Sunday, Nov 22, 2026
|
Advertisement

ಬಸವ ಮಂಟಪ ಕೃತಿ ಸುತ್ತ ಭುಗಿಲೆದ್ದ ವಿವಾದ ಲೇಖಕ, ಪ್ರಕಾಶಕರ ವಿರುದ್ಧ ಕಾನೂನು ಕ್ರಮ !!

ಕರ್ನಾಟಕದ 12ನೇ ಶತಮಾನದ ಸಮಾಜ ಸುಧಾರಕರಲ್ಲಿ ಒಬ್ಬರಾದ ಬಸವಣ್ಣನವರ ಕುರಿತು ಪ್ರಕಟವಾದ 'ಬಸವ ಮಂಟಪ' ಪುಸ್ತಕದ ವಿಚಾರವಾಗಿ ರಾಜ್ಯದಲ್ಲಿ ವಿವಾದ ತೀವ್ರಗೊಂಡಿದು. ಲೇಖಕ ರವಿ ಹಂಜ್ ಅವರ ಪುಸ್ತಕದಲ್ಲಿನ ಕೆಲವು ಬರಹಗಳು ಹಾಗೂ ಸಂದರ್ಶನದಲ್ಲಿ ಮಾಡಿರುವ ಹೇಳಿಕೆಗಳು ಬಸವಣ್ಣನವರ ಗೌರವಕ್ಕೆ ಧಕ್ಕೆ ತಂದಿವೆ ಎಂದು ಬಸವ ಸಮಿತಿ ಆರೋಪ  ವ್ಯಕ್ತಪಡಿಸಿದೆ. ಈ ವಿಚಾರ ಗುರುವಾರ ನಡೆದ ರಾಜ್ಯ ಸಚಿವ ಸಂಪುಟ ಸಭೆಯಲ್ಲೂ ಚರ್ಚೆಯಾಗಿದ್ದು, ಪುಸ್ತಕವನ್ನು ನಿಷೇಧಿಸುವುದು  ಹಾಗೂ ಲೇಖಕ ಮತ್ತು ಪುಸ್ತಕ ಮುದ್ರಿಸಿದವರ  ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲು ಸರ್ಕಾರ ನಿರ್ಧರಿಸಿದೆ

ಪುಸ್ತಕವಿವಾದ , ಕರ್ನಾಟಕಸುದ್ದಿ | Photo Credit: https://encrypted-tbn0.gstatic.com/images?\https://www.instagram.com/dr.g.parameshwara_official/
ಪುಸ್ತಕವಿವಾದ , ಕರ್ನಾಟಕಸುದ್ದಿ | Photo Credit: https://encrypted-tbn0.gstatic.com/images?\https://www.instagram.com/dr.g.parameshwara_official/

ವಿವಾದದ ಬೆನ್ನಲ್ಲೇ ಬೆಂಗಳೂರಿನ ಹೈಗ್ರೌಂಡ್ಸ್ ಪೊಲೀಸ್ ಠಾಣೆಯಲ್ಲಿ ಲೇಖಕ ರವಿ ಹಂಜ್ ಹಾಗೂ ಪುಸ್ತಕದ ಪ್ರಕಾಶಕ ವಿಶ್ವೇಶ್ವರ ಭಟ್ ಸೇರಿದಂತೆ ಸಂಬಂಧಪಟ್ಟವರ ವಿರುದ್ಧ ದೂರು ದಾಖಲಾಗಿದ್ದು, ಎಫ್‌ಐಆರ್ ದಾಖಲಿಸಿ ತನಿಖೆ ಆರಂಭಿಸಲಾಗಿದೆ ಎಂದು ವರದಿಯಾಗಿದೆ. ಈ ಪ್ರಕರಣ ರಾಜ್ಯದಲ್ಲಿ ರಾಜಕೀಯ ಹಾಗೂ ಸಾಮಾಜಿಕ ಚರ್ಚೆಗೆ ಕಾರಣವಾಗಿದೆ.

Advertisement

ಬಸವ ಮಂಟಪ  ಪುಸ್ತಕದಲ್ಲಿ ಏನಿದೆ? ವಿವಾದ ಶುರುವಾಗಿದ್ದು ಹೇಗೆ?

ರವಿ ಹಂಜ್ ಅವರು ಕಳೆದ ಒಂದೆರಡು ವರ್ಷಗಳಲ್ಲಿ ಕನ್ನಡ ಪತ್ರಿಕೆಯೊಂದರಲ್ಲಿ ಬರೆದ ಅಂಕಣಗಳನ್ನು ಒಟ್ಟುಗೂಡಿಸಿ 'ಬಸವ ಮಂಟಪ' ಎಂಬ ಪುಸ್ತಕವನ್ನು ಪ್ರಕಟಿಸಿದ್ದಾರೆ. ಈ ಕೃತಿ ಬೆಂಗಳೂರಿನಲ್ಲಿ ನವೆಂಬರ್ 15ರಂದು ಬಿಡುಗಡೆಯಾಗಿದೆ ಎಂದು ವರದಿಯಾಗಿದೆ. ಪುಸ್ತಕ ಬಿಡುಗಡೆಯಾದ ಬಳಿಕ ಅದರಲ್ಲಿರುವ ಬಸವಣ್ಣನವರ ಕುರಿತ ವಿವರಣೆಗಳು ಹಾಗೂ ಲೇಖಕರು ನೀಡಿದ ಸಂದರ್ಶನದ ಕೆಲವು ಹೇಳಿಕೆಗಳು ವಿವಾದಕ್ಕೆ ಕಾರಣವಾಗಿವೆ. 

ಬಸವಣ್ಣನವರ ಕುರಿತು ಕಳ್ಳ, ದರೋಡೆಕೋರ, ಕೊಲೆಗಾರ ಸೇರಿದಂತೆ ಅವಹೇಳನಕಾರಿಯಾದ ಪದಗಳನ್ನು ಬಳಸಿ ಅವರನ್ನು ಬಿಂಬಿಸಲಾಗಿದೆ ಎಂಬ ಆರೋಪ ಪುಸ್ತಕದ ವಿರುದ್ಧ ಕೇಳಿಬಂದಿದೆ. ಅಲ್ಲದೆ, ಲಿಂಗಾಯತ ಸಮುದಾಯದ ಕುರಿತು ಬಳಸಿರುವ ಕೆಲವು ಪದಗಳು ಮತ್ತು ಶರಣರ ತತ್ವಗಳ ಬಗ್ಗೆ ಮಾಡಿರುವ ವ್ಯಾಖ್ಯಾನಗಳು ಸಮುದಾಯದ ಜನರ ಆಕ್ರೋಶಕ್ಕೆ ಕಾರಣವಾಗಿವೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ಆದರೆ, ಪುಸ್ತಕದಲ್ಲಿನ ಬರಹಗಳ ಬಗ್ಗೆ ಆಕ್ಷೇಪ ವ್ಯಕ್ತಪಡಿಸಿರುವವರು ಅವು ಬಸವಣ್ಣನವರ ಇತಿಹಾಸ, ವ್ಯಕ್ತಿತ್ವ ಹಾಗೂ ಶರಣ ಪರಂಪರೆಯನ್ನು ತಪ್ಪಾಗಿ ಬಿಂಬಿಸುತ್ತವೆ ಎಂದು ಆರೋಪಿಸಿದ್ದಾರೆ. ಇದು ಆರೋಪವಾಗಿದ್ದು, ಪುಸ್ತಕದ ವಿಷಯ ಮತ್ತು ಲೇಖಕರ ಪ್ರತಿಕ್ರಿಯೆ ಎರಡನ್ನೂ ಪ್ರತ್ಯೇಕವಾಗಿ ಗಮನಿಸಬೇಕಿದೆ. 

ಬಸವ ಸಮಿತಿ ಪೊಲೀಸ್ ಠಾಣೆಗೆ ದೂರು ನೀಡಿದ್ದೇಕೆ?

ಬಸವ ಸಮಿತಿ ಅಧ್ಯಕ್ಷ ಅರವಿಂದ್ ಜತ್ತಿ ಅವರು ಬೆಂಗಳೂರಿನ ಹೈಗ್ರೌಂಡ್ಸ್ ಪೊಲೀಸ್ ಠಾಣೆಗೆ ದೂರು ಸಲ್ಲಿಸಿ, ಲೇಖಕ ರವಿ ಹಂಜ್ ಮತ್ತು ಪ್ರಕಾಶಕ ವಿಶ್ವೇಶ್ವರ ಭಟ್ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಿದ್ದಾರೆ.

Advertisement

ದೂರಿನಲ್ಲಿ ಬಸವಣ್ಣನವರ ಕುರಿತು ಮಾಡಿರುವ ಆರೋಪಿತ ಹೇಳಿಕೆಗಳು ಅವರ ಅನುಯಾಯಿಗಳ ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಭಾವನೆಗಳಿಗೆ ನೋವುಂಟುಮಾಡಿವೆ. ಇಂತಹ ಹೇಳಿಕೆಗಳು ಸಮಾಜದಲ್ಲಿ ಅಶಾಂತಿ ಅಥವಾ ಸಮುದಾಯಗಳ ನಡುವೆ ದ್ವೇಷಕ್ಕೆ ಕಾರಣವಾಗಬಹುದು ಎಂದು ದೂರಿನಲ್ಲಿ ಆತಂಕ ವ್ಯಕ್ತಪಡಿಸಲಾಗಿದೆ.

ಪುಸ್ತಕವನ್ನು ವಶಕ್ಕೆ ಪಡೆದು, ಅದರ ಪ್ರಕಟಣೆ ಮತ್ತು ಸಂಬಂಧಿತ ಹೇಳಿಕೆಗಳ ಕುರಿತು ತನಿಖೆ ನಡೆಸಬೇಕು ಎಂಬ ಬೇಡಿಕೆಯನ್ನೂ ಸಮಿತಿ ಮುಂದಿಟ್ಟಿದೆ. ಈ ದೂರಿನ ಆಧಾರದಲ್ಲಿ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ ಎಂದು ವರದಿಯಾಗಿದೆ. 

ನಿನ್ನೆ ನಡೆದ ಸಚಿವ ಸಂಪುಟ ಸಭೆಯಲ್ಲಿ ಏನಾಯಿತು?

ನವೆಂಬರ್ 19ರಂದು ನಡೆದ ಕರ್ನಾಟಕ ಸಚಿವ ಸಂಪುಟ ಸಭೆಯಲ್ಲಿ ಈ ಪುಸ್ತಕದ ವಿಚಾರವನ್ನು ಗಂಭೀರವಾಗಿ ಚರ್ಚಿಸಲಾಗಿದೆ. ಬಸವ ಸಮಿತಿಯಿಂದ ಮುಖ್ಯಮಂತ್ರಿ ಅವರಿಗೆ ಸಲ್ಲಿಸಲಾದ ಮನವಿಯ ಹಿನ್ನೆಲೆಯಲ್ಲಿ ಸಚಿವರು ಈ ವಿಷಯವನ್ನು ಸಭೆಯಲ್ಲಿ ಪ್ರಸ್ತಾಪಿಸಿದರು. ಬಸವಣ್ಣನವರ ಬಗ್ಗೆ ಆಕ್ಷೇಪಾರ್ಹ ಬರಹಗಳಿವೆ ಎಂಬ ಆರೋಪದ ಹಿನ್ನೆಲೆಯಲ್ಲಿ ಪುಸ್ತಕವನ್ನು ಮುಟ್ಟುಗೋಲು ಹಾಕಿಕೊಳ್ಳಲು ಮತ್ತು ಲೇಖಕ ಹಾಗೂ ಪ್ರಕಾಶಕರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲು ಸಂಪುಟ ನಿರ್ಧರಿಸಿದೆ ಎಂದು ಉಪಮುಖ್ಯಮಂತ್ರಿ ಜಿ. ಪರಮೇಶ್ವರ ತಿಳಿಸಿದ್ದಾರೆ. 

ಒಟ್ಟಿನಲ್ಲಿ, ಬಸವಣ್ಣನವರ ಕುರಿತು ವಿವಾದಾತ್ಮಕ ಬರಹಗಳ ಆರೋಪದಿಂದ ಆರಂಭವಾದ 'ಬಸವ ಮಂಟಪ' ಪುಸ್ತಕ ವಿವಾದ ಇದೀಗ ಪೊಲೀಸ್ ತನಿಖೆ, ಪುಸ್ತಕ ಮುಟ್ಟುಗೋಲು ಮತ್ತು ಕಾನೂನು ಕ್ರಮದ ಹಂತಕ್ಕೆ ತಲುಪಿದೆ. ಲೇಖಕರು ತಮ್ಮ ಬರಹಗಳನ್ನು ಸಮರ್ಥಿಸಿಕೊಂಡಿದ್ದರೆ, ಬಸವ ಸಮಿತಿ ಹಾಗೂ ವಿವಿಧ ರಾಜಕೀಯ ನಾಯಕರು ಕ್ರಮಕ್ಕೆ ಒತ್ತಾಯಿಸಿದ್ದಾರೆ. ಮುಂದಿನ ದಿನಗಳಲ್ಲಿ ಪೊಲೀಸ್ ತನಿಖೆ ಮತ್ತು ಸರ್ಕಾರದ ಕಾನೂನು ಪ್ರಕ್ರಿಯೆ ಈ ವಿವಾದದ ಮುಂದಿನ ಬೆಳವಣಿಗೆಯನ್ನು ನಿರ್ಧರಿಸಲಿದೆ.

Comments