಾಜಕೀಯದಲ್ಲಿ ಈಗ ಹೊಸದೊಂದು ಚರ್ಚೆ ಸಿಕ್ಕಾಪಟ್ಟೆ ಸೌಂಡ್ ಮಾಡ್ತಿದೆ. ಅದೇನೆಂದ್ರೆ, ಈ ಬಾರಿ ಮುಂಗಾರು (ಮಳೆಗಾಲ) ಅಧಿವೇಶನವನ್ನು ಬೆಳಗಾವಿಯ ಸುವರ್ಣಸೌಧದಲ್ಲಿ ನಡೆಸೋಕೆ ಸರ್ಕಾರ ಭರ್ಜರಿ ಪ್ಲಾನ್ ಮಾಡ್ತಿದೆ! ಜುಲೈ ಎರಡನೇ ವಾರದಲ್ಲಿ, ಅಂದ್ರೆ ಜುಲೈ 13 ರಿಂದ ಸುಮಾರು 10 ದಿನಗಳ ಕಾಲ ಈ ಅಧಿವೇಶನ ನಡೆಸೋ ಪ್ರಸ್ತಾವನೆ ಸರ್ಕಾರದ ಮುಂದಿದೆ.
ಆದ್ರೆ, ಸರ್ಕಾರದ ಈ ಹೊಸ ಪ್ಲಾನ್ಗೆ ಈಗ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗ್ತಿದ್ದು, ಸಾರ್ವಜನಿಕ ವಲಯದಲ್ಲಿ ದೊಡ್ಡ ಮಟ್ಟದ ಚರ್ಚೆ ಶುರುವಾಗಿದೆ. ಯಾಕಂದ್ರೆ, ಇದುವರೆಗೆ ಕೇವಲ ಚಳಿಗಾಲದ ಅಧಿವೇಶನವನ್ನು ಮಾತ್ರ ಬೆಳಗಾವಿಯಲ್ಲಿ ನಡೆಸಿ, ಬಜೆಟ್ ಹಾಗೂ ಮುಂಗಾರು ಅಧಿವೇಶನಗಳನ್ನು ಬೆಂಗಳೂರಿನ ವಿಧಾನಸೌಧದಲ್ಲೇ ನಡೆಸಲಾಗುತ್ತಿತ್ತು. ಈಗ ಇತಿಹಾಸದಲ್ಲೇ ಮೊದಲ ಬಾರಿಗೆ ಮಳೆಗಾಲದ ಅಧಿವೇಶನವನ್ನೂ ಬೆಳಗಾವಿಗೆ ಶಿಫ್ಟ್ ಮಾಡೋಕೆ ನೋಡ್ತಿರೋದು ಹಲವು ಪ್ರಶ್ನೆಗಳಿಗೆ ಕಾರಣವಾಗಿದೆ.
ಜಿಲ್ಲಾಡಳಿತದ ಸಿದ್ಧತೆ ಮತ್ತು ಬಾಕಿ ಬಿಲ್ಗಳ ಕಿರಿಕಿರಿ!
ಸರ್ಕಾರದ ಈ ಐಡಿಯಾ ಹೊರಬೀಳುತ್ತಿದ್ದಂತೆ ಬೆಳಗಾವಿ ಜಿಲ್ಲಾಡಳಿತ ಅಲರ್ಟ್ ಆಗಿದ್ದು, ಪ್ರೈಮರಿ ಲೆವೆಲ್ನಲ್ಲಿ ಒಂದು ಮೀಟಿಂಗ್ ಕೂಡ ಮಾಡಿದೆ. ಆದ್ರೆ, ಬೆಳಗಾವಿ ಡಿಸಿ ಮೊಹಮ್ಮದ್ ರೋಷನ್ ಅವರು ಮಾತ್ರ, "ನಮಗೆ ಮುಂಗಾರು ಅಧಿವೇಶನದ ಸಿದ್ಧತೆ ಬಗ್ಗೆ ಇನ್ನು ಯಾವುದೇ ಅಫಿಷಿಯಲ್ ಆರ್ಡರ್ ಬಂದಿಲ್ಲ" ಅಂತ ಸ್ಪಷ್ಟಪಡಿಸಿದ್ದಾರೆ.
ಇವೆಲ್ಲದರ ನಡುವೆ, ಈ ಅಧಿವೇಶನ ಬೆಳಗಾವಿಗೆ ಬೇಡಪ್ಪಾ ಅನ್ನೋರ ವಾದಕ್ಕೆ ಮುಖ್ಯ ಕಾರಣ ವೆಚ್ಚದ ಹೊರೆ! ಹೌದು, ಕಳೆದ ಬಾರಿ ನಡೆದ ಅಧಿವೇಶನಗಳ ಹೋಟೆಲ್ ಬಿಲ್ಗಳನ್ನೇ ಸರ್ಕಾರ ಇನ್ನು ಕಂಪ್ಲೀಟ್ ಆಗಿ ಸೆಟಲ್ ಮಾಡಿಲ್ಲವಂತೆ. ಮೂಲಗಳ ಪ್ರಕಾರ, ಬರೋಬ್ಬರಿ 45 ಲಕ್ಷ ರೂಪಾಯಿಗೂ ಅಧಿಕ ಹೋಟೆಲ್ ಬಿಲ್ಗಳು ಬಾಕಿ ಇವೆ. ಅಷ್ಟೇ ಅಲ್ಲ, ಟ್ರಾಫಿಕ್ ಮ್ಯಾನೇಜ್ಮೆಂಟ್, ಸೆಕ್ಯೂರಿಟಿ ಮತ್ತು ಪ್ರೊಟೆಸ್ಟ್ ಕಂಟ್ರೋಲ್ ಮಾಡೋಕೆ ಮಾಡಿದ ತಾತ್ಕಾಲಿಕ ಅರೇಂಜ್ಮೆಂಟ್ಸ್ಗಳ ದುಡ್ಡನ್ನೂ ಇನ್ನು ಪೂರ್ತಿಯಾಗಿ ಪಾವತಿಸಿಲ್ಲ ಅನ್ನೋ ಮಾತುಗಳು ಕೇಳಿಬರುತ್ತಿವೆ.
ಕೋಟಿ ಕೋಟಿ ಖರ್ಚು: ಆರ್ಟಿಐ ರಿಪೋರ್ಟ್ನಲ್ಲಿ ಶಾಕಿಂಗ್ ಉಲ್ಲೇಖ!
ಮಾಹಿತಿ ಹಕ್ಕು ಕಾಯ್ದೆ (RTI) ಅಡಿಯಲ್ಲಿ ಸಿಕ್ಕಿರೋ ರಿಪೋರ್ಟ್ ನೋಡಿದ್ರೆ ಕಣ್ಣು ಕರಗಡಕಾಗೋದು ಗ್ಯಾರಂಟಿ. ಬೆಳಗಾವಿಯಲ್ಲಿ ನಡೆಯೋ ಒಂದೊಂದು ಅಧಿವೇಶನದ ಅವಧಿಗೂ ಸರ್ಕಾರ ಬರೋಬ್ಬರಿ 14 ಕೋಟಿ ರೂಪಾಯಿಯಿಂದ ಹಿಡಿದು 28 ಕೋಟಿ ರೂಪಾಯಿವರೆಗೂ ನೀರು ತರ ಖರ್ಚು ಮಾಡುತ್ತೆ! ಶಾಸಕರು, ಮಂತ್ರಿಗಳು ಹಾಗೂ ಆಫೀಸರ್ಸ್ಗಳ ವಸತಿ, ಊಟ, ಸೆಕ್ಯೂರಿಟಿ ಮತ್ತು ಗಾಡಿಗಳ ಬಾಡಿಗೆಗೇ ಈ ಕೋಟ್ಯಂತರ ರೂಪಾಯಿ ವ್ಯಯವಾಗುತ್ತದೆ.
ನಿಮಗೆ ಗೊತ್ತಿರಲಿ, 2012ರಲ್ಲಿ ಬೆಳಗಾವಿಯ ಸುವರ್ಣಸೌಧ ಉದ್ಘಾಟನೆಯಾದಾಗಿನಿಂದ ಇಲ್ಲಿಯವರೆಗೆ ನಡೆದಿರೋ ಅಧಿವೇಶನಗಳಿಗೆ ಸರ್ಕಾರ ಅಂದಾಜು 170 ಕೋಟಿ ರೂಪಾಯಿಗೂ ಹೆಚ್ಚು ಹಣ ಖರ್ಚು ಮಾಡಿದೆ!
ಖರ್ಚಿನ ಜೊತೆಗೆ ಭದ್ರತೆಯೂ ದೊಡ್ಡ ಸವಾಲು
ಬೆಳಗಾವಿಯಲ್ಲಿ ಅಧಿವೇಶನ ಮಾಡೋದು ಅಂದ್ರೆ ಬರೀ ದುಡ್ಡಿನ ಮ್ಯಾಟರ್ ಅಷ್ಟೇ ಅಲ್ಲ, ಭದ್ರತೆಯೂ ಅಷ್ಟೇ ದೊಡ್ಡ ಸಾಹಸ.
ಖಾಕಿ ಕಾವಲು: ಪ್ರತಿ ಬಾರಿ ಅಧಿವೇಶನ ನಡೆದಾಗಲೂ ಸಿಟಿಯಲ್ಲಿ 6,000ಕ್ಕೂ ಹೆಚ್ಚು ಪೊಲೀಸ್ ಸಿಬ್ಬಂದಿಯನ್ನು ಭದ್ರತೆಗೆ ನಿಯೋಜಿಸಬೇಕಾಗುತ್ತದೆ.
ಹದ್ದಿನ ಕಣ್ಣು: ನೂರಾರು ಸಿಸಿಟಿವಿ ಕ್ಯಾಮೆರಾಗಳು, ಬ್ಯಾರಿಕೇಡ್ಗಳ ಅಳವಡಿಕೆ ಅಂತ ಪೊಲೀಸ್ ಇಲಾಖೆ ಹಗಲು ರಾತ್ರಿ ಕಷ್ಟಪಡಬೇಕಾಗುತ್ತೆ.
ಪ್ರತಿಭಟನೆಗಳ ತಲೆನೋವು: ಉತ್ತರ ಕರ್ನಾಟಕದ ಹೃದಯಭಾಗವಾದ್ದರಿಂದ ರೈತ ಸಂಘಟನೆಗಳು, ಕನ್ನಡ ಪರ ಹೋರಾಟಗಾರರು, ಕಾರ್ಮಿಕ ಸಂಘಗಳು ತಮ್ಮ ಬೇಡಿಕೆಗಳಿಗಾಗಿ ಸುವರ್ಣಸೌಧಕ್ಕೆ ಮುತ್ತಿಗೆ ಹಾಕಲು ಬರ್ತಾರೆ. ಇವರನ್ನು ಕಂಟ್ರೋಲ್ ಮಾಡೋದು ಆಡಳಿತ ಯಂತ್ರಕ್ಕೆ ದೊಡ್ಡ ತಲೆನೋವು.
ಸ್ಥಳೀಯ ವ್ಯಾಪಾರಿಗಳಿಗೆ ಹಬ್ಬ, ಆದ್ರೆ ಜನಸಾಮಾನ್ಯರ ಪ್ರಶ್ನೆ ಏನು?
ಅಧಿವೇಶನದಿಂದ ಒಂದು ಪ್ಲಸ್ ಪಾಯಿಂಟ್ ಅಂದ್ರೆ, ಅಲ್ಲಿನ ಹೋಟೆಲ್ಗಳು, ಟ್ರಾವೆಲ್ಸ್ ಏಜೆನ್ಸಿಗಳು, ರೆಸ್ಟೋರೆಂಟ್ಗಳು ಹಾಗೂ ಲೋಕಲ್ ಬಿಸಿನೆಸ್ಗಳಿಗೆ ಸಖತ್ ಡಿಮ್ಯಾಂಡ್ ಇರುತ್ತೆ. 10 ದಿನಗಳ ಕಾಲ ಅಲ್ಲಿ ಭರ್ಜರಿ ವ್ಯಾಪಾರ ನಡೆಯುತ್ತೆ ಅನ್ನೋದು ನಿಜ.
ಆದ್ರೆ, ಕೇವಲ 10 ದಿನಗಳ ಶೋ ಮತ್ತು ಅಲ್ಪಾವಧಿಯ ಬಿಸಿನೆಸ್ ಲಾಭಕ್ಕಾಗಿ ಸರ್ಕಾರ ಇಷ್ಟೊಂದು ಕೋಟಿ ಕೋಟಿ ಸಾರ್ವಜನಿಕರ ತೆರಿಗೆ ಹಣವನ್ನು ಸುರಿಯುವುದು ಎಷ್ಟು ಸರಿ? ಬೆಂಗಳೂರಿನಲ್ಲಿ ಆರಾಮಾಗಿ ಮಾಡಬಹುದಾದ ಕೆಲಸಕ್ಕೆ ಇಷ್ಟೊಂದು ವೆಚ್ಚ ಮತ್ತು ಆಡಳಿತಾತ್ಮಕ ರಿಸ್ಕ್ ತಗೋಬೇಕಾ? ಅನ್ನೋದು ಹಲವರ ನೇರ ಪ್ರಶ್ನೆ.
ಪ್ರಾದೇಶಿಕ ಸಮತೋಲನ ಕಾಯ್ದುಕೊಳ್ಳಲು ಉತ್ತರ ಕರ್ನಾಟಕ ಭಾಗದಲ್ಲಿ ಅಧಿವೇಶನ ಮಾಡೋದು ಒಳ್ಳೆಯದೇ ಆದ್ರೂ, ಈಗಿನ ಆರ್ಥಿಕ ಪರಿಸ್ಥಿತಿ ಮತ್ತು ಮಳೆಗಾಲದ ಸವಾಲುಗಳ ಮಧ್ಯೆ ಸರ್ಕಾರ ಈ ಸಾಹಸಕ್ಕೆ ಕೈ ಹಾಕುತ್ತಾ ಅನ್ನೋದನ್ನ ಕಾದು ನೋಡಬೇಕಿದೆ.
