ಮಲೆನಾಡಿನ ಹೆಬ್ಬಾಗಿಲು ಶಿವಮೊಗ್ಗದಲ್ಲಿ ಮತ್ತೊಮ್ಮೆ ಕಾಳಿಂಗ ಸರ್ಪದ ಹವಾ ಶುರುವಾಗಿದೆ! ಶಿವಮೊಗ್ಗ ಜಿಲ್ಲೆಯ ಮಂಡಗದ್ದೆ ಸಮೀಪದ ಕಣಗಲಕೊಪ್ಪ ಗ್ರಾಮದಲ್ಲಿ ನಡೆದಿರುವ ಈ ರೋಮಾಂಚನಕಾರಿ ಘಟನೆ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಫುಲ್ ವೈರಲ್ ಆಗ್ತಿದೆ.
ಮನೆಯೊಂದರ ಸೌದೆ ಬಣವೆಯೊಳಗೆ ಅಡಗಿ ಕುಳಿತಿದ್ದ ಬೃಹತ್ ಗಾತ್ರದ ಕಾಳಿಂಗ ಸರ್ಪವನ್ನು (King Cobra) ನೋಡಿ ಮನೆಯವರು ಮತ್ತು ಗ್ರಾಮಸ್ಥರು ಅಕ್ಷರಶಃ ಬೆಚ್ಚಿಬಿದ್ದಿದ್ದಾರೆ. ಕೊನೆಗೆ ಸ್ಥಳಕ್ಕೆ ಬಂದ ಉರಗ ತಜ್ಞರು ಹಾವನ್ನು ಸುರಕ್ಷಿತವಾಗಿ ಹಿಡಿದ ಮೇಲಷ್ಟೇ ಎಲ್ಲರೂ ನಿಟ್ಟುಸಿರು ಬಿಟ್ಟಿದ್ದಾರೆ. ಆ ಕಂಪ್ಲೀಟ್ ಸ್ಟೋರಿ ಇಲ್ಲಿದೆ ನೋಡಿ:
ಸೌದೆ ತರಲು ಹೋದಾಗ ಶಾಕ್ ಕೊಟ್ಟ 'ಕಾಳಿಂಗ'!
ಕಣಗಲಕೊಪ್ಪ ಗ್ರಾಮದ 17 ನೇ ಮೈಲಿಗಲ್ಲಿನಲ್ಲಿರುವ ಮನೆಯೊಂದರಲ್ಲಿ ಈ ಘಟನೆ ನಡೆದಿದೆ. ಎಂದಿನಂತೆ ಮನೆಯವರು ಅಡುಗೆಗೆ ಸೌದೆ ತರಲು ಅಂತ ಹೊರಗಡೆ ಇದ್ದ ಸೌದೆ ಬಲೆಯಲ್ಲಿ (ಬಣವೆ) ಕೈ ಹಾಕಿದ್ದಾರೆ. ಆದರೆ, ಅಲ್ಲಿ ಕಾಯುತ್ತಿದ್ದದ್ದು ಮಾತ್ರ ಸಾಕ್ಷಾತ್ ನಾಗರಾಜ! ಸೌದೆ ಕಡ್ಡಿಗಳ ಮಧ್ಯೆ ಏನೋ ಕಪ್ಪಗೆ, ಬೃಹತ್ ಗಾತ್ರದ ವಸ್ತು ಅಲುಗಾಡುತ್ತಿರುವುದನ್ನು ಗಮನಿಸಿದ ಮನೆಯವರು ಹತ್ತಿರ ಹೋಗಿ ನೋಡಿದ್ದಾರೆ.
ಅಲ್ಲಿ ಹೆಡೆ ಎತ್ತಿ ಬುಸುಗುಟ್ಟುತ್ತಾ ಕುಳಿತಿದ್ದ ಬೃಹತ್ ಕಾಳಿಂಗ ಸರ್ಪವನ್ನು ಕಂಡು ಅವರ ಎದೆ ಝಲ್ಲೆಂದಿದೆ. ತಕ್ಷಣವೇ ಹೆದರಿ ದೂರ ಓಡಿ ಬಂದ ಕುಟುಂಬಸ್ಥರು, ಈ ವಿಷಯವನ್ನು ಇಡೀ ಹಳ್ಳಿಗೆ ತಿಳಿಸಿದ್ದಾರೆ. ವಿಷಯ ತಿಳಿಯುತ್ತಿದ್ದಂತೆ ಕಾಳಿಂಗನನ್ನು ನೋಡಲು ಇಡೀ ಕಣಗಲಕೊಪ್ಪ ಗ್ರಾಮದ ಜನರೇ ಆ ಮನೆಯ ಮುಂದೆ ಜಮಾಯಿಸಿದ್ದರು.
ಅರಣ್ಯಾಧಿಕಾರಿಗಳ ಅಲರ್ಟ್, ಎಂಟ್ರಿ ಕೊಟ್ಟ ಸ್ನೇಕ್ ಕಿರಣ್!
ಹಾವಿನ ಗಾತ್ರ ತುಂಬಾ ದೊಡ್ಡದಾಗಿದ್ದರಿಂದ ಮತ್ತು ಅದು ವಿಷಪೂರಿತ ಕಾಳಿಂಗ ಸರ್ಪವಾಗಿದ್ದರಿಂದ ಸಾರ್ವಜನಿಕರು ಅದರ ಹತ್ತಿರ ಹೋಗುವ ಸಾಹಸ ಮಾಡಲಿಲ್ಲ. ತಕ್ಷಣವೇ ಸ್ಥಳೀಯರು ಅರಣ್ಯ ಇಲಾಖೆಯ ಅಧಿಕಾರಿಗಳಿಗೆ ಫೋನ್ ಮಾಡಿ ವಿಷಯ ತಿಳಿಸಿದ್ದಾರೆ. ಸ್ಥಳಕ್ಕೆ ಧಾವಿಸಿದ ಅರಣ್ಯಾಧಿಕಾರಿಗಳು, ಹಾವನ್ನು ಯಾವುದೇ ಗಾಯಗಳಿಲ್ಲದೆ ಸುರಕ್ಷಿತವಾಗಿ ರೆಸ್ಕ್ಯೂ ಮಾಡಬೇಕೆಂದು ಶಿವಮೊಗ್ಗದ ಪ್ರಖ್ಯಾತ ಉರಗ ತಜ್ಞರಾದ ಸ್ನೇಕ್ ಕಿರಣ್ ಅವರಿಗೆ ಮಾಹಿತಿ ನೀಡಿದರು.
ಮಾಹಿತಿ ಸಿಗುತ್ತಿದ್ದಂತೆ ಕಿರಣ್ ಅವರು ತಮ್ಮ ರೆಸ್ಕ್ಯೂ ಕಿಟ್ ಹಿಡಿದುಕೊಂಡು ತಕ್ಷಣವೇ ಕಣಗಲಕೊಪ್ಪ ಗ್ರಾಮದ ಆ ಮನೆಗೆ ಆಗಮಿಸಿದರು.
15 ಅಡಿ ಉದ್ದ, 8.5 ಕೆಜಿ ತೂಕದ ಬೃಹತ್ ಸರ್ಪ!
ಸ್ಥಳಕ್ಕೆ ಬಂದ ಸ್ನೇಕ್ ಕಿರಣ್ ಅವರು ಸೌದೆ ಬಣವೆಯಲ್ಲಿದ್ದ ಹಾವನ್ನು ಹೊರಗೆ ತೆಗೆಯಲು ಕಾರ್ಯಾಚರಣೆ ಶುರು ಮಾಡಿದರು. ಸೌದೆ ಕಡ್ಡಿಗಳನ್ನು ಒಂದೊಂದಾಗಿ ಜಾಗರೂಕತೆಯಿಂದ ಪಕ್ಕಕ್ಕೆ ಸರಿಸುತ್ತಿದ್ದಂತೆ, ಕಾಳಿಂಗ ಸರ್ಪ ಜೋರಾಗಿ ಬುಸುಗುಟ್ಟುತ್ತಾ ಹೆಡೆ ಬಿಚ್ಚಿ ನಿಂತಿದೆ. ಹಾವಿನ ಆ ರೌದ್ರಾವತಾರ ನೋಡಿ ಅಲ್ಲಿದ್ದ ಜನರೆಲ್ಲಾ ಒಂದು ಕ್ಷಣ ಇನ್ನು ಹತ್ತು ಅಡಿ ಹಿಂದಕ್ಕೆ ಓಡಿದ್ದಾರೆ.
ಕಿರಣ್ ಅವರ ಚಾಕಚಕ್ಯತೆ:
ಆದರೆ, ಇಂತಹ ನೂರಾರು ಹಾವುಗಳನ್ನು ಹಿಡಿದು ಪಳಗಿರುವ ಸ್ನೇಕ್ ಕಿರಣ್ ಅವರು ಯಾವುದೇ ಆತಂಕವಿಲ್ಲದೆ, ಅತ್ಯಂತ ತಾಳ್ಮೆಯಿಂದ ಹಾವಿಗೆ ಯಾವುದೇ ನೋವಾಗದಂತೆ ಅದರ ಬಾಲವನ್ನು ಹಿಡಿದು ಹೊರಗೆ ಎಳೆದಿದ್ದಾರೆ. ಸುಮಾರು ಅರ್ಧ ಗಂಟೆಗೂ ಹೆಚ್ಚು ಕಾಲ ನಡೆದ ಈ ಯಶಸ್ವಿ ಕಾರ್ಯಾಚರಣೆಯ ಬಳಿಕ ಕಿರಣ್ ಅವರು ಹಾವನ್ನು ಪ್ಲಾಸ್ಟಿಕ್ ಡಬ್ಬದೊಳಗೆ ಸೇರಿಸುವಲ್ಲಿ ಯಶಸ್ವಿಯಾದರು.
ಹಾವನ್ನು ಹಿಡಿದು ಪರಿಶೀಲಿಸಿದಾಗ ಅದು ಬರೋಬ್ಬರಿ 15 ಅಡಿ ಉದ್ದ ಹಾಗೂ 8.5 ಕೆಜಿಗೂ ಅಧಿಕ ತೂಕ ಇರುವುದು ಗೊತ್ತಾಗಿದೆ. ಇಷ್ಟು ದೊಡ್ಡ ಗಾತ್ರದ ಕಾಳಿಂಗ ಸರ್ಪ ಈ ಭಾಗದಲ್ಲಿ ಸಿಕ್ಕಿರುವುದು ನಿಜಕ್ಕೂ ಅಪರೂಪ ಎನ್ನಲಾಗಿದೆ.
ಕಾಡಿಗೆ ಸೇರಿದ ನಾಗರಾಜ, ನಿಟ್ಟುಸಿರು ಬಿಟ್ಟ ಜನ
ಅಷ್ಟೊಂದು ದೊಡ್ಡ ಹಾವನ್ನು ಅತ್ಯಂತ ಸಲೀಸಾಗಿ ಮತ್ತು ಸುರಕ್ಷಿತವಾಗಿ ಹಿಡಿದ ಉರಗ ತಜ್ಞ ಸ್ನೇಕ್ ಕಿರಣ್ ಅವರ ಚಾತುರ್ಯವನ್ನು ಕಂಡು ಗ್ರಾಮಸ್ಥರು ಹಾಗೂ ಅರಣ್ಯಾಧಿಕಾರಿಗಳು ಭೇಷ್ ಎಂದಿದ್ದಾರೆ. ಹಾವನ್ನು ಹಿಡಿದ ಬಳಿಕ ಕಿರಣ್ ಅವರು ಅದನ್ನು ಯಾರಿಗೂ ತೊಂದರೆಯಾಗದಂತೆ ದೂರದ ದಟ್ಟ ಅರಣ್ಯ ಪ್ರದೇಶಕ್ಕೆ ಕೊಂಡೊಯ್ದು, ಪ್ರಕೃತಿಯ ಮಡಿಲಿಗೆ ಸುರಕ್ಷಿತವಾಗಿ ಬಿಟ್ಟು ಬಂದಿದ್ದಾರೆ.
ಅಲ್ಲಿಯವರೆಗೂ ಭೀತಿಯಲ್ಲಿದ್ದ ಗ್ರಾಮಸ್ಥರು ಕಾಳಿಂಗ ಸರ್ಪ ಕಾಡು ಸೇರಿದ ಸುದ್ದಿ ಕೇಳಿ ನೆಮ್ಮದಿಯ ನಿಟ್ಟುಸಿರು ಬಿಟ್ಟಿದ್ದಾರೆ. ಮಳೆಗಾಲ ಹತ್ತಿರ ಬರುತ್ತಿರುವುದರಿಂದ ಮಲೆನಾಡು ಭಾಗದಲ್ಲಿ ಹಾವುಗಳು ಹೆಚ್ಚಾಗಿ ನಾಡಿಗೆ ಬರುತ್ತವೆ, ಸಾರ್ವಜನಿಕರು ಎಚ್ಚರಿಕೆಯಿಂದ ಇರಬೇಕು ಎಂದು ಅರಣ್ಯ ಇಲಾಖೆ ಮನವಿ ಮಾಡಿದೆ.
