2026ರ ಪಶ್ಚಿಮ ಏಷ್ಯಾದ ಸಂಘರ್ಷವು ಈಗ ಜಾಗತಿಕ ಇಂಧನ ಬಿಕ್ಕಟ್ಟಿಗೆ ಕಾರಣವಾಗುವ ಲಕ್ಷಣಗಳು ಕಾಣುತ್ತಿವೆ. ಇರಾನ್ ಸರ್ಕಾರವು ಹಾರ್ಮುಜ್ ಜಲಸಂಧಿಯ ಮೇಲೆ ಭಾಗಶಃ ನಿರ್ಬಂಧ ಹೇರುವ ಮೂಲಕ ಜಾಗತಿಕ ಮಾರುಕಟ್ಟೆಗೆ ಎಚ್ಚರಿಕೆ ನೀಡಿದೆ. ವಿಶೇಷವೆಂದರೆ, ಈ ಮಾರ್ಗದಲ್ಲಿ ಕೇವಲ ತನ್ನ ಮಿತ್ರ ರಾಷ್ಟ್ರಗಳಾದ ರಷ್ಯಾ ಮತ್ತು ಚೀನಾದ ಹಡಗುಗಳಿಗೆ ಮಾತ್ರ ಪ್ರವೇಶ ನೀಡಲಾಗಿದ್ದು, ಈ ಕುರಿತಾದ ಸಮಗ್ರ ಮಾಹಿತಿ ಇಲ್ಲಿದೆ.
ತನ್ನ ಮೇಲಿನ ದಾಳಿಗಳ ಬೆನ್ನಲ್ಲೇ ಇರಾನ್ ಸರ್ಕಾರವು ಹಾರ್ಮುಜ್ ಜಲಸಂಧಿಯನ್ನು ಒಂದು ರಾಜತಾಂತ್ರಿಕ ಆಯುಧವಾಗಿ ಬಳಸಲು ಮುಂದಾಗಿದೆ. ಜಾಗತಿಕ ತೈಲ ಹರಿವಿನ ಐದನೇ ಒಂದು ಭಾಗವನ್ನು ನಿಯಂತ್ರಿಸುವ ಈ ಜಲಸಂಧಿಯಲ್ಲಿ ಕೇವಲ ಚೀನಾ ಮತ್ತು ರಷ್ಯಾ ದೇಶಗಳ ಹಡಗುಗಳಿಗೆ ಮಾತ್ರ ಇಂದಿನಿಂದ ಸಂಚಾರದ ಅನುಮತಿ ನೀಡಲಾಗಿದೆ. ಈ ಮೂಲಕ ಇರಾನ್ ತನ್ನ ಶತ್ರು ರಾಷ್ಟ್ರಗಳ ಇಂಧನ ಪೂರೈಕೆಗೆ ದೊಡ್ಡ ಪೆಟ್ಟು ನೀಡಿದ್ದು, ಈ ವಿಚಾರವನ್ನು ಐಆರ್ಜಿಸಿ ಅಧಿಕೃತವಾಗಿ ಖಚಿತಪಡಿಸಿದೆ.
ಇರಾನ್ನ ಈ ನಿರ್ಧಾರವು ಕೇವಲ ಆರ್ಥಿಕ ಉದ್ದೇಶವನ್ನಷ್ಟೇ ಹೊಂದಿಲ್ಲ, ಬದಲಾಗಿ ಇದು ಒಂದು ಆಳವಾದ ರಾಜತಾಂತ್ರಿಕ ತಂತ್ರಗಾರಿಕೆಯಾಗಿದೆ. ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ದಾಳಿಗಳ ಸಂಕಷ್ಟದ ಸಮಯದಲ್ಲಿ ತನಗೆ ಬೆಂಬಲವಾಗಿ ನಿಂತ ಚೀನಾ ಮತ್ತು ರಷ್ಯಾದ ಸ್ನೇಹಕ್ಕೆ ಕೃತಜ್ಞತೆ ಸಲ್ಲಿಸಲು ಇರಾನ್ ಈ ಕ್ರಮ ಕೈಗೊಂಡಿದೆ. ಪರಿಣಾಮವಾಗಿ, ಹಾರ್ಮುಜ್ ಜಲಸಂಧಿಯಲ್ಲಿ ಕೇವಲ ಈ ಎರಡು ರಾಷ್ಟ್ರಗಳ ಹಡಗುಗಳಿಗೆ ಮಾತ್ರ ಮುಕ್ತ ಪ್ರವೇಶವಿದ್ದು, ಯುರೋಪ್ ಸೇರಿದಂತೆ ಇತರ ಎಲ್ಲಾ ದೇಶಗಳ ಹಡಗುಗಳ ಸಂಚಾರವನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ.
ಇರಾನ್ ನೌಕಾಪಡೆಯು ಅತ್ಯಂತ ಗಂಭೀರವಾದ ಎಚ್ಚರಿಕೆಯನ್ನು ನೀಡಿದೆ. ಅನುಮತಿ ಇಲ್ಲದ ಯಾವುದೇ ಹಡಗು ಈ ಮಾರ್ಗದಲ್ಲಿ ಸಂಚರಿಸಲು ಪ್ರಯತ್ನಿಸಿದರೆ, ಅಂತಹ ಹಡಗುಗಳನ್ನು ಇರಾನ್ನ ಕರಾವಳಿ ಕ್ಷಿಪಣಿಗಳು, ಡ್ರೋನ್ಗಳು, ನೌಕಾ ಘಟಕಗಳ ಮೂಲಕ ನೇರವಾಗಿ ಗುರಿಪಡಿಸಿ ನಾಶಪಡಿಸಲಾಗುವುದು ಎಂದು ತಿಳಿಸಿದೆ. ಈ ಎಚ್ಚರಿಕೆಯು ಜಾಗತಿಕ ಸಾಗರಯಾನ ಸಂಸ್ಥೆಗಳಲ್ಲಿ ಆತಂಕವನ್ನು ಸೃಷ್ಟಿಸಿದೆ.
ಇರಾನ್ನ ಈ 'ಆಯ್ದ ದಿಗ್ಬಂಧನ' ಜಾಗತಿಕ ಮಾರುಕಟ್ಟೆಯ ಮೇಲೆ ಭೀಕರ ಪರಿಣಾಮ ಬೀರಿದೆ. ಬ್ರೆಂಟ್ ಕಚ್ಚಾ ತೈಲದ ಬೆಲೆ ಪ್ರತಿ ಬ್ಯಾರೆಲ್ಗೆ 120 ಡಾಲರ್ ದಾಟಿದೆ. ಹಾರ್ಮುಜ್ ಜಲಸಂಧಿಯ ಮೂಲಕ ನಡೆಯುತ್ತಿದ್ದ ಶೇಕಡಾ 80 ರಷ್ಟು ಸಂಚಾರ ಈಗ ಸ್ಥಗಿತಗೊಂಡಿದೆ. ಮರ್ಸ್ಕ್ ನಂತಹ ವಿಶ್ವದ ಪ್ರಮುಖ ಹಡಗು ಕಂಪನಿಗಳು ತಮ್ಮ ಸಂಚಾರವನ್ನುರದ್ದುಗೊಳಿಸಿವೆ, ಇದರಿಂದಾಗಿ ಸುಮಾರು 170ಕ್ಕೂ ಹೆಚ್ಚು ಹಡಗುಗಳು ಪರ್ಷಿಯನ್ ಕೊಲ್ಲಿಯಲ್ಲಿ ಸಿಲುಕಿಕೊಂಡಿವೆ. ವಿಮಾ ಕಂಪನಿಗಳು ಈ ಪ್ರದೇಶದಲ್ಲಿ ಸಂಚರಿಸುವ ಹಡಗುಗಳಿಗೆ ವಿಮೆ ನೀಡಲು ನಿರಾಕರಿಸುತ್ತಿರುವುದು ಪರಿಸ್ಥಿತಿಯನ್ನು ಮತ್ತಷ್ಟು ಹದಗೆಡಿಸಿದೆ.
ಇರಾನ್ನ ಈ ನಿರ್ಧಾರವು ಜಾಗತಿಕ ಪೂರೈಕೆ ಸರಪಳಿಯನ್ನು ಅಸ್ತವ್ಯಸ್ತಗೊಳಿಸಿದೆ. ಚೀನಾ ಮತ್ತು ರಷ್ಯಾ ತಾತ್ಕಾಲಿಕವಾಗಿ ಲಾಭ ಪಡೆಯಬಹುದಾದರೂ, ಉಳಿದ ಪ್ರಪಂಚವು ಇಂಧನ ಅಭಾವ ಮತ್ತು ಬೆಲೆ ಏರಿಕೆಯ ಭೀತಿಯನ್ನು ಎದುರಿಸುತ್ತಿದೆ.
