ಮೆಡಿಕೋವರ್ ಆಸ್ಪತ್ರೆಯ ವೈದ್ಯರು ಮೂರು ವರ್ಷದ ಪುಟ್ಟ ಮಗುವೊಂದರ ಹೊಟ್ಟೆಯಿಂದ ಬೃಹತ್ ಗಾತ್ರದ ಕೂದಲಿನ ಮುದ್ದೆ (ಹೇರ್ ಬಾಲ್) ಮತ್ತು ರಬ್ಬರ್ ಬ್ಯಾಂಡ್ಗಳನ್ನು ಶಸ್ತ್ರಚಿಕಿತ್ಸೆ ಮೂಲಕ ಹೊರತೆಗೆದು, ಮಗುವಿನ ಜೀವ ಉಳಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಮಗುವಿಗೆ ಕಾಡುತ್ತಿದ್ದ 'ಪಿಕಾ' (Pica) ಎಂಬ ಅಪರೂಪದ ಕಾಯಿಲೆಯೇ ಇದಕ್ಕೆ ಕಾರಣವಾಗಿತ್ತು. ಅತ್ಯಂತ ಸಂಕೀರ್ಣವಾದ ಲ್ಯಾಪ್ರೊಸ್ಕೋಪಿಕ್ ಸರ್ಜರಿ ನಡೆಸಿ ವೈದ್ಯರ ತಂಡ ಈ ಸಾಹಸ ಮಾಡಿದೆ.
ಸದ್ಯ ಈ ಕೇಸ್ ವೈದ್ಯಕೀಯ ವಲಯದಲ್ಲಿ ಸಖತ್ ಸೌಂಡ್ ಮಾಡ್ತಿದ್ದು, ಸಮಯಪ್ರಜ್ಞೆ ಮೆರೆದ ವೈದ್ಯರ ತಂಡಕ್ಕೆ ಎಲ್ಲೆಡೆಯಿಂದ ಭಾರಿ ಪ್ರಶಂಸೆ ವ್ಯಕ್ತವಾಗ್ತಿದೆ. ಮಗುವಿನ ಜೀರ್ಣಾಂಗ ವ್ಯವಸ್ಥೆಯಿಂದ ಬರೋಬ್ಬರಿ 25 ಸೆಂಟಿಮೀಟರ್ ಉದ್ದದ, ಸುಮಾರು 480 ಗ್ರಾಂ ತೂಕದ ಕೂದಲಿನ ರಾಶಿ ಹಾಗೂ ಅದರ ಜೊತೆಗೆ ರಬ್ಬರ್ ಬ್ಯಾಂಡ್ಗಳು ಸೇರಿದಂತೆ ಇನ್ನಿತರ ಜೀರ್ಣವಾಗದ ವಸ್ತುಗಳನ್ನು ವೈದ್ಯರು ಯಶಸ್ವಿಯಾಗಿ ಹೊರಗೆಳೆದಿದ್ದಾರೆ.
ಏನಿದು ಅಪರೂಪದ 'ಪಿಕಾ' ಕಾಯಿಲೆ?
ವೈದ್ಯರ ಪ್ರಕಾರ, ಆ ಮಗು ಬೆಳೆಯುತ್ತಾ ಹೋದಂತೆ ತಲೆಕೂದಲು, ರಬ್ಬರ್ ಬ್ಯಾಂಡ್ಗಳು, ಬಲೂನ್ ಚೂರುಗಳು ಹಾಗೂ ಆಹಾರವಲ್ಲದ ಬೇರೆ ಬೇರೆ ವಸ್ತುಗಳನ್ನು ತಿನ್ನುವ ವಿಚಿತ್ರ ಅಭ್ಯಾಸವನ್ನು ಬೆಳೆಸಿಕೊಂಡಿತ್ತು. ವೈದ್ಯಕೀಯ ಭಾಷೆಯಲ್ಲಿ ಇದಕ್ಕೆ 'ಪಿಕಾ' ಎಂದು ಕರೆಯಲಾಗುತ್ತದೆ. ಇದೊಂದು ಮಾನಸಿಕ ಮತ್ತು ನಡವಳಿಕೆಗೆ ಸಂಬಂಧಿಸಿದ ಕಾಯಿಲೆಯಾಗಿದೆ (Psychological Disorder). ಈ ಸಮಸ್ಯೆಯಿಂದ ಬಳಲುವವರು ಆಹಾರವಲ್ಲದ, ತಿನ್ನಲು ಯೋಗ್ಯವಲ್ಲದ ವಸ್ತುಗಳನ್ನು ಹಠ ಹಿಡಿದು, ಕದ್ದುಮುಚ್ಚಿ ತಿನ್ನುವ ಕ್ರೇಜ್ ಬೆಳೆಸಿಕೊಳ್ಳುತ್ತಾರೆ.
ಮಗುವಿಗೆ ಕಳೆದ ಕೆಲವು ದಿನಗಳಿಂದ ತೀವ್ರವಾದ ಹೊಟ್ಟೆನೋವು, ಎಡೆಬಿಡದ ವಾಂತಿ ಮತ್ತು ಹಸಿವು ಸಂಪೂರ್ಣವಾಗಿ ಕಡಿಮೆಯಾದ ಕಾರಣ ಪೋಷಕರು ಗಾಬರಿಯಾಗಿ ತಕ್ಷಣ ಮೆಡಿಕೋವರ್ ಆಸ್ಪತ್ರೆಗೆ ಕರೆದುಕೊಂಡು ಬಂದಿದ್ದಾರೆ.
ಸ್ಕ್ಯಾನಿಂಗ್ ವರದಿಯಲ್ಲಿ ಶಾಕ್ ಮಗುವಿನ ಹೊಟ್ಟೆ ಮತ್ತು ಕರುಳಿನ ಭಾಗದಲ್ಲಿ ಏನೋ ಒಂದು ದೊಡ್ಡ ವಸ್ತು ಸಿಲುಕಿಕೊಂಡಿರುವುದು ಸ್ಕ್ಯಾನಿಂಗ್ನಲ್ಲಿ ಪತ್ತೆಯಾಗಿದೆ. ದಿನ ಕಳೆದಂತೆ ಆ ಕೂದಲಿನ ಮುದ್ದೆ ದೊಡ್ಡದಾಗಿ ಬೆಳೆದು ಇಡೀ ಜೀರ್ಣಾಂಗವ್ಯೂಹವನ್ನೇ ಬ್ಲಾಕ್ ಮಾಡಿತ್ತು. ತಕ್ಷಣವೇ ಸರ್ಜರಿ ಮಾಡದಿದ್ದರೆ ಮಗುವಿನ ಜೀವಕ್ಕೇ ಆಪತ್ತು ಎದುರಾಗುವ ಪರಿಸ್ಥಿತಿ ಇತ್ತು.
ಸವಾಲಾಗಿದ್ದ ಸೂಕ್ಷ್ಮ ಶಸ್ತ್ರಚಿಕಿತ್ಸೆ
ಮೆಡಿಕೋವರ್ ಆಸ್ಪತ್ರೆಯ ತಜ್ಞ ವೈದ್ಯರ ತಂಡವು ಮಗುವಿಗೆ ದೊಡ್ಡ ಗಾಯಗಳಾಗದಂತೆ ತಡೆಯಲು 'ಮಿನಿಮಲಿ ಇನ್ವೇಸಿವ್ ಲ್ಯಾಪ್ರೊಸ್ಕೋಪಿಕ್' (ದೂರದರ್ಶಕ) ಶಸ್ತ್ರಚಿಕಿತ್ಸೆ ಮಾಡಲು ನಿರ್ಧರಿಸಿತು. ಆದರೆ ಇದು ಅಂದುಕೊಂಡಷ್ಟು ಸುಲಭವಾಗಿರಲಿಲ್ಲ. ಯಾಕಂದ್ರೆ, ಆ ಕೂದಲಿನ ಮುದ್ದೆ ಮಗುವಿನ ಜೀರ್ಣಾಂಗ ನಾಳದ ಆಳದವರೆಗೆ ಹರಡಿಕೊಂಡಿತ್ತು.
ವೈದ್ಯರ ಕಠಿಣ ಪರಿಶ್ರಮದಿಂದ ಯಾವುದೇ ಪ್ರಮುಖ ಅಡ್ಡಪರಿಣಾಮಗಳಿಲ್ಲದೆ, ಆ 25 ಸೆಂ.ಮೀ ಉದ್ದದ ದೈತ್ಯ ಹೇರ್ ಬಾಲ್ ಅನ್ನು ಸುರಕ್ಷಿತವಾಗಿ ದೇಹದಿಂದ ಹೊರತೆಗೆಯಲಾಯಿತು. ಸದ್ಯ ಮಗು ಆಸ್ಪತ್ರೆಯಲ್ಲಿ ವೈದ್ಯರ ನಿಗಾದಲ್ಲಿದ್ದು, ಸಂಪೂರ್ಣವಾಗಿ ಚೇತರಿಸಿಕೊಳ್ಳುತ್ತಿದೆ ಎಂದು ಆಸ್ಪತ್ರೆಯ ಮೂಲಗಳು ತಿಳಿಸಿವೆ.
ಪೋಷಕರಿಗೆ ವೈದ್ಯರ ಪ್ರಮುಖ ಎಚ್ಚರಿಕೆ
ಸಾಮಾನ್ಯವಾಗಿ ಇಂತಹ 'ಪಿಕಾ' ಕಾಯಿಲೆಗಳು ಸಣ್ಣ ಮಕ್ಕಳಲ್ಲಿ ಹೆಚ್ಚಾಗಿ ಕಂಡುಬರುತ್ತವೆ. ಇದಕ್ಕೆ ದೇಹದಲ್ಲಿನ ಪೌಷ್ಟಿಕಾಂಶದ ಕೊರತೆ, ಮಾನಸಿಕ ಬೆಳವಣಿಗೆಯ ದೋಷಗಳು, ಮಗುವಿನ ಮೇಲಾಗುವ ಮಾನಸಿಕ ಒತ್ತಡ ಅಥವಾ ನಡವಳಿಕೆಯ ತೊಂದರೆಗಳು ಕಾರಣವಾಗಿರಬಹುದು ಎಂದು ವೈದ್ಯರು ಸ್ಪಷ್ಟಪಡಿಸಿದ್ದಾರೆ.
ಲಕ್ಷಣಗಳು: ಮಕ್ಕಳು ಪದೇ ಪದೇ ಸೀಮೆಸುಣ್ಣ (Chalk), ಮಣ್ಣು, ಪೇಪರ್, ಪ್ಲಾಸ್ಟಿಕ್, ತಲೆಕೂದಲು ಅಥವಾ ರಬ್ಬರ್ ತಿನ್ನುತ್ತಿದ್ದರೆ ತಕ್ಷಣ ಅಲರ್ಟ್ ಆಗಿ.
ಅಪಾಯಗಳು - ಇದನ್ನು ಆರಂಭದಲ್ಲೇ ಪತ್ತೆ ಹಚ್ಚದಿದ್ದರೆ ಕರುಳಿನ ಬ್ಲಾಕೇಜ್, ಗಂಭೀರ ಸೋಂಕು (Infection) ಉಂಟಾಗಿ ಪ್ರಾಣಕ್ಕೆ ಕುತ್ತು ಬರಬಹುದು.
ವೈದ್ಯರ ಈ ಯಶಸ್ವಿ ಸರ್ಜರಿಯನ್ನು ಸಾರ್ವಜನಿಕರು ಹಾಗೂ ಆರೋಗ್ಯ ಇಲಾಖೆಯ ಗಣ್ಯರು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. ಆದರೆ, ಕೇವಲ ಸರ್ಜರಿ ಮಾಡಿದರೆ ಸಾಲದು, ಮಗುವಿಗೆ ಇನ್ನು ಮುಂದೆ ಈ ಅಭ್ಯಾಸ ಮರುಕಳಿಸದಂತೆ ತಡೆಯಲು ದೀರ್ಘಾವಧಿಯ ಸೈಕಾಲಜಿಕಲ್ ಕೌನ್ಸೆಲಿಂಗ್ ಹಾಗೂ ಬಿಹೇವಿಯರ್ ಥೆರಪಿ (ನಡವಳಿಕೆ ಚಿಕಿತ್ಸೆ) ಕೊಡುವುದು ತುಂಬಾ ಮುಖ್ಯ ಎಂದು ಹೆಲ್ತ್ ಎಕ್ಸ್ಪರ್ಟ್ಸ್ ಸಲಹೆ ನೀಡಿದ್ದಾರೆ.
