ಉತ್ತರ ಪ್ರದೇಶದಲ್ಲಿ ಸದ್ಯ ಪೊಲೀಸ್ ಕಾನ್ಸ್ಟೆಬಲ್ ಹುದ್ದೆಗಳ ನೇಮಕಾತಿ ಪರೀಕ್ಷೆಯದ್ದೇ ಜ್ವರ. ಜೂನ್ 8 ರಿಂದ 10 ರವರೆಗೆ ನಡೆಯುತ್ತಿರುವ ಈ ಪರೀಕ್ಷೆಯ ಎರಡನೇ ದಿನದಂದು ಉತ್ತರ ಪ್ರದೇಶದ ರೈಲ್ವೆ ಸ್ಟೇಷನ್‌ಗಳಲ್ಲಿ ಕಂಡುಬಂದ ದೃಶ್ಯಗಳು ನಿಜಕ್ಕೂ ಎಲ್ಲರನ್ನೂ ಬೆಚ್ಚಿಬೀಳಿಸುವಂತಿದ್ದವು. ಕೇವಲ ಒಂದು ಸರ್ಕಾರಿ ಕೆಲಸಕ್ಕಾಗಿ ಯುವಜನತೆ ಎಷ್ಟು ಕಷ್ಟಪಡುತ್ತಿದ್ದಾರೆ ಅನ್ನೋದಕ್ಕೆ ಈ ದೃಶ್ಯಗಳೇ ಸಾಕ್ಷಿ.
ಸುಮಾರು 28.9 ಲಕ್ಷಕ್ಕೂ ಹೆಚ್ಚು ಅಭ್ಯರ್ಥಿಗಳು ಪರೀಕ್ಷೆ ಬರೆಯಲು ರೈಲ್ವೆ ಸ್ಟೇಷನ್‌ಗಳಿಗೆ ಒಮ್ಮೆಲೇ ಲಗ್ಗೆ ಇಟ್ಟಿದ್ದರಿಂದ ಇಡೀ ಉತ್ತರ ಪ್ರದೇಶದ ಪ್ರಮುಖ ನಿಲ್ದಾಣಗಳು ಮನುಷ್ಯರ ಸಾಗರದಂತೆ ಕಾಣುತ್ತಿದ್ದವು. ಲಕ್ನೋದ ಚಾರ್‌ಬಾಗ್ ಮತ್ತು ಕಾನ್ಪುರ ಸೆಂಟ್ರಲ್ ರೈಲ್ವೆ ಸ್ಟೇಷನ್‌ಗಳ ಪ್ಲಾಟ್‌ಫಾರ್ಮ್‌ಗಳಲ್ಲಂತೂ ಕಾಲಿಡಲು ಕೂಡ ಜಾಗ ಇರಲಿಲ್ಲ. ಗೋರಖ್‌ಪುರ ಮತ್ತು ವಾರಣಾಸಿಯಂತಹ ದೊಡ್ಡ ನಗರಗಳ ಪರೀಕ್ಷಾ ಕೇಂದ್ರಗಳಿಗೆ ತಲುಪಲು ಅಭ್ಯರ್ಥಿಗಳು ತೀವ್ರ ಹರಸಾಹಸ ಪಟ್ಟರು.
ಕಿಕ್ಕಿರಿದು ತುಂಬಿದ ಟ್ರೈನ್‌ಗಳು, ಕಿಟಕಿಯಲ್ಲೇ ನುಗ್ಗಿದ ಯುವಕರು!
ಸಾಮಾಜಿಕ ಜಾಲತಾಣಗಳಲ್ಲಿ ಸದ್ಯ ಉತ್ತರ ಪ್ರದೇಶದ ರೈಲ್ವೆ ಸ್ಟೇಷನ್‌ಗಳ ವಿಡಿಯೋಗಳು ಸಿಕ್ಕಾಪಟ್ಟೆ ವೈರಲ್ ಆಗುತ್ತಿವೆ. ಟ್ರೈನ್‌ಗಳು ಈಗಾಗಲೇ ಸಂಪೂರ್ಣವಾಗಿ ಭರ್ತಿಯಾಗಿದ್ದರೂ, ಹೇಗಾದರೂ ಮಾಡಿ ಪರೀಕ್ಷಾ ಕೇಂದ್ರ ತಲುಪಲೇಬೇಕು ಎಂಬ ಹಠಕ್ಕೆ ಬಿದ್ದ ಅಭ್ಯರ್ಥಿಗಳು ಕಿಕ್ಕಿರಿದು ತುಂಬಿದ್ದ ಕೋಚ್‌ಗಳ ಒಳಗೆ ನುಗ್ಗಲು ಪ್ರಯತ್ನಿಸುತ್ತಿರುವುದು ವಿಡಿಯೋದಲ್ಲಿ ಕಂಡುಬಂದಿದೆ. ಕೆಲವರಂತೂ ಜಾಗ ಸಿಗದೆ ಕಿಟಕಿಗಳ ಮೂಲಕವೇ ಟ್ರೈನ್ ಒಳಗೆ ಹತ್ತುತ್ತಿದ್ದರೆ, ಇನ್ನು ಕೆಲವರು ಬಾಗಿಲಿಗೆ ಜೋತು ಬಿದ್ದು ಪ್ರಯಾಣ ಬೆಳೆಸಿದರು.
ಒಟ್ಟು 32,679 ಕಾನ್ಸ್ಟೆಬಲ್ ಹುದ್ದೆಗಳಿಗಾಗಿ ಈ ಪರೀಕ್ಷೆ ನಡೆಯುತ್ತಿದ್ದು, ಹುದ್ದೆಗಳ ಸಂಖ್ಯೆಗಿಂತ ಪರೀಕ್ಷೆ ಬರೆಯುವವರ ಸಂಖ್ಯೆ ಕೋಟ್ಯಂತರ ಪಟ್ಟು ಹೆಚ್ಚಿರುವುದರಿಂದ ಈ ತರಹದ ಪರಿಸ್ಥಿತಿ ನಿರ್ಮಾಣವಾಗಿದೆ. ನಮ್ಮ ದೇಶದಲ್ಲಿ ಸರ್ಕಾರಿ ಉದ್ಯೋಗಕ್ಕಾಗಿ ಇರುವ ಪೈಪೋಟಿ ಮತ್ತು ನಿರುದ್ಯೋಗದ ತೀವ್ರತೆ ಎಷ್ಟಿದೆ ಅನ್ನೋದನ್ನು ಈ ದೃಶ್ಯಗಳು ಕಣ್ಣಿಗೆ ಕಟ್ಟುವಂತೆ ತೋರಿಸುತ್ತವೆ.
ಸರ್ಕಾರದ ಸಿದ್ಧತೆ ಏನಿತ್ತು?
ರೈಲ್ವೆ ಇಲಾಖೆ ಮತ್ತು ರಾಜ್ಯ ಸರ್ಕಾರ ಈ ಪರಿಸ್ಥಿತಿಯನ್ನು ನಿಭಾಯಿಸಲು ಮೊದಲೇ ಕೆಲವು ಮುನ್ನೆಚ್ಚರಿಕೆ ಕ್ರಮಗಳನ್ನು ತಗೆದುಕೊಂಡಿತ್ತು.
ವಿಶೇಷ ಟ್ರೈನ್‌ಗಳು: ಅಭ್ಯರ್ಥಿಗಳ ಅನುಕೂಲಕ್ಕಾಗಿ ರೈಲ್ವೆ ಇಲಾಖೆಯು ಪ್ರತ್ಯೇಕವಾಗಿ ವಿಶೇಷ ಟ್ರೈನ್‌ಗಳನ್ನು ಓಡಿಸಿತ್ತು ಮತ್ತು ಸ್ಟೇಷನ್‌ಗಳಲ್ಲಿ ಗೊಂದಲ ನಿವಾರಿಸಲು ಹೆಚ್ಚಿನ ಸಿಬ್ಬಂದಿಯನ್ನು ನಿಯೋಜಿಸಿತ್ತು.
ಬಸ್ ದರದಲ್ಲಿ 50% ರಿಯಾಯಿತಿ: ಟ್ರೈನ್‌ಗಳ ಮೇಲಿನ ಒತ್ತಡ ಕಡಿಮೆ ಮಾಡಲು ಉತ್ತರ ಪ್ರದೇಶ ರಾಜ್ಯ ಸರ್ಕಾರವು ಬಸ್ ಪ್ರಯಾಣದ ದರದಲ್ಲಿ ಶೇಕಡಾ 50 ರಷ್ಟು ಭಾರಿ ರಿಯಾಯಿತಿಯನ್ನು ಘೋಷಿಸಿತ್ತು. ಆದರೂ ಕೂಡ, ಲಕ್ಷಾಂತರ ಸಂಖ್ಯೆಯಲ್ಲಿದ್ದ ಅಭ್ಯರ್ಥಿಗಳ ಮುಂದೆ ಈ ಸೌಲಭ್ಯಗಳು ಸಾಲದಾದವು.
यूपी में सिपाही भर्ती परीक्षा का आज दूसरा दिन: लखनऊ में खिड़कियों से ट्रेनों में घुसे अभ्यर्थी#Lucknow | #UttarPradesh pic.twitter.com/L3l26F7PEH
— NDTV India (@ndtvindia) June 9, 2026
ಮೊದಲ ದಿನದಷ್ಟೇ ಇದ್ದ ಒತ್ತಡ, ಆದರೆ ಪರೀಕ್ಷೆ ಸಕ್ಸಸ್!
ಪರೀಕ್ಷೆಯ ಮೊದಲ ದಿನವೂ ಇದೇ ರೀತಿಯ ಗೊಂದಲ ಮತ್ತು ಜನದಟ್ಟಣೆ ಇತ್ತು. ಎರಡನೇ ದಿನವೂ ಪರಿಸ್ಥಿತಿ ಭಿನ್ನವಾಗಿರಲಿಲ್ಲ. ಆದರೆ, ಇಷ್ಟೆಲ್ಲಾ ಗದ್ದಲ ಮತ್ತು ಗೊಂದಲಗಳ ನಡುವೆಯೂ ಯಾವುದೇ ದೊಡ್ಡ ಮಟ್ಟದ ಅಹಿತಕರ ಘಟನೆಗಳಾಗಲಿ ಅಥವಾ ಯಾರಿಗಾದರೂ ಗಂಭೀರ ಗಾಯಗಳಾಗಲಿ ಸಂಭವಿಸಿಲ್ಲ ಎಂಬುದು ಸಮಾಧಾನದ ಸಂಗತಿ.
ಎಲ್ಲಾ ಪರೀಕ್ಷಾ ಕೇಂದ್ರಗಳಲ್ಲಿ ಪರೀಕ್ಷೆಗಳು ಅತ್ಯಂತ ಶಾಂತಿಯುತವಾಗಿ ಮತ್ತು ಸುಗಮವಾಗಿ ನಡೆದಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಕಷ್ಟಪಟ್ಟು ಟ್ರೈನ್ ಹಿಡಿದು ಹೋದ ಅಭ್ಯರ್ಥಿಗಳು ತಮ್ಮ ಕನಸಿನ ಉದ್ಯೋಗಕ್ಕಾಗಿ ಪರೀಕ್ಷಾ ಕೊಠಡಿಯಲ್ಲಿ ನಿರಾಳವಾಗಿ ಪರೀಕ್ಷೆ ಬರೆದಿದ್ದಾರೆ.
Comments