ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಪರಿಸ್ಥಿತಿ ಭೀಕರವಾಗಿರುವ ಬೆನ್ನಲ್ಲೇ, ಇರಾನ್ನ ಸರ್ಕಾರಿ ಸುದ್ದಿವಾಹಿನಿಯ ವಿಡಿಯೋವೊಂದು ಇಂಟರ್ನೆಟ್ನಲ್ಲಿ ಸಖತ್ ಸದ್ದು ಮಾಡುತ್ತಿದೆ. ಈ ವಿಡಿಯೋದಲ್ಲಿ ಸುದ್ದಿ ವಾಚಕಿ ಮಾತನಾಡುತ್ತಿರುವಾಗಲೇ ದೊಡ್ಡ ಸ್ಫೋಟವೊಂದು ಸಂಭವಿಸಿ, ಸ್ಟುಡಿಯೋ ಧೂಳಿನಿಂದ ತುಂಬಿಹೋಗುವ ದೃಶ್ಯವಿದೆ. ಆದರೆ, ಈ ವಿಡಿಯೋದೊಂದಿಗೆ ಹರಿದಾಡುತ್ತಿರುವ ಸಬ್ಟೈಟಲ್ಗಳು ತಪ್ಪು ಮಾಹಿತಿಯಿಂದ ಕೂಡಿದ್ದು, ಈಗ ಅದರ ಹಿಂದಿನ ಅಸಲಿ ಸತ್ಯ ಹೊರಬಂದಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳಲಾದ ವಿಡಿಯೋದಲ್ಲಿ, ಇರಾನ್ ಸುದ್ದಿ ವಾಚಕಿ, ನಮ್ಮನ್ನು ಯಾವ ಬಾಂಬ್ ಕೂಡ ಮುಟ್ಟಲು ಸಾಧ್ಯವಿಲ್ಲ, ಏಕೆಂದರೆ ಅಲ್ಲಾ ನಮ್ಮನ್ನು ರಕ್ಷಿಸುತ್ತಾನೆ ಎಂದು ಹೇಳುತ್ತಿರುವಂತೆ ಸಬ್ಟೈಟಲ್ ನೀಡಲಾಗಿದೆ. ಅವರು ಈ ಮಾತು ಹೇಳಿದ ಮರುಕ್ಷಣವೇ ಸ್ಟುಡಿಯೋದಲ್ಲಿ ಭೀಕರ ಸ್ಫೋಟ ಸಂಭವಿಸುತ್ತದೆ. ಇದನ್ನು ನೋಡಿ ಅನೇಕರು ಇದು ದೈವಿಕ ವ್ಯಂಗ್ಯ ಎಂದು ತಮಾಷೆ ಮಾಡುತ್ತಾ ವಿಡಿಯೋ ಹಂಚಿಕೊಳ್ಳುತ್ತಿದ್ದಾರೆ. ಆದರೆ, ತನಿಖೆಯ ಪ್ರಕಾರ ಆಕೆ ಹೇಳಿದ ಮಾತುಗಳೇ ಬೇರೆಯಂತೆ.
ಭಾಷಾ ತಜ್ಞರು ಮತ್ತು ಅಧಿಕೃತ ಅನುವಾದಗಳ ಪ್ರಕಾರ, ಸುದ್ದಿ ವಾಚಕಿ ಸಹರ್ ಎಮಾಮಿ ಅವರು 'ಅಲ್ಲಾ ರಕ್ಷಿಸುತ್ತಾನೆ' ಎಂಬ ಮಾತುಗಳನ್ನೇ ಆಡಿಲ್ಲ. ಬದಲಿಗೆ, ಅವರು ಇರಾನ್ನ ಇತಿಹಾಸ ಮತ್ತು ದೇಶದ ಮೇಲಾಗುತ್ತಿರುವ ಆಕ್ರಮಣದ ಬಗ್ಗೆ ಮಾತನಾಡುತ್ತಿದ್ದರು. ಸ್ಟುಡಿಯೋ ಮೇಲೆ ದಾಳಿಯಾಗುವ ಕೆಲವೇ ಕ್ಷಣಗಳ ಮೊದಲು ಅವರು, 'ಈಗ ಕೇಳಿಸಿದ ಶಬ್ದವು ನಮ್ಮ ಮಾತೃಭೂಮಿಯ ಮೇಲಿನ ಆಕ್ರಮಣದ ಶಬ್ದವಾಗಿದೆ. ಇದು ಸತ್ಯ ಮತ್ತು ನ್ಯಾಯದ ಮೇಲಿನ ದಾಳಿ' ಎಂದು ಹೇಳುತ್ತಿದ್ದರು. ದುರದೃಷ್ಟವಶಾತ್, ಅವರು ಮಾತನಾಡುತ್ತಿರುವಾಗಲೇ ಎರಡನೇ ಬಾಂಬ್ ಸ್ಟುಡಿಯೋದ ಮೇಲೆ ನೇರವಾಗಿ ಬಿದ್ದಿದೆ.
ಮಾರ್ಚ್ 1, 2026 ರ ಭಾನುವಾರ ರಾತ್ರಿ, ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಇರಾನ್ನ ಟೆಹ್ರಾನ್ನಲ್ಲಿರುವ ಸರ್ಕಾರಿ ಮಾಧ್ಯಮ ಕೇಂದ್ರಗಳ ಮೇಲೆ 'ಆಪರೇಷನ್ ಎಪಿಕ್ ಫ್ಯೂರಿ' ಅಡಿಯಲ್ಲಿ ದಾಳಿ ನಡೆಸಿದ್ದವು. ಟೆಹ್ರಾನ್ನಲ್ಲಿರುವ 'ಗ್ಲಾಸ್ ಬಿಲ್ಡಿಂಗ್' ಎಂದು ಕರೆಯಲ್ಪಡುವ IRIB ಪ್ರಧಾನ ಕಚೇರಿಯೇ ಇವರ ಮುಖ್ಯ ಗುರಿಯಾಗಿತ್ತು. ಈ ದಾಳಿಯಿಂದ ಪಕ್ಕದಲ್ಲಿದ್ದ ಗಾಂಧಿ ಆಸ್ಪತ್ರೆಗೂ ಹಾನಿಯಾಗಿದ್ದು, ಸುದ್ದಿವಾಹಿನಿಯ ಸ್ಯಾಟಲೈಟ್ ಸಂಪರ್ಕ ಕಡಿತಗೊಂಡಿದೆ.
ದಾಳಿಯ ನಂತರ ಸ್ಟುಡಿಯೋ ಧ್ವಂಸಗೊಂಡಿದ್ದರೂ, ಸಹರ್ ಎಮಾಮಿ ಮತ್ತು ಅವರ ತಂಡವು ಕೇವಲ ಕೆಲವೇ ನಿಮಿಷಗಳಲ್ಲಿ ಪರ್ಯಾಯ ಸ್ಟುಡಿಯೋ ಮೂಲಕ ಮತ್ತೆ ನೇರ ಪ್ರಸಾರ ಆರಂಭಿಸಿದರು. ಇರಾನ್ ಸರ್ಕಾರ ಇದನ್ನು "ಪ್ರತಿರೋಧದ ಸಂಕೇತ" ಎಂದು ಶ್ಲಾಘಿಸಿದೆ. ಪ್ರಸ್ತುತ ಟೆಹ್ರಾನ್ನಲ್ಲಿ ಪರಿಸ್ಥಿತಿ ಅತ್ಯಂತ ಉದ್ವಿಗ್ನವಾಗಿದೆ. ಇಂಟರ್ನೆಟ್ ಸಂಪರ್ಕ ಸ್ಥಗಿತಗೊಂಡಿದ್ದು, ಜನರು ರೇಡಿಯೋ ಮತ್ತು ಜನರ ಮಾತುಗಳ ಮೂಲಕವೇ ಸುದ್ದಿಯನ್ನು ಪಡೆಯುತ್ತಿದ್ದಾರೆ.
Iranian state TV host: “No bomb can reach us because Allah protects us”
— Martin Walsh (@martinwalsh__) March 2, 2026
One second later: BOOM 💥 pic.twitter.com/Qt8lTFNEgB
ಯುದ್ಧದ ಸಮಯದಲ್ಲಿ ಇಂತಹ 'ಮೀಮ್' ಮಾದರಿಯ ವಿಡಿಯೋಗಳು ಸತ್ಯಕ್ಕಿಂತ ವೇಗವಾಗಿ ಹರಡುತ್ತವೆ. ಇರಾನ್ ಸರ್ಕಾರವನ್ನು ಹೀಯಾಳಿಸಲು ವಿಡಿಯೋದ ಅನುವಾದವನ್ನು ಬದಲಾಯಿಸಿ ಹರಿಬಿಡಲಾಗಿದೆ. ಸತ್ಯವೇನೆಂದರೆ, ಆ ವಾಚಕಿ ದೇಶಭಕ್ತಿಯ ಮಾತುಗಳನ್ನಾಡುತ್ತಿದ್ದರೇ ಹೊರತು ಯಾವುದೇ ಧಾರ್ಮಿಕ ಅಹಂಕಾರದ ಮಾತುಗಳನ್ನಲ್ಲ. ಯಾವುದೇ ಮಾಹಿತಿಯನ್ನು ನಂಬುವ ಮೊದಲು ಅದರ ಸತ್ಯಾಸತ್ಯತೆಯನ್ನು ಪರಿಶೀಲಿಸುವುದು ಅಗತ್ಯ.
