ಸಚಿವ ಸತೀಶ್ ಜಾರಕಿಹೊಳಿ ಅವರು ಪ್ರತಿನಿಧಿಸುವ ಜಿಲ್ಲೆಯ ಪ್ರತಿಷ್ಠಿತ ಯಮಕನಮರಡಿ ವಿಧಾನಸಭಾ ಕ್ಷೇತ್ರದ ವ್ಯಾಪ್ತಿಯಲ್ಲಿ ಕಾನೂನು ಸುವ್ಯವಸ್ಥೆಯನ್ನು ಅಣಕಿಸುವಂತಹ ಮತ್ತೊಂದು ಅತ್ಯಂತ ಕ್ರೂರ ಮತ್ತು ಹ್ಯೇಯ ಕೃತ್ಯ ಬೆಳಕಿಗೆ ಬಂದಿದೆ. ವಿವಾಹಿತ ಮಹಿಳೆಯನ್ನು ಯುವಕನೊಬ್ಬ ಓಡಿಸಿಕೊಂಡು ಹೋಗಿದ್ದಾನೆ ಎಂಬ ಕಾರಣಕ್ಕೆ ಕೆರಳಿದ ನೂರಾರು ಜನರ ಗುಂಪು, ಆ ಯುವಕನ ಮನೆ ಮೇಲೆ ಮಾರಕಾಸ್ತ್ರಗಳೊಂದಿಗೆ ಮುಗಿಬಿದ್ದು ಇಡೀ ಮನೆಯನ್ನು ಸಂಪೂರ್ಣವಾಗಿ ದ್ವಂಸಗೊಳಿಸಿದೆ.
ಬೆಳಗಾವಿ ತಾಲೂಕಿನ ಭರಮ್ಯಾನಟ್ಟಿ ಗ್ರಾಮದಲ್ಲಿ ಈ ಭೀಕರ ಘಟನೆ ನಡೆದಿದ್ದು, ಇಡೀ ಗ್ರಾಮದಲ್ಲಿ ಸದ್ಯ ಉದ್ವಿಗ್ನ ಹಾಗೂ ಭಯದ ವಾತಾವರಣ ನಿರ್ಮಾಣವಾಗಿದೆ. ಕೇವಲ ಮನೆ ಹಾನಿ ಮಾಡುವುದಷ್ಟೇ ಅಲ್ಲದೆ, ಮನೆಯಲ್ಲಿದ್ದ ಅಮಾಯಕ ಕುಟುಂಬಸ್ಥರನ್ನೇ ಹತ್ಯೆ ಮಾಡಲು ದುಷ್ಕರ್ಮಿಗಳು ಯತ್ನಿಸಿರುವುದು ಸಾರ್ವಜನಿಕ ವಲಯದಲ್ಲಿ ತೀವ್ರ ಆತಂಕ ಮೂಡಿಸಿದೆ.
ಈ ಕ್ರೂರ ದಾಳಿಗೆ ಮೂಲ ಕಾರಣ ಪ್ರೇಮ ವಿವಾಹ ಮತ್ತು ಸ್ನೇಹಕ್ಕೆ ಎಸಗಿದ ದ್ರೋಹ ಎನ್ನಲಾಗಿದೆ. ಭರಮ್ಯಾನಟ್ಟಿ ಗ್ರಾಮದ ನಿವಾಸಿಯಾದ ಯಲ್ಲಪ್ಪ ನಾಯಕ ಹಾಗೂ ಬಸಪ್ಪ ನಾಯಕ ಎಂಬಿಬ್ಬರು ಅತ್ಯಂತ ಆತ್ಮೀಯ ಸ್ನೇಹಿತರಾಗಿದ್ದರು. ಇವರಿಬ್ಬರೂ ಬೆಳಗಾವಿಯ ಉದ್ಯಮಬಾಗದಲ್ಲಿರುವ ಪ್ರಖ್ಯಾತ ‘ಅಶೋಕ್ ಐರನ್’ ಕಂಪನಿಯಲ್ಲಿ ಒಟ್ಟಿಗೆ ಕೆಲಸ ಮಾಡುತ್ತಿದ್ದರು. ಕಳೆದ ವರ್ಷವಷ್ಟೇ ಬಸಪ್ಪ ನಾಯಕ ಎಂಬುವವರಿಗೆ ನಾಗವ್ವ ಎಂಬಾಕೆಯೊಂದಿಗೆ ವಿವಾಹವಾಗಿತ್ತು.
ಮದುವೆಯ ನಂತರ ಬಸಪ್ಪ ದಂಪತಿ ಹಾಗೂ ಯಲ್ಲಪ್ಪ ಮೂವರೂ ಒಂದೇ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದರಿಂದ, ಮೂವರ ನಡುವೆ ಸಲುಗೆ ಮತ್ತಷ್ಟು ಹೆಚ್ಚಾಗಿದೆ. ಸ್ನೇಹಿತನ ಮನೆಗೆ ಅತಿಯಾಗಿ ಬಂದು ಹೋಗುತ್ತಿದ್ದ ಯಲ್ಲಪ್ಪ ನಾಯಕ ಮತ್ತು ಬಸಪ್ಪನ ಪತ್ನಿ ನಾಗವ್ವ ನಡುವೆ ಅಕ್ರಮ ಸಂಬಂಧ ಬೆಳೆದಿದೆ ಎನ್ನಲಾಗಿದೆ. ಈ ಸಲುಗೆಯು ದಿನಕಳೆದಂತೆ ಪ್ರೀತಿಯಾಗಿ ಬದಲಾಗಿದ್ದು, ಕೇವಲ ಎರಡು ದಿನಗಳ ಹಿಂದೆ ಯಲ್ಲಪ್ಪ ನಾಯಕ, ತನ್ನ ಸ್ನೇಹಿತನ ಪತ್ನಿಯಾಗಿದ್ದ ವಿವಾಹಿತೆ ನಾಗವ್ವಳನ್ನು ಕರೆದುಕೊಂಡು ಊರಿನಿಂದ ಓಡಿ ಹೋಗಿದ್ದಾನೆ.
200ಕ್ಕೂ ಹೆಚ್ಚು ಜನರಿಂದ ಮಾರಕಾಸ್ತ್ರ ಸಮೇತ ಅಟ್ಟಹಾಸ
ತಮ್ಮ ಮಗಳು/ಪತ್ನಿ, ಸ್ನೇಹಿತನ ಜೊತೆ ಓಡಿ ಹೋಗಿರುವ ವಿಷಯ ತಿಳಿಯುತ್ತಿದ್ದಂತೆ ವಿವಾಹಿತೆ ನಾಗವ್ವಳ ಪೋಷಕರು ಹಾಗೂ ಆಕೆಯ ಪತಿ ಬಸಪ್ಪನ ಪೋಷಕರು ಮತ್ತು ಸಂಬಂಧಿಕರು ತೀವ್ರ ಆಕ್ರೋಶಗೊಂಡಿದ್ದಾರೆ. ಕೇವಲ ಕಾನೂನಾತ್ಮಕವಾಗಿ ದೂರು ನೀಡುವುದನ್ನು ಬಿಟ್ಟು, ತಾವೇ ಕಾನೂನನ್ನು ಕೈಗೆತ್ತಿಕೊಳ್ಳಲು ಮುಂದಾಗಿದ್ದಾರೆ.
ಯಲ್ಲಪ್ಪ ನಾಯಕನ ಕುಟುಂಬಸ್ಥರನ್ನೇ ಗುರಿಯಾಗಿಸಿಕೊಂಡು (ಟಾರ್ಗೆಟ್ ಮಾಡಿ) ಭರಮ್ಯಾನಟ್ಟಿ ಗ್ರಾಮಕ್ಕೆ ನೂರಾರು ಜನರ ಗುಂಪು ಧಾವಿಸಿದೆ. ತಳವಾರ, ಜಂಬೆ, ಕುಡಗೋಲು ಮತ್ತು ದಪ್ಪನೆಯ ಬಡಿಗೆಗಳಂತಹ ಭೀಕರ ಮಾರಕಾಸ್ತ್ರಗಳನ್ನು ಕೈಯಲ್ಲಿ ಹಿಡಿದುಕೊಂಡು ಬಂದ ಸುಮಾರು ಇನ್ನೂರಕ್ಕೂ ಅಧಿಕ ಜನರ ರೌಡಿ ಗುಂಪು ಯಲ್ಲಪ್ಪನ ಮನೆ ಮೇಲೆ ಏಕಾಏಕಿ ದಾಳಿ ಮಾಡಿದೆ. ರಕ್ಕಸರಂತೆ ವರ್ತಿಸಿದ ದುಷ್ಕರ್ಮಿಗಳು ಯಲ್ಲಪ್ಪನ ಇಡೀ ಮನೆಯನ್ನು ಧ್ವಂಸಗೊಳಿಸಲು ಶುರು ಮಾಡಿದ್ದಾರೆ.
ಹತ್ಯೆಗೆ ಯತ್ನ, ಪ್ರಾಣ ಉಳಿಸಿಕೊಂಡು ಓಡಿದ ಪೋಷಕರು
ದಾಳಿಯ ತೀವ್ರತೆ ಎಷ್ಟಿತ್ತೆಂದರೆ, ಮನೆಯಲ್ಲಿದ್ದ ಯಲ್ಲಪ್ಪನ ವಯಸ್ಸಾದ ಪೋಷಕರು ಮತ್ತು ಕುಟುಂಬಸ್ಥರನ್ನು ಜೀವಂತವಾಗಿ ಮುಗಿಸಲು ದುಷ್ಕರ್ಮಿಗಳ ಗುಂಪು ಯತ್ನಿಸಿದೆ. ಕೈಯಲ್ಲಿದ್ದ ಆಯುಧಗಳನ್ನು ಬೀಸುತ್ತಾ ಕೊಲ್ಲಲು ಮುಂದಾದಾಗ, ಪ್ರಾಣಭಯದಿಂದ ತಲ್ಲಣಗೊಂಡ ಯಲ್ಲಪ್ಪನ ಪೋಷಕರು ಹೇಗೋ ಮಾಡಿ ಮನೆಯ ಹಿಂಬಾಗಿಲಿನಿಂದ ಓಡಿ ಹೋಗಿ ಪ್ರಾಣ ಉಳಿಸಿಕೊಂಡಿದ್ದಾರೆ.
ಕುಟುಂಬಸ್ಥರು ಸಿಗದಿದ್ದಾಗ ತೀವ್ರ ಆಕ್ರೋಶಗೊಂಡ ದುಷ್ಕರ್ಮಿಗಳು ಇಡೀ ಮನೆಯನ್ನು ಜಖಂಗೊಳಿಸಿದ್ದಾರೆ. ಮನೆಯ ಮೇಲ್ಛಾವಣಿಯ ಹಂಚುಗಳನ್ನು ಹೊಡೆದು ಪುಡಿಪುಡಿ ಮಾಡಿದ್ದಾರೆ. ಮನೆಯೊಳಗಿದ್ದ ಟಿವಿ, ಬಟ್ಟೆ ಇಡುವ ಅಲ್ಮಾರಿ, ಗೃಹೋಪಯೋಗಿ ವಸ್ತುಗಳು ಹಾಗೂ ಪೀಠೋಪಕರಣಗಳನ್ನು ಸಂಪೂರ್ಣವಾಗಿ ಜಜ್ಜಿ ಹಾಕಿದ್ದಾರೆ. ಇಡೀ ಮನೆ ಸ್ಮಶಾನದಂತಾಗಿ ಮಾರ್ಪಟ್ಟಿದೆ.
ಚಿನ್ನ, ಹಣ ಹಾಗೂ 25 ಕುರಿಗಳ ಲೂಟಿ
ದಾಳಿಕೋರರ ಅಟ್ಟಹಾಸ ಕೇವಲ ಮನೆ ಧ್ವಂಸ ಮಾಡುವುದಕ್ಕೆ ನಿಲ್ಲಲಿಲ್ಲ. ಮನೆಯನ್ನು ಸಂಪೂರ್ಣವಾಗಿ ದೋಚಿದ್ದಾರೆ. ಅಲ್ಮಾರಿಯಲ್ಲಿದ್ದ ನಗದು ಹಣ, ಬೆಲೆಬಾಳುವ ಚಿನ್ನಾಭರಣಗಳನ್ನು ದೋಚಿದ್ದಲ್ಲದೆ, ಯಲ್ಲಪ್ಪನ ಕುಟುಂಬ ಸಾಕಿ ಮುದ್ದಿಸಿದ್ದ ಸುಮಾರು 25 ಕುರಿಗಳನ್ನು ದುಷ್ಕರ್ಮಿಗಳು ತಮ್ಮೊಂದಿಗೆ ಹೊಡೆದುಕೊಂಡು ಪರಾರಿಯಾಗಿದ್ದಾರೆ.
ಪೊಲೀಸ್ ಕಮಿಷನರ್ ಮೊರೆ ಹೋದ ಸಂತ್ರಸ್ತ ಕುಟುಂಬ
ಈ ಭೀಕರ ದಾಳಿಯಿಂದಾಗಿ ಇಡೀ ಆಸ್ತಿ-ಪಾಸ್ತಿ ಕಳೆದುಕೊಂಡು ಬೀದಿಗೆ ಬಿದ್ದಿರುವ ಯಲ್ಲಪ್ಪನ ಪೋಷಕರು ತೀವ್ರ ಆಘಾತಕ್ಕೊಳಗಾಗಿದ್ದಾರೆ. ಸ್ಥಳೀಯವಾಗಿ ತಮಗೆ ನ್ಯಾಯ ಸಿಗುವುದಿಲ್ಲ ಮತ್ತು ಜೀವಕ್ಕೆ ತೀವ್ರ ಅಪಾಯವಿದೆ ಎಂದು ಹೆದರಿದ ಸಂತ್ರಸ್ತ ಕುಟುಂಬಸ್ಥರು ನೇರವಾಗಿ ಬೆಳಗಾವಿ ಪೊಲೀಸ್ ಕಮಿಷನರ್ ಅವರ ಕಚೇರಿಗೆ ಧಾವಿಸಿದ್ದಾರೆ.
ತಮ್ಮ ಮನೆ ಸಂಪೂರ್ಣ ದ್ವಂಸವಾಗಿರುವ ಚಿತ್ರಣ ಹಾಗೂ ತಮಗೆ ನಡೆದಿರುವ ಅನ್ಯಾಯವನ್ನು ಕಮಿಷನರ್ ಎದುರು ಕಣ್ಣೀರು ಹಾಕುತ್ತಾ ವಿವರಿಸಿದ್ದಾರೆ. ತಪ್ಪು ಮಾಡಿದ್ದು ಯಲ್ಲಪ್ಪ ಮತ್ತು ನಾಗವ್ವ. ಅದಕ್ಕೆ ಇಡೀ ಕುಟುಂಬವನ್ನು ಈ ರೀತಿ ಕ್ರೂರವಾಗಿ ಶಿಕ್ಷಿಸುವುದು, ಕೊಲ್ಲಲು ಯತ್ನಿಸುವುದು ಎಷ್ಟು ಸರಿ? ಎಂದು ಪ್ರಶ್ನಿಸಿರುವ ಸಂತ್ರಸ್ತರು, ದಾಳಿ ನಡೆಸಿ ದರೋಡೆ ಮಾಡಿರುವ ಇನ್ನೂರಕ್ಕೂ ಹೆಚ್ಚು ದುಷ್ಕರ್ಮಿಗಳ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಬೇಕು ಮತ್ತು ತಮಗೆ ರಕ್ಷಣೆ ನೀಡಬೇಕು ಎಂದು ಲಿಖಿತವಾಗಿ ದೂರು ನೀಡಿದ್ದಾರೆ.
ಸಾರ್ವಜನಿಕ ವಲಯದಲ್ಲಿ ಆಕ್ರೋಶ
ಸಚಿವ ಸತೀಶ್ ಜಾರಕಿಹೊಳಿ ಅವರ ಸ್ವಕ್ಷೇತ್ರದಲ್ಲೇ ಇಂತಹ ಹ್ಯೇಯ ಹಾಗೂ ಕಾನೂನುಬಾಹಿರ ಕೃತ್ಯ ನಡೆದಿರುವುದು ರಾಜ್ಯಾದ್ಯಂತ ಚರ್ಚೆಗೆ ಗ್ರಾಸವಾಗಿದೆ. ಯಾರೋ ಮಾಡಿದ ತಪ್ಪಿಗೆ ಇಡೀ ಕುಟುಂಬವನ್ನು ಟಾರ್ಗೆಟ್ ಮಾಡುವುದು, ಮಾರಕಾಸ್ತ್ರಗಳೊಂದಿಗೆ ಹಳ್ಳಿಗಳ ಮೇಲೆ ದಾಳಿ ನಡೆಸಿ ದರೋಡೆ ಮಾಡುವುದು ನಾಗರಿಕ ಸಮಾಜ ತಲೆತಗ್ಗಿಸುವಂತದ್ದಾಗಿದೆ. ಬೆಳಗಾವಿ ಪೊಲೀಸರು ತಕ್ಷಣವೇ ಮಧ್ಯಪ್ರವೇಶಿಸಿ ಈ ರೌಡಿ ಗುಂಪನ್ನು ಬಂಧಿಸದಿದ್ದರೆ ಹಳ್ಳಿಗಳಲ್ಲಿ ಇಂತಹ ಕ್ರೌರ್ಯಗಳು ಮತ್ತಷ್ಟು ಹೆಚ್ಚಾಗಲಿವೆ ಎಂದು ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
